Kapitel 52
Na wan wondroe fasi Jesus e gi njanjan na doesoendoesoen sma
DEN twarfoe apostel prisiri srefisrefi foe wan aparti preikiwaka di den ben waka na ini heri Galilea. Now, sjatoe baka di den sma kiri Johanes, den apostel e drai go baka na Jesus, èn den e froeteri en den kefalek moi ondrofenitori foe den. Te Jesus e si taki den weri èn taki someni sma e go-kon, taki den no abi ten srefi foe njan, a e taki: ’Meki wi go wi wawan na wan tiri presi pe oenoe kan rostoe.’
Kande krosibei foe Kaperna-um den e go na ini a boto foe den, èn den e go na wan farawe presi. Soleki fa a sori, den e go na a owstoesei foe Jordan liba, pasa Betsa-ida. Ma foeroe sma e si taki den e gowe, èn trawan e kon sabi dati toe. Ala den sma disi e lon sei a sjoro go drape, èn te a boto doro, den sma de drape kaba e wakti den.
Te Jesus komoto na a boto èn e si a bigi ipi sma, dan a e sari, foe di den sma de leki skapoe sondro herder. Foe dati ede a e dresi den sikiwan foe den èn a e bigin leri den foeroe sani.
A ten e lon pasa esi, èn den disipel foe Jesus e kon na en èn e taki: „A presi fara foe foto èn a lati kaba. Seni den sma gowe, so taki den kan go na den dorpoe ini a birti èn den kan bai wan sani foe njan.”
Ma Jesus e piki den: „Oenoe moesoe gi den wan sani foe njan.” Foe di Jesus sabi kaba san a o go doe, meki a e tesi Filipus, foe di a e aksi en: „Pe wi sa bai brede, so taki den kan njan?”
Leki fa Filipus e si a tori, dan a de wan sani di no kan. Ija, so wan 5000 man de drape, èn te joe e teri den oemasma nanga den pikin-nengre makandra, dan kande a pasa wan 10.000 sma! „Toe hondro dinari [na ini a ten dati wan dinari ben de a moni di wan sma e wroko ini wán dei] gi brede no nofo gi den, awansi ibriwan foe den e kisi pikinso nomo kande”, Filipus e piki.
Kande foe sori taki a de wan sani di no kan foe gi njanjan na someni mofo, meki Andreas e taki sondro foe den aksi en: „Wan pikin boi dja abi feifi gerstbrede nanga toe fisi”, èn a e taki moro fara „ma san disi wani taki gi someni sma?”
Foe di a de lente, leti bifo a Paska foe 32 G.T., meki boen foeroe groen grasi de. Foe dati ede Jesus e meki den disipel foe en taigi den sma taki den moesoe go didon na tapoe a grasi ini groepoe foe 50 èn foe 100 sma. A e teki den feifi brede nanga den toe fisi, e loekoe go na hemel, èn a e taki wan blesi. Dan a e bigin broko den brede èn e prati den fisi. A e gi den disipel foe en, di, foe den sei, e prati den gi den sma. Na wan froewondroe sani, taki ala sma njan te den bere foeroe!
Baka ten Jesus e taigi den disipel foe en: „Tjari den pisi di tan abra kon na wan, so taki noti no e froemorsoe.” Te den e doe dati, dan den e foeroe twarfoe baskita nanga san tan abra foe a njanjan disi! Mateus 14:13-21; Markus 6:30-44; Lukas 9:10-17; Johanes 6:1-13.
▪ Foe san ede Jesus e soekoe wan presi foe kan de en wawan nanga den apostel foe en?
▪ Pe Jesus e go nanga den disipel foe en, èn fa a doe kon taki den no e feni a rostoe di den abi fanowdoe?
▪ San den disipel e aksi tranga te a kon lati, ma fa Jesus e sorgoe gi den sma?