Taki a wortu fu Gado fri èn sondro frede
1 Sortu krakti a abi na tapu yu te yu kon tanapu na fesi gens ofu e kisi ferfolgu fu feianti fu a bun nyunsu? Yu teki na fasti bosroiti fu tan gi kotoigi, san gensman ooktu mag taki ofu du? Aladi pikinso sma nomo kande e meki den ati kon frede ofu e firi fu tapu nanga preiki, toku wi alamala kan nyanbun fu na eksempre fu Paulus nanga Silas. Den no ben meki ferfolgu meki den lasi ati ofu meki den tapu den mofo. Paulus ben skrifi: ’Bakadi fosi wi ben nyan pina èn ben kisi behandeling tapu wan syen fasi, wi ben tyari nanga yepi fu wi Gado fri fu taki sondro frede komakandra fu taki a bun nyunsu gi unu’ (1 Thessalonika 2:2). Nanga yepi fu a tranga fu Yehovah den ben man fu tan preiki (Psalm 138:3). Nanga yepi fu Yehovah wi ooktu kan sori a fri fu taki sondro frede di de fanowdu fu kon leki winiman na doro ini a strei na a ten fu gens.
2 Yehovah na wi kibripe na ini ten fu muilekheid. Nanga sakafasi wi e taki nanga en fu yepi wi (Ps. 18:2, 3). Wi brada ini na fosi yarhondro ben aksi Yehovah fu yepi den ’fu tan taki en wortu nanga ala fri fu taki sondro frede’ (Tori 4:29). Yehovah ben yere na begi disi fudi a ben furu den disipel nanga santa yeye. A sa du asrefi gi wi. — Tori. 4:31.
GRABU DEN OKASI FU TAKI
3 Ini ibri gemeente den orga velddienstkomakandra fu wan takmakandra fu yeye sani di e gi dek’ati bifo den preikiman go ini a gebied. Yu e horibaka gi den komakandra disi pe a de mogelek ooktu? Efu dati de so, dan yu sa kisi tranga aladi yu sa proberi fu tranga trawan. Ini a ten di wi de ini a velddienst dan moro okasi de ete fu yepi makandra èn fu gi makandra dek’ati. Den pionier nanga trawan di man fu gi moro ten na ini a dienst, kande moro furu kan meki tra preikiman nyanbun fu na ondrofeni fu den te den e go doro fu doro. Te yu gebroiki rai fu na Tak-go-tak-kon-buku, alamala sa de srekasreka moro bun fu taki nanga overtoigi.
4 Ini son gebied brada nanga sisa e si dati furu sma no de na oso na deiten. Tapu difrenti fasi muiti kan du fu miti nanga den sma disi ete. Wán heri bun fasi de, a no de fu taki, fu wroko na gebied na netiten. Ma ooktu na deiten mogelekheid de. Son preikiman e du stratiewroko na bushalte ofu na fosi oso pe furu sma e libi ma di yu no kan go na ini tapu ten di den sma e go a den wroko ofu e kon na oso. Trawan e teki fesi fu taki nanga sma di e sdon na ini den oto. Ini wan gebied tu sisa di ben gi kotoigi na a fasi disi ben prati moro leki feifitenti tijdschrift ini moro mendri leki wan yuru.
5 Te yu e prati tapu publiki presi buku na sma, kande yu kan kisi na oso-adres fu den èn seti sani fu meki wan gobaka ofu hori wan bijbelstudi. A e aksi dek’ati nanga fri fu taki sondro frede fu waka miti vreemde sma èn abi takmakandra nanga den, ma den bakapisi kan de, bun srefsrefi. A de fanowdu fu taki „fri èn sondro frede ini na makti fu Yehovah” neleki den apostel. — Tori. 14:3.
6 Moro nanga moro brada nanga sisa e gebroiki ooktu den neti, èn ooktu den syatu pisten bifo na gemeente-bukustudi, fu miti nanga sma na oso. A e aksi kande pikinso yeye krakti fu fiti yusrefi fu tyari wan kenki kon ini yu schema, ma na netidienst seiker sa meki na prisiri fu yu kon moro bigi. Furu ben prati na sofasi moro tijdschrift èn moro makriki den meki mofo fu gobaka.
DU YU PRISTERI NANGA FRI FU TAKI SONDRO FREDE
7 Ini yuli na bukupristeri ben de na buku Na pasi di e go na tru koloku fu wan bijdrage fu Sf 3,00. Na buku disi abi bodoi di de tumsi prenspari gi den sma di e angri èn e dreiwatra fu na waarheid. Pristeri na buku disi nanga fertrow, èn gebroiki ini disi na Tori fu takmakandra di wi e gebroiki now. Luku na Tak-go-tak-kon-buku fu wan inleiding di sa du en bun na ini unu gebied.
8 Di Paulus ben kisi fu na fositron fu Yesus na kari fu tron en bakaman, a ben teki disi nanga faya èn ben preiki nanga fri èn sondro frede (Tori. 9:5, 15, 16, 20, 27, 28). A ben tan du disi getrow te na en dede. Wi mu waka na baka en eksempre èn go doro fu abi wan prati fu taki a Wortu fu Gado fri èn sondro frede.