Yu E Preiki Nanga Deki-ati?
1 Gensman ben sroto Petrus nanga Yohanes, èn den ben tapu skreki gi den so srefi. Toku den tu apostel disi ben tan meki a nyunsu fu a Kownukondre bekènti nanga deki-ati (Tori. 4:17, 21, 31). Fa wi kan preiki nanga deki-ati na ini a ten disi?
2 Wi Musu Abi Deki-ati te Wi E Gi Kotoigi: Te wan sma abi „deki-ati”, dan a sma dati de „sondro frede”, san wani taki dati „a sma abi a fasti bosroiti fu no frede, fu kakafutu, èn fu horidoro”. Tru Kresten di e preiki nanga deki-ati, no e frede fu fruteri trawan san den e bribi. Den e du dati ibritron te wan bun okasi de fu prati a bun nyunsu nanga trawan (Tori. 4:20; 1 Petr. 3:15). Te wi e preiki nanga deki-ati, dan wi e sori taki wi no e syen gi a bun nyunsu (Ps. 119:46; Rom. 1:16; 2 Tim. 1:8). Fu dati ede, wi abi deki-ati fanowdu te wi wani du a wroko di wi kisi fu preiki a bun nyunsu fu a Kownukondre na ini a ten disi fu a kaba. Deki-ati e buweigi wi fu prati a bun nyunsu nanga sma na ala presi pe wi man feni den.—Tori. 4:29; 1 Kor. 9:23.
3 Deki-ati na Skoro: A de so taki yu e feni en muilek fu preiki gi den skoromati fu yu, fu di yu e frede, noso fu di yu fruleigi? Son ten a no de wan makriki sani fu du; fu taki leti, a kan de wan trutru tyalensi. Ma Yehovah sa gi yu tranga efu yu e begi fu kisi deki-ati fu preiki gi trawan (Ps. 138:3). Deki-ati sa yepi yu fu taigi trawan taki yu na wan Kotoigi fu Yehovah, èn a sa yepi yu tu fu kakafutu te sma e spotu yu. Leki bakapisi fu dati, a preiki di yu e preiki na skoro kande sa tyari frulusu kon gi den wan di e arki yu.—1 Tim. 4:16.
4 Deki-ati na Yu Wrokope: Den sma na yu wrokope sabi taki yu na wan Kotoigi fu Yehovah? A wan-enkri fasi fa den wrokokompe fu yu kande kan yere a bun nyunsu, na te yu e preiki gi den. A deki-ati di yu abi sa yepi yu tu fu kisi fri ten fu yu grontapuwroko, so taki yu man go na den Kresten konmakandra èn so srefi na bigi konmakandra.
5 Teki Deki-ati te Tesi E Miti Yu: A de fanowdu srefisrefi fu teki deki-ati te trawan e gens wi (1 Tes. 2:1, 2). Deki-ati e yepi wi fu tan hori fasti na a bribi fu wi te sma e tapu skreki gi wi, te den e spotu wi, noso te den e frufolgu wi (Fil. 1:27, 28). Deki-ati so srefi e tranga wi fu tanapu kánkan te sma e kwinsi wi, so taki wi no e hori wisrefi moro na den markitiki fu wi Gado, Yehovah. A e tranga wi fu tan suku vrede te trawan e pruberi fu suku trobi nanga wi.—Rom. 12:18.
6 Awansi sortu problema e miti wi, meki wi tan preiki a bun nyunsu nanga deki-ati.—Ef. 6:18-20.