Na Tiri Di Sa Tjari Na Paradijs Kon

Di Jezus ben de na grontapoe, a ben taigi en bakaman foe begi foe a Kownoekondre foe Gado: „Meki joe kownoekondre kon. Meki joe wani pasa, soleki na ini hemel, so toe na grontapoe” (Mattéus 6:9, 10). A ben e taki doronomo foe „na boen joensoe foe a kownoekondre” (Mattéus 4:23). Te joe loekoe en boen, dan a ben e taki moro foe a Kownoekondre leki foe iniwan tra sani. Foe san-ede? Bika a Kownoekondre na a wrokosani di Gado sa gebroiki foe loesoe den problema di e meki a libi so moeilek na ini a ten disi. Nanga jepi foe a Kownoekondre, Gado sa tjari heri esi wan kaba kon na feti, angri, siki nanga ogridoe, èn a sa tjari wánfasi nanga vréde kon.

Joe ben sa wani foe libi na ini so wan grontapoe? Efoe dati de so, dan joe moe lési na pikin boekoe disi. Na ini en, joe sa leri dati na Kownoekondre na wan tiri, ma a de moro boen leki iniwan tiri di oiti ben tiri tapoe libisma. Joe sa froestan ooktoe na moifasi fa Gado ben sori en knegti safrisafri den prakseri foe en di e go foe na Kownoekondre. Moro fara, joe sa froestan fa na Kownoekondre kan jepi joe na ini na ten disi.

Te joe loekoe en boen, dan nownow kaba joe kan tron wan sma di e saka ensrefi na ondro na Kownoekondre foe Gado. Ma bifo joe teki a bosroiti foe doe disi, dan a sa de fanowdoe foe joe sabi moro foe a Kownoekondre. Foe dat’ede meki wi e gi joe tranga foe ondrosoekoe a pikin boekoe disi. Ala san a sa froeteri joe foe a Kownoekondre, teki komoto foe a bijbel.

Na ini a fosi presi, meki wi go loekoe foe san-ede wi abi na Kownoekondre foe Gado so tranga fanowdoe.

Na ini a bigin foe a libisma historia, Gado ben meki libisma volmaakti èn a ben poti en na ini wan paradijs. Na a ten dati na Kownoekondre no ben de fanowdoe.

Ma Adam nanga Eva, oen fosi papa nanga mama, ben arki na Satan, wan engel di ben opo ensrefi tége Gado. A ben froeteri Adam nanga Eva lé di ben e go foe Gado èn a ben tjari den ooktoe so fara foe opo densrefi tége Gado. Datmeki den ben ferdini foe dede, bikasi „na paiman di sondoe e tjari kon na dede”.​—Romeini 6:23.

Wan onvolmaakti, sondoe libisma no kan meki volmaakti pikin. Foe dat’ede meki ala den pikin foe Adam ben kon gebore onvolmaakti, nanga sondoe èn e dede.​—Romeini 5:12.

Foe sensi a ten dati, libisma ben abi a Kownoekondre foe Gado fanowdoe foe jepi den foe kon boen baka foe a floekoe foe sondoe nanga dede. Na Kownoekondre sa krin ooktoe na nen foe Gado foe den lé di Satan ben froeteri foe en.

Jehovah Gado ben pramisi dati wan spesroetoe „siri” (ofoe bakapikin) ben sa gebore foe fri libisma poeroe foe sondoe (Genesis 3:15). Na „siri” disi ben sa de na Kownoe foe a Kownoekondre foe Gado.

Soema ben sa de dati?

So wan 2000 jari baka di Adam ben sondoe, wan toemsi getrow man ben e libi, di ben nen Abraham. Jehovah ben taigi Abraham foe gwe libi en égi foto, èn foe libi na ini tenti na ini a kondre Palestina.

Abraham ben doe ala san Jehovah ben taigi en foe doe, sosrefi toe wan toemsi moeilek sani. Jehovah ben taigi en foe offer en manpikin Isaäk na tapoe wan altari.

Jehovah no ben wani troetroe wan libisma ofrandi. Ma a ben wani foe sabi omeni Abraham ben lobi en. Leti na a momenti di Abraham ben o kiri Isaäk, Jehovah ben stop en.

Foe di Abraham ben abi so wan bigi bribi, meki Jehovah ben pramisi foe gi en bakapikin na kondre Palestina èn a ben taki dati na pramisi Siri ben sa de na ini en famirilin nanga di foe en manpikin Isaäk.​—Genesis 22:17, 18; 26:4, 5.

Isaäk ben abi toe manpikin di ben de wan twelengi, Esau nanga Jakob. Jehovah ben taki, dati na pramisi Siri ben sa kon nanga jepi foe Jakob.​—Genesis 28:13-15.

Jakob di Jehovah ben kari ooktoe Israël, ben abi 12 manpikin, di alamala te foe kaba ben kisi pikin. Soboen den pikin foe Abraham ben bigin foe kon moro foeroe.​—Genesis 46:8-27.

Di wan hebi angriten ben kon na ini a kontren, Jakob nanga en osofamiri ben froisi go na Egypte foe di Farao, na tiriman foe Egypte, ben kari den foe kon drape.​—Genesis 45:16-20.

Na ini Egypte a ben kon na krin, taki a pramisi Siri ben sa de wan bakapikin foe a manpikin foe Jakob, Juda.​—Genesis 49:10.

Te foe kaba Jakob ben dede, èn en bakapikin gro kon foeroe ini nomroe te leki den ben de leki wan naatsi. Ne den Egyptesma ben kon frede foe den, èn ben meki den kon tron srafoe.​—Exodus 1:7-14.

Te foe kaba Jehovah ben seni Mozes, wan toemsi getrow man, foe aksi nanga tranga, dati na Farao foe a ten dati, meki den pikin foe Israël go na ini fri.​—Exodus 6:10, 11.

Farao no ben wani kwetkweti, èn foe dat’ede meki Jehovah tjari tin plaag kon tapoe den Egyptesma. Leki na lasti plaag, a ben seni na engel foe dede go foe kiri ala den fosigebore manpikin foe Egypte.​—Exodus, den kapitel 7 te nanga 12.

Gado ben taigi den Israëlsma, taki efoe den ben sa kiri wan pikin skapoe gi a neti-njanjan foe den èn poti pikinso foe a broedoe tapoe den doropostoe foe den, dan na engel foe dede ben sa pasa den oso foe den. Na so fasi den fosigeborewan foe den Israëlsma ben tan na libi.​—Exodus 12:1-35.

Leki wan bakapisi foe disi, Farao ben gi komando foe den Israëlsma hari gwe libi Egypte. Ma dan a kenki en prakseri èn hari go na den baka foe tjari den kon baka.

Jehovah ben opo wan pasi gi den Israëlsma foe lowe pasa na Redi Se. Èn Farao nanga en legre ben dede a watra, di den ben proeberi foe go na den baka.​—Exodus 15:5-21.

Jehovah ben tjari den manpikin foe Israël go na wan bergi di ben nen Sinaï na ini na gran sabana. Na dape a ben gi den en Wet èn a ben taki, dati efoe den ben sa hori en, den ben sa tron wan kownoekondre foe priester èn wan santa naatsi. Soboen, na ini den ten di ben o pasa den Israëlsma ben sa abi na okasi foe de wan prenspari pisi foe a Kownoekondre foe Gado.​—Exodus 19:6; 24:3-8.

Baka di den Israëlsma ben de na a Bergi Sinaï foe wan pisten foe wan jari so, Jehovah ben tjari den foe go na Palestina, na kondre di a ben pramisi Abraham, a fosten tata foe den.

Bakaten, na ini Palestina, Gado ben gi den Israëlsma pasi foe kownoe tiri den. Na a ten dati Gado ben abi wan kownoekondre na grontapoe.

Na di foe toe kownoe foe Israël ben de David, wan bakapikin foe Juda. David ben wini ala den féanti foe Israël, èn a ben meki Jeruzalem tron na mamafoto foe na naatsi.

Sani di ben pasa na ini a ten foe a tiri foe David e sori taki te Jehovah e hori baka gi wan kownoe, dan no wan grontapoe tiriman kan wini en.

Jehovah ben taki dati na pramisi Siri ben sa de wán foe den bakapikin foe David.​—1 Kronieken 17:7, 11, 14.

Salomo, na manpikin foe David, ben tiri baka en. A ben de wan koni kownoe, èn sani ben waka boen gi Israël na ondro en tiri.

Salomo ben bow ooktoe wan moi tempel gi Jehovah na ini Jeruzalem. Na fasi fa sani ben de na ondro na tiri foe Salomo e sori wi wantoe foe den blesi di a Kownoekondre foe Gado di e kon sa tjari kon gi libisma.​—1 Kownoe 4:24, 25.

Ma, foeroe foe den kownoe di kon baka Salomo no ben de getrow srefsrefi.

Ma aladi den bakapikin foe David ben e tiri ete na ini Jeruzalem, dan Jehovah ben gebroiki en proféti Jesaja foe froeteri foe wan Manpikin foe David di ben moe kon ete èn di ben o tiri na heri grontapoe ini getrowfasi. A wan disi ben sa de na pramisi Siri.​—Jesaja 9:6, 7.

Na proféti Jesaja ben froeteri a fesi, taki a tiri foe En ben sa de nanga moro glori leki di foe Salomo.​—Jesaja den kapitel 11 nanga 65.

Now moro leki oiti wanten, den knegti foe Gado ben e aksi densrefi soema ben a de na Siri disi.

Ma bifo a Siri ben kon, den kownoe foe Israël ben kon de so takroe, dati ini 607 bifo G.T. Jehovah ben gi den Babylonsma pasi foe wini na naatsi èn moro foeroe foe den sma den ben tjari go ini katibo na Babylon. Ma Gado no ben frigiti en pramisi. Na Siri ben moesoe foe sori ensrefi tokoe ete na ini na famirilin foe David.​—Ezechiël 21:25-27.

San ben pasa nanga Israël ben sori, taki aladi wan koni, getrow libisma kownoe ben kan tjari wini kon, den wini disi ben skotoe. Getrow man e dede èn den sma di ben sa teki a presi foe den a kan taki den no ben sa de getrow. San ben de na loesoe? Na pramisi Siri.

Te foe kaba, baka doesoendoesoen jari, na Siri ben sori ensrefi. Soema a ben de?

Wan engel foe Gado ben gi na piki na wan oemapikin foe Israël di no ben trow èn di ben nen Maria. A ben taigi en, taki a ben o kisi wan manpikin, di ben sa nen Jezus. Disi na san a engel ben taki:

„A wan disi sa de bigi èn den sa kari en Manpikin foe a Moro Héwan; èn Jehovah Gado sa gi en na troon foe en tata David, èn a sa tiri leki kownoe.”​—Lukas 1:32, 33.

Soboen, Jezus ben de na pramisi Siri èn te foe kaba na Kownoe foe a Kownoekondre foe Gado. Ma foe san-ede Jezus ben de trafasi leki den getrow man di ben libi na fesi?

Jezus ben gebore nanga jepi foe wan wondroe. A mama foe en ben de wan njoenwenke, èn Jezus no ben abi wan libisma papa. A fesi foe dati Jezus ben libi na ini hemel èn na santa jeje ofoe wroko krakti foe Gado ben poeroe a libi foe Jezus komoto foe hemel go na ini a moeroe foe Maria. Foe dat’ede meki a no ben kisi na sondoe foe Adam. Na ini en heri libi, Jezus no ben sondoe.​—1 Petrus 2:22.

Di Jezus ben de 30 jari a ben teki dopoe.

A ben froeteri sma foe a Kownoekondre foe Gado èn te foe kaba a ben pristeri ensrefi leki a Kownoe foe a Kownoekondre dati.​—Mattéus 4:23; 21:4-11.

A ben doe foeroe wondroe toe.

A ben dresi sikiman.​—Mattéus 9:35.

Na wan wondroefasi a ben gi njanjan a den sma di ben abi angri.​—Mattéus 14:14-22.

Srefi den dedewan a ben opobaka.​—Mattéus 9:18, 23-26.

Den wondroe disi e sori sortoe sani Jezus sa doe gi libisma leki Kownoe foe Gado Kownoekondre.

Joe e memre ete fa Kownoe David ben meki Jeruzalem tron na mamafoto foe en kownoekondre? Jezus ben tjari kon na krin, dati a Kownoekondre foe Gado no ben sa de na grontapoe, ma na ini hemel (Johannes 18:36). Datmeki den e kari na Kownoekondre na „hemel Jeruzalem”.​—Hebrewsma 12:22, 28.

Jezus ben froeteri finifini foe den wet di den sma, di ben sa wani saka densrefi na ondro na Kownoekondre, ben sa moe gi jesi na den. Den wet disi de now na ini bijbel. Den moro prenspari wet ben de, dati sma ben moe lobi Gado èn lobi makandra.​—Mattéus 22:37-39.

Jezus ben tjari ooktoe kon na krin, dati en no ben sa de en wawan na ini a tiri foe en Kownoekondre. Joe ben sa abi sma di den teki foe go na hemel èn foe tiri drape nanga en (Lukas 12:32; Joh. 14:3). Omeni sma den ben sa de? Openbaring 14:1 e piki: 144.000.

Efoe soso 144.000 sma e go na hemel foe tiri nanga Jezus, san den tra libisma kan howpoe foe kisi dan?

Na bijbel e taki: „Den regtvaardiki sma, den dati sa abi na grontapoe, èn den sa libi na tapoe foe tégo”.​—Psalm 37:29.

Den sma di sa libi foe tégo na grontapoe den e kari den den „tra skapoe”.​—Johannes 10:16.

Soboen toe howpoe de. Joe abi 144.000 di Jehovah Gado ben kari foe go na hemel foe tiri nanga Jezus Kristus. Ma miljoenmiljoen trawan abi na séker howpoe foe libi foe tégo na grontapoe leki sma di e saka densrefi na ondro en Kownoekondre.​—Openbaring 5:10.

Satan no ben wani si Jezus na ai èn ben gens en. Baka di Jezus ben préki dri nanga afoe jari, Satan ben meki den kisi en èn kiri en, foe di den ben spikri en na wan postoe. Foe san-ede Gado gi pasi taki disi pasa?

Prakseri, taki foe di a roetoe foe wi ben komoto foe Adam, meki wi alamala e sondoe èn e ferdini foe dede.​—Romeini 6:23.

Prakseri ooktoe, taki, foe di Jezus ben gebore tapoe wan wondroefasi, a ben de volmaakti èn no ben ferdini foe dede. Tokoe Gado ben gi Satan pasi foe ’masi Jezus ini en bakafoetoe’, foe kiri en. Ma Gado wiki en kon na libi baka leki wan jeje di no e dede moro. Foe di a ben abi ete na reti tapoe volmaakti libisma libi, a ben kan gebroiki disi now foe loesoe wi libisma poeroe foe sondoe.​—Genesis 3:15; Romeini 5:12, 21; Mattéus 20:28.

Foe jepi wi foe froestan krinkrin san Jezus srakti-ofrandi wani taki, na bijbel e taki foe en nanga jepi foe proféti eksempre.

Foe eksempre, joe e memre ete fa Jehovah ben froeteri Abraham foe offer en manpikin, leki wan tesi tapoe en lobi?

Disi ben de wan proféti eksempre foe na ofrandi foe Jezus. A ben sori fa a lobi foe Jehovah gi libisma ben de so bigi, taki a ben gi en Mankpikin, Jezus, pasi foe dede gi oenoe, sodati wi ben sa abi libi.​—Johannes 3:16.

Joe e memre a fasi fa Jehovah ben fri den Israëlsma komoto foe Egypte èn kibri den fosi geborewan foe den, foe di a meki na engel foe dede waka pasa den?​—Exodus 12:12, 13.

Disi ben de wan proféti eksempre. Net soleki fa na broedoe foe na lam ben wani taki libi gi den fosi geborewan foe den Israëlsma, na so na broedoe foe Jezus di ben trowe na gron, e wani taki libi gi den sma di e bribi na ini en. Èn soleki den sani di ben pasa na a neti dati ben wani taki fri gi den Israëlsma, na so na dede foe Jezus e gi libisma fri foe sondoe nanga dede.

Na foe dat’ede den e kari Jezus „na Lam foe Gado di e teki na sondoe foe na grontapoe gowe”.​—Johannes 1:29.

Ma ini a ten di Jezus ben de na grontapoe a ben tjari ooktoe discipel kon makandra èn a ben leri den foe préki na boen njoensoe foe na Kownoekondre srefi te na baka en dede.​—Mattéus 10:5; Lukas 10:1.

Den disi ben de den fosi libisma di Gado ben teki foe tiri nanga Jezus na ini en Kownoekondre.​—Lukas 12:32.

Joe e memre ete dati Gado ben pramisi den djoe, taki efoe den ben sa hori na Wet, den ben sa den „wan kownoekondre foe priester”? Now den ben abi wan okasi foe de wan pisi foe a Kownoekondre foe Gado èn foe dini leki hemel priester, efoe den ben sa teki Jezus. Ma moro foeroe foe den ben trowe Jezus.

Foe dat’ede meki foe sensi a ten dati, den djoe no ben de a naatsi di Gado ben teki; Palestina no ben de moro langa na Pramisi Kondre.​—Mattéus 21:43; 23:37, 38.

Foe den dé foe Jezus te kon miti wi ten, Jehovah ben tjari den wan disi kon makandra, di ben sa tiri nanga Jezus na ini hemel. Joe abi te now ete wantoe doesoen foe den di de a libi na grontapoe. Wi e kari den a salfoe fikapisi.​—Openbaring 12:17.

Now joe e bigin foe froestan san na a Kownoekondre foe Gado. A de wan tiri na ini hemel, a Kownoe foe en na Jezus Kristus, èn 144.000 sma foe grontapoe e go tiri makandra nanga en. A sa tiri tapoe den getrow libisma na grontapoe èn sa abi na makti foe tjari vréde kon na grontapoe.

Baka di Jezus ben dede a ben kisi wan opobaka èn a ben go na hemel. Dape a ben wakti foe Gado taigi en oten a ben sa de a ten gi en foe bigin tiri leki Kownoe foe a Kownoekondre foe Gado (Psalm 110:1). Oten dati ben sa de?

Sontron Jehovah ben gi sma dren foe froeteri den sani foe en Kownoekondre.

Ini den dé foe Daniël, Jehovah ben gi so wan dren na Nebukadnezar, na kownoe foe Babylon. A dren ben e go foe wan kefarlek bigi bon.​—Daniël 4:10-37.

Den ben koti na bon trowe èn den ben banti na tompoe foe sébi jari langa.

Na bon ben de wan prenki foe Nebukadnezar. Net leki fa den ben banti na tompoe foe sébi jari langa, na so Nebukadnezar ben lasi en froestan foe sébi jari langa. Dan a ben kisi en froestan baka.

Ala disi ben de wan proféti eksempre. Nebukadnezar ben e agersi na tirimakti foe Jehovah na a heri grontapoe. Biginbigin a makti disi ben de foe si nanga jepi foe den bakapikin foe Kownoe David na ini Jeruzalem. Di Babylon ben wini Jeruzalem ini 607 bifo G.T., na famirilin dati foe kownoe ben tapoe foe wan pisten. Noiti moro joe ben sa abi wan tra kownoe na ini na famirilin foe David „te leki en kon di abi na reti a tapoe leki fa na wet taki” (Ezechiël 21:27). Dati ben de Jezus Kristus.

O langa a ben sa de foe sensi 607 G.T. te leki Jezus ben sa bigin foe tiri? Sébi proféti jari. Dati de 2520 jari (Openbaring 12:6, 14). Èn 2520 jari foe 607 bifo G.T. e tjari wi go na 1914 G.T.

Soboen, Jezus ben bigin foe tiri na ini hemel na ini 1914. San dati ben wani taki?

Na bijbel e froeteri wi disi nanga jepi foe wan visioen di na apostel Johannes ben si.

A ben si na ini hemel fa wan oema e meki wan manpikin.​—Openbaring 12:1-12.

Na oema e agersi na hemel organisaatsi foe Gado, dati wani taki ala den engel knegti foe Gado na ini hemel. Na manpikin e agersi na Kownoekondre foe Gado. Disi ben kon gebore ini 1914.

San ben pasa baka foe dati? Na fosi sani di Jezus ben doe leki Kownoe ben de foe iti Satan nanga den engel, di makandra nanga en ben opo densrefi tége Gado, komoto foe hemel go na grontapoe.​—Openbaring 12:9.

Na bijbel e froeteri wi na bakapisi: „Oen prisiri, oen hemel èn oenoe di e libi na ini den! Heloe foe grontapoe nanga na se, bikasi Didibri saka kon na oenoe, a abi bigi atibron, foe di a sabi taki a abi wan sjatoe pisten.”​—Openbaring 12:12.

Soboen, di Jezus ben bigin foe tiri na ini hemel, dan en féanti ben bigin wroko tranga na grontapoe. Leki fa a bijbel ben taki a fesi, a ben bigin foe tiri na mindri foe en féanti.​—Psalm 110:1, 2.

San disi ben sa wani taki gi libisma?

Jezus ben froeteri wi: feti, mankeri foe njanjan, siki nanga gronseki.​—Mattéus 24:7, 8; Lukas 21:10, 11.

Wi ben si den sani disi pasa sensi 1914, èn dati den wan tra réde foe san-ede wi sabi, taki a Kownoekondre ben bigin foe tiri na a ten dati.

Joe ben sa abi ooktoe „broeja skreki foe den naatsi, di no sabi wan pasi foe komoto . . . aladi libisma e kon weri foe frede” (Lukas 21:25, 26). Wi ben si disi toe, foe sensi 1914.

Na apostel Paulus ben taki moro fara, dati sma ben sa „lobi densrefi nomo, sa lobi moni, . . . sa trangajesi papa nanga mama . . . no de opo gi nowan kroederi, lèman foe pori sma nen, sondro foe dwengi densrefi.”​—2 Timoteus 3:1-5.

Now joe sabi foe san-ede a libi de so tranga na ini a ten disi. Satan ben e wroko tranga srefisrefi. Ma a Kownoekondre foe Gado ben e wroko tranga toe.

Heri esi baka 1914, na fikapisi foe den sma di e howpoe foe tiri na ini hemel nanga Jezus ben bigin foe froeteri na boen njoensoe, dati na Kownoekondre ben opo. Na wroko disi panja go now na a heri grontapoe, soleki fa Jezus ben taki, dati a ben sa pasa.​—Mattéus 24:14.

San na a prakseri foe a prékiwroko disi?

Na a fosi presi, a de foe froeteri sma foe a Kownoekondre foe Gado.

Na a di foe toe presi, a de foe jepi sma foe teki wan bosroiti, efoe den wani de sma di e saka densrefi na ondro na Kownoekondre.

Jezus ben taki, dati na ini wi ten den ben sa prati ala libisma na ini sma di gersi skapoe èn sma di gersi bokoboko.​—Mattéus 25:31-46.

Den „skapoe” ben sa de den wan di lobi en nanga en brada. Den „bokoboko” ben sa de den wan di no e doe dati.

Den „skapoe” ben sa kisi tégo libi èn den „bokoboko” no ben sa kisi dati.

Na pratiwroko disi e feni presi nanga na préki foe na boen njoensoe foe na Kownoekondre.

Djaso wan profétitori de foe na proféti Jesaja.

„Èn a moesoe pasa na ini na lasti pisi foe den dé, dati na bergi foe na oso foe Jehovah sa poti stéfi na tapoesé foe den bergi, èn séker a sa opo poti hé na tapoesé foe den pikin bergi; èn na en ala den naatsi moesoe hari go.”​—Jesaja 2:2.

Libisma tanapoe now fesi nanga fesi nanga „na lasti pisi foe den dé”.

Jehovah en „oso” foe anbegi ben „opo poti hé” na tapoesé foe falsi fasi foe anbegi.

„Èn foeroe sma sa go séker èn taki: ’Oen kon, oen pipel, èn meki wi go na a bergi foe Jehovah, na a oso foe Jakob; èn a sa leri wi foe en pasi, èn wi sa waka ini en pasi.’”​—Jesaja 2:3.

Soboen, foeroe sma foe ala naatsi e kon foe anbegi Jehovah èn den e kari trawan foe bondroe kon na wán nanga den. Den leri foe handri na wan fasi di Jehovah e feni boen.

„Èn den moe naki den fet’owroe tron ploegoe èn den lansri tron kronnefi. Naatsi no sa opo fet’owroe tége naatsi èn ooktoe den no sa leri feti moro.”​—Jesaja 2:4.

Den sma di e anbegi Jehovah de ini wánfasi èn den lobi vrède.

Na bakapisi foe a wroko disi foe a Kownoekondre foe Gado de, dati now pikinmoro dri miljoen sma na a heri grontapoe e saka densrefi kaba na ondro na Kownoekondre.

Den tjari kon makandra lontoe na fikapisi, den wan di tan abra foe den sma di abi na howpoe foe go na hemel èn foe tiri nanga Kristus.

Den e kisi jeje njanjan foe a organisaatsi foe Gado.​—Mattéus 24:45-47.

Den de wan groepoe foe kristensma foe ala naatsi di de leki brada èn di lobi makandra troetroe.​—Johannes 13:35.

Den de fri foe brok’ede, èn den abi wan howpoe foe a ten di e kon.​—Filipi 4:7.

Heri esi na préki foe na boen njoensoe sa doro en kaba. Den „skapoe” sa ben tjari kon makandra. Dan san na Kownoekondre sa doe?

Joe e memre ete, dati na getrow Kownoe David ben wini ala den féanti foe a pipel foe Gado? We, Kownoe Jezus sa doe a srefi.

Wan dé Kownoe Nebukadnezar ben kisi wan dren di ben e go foe wan boen bigi popki, di e agersi ala den grontapoe makti foe en ten te doro na ten foe wi.

Dan a si wan ston koti poeroe foe wan bergi, èn a masi a popki na pispisi. Na ston de wan prenki foe a Kownoekondre foe Gado.

Disi wani taki na pori foe na disten takroe seti foe sani.​—Daniël 2:44.

Djaso wantoe foe den sani de, di na Kownoekondre sa naki trowe na gron.

Falsi fasi foe anbegi sa komoto na pasi, net leki wan miriston di trowe go na ini na se.​—Openbaring 18:21.

Datmeki ala den sma di lobi Gado e kisi a dek’ati foe komoto gwe libi falsi anbegi NOW.​—Openbaring 18:4.

Baka dati, Kownoe Jezus sa „naki den naatsi . . . èn a sa tjari den naatsi nanga wan isri tiki.”​—Openbaring 19:15.

Foe dat’ede meki Jehovah Kotoigi, aladi den e pai den belasting foe den èn e gi jesi na den wet foe a kondre, no e abi noti foe doe nanga politiek.

Te foe kaba, Satan srefi, na bigi „draak”, sa trowe go na ini na peti di no abi gron.​—Openbaring 20:2, 3.

Soso den „skapoe”, den di e saka densrefi na ondro Jezus leki Kownoe, sa pasa libilibi na benawtoe disi.​—Mattéus 25:31-34, 41, 46.

Na apostel Johannes ben si wan visioen foe den „skapoe” di e pasa libilibi na benawtoe.

„Mi ben si èn loekoe! wan bigi ipi, di nowan sma ben man foe teri, komoto foe ala naatsi èn lo èn pipel èn tongo, tanapoe na fesi a troon èn na fesi foe a Lam, den weri weti krosi; èn palmtaki ben de na ini den anoe.”​—Openbaring 7:9.

Ala den sma di e teki na prèki foe na boen njoensoe na wan boen fasi e tron sma foe a „bigi ipi”.

Den „komoto foe a bigi benawtoe”.​—Openbaring 7:14.

Den „palmtaki” e sori taki den e bari wan switikon gi Jezus leki den Kownoe.

Dati den e eri „weti krosi” e agersi dati den abi bribi na ini na ofrandi foe Jezus.

Na „Lam” na Jezus Kristus.

Foe sortoe blesi den e njan boen foe den dan? Joe e memre na kolokoe di ben de ini Israël di na getrow Kownoe Salomo ben e tiri? Disi ben gi na wan pikin fasi wan prenki foe a kolokoe, di sa de na grontapoe ondro Kownoe Jezus.

Vréde sa de troetroe na mindri libisma, èn na mindri libisma nanga den meti, net soleki Jesaja ben taki na fesi.​—Psalm 46:9; Jesaja 11:6-9.

Net soleki fa Jezus ben dresi den sikiman, di a ben de na grontapoe, na so a sa poeroe siki foe ala libisma.​—Jesaja 33:24.

Net soleki fa a ben gi den ipi sma njanjan, na so a sa poeroe a mankeri foe njanjan gi a ala libisma.​—Psalm 72:16.

Net soleki fa a ben wiki den dedewan, na so a sa wiki den dedewan di no ben abi na okasi dorodoro foe saka densrefi na ondro na Kownoekondre foe Gado.​—Johannes 5:28, 29.

Safrisafri a sa tjari libisma go baka na a volmaaktifasi di Adam ben lasi.

Disi no de wan toemsi moi ten di de na wi fesi? Joe ben sa wani foe si en? Efoe dati de so, handri so, dati joe kan saka joesrefi now na ondro na Kownoekondre foe Gado èn tron wan foe den „skapoe”.

Teki leri foe na bijbel èn kon sabi Jehovah Gado nanga Jezus Kristus.​—Johannes 17:3.

Tan farawe foe ogri sani, soleki foefoeroe, lé, hoeroedoe, nanga droengoe, sani di no e plisi Jehovah Gado.​—1 Korinte 6:9-11.

Leri den wet foe na Kownoekondre èn gi jesi na den.​—Jesaja 2:3, 4.

Gi joe libi abra foe dini Jehovah è teki dopoe.​—Mattéus 28:19, 20.

Meki mati nanga trawan di e saka densrefi ooktoe na ondro na Kownoekondre.​—Hebrewsma 10:25.

Teki prati na ini a préki foe a boen njoensoe foe a Kownoekondre.​—Mattéus 24:14.

Dan nanga a jepi foe Gado, joe sa si na Paradijs, di Adam ben lasi gi en bakapikin, kon joen baka èn joe sa si na pramisi di kon troe: „Mi ben jere wan tranga sten foe a troon taki: ’Loekoe! Na tenti foe Gado de na libisma, èn a sa libi na den mindri, èn den sa de en pipel. Èn Gado srefi sa de nanga den. Èn a sa figi poeroe ala watra na den ai, èn dede no sa de moro, nowan kré, nowan babari, nowan pen no sa de moro. Den fosi sani ben pasa gowe.’”​—Openbaring 21:3, 4.

[Schema na tapoe bladzijde 20 di e tjari sani kon na krin]

(Efoe joe wani sabi pe den sani disi skrifi, loekoe a brochure)

607 bifo G.T. 1914 G.T.

Bifo G.T. | G.T.

500 1.000 1.500 2.000 2.520

[Prenki na tapoe bladzijde 11]

Abraham

Isaäk

Jakob

Juda

David

[Prenki na tapoe bladzijde 14]

144.000

[Prenki na tapoe bladzijde 16]

Jezus

Adam