Tan taki fu a wortu fu Gado sondro frede
1 Wi leki Kresten dinari sabi taki a no ala sma o arki te wi e preiki gi den (Mat. 10:14). Ma aladi son sma no wani arki, toku dati no e tapu wi fu preiki a bun nyunsu (Odo 29:25). San e yepi wi fu tan taki fu a wortu fu Gado sondro frede?
2 Na apostel Paulus ben frustan taki „a sabi fu Krestes Yesus . . . warti moro ala sani”. Disi ben meki a taki na wan fasi di e sori taki a ben abi „tranga bribi” (Fil. 3:8; 1 Tes. 1:5). Son sma ben si a boskopu di a ben e preiki, leki wan soso sani èn leki wan don sani. Ma toku a ben sabi taki a boskopu disi ben de ’a sani di Gado e gebroiki fu frulusu ala sma di e bribi’ (Rom. 1:16). Fu dati ede, srefi te sma ben e gens en, a ben tan ’taki sondro frede nanga den sma, fu di Yehovah ben gi en a makti fu du dati’.—Tori. 14:1-7; 20:18-21, 24.
3 A Sma di e gi wi krakti: A no fu di Paulus srefi ben tranga so, meki a ben man gi kotoigi sondro frede. Di Paulus ben taki fu ensrefi èn fu Silas, a ben skrifi: „Baka di den sma na Filipi pina wi fosi èn den du sani nanga wi na wan syen fasi . . . dan wi Gado gi wi deki-ati fu fruteri unu a bun nyunsu fu Gado, aladi a ben muilek srefisrefi gi wi” (1 Tes. 2:2; Tori. 16:12, 37). Boiti dati, na a ten di Paulus ben de na strafu na ini Rome, a ben aksi den Kresten brada fu begi Gado gi en, so taki a ben kan tan meki a bun nyunsu bekènti ’sondro frede, soleki fa a ben musu taki’ (Ef. 6:18-20). Paulus no ben frutrow tapu ensrefi, ma a ben frutrow tapu Yehovah, èn na fu dati ede a ben man tan taki sondro frede fu Gado wortu.—2 Kor. 4:7; Fil. 4:13.
4 Na so a de tu na ini a ten disi. Wan brada ben feni en muilek srefisrefi fu taigi sma na en wrokope taki en na wan Kotoigi fu Yehovah, èn a ben muilek gi en fu gi kotoigi na en wrokope. A brada disi ben begi fu a tori disi, èn a bigin gi kotoigi. Wan man na en wrokope no ben wani arki biginbigin, ma baka di a kon yere fu na opobaka howpu, a bigin studeri Bijbel. Sensi a ten dati, a brada e gebroiki ibri okasi fu gi kotoigi. A brada disi ben go wroko na wan tra presi, èn na ini wan pisi ten fu 14 yari, a yepi 34 sma fu en wrokope fu teki dopu. Wi kan de seiker taki Yehovah sa gi wi a krakti tu ’fu tan taki a wortu fu en sondro frede’.—Tori. 4:29.