Kapitel 8
San e pasa te wan sma dede?
1. San sma e aksi foeroetron ini a tori foe den dedewan?
SONTE joe sabi a leigi firi di e kon te joe lasi wan lobiwan ini dede. Fa joe e sari srefisrefi èn e firi leki joe no man jepi joesrefi! A no de foe taki dati joe e aksi: San e pasa nanga wan sma te a dede? A de na libi na wan presi ete? Den libiwan sa man abi prisiri oiti baka na grontapoe nanga den wan di dede now?
2. San ben pasa nanga a fosi libisma, Adam, di a dede?
2 Wi sa man piki den aksi disi moro makriki, efoe wi sabi san ben pasa nanga Adam di a dede. Gado ben taigi en, baka di a ben sondoe: „Joe [sa] drai go baka na a gron, bika na drape Gado ben teki joe poeroe. Bika doti joe de èn na doti joe sa drai go baka” (Genesis 3:19). Prakseri pikinso san dati wani taki. Bifo Gado ben meki Adam foe doti, Adam no ben de. So boen, baka di Adam ben dede, a ben drai go baka na a srefi fasi dati, di a no ben de.
3. (a) San na dede? (b) San Preikiman 9:5, 10 e taki foe a fasi pe den dedewan de na ini?
3 Foe taki en makriki, dede na a kontrari foe libi. Bijbel e sori disi na ini Preikiman 9:5, 10. Den vers disi e taki so: „Den libiwan sabi ete, taki den moesoe dede, ma den dedewan, den no sabi noti kwetikweti; èn den no abi wan paiman moro, bika sma frigiti srefi foe memre den. Ala san joe anoe feni foe doe, doe dati nanga joe krakti srefi, bika no wan wroko noso prakseri noso sabi noso koni no de na ini Sjeol [grebi, Statenvertaling (Bakratongo)], pe joe e go.”
4. (a) San e pasa nanga a man di wan sma man denki te a sma dede? (b) Foe san ede den sani leki jere, si, firi, smeri nanga tesi e tapoe foe wroko te wan sma dede?
4 Disi wani taki, dati den dedewan no kan doe noti èn no kan firi noti. Den no abi no wan enkri prakseri moro, soleki fa bijbel e taki: „No poti oen froetrow tapoe heisma, noso tapoe a manpikin foe libisma na grontapoe, di froeloesoe no de na en. En jeje e komoto gowe, a e go baka na en gron; na a dei dati den prakseri foe en e lasi gowe” (Psalm 146:3, 4). Te wan sma dede, dan a jeje foe en, en libikrakti, di ben e kisi san a abi fanowdoe nanga a hari di a sma e hari bro, e „komoto gowe”. A no de moro. So boen, sani leki jere, si, firi, smeri nanga tesi, di anga foe a denki di a man denki, no e wroko moro. Soleki fa bijbel e taki, dan den dedewan e kon ini wan fasi pe den no sabi notinoti moro.
5. (a) Fa bijbel e sori taki a fasi pe dedesma nanga dede meti de na ini, na a srefi? (b) San na a „jeje” di e meki libisma nanga meti libi?
5 Te libisma nanga meti dede, dan den e kon na ini a srefi fasi disi pe den no sabi notinoti moro. Loekoe fa bijbel e tjari a penti disi kon na fesi: „Soleki fa a wán dede, na so a trawan dede, èn den alamala abi soso wán jeje, so taki libisma no moro hei leki meti, bika ala sani na soso sani. Alamala e go na wán presi. Den alamala komoto na doti, èn den alamala e drai go baka na doti” (Preikiman 3:19, 20). A „jeje” di e meki meti libi, na a srefi „jeje” di e meki libisma libi. Te a „jeje” disi noso libikrakti di wi no kan si, e komoto gowe, dan libisma nanga meti e drai go baka na a doti di Gado ben teki meki den.
A SILI E DEDE
6. Fa bijbel e sori taki meti na sili?
6 Son sma taki, dati san e meki libisma de tra fasi leki meti, de taki libisma abi wan sili, ma meti no abi dati. Ma ini Genesis 1:20 nanga 30 tanapoe taki Gado ben meki „libi sili” foe libi na ini watra, èn taki den meti abi „libi leki wan sili”. Na ini den vers disi son bijbel e gebroiki den wortoe „mekisani” nanga „libi” na presi foe „sili”, ma ini san den skrifi na a lanki foe den bijbel foe den, e kon na krin taki a wortoe „sili” tanapoe na ini a tongo di sma ben taki biginbigin. Wan foe den presi ini bijbel pe den e kari meti sili, na Numeri 31:28. Drape den e taki foe „wán sili tapoe ibri feifi hondro foe den libisma nanga foe den kaw nanga foe den boeriki nanga foe den pikin meti”.
7. San bijbel e taki foe boeweisi taki meti sili nanga libisma sili dede?
7 Foe di meti na sili, dan te den dede, a sili foe den dede. Soleki fa bijbel e taki: „Ibri libi sili dede, ija, ala sani san ben de na ini se” (Openbaring 16:3). Fa a de nanga den libisma sili? Soleki fa wi ben leri ini a kapitel na fesi, dan Gado no ben meki libisma nanga wan sili. Libisma na wan sili. So boen, soleki fa wi ben sa froewakti, dan te wan sma dede, en sili dede. Bijbel e taki foeroetron dati disi troe. Noiti bijbel e taki dati a sili no dede noso dati a no kan dede. „Ala sma di e saka go na doti, sa boekoendoe, èn no wan sma sa hori oiti en eigi sili na libi”, Psalm 22:29 e taki. „A sili di e sondoe, na en sa dede”, Esekièl 18:4 nanga 20 e froeteri. Èn efoe joe opo Josua 10:28-39, dan joe sa feni seibi presi drape, pe e taki dati den e kiri noso e pori a sili.
8. Fa wi sabi taki a libisma sili, Jesus Krestes, dede?
8 Na ini wan profeititori di e taki foe Jesus Krestes, bijbel e taki: „A ben kanti en sili go na ini dede . . . èn ensrefi ben tjari a sondoe foe foeroe sma” (Jesaja 53:12). A leri foe a loesoe-paiman e boeweisi taki a ben de wan sili (Adam) di ben sondoe, èn taki foe bai libisma kon fri, dan wan srefi sortoe sili (wan libisma), ben moesoe gi leki ofrandi. Krestes ben sorgoe gi a loesoe-paiman foe di a ’ben kanti en sili go na ini dede’. Jesus, a libisma sili, dede.
9. San den wortoe: ’A jeje srefi e drai go baka na a troe Gado di ben gi en’, wani taki?
9 Soleki fa wi si kaba, dan a „jeje” a no a srefi leki a sili foe wi. A jeje na wi libikrakti. A libikrakti disi de na ini ibri cel foe a skin foe libisma nanga meti. A hari di wi e hari bro e gi a libikrakti san a abi fanowdoe noso e meki a tan na libi. San a wani taki dan, te bijbel e taki dati te wan sma dede, ’a doti e drai go baka na a gron . . . èn a jeje srefi e drai go baka na a troe Gado di ben gi en’? (Preikiman 12:7) Te wan sma dede, dan a libikrakti e libi ala cel foe a skin baka wan pisi ten èn a skin e bigin pori. Ma disi no wani taki, dati wi libikrakti e gowe libi grontapoe troetroe èn e pasa na ini a kontren foe na universum go na Gado. Na presi foe dati, a jeje e drai go baka na Gado na a fasi disi, taki a howpoe foe wi foe kisi libi na ini a ten di e kon, de now krinkrin ini anoe foe Gado. Soso nanga en makti wi kan kisi a jeje, noso libikrakti baka, so taki wi man libi baka. — Psalm 104:29, 30.
LASARUS — WAN MAN DI DEDE FO DEI LANGA
10. San Jesus ben taki foe a fasi pe Lasarus ben de na ini, ala di Lasarus dede troetroe?
10 A sani san ben pasa nanga Lasarus, di dede fo dei langa, e jepi wi foe froestan a fasi pe den dedewan de na ini. Jesus ben taigi en disipel, taki: „Lasarus, wi mati, go rostoe, ma mi e go drape foe wiki en na a sribi.” Ma den disipel ben piki: „Masra, efoe a go rostoe, dan a sa kon boen baka.” Tapoe dati Jesus ben taigi den krin: „Lasarus dede.” Foe san ede Jesus ben taki dati Lasarus ben e sribi, ala di a dede troetroe? Meki wi go loekoe.
11. San Jesus ben doe gi a dede man, Lasarus?
11 Di Jesus ben doro krosibei na a foto pe Lasarus ben libi, dan Marta, a sisa foe Lasarus, ben waka miti en. Heri esi, den ben go makandra nanga foeroe trawan na a grebikamra pe den ben poti Lasarus didon. A ben de wan bergi-olo èn wan ston ben de na fesi na olo. Jesus ben taki: „Poeroe a ston.” Foe di Lasarus dede fo dei langa kaba, dan Marta ben taki: „Masra, a moesoe smeri now kaba.” Ma den ben poeroe a ston èn Jesus ben bari taki: „Lasarus, kon na doro!” Èn a ben kon na doro libilibi, ala di a ben domroe na ini grebikrosi ete. „Loesoe en èn meki a go”, Jesus ben taki. — Johanes 11:11-44.
12, 13. (a) Foe san ede wi kan de seiker taki Lasarus no ben sabi noti moro di a dede? (b) Foe san ede Jesus ben taki, dati Lasarus ben e sribi, ala di a dede troetroe?
12 Prakseri a sani disi pikinso: Na ini sortoe fasi Lasarus ben de, di a dede den fo dei dati? A ben de na hemel? A ben de wan boen man. Tokoe Lasarus no ben taki noti foe a de di a ben de na hemel. Efoe a ben de drape. dan seiker a ben o taki dati. Nôno, Lasarus dede troetroe, soleki fa Jesus ben taki dati. Dan foe san ede Jesus ben taigi den disipel foe en biginbigin, taki Lasarus ben e sribi nomo?
13 We, Jesus ben sabi taki a dede man, Lasarus, no ben sabi noti moro, soleki fa bijbel e taki: „Den dedewan . . . no sabi notinoti moro” (Preikiman 9:5). Ma wan sma di de na libi, kan wiki foe wan dipi sribi. So boen, Jesus ben o sori, taki a ben kan wiki en mati Lasarus komoto na dede nanga jepi foe a krakti di Gado ben gi en.
14. A sabi di wi sabi taki Jesus abi a makti foe opo den dedewan baka, moesoe boeweigi wi foe doe san?
14 Te wan sma e sribi dipi, a no e memre noti. Na so a de toe nanga den dedewan. Den no abi no wan enkri firi moro. Den no de moro. Ma te a ten foe Gado sa doro, dan den dedewan di Gado ben bai kon fri, sa kisi wan opobaka kon na libi (Johanes 5:28). A sabi disi moesoe boeweigi wi seiker foe doe ala moeiti foe Gado feni wi boen. Efoe wi doe dati, dan srefi efoe wi dede, Gado sa memre wi èn tjari wi kon baka na libi. — 1 Tesalonikasma 4:13, 14.
[Prenki na tapoe bladzijde 76]
ADAM — a ben meki foe doti . . . a ben drai go baka na doti
[Prenki na tapoe bladzijde 78]
San ben de a fasi pe Lasarus ben de na ini, bifo Jesus ben opo en baka?