Yesus libi nanga diniwroko

Gi nyanyan na wan wondrufasi na dusundusun sma

DEN twarfu apostel ben prisiri srefsrefi fu wan aparti preiki waka psa heri Galiléa. Now, syatu baka na kiri di den kiri Johannes, den e drai go baka na Yesus, den e ferteri den wondru ondrofeni fu den. Di Yesus e si dati den weri èn dati someni sma e kon èn e go dati den no abi srefi ten fu den nyan, meki ai taki: ’Meki wi go wi wawan na wan tiri presi pe unu kan rostu.’

Den e go ini den boto, seiker ini a birti fu Kapernaüm èn e poti ede go na wan farawe presi. A de krin na a oostsei fu a Jordaan, psa Betsaïda. Ma furu sma e si den e gwe, èn trawan e kon sabi dati ooktu. Alamala e lon sei na syoro go drape èn te na boto e tapu drape, dan den e de drape kaba e wakti den.

Te Yesus e komoto ini a boto èn e si na bigi ipi sma a e kisi sari fudi den sma de leki skapu sondro herder. Fu dat’ede a e dresi den sikiwan fu den èn e bigin fu leri den furu sani.

A ten e lon psa esi, èn Yesus disipel e kon na en èn e taki: „A presi de farawe èn a lati kaba. Seni den sma gwe, sodati den kan go na den dorpu ini a birti èn kan bai wan sani fu nyan.”

Ma Yesus e piki den: „Gi den wan sani fu nyan.” Dan Yesus, di ben sabi kaba san a ben o go du, e tesi Filippus fudi ai aksi en: „Pe wi sa bai brede, sodati den kan nyan?”

Fu a sei fu Filippus dan a den wan situatie fu wan sani di no kan. Sowan feifi dusun man de drape èn nanga umasma nanga pikinnengre makandra seiker psa wan tindusun sma! „Tuhondro dinarii [wan dinarii ben de ini a ten dati wan dei wroko pai] brede no de nofo gi den, awinsi ibriwan sma ben sa kisi pikinso nomo”, Filippus e piki.

Kande fu sori dati a de wan sani di no kan fu gi nyanyan na someni mofo meki Andréas sondro fu den aksi en e taki: „Wan pikin boi dya di abi feifi gerstebrede nanga tu fisi”, èn ai taki moro fara „ma san na disi a mindri someni sma?”

Fudi a ben de pikindreiten, leti bifo na Pascha fu 32 G.T. meki taki grun grasi de psa marki. Fu dat’ede meki Yesus e meki den disipel taigi den sma dati den mu go didon ini grupu fu feifitenti èn hondro ini a grasi. A e teki den feifi brede èn den tu fisi e luku go na hemel èn e taki na blesi. Dan a e bigin fu broko den brede èn fu prati den fisi. A e gi na en disipel, di fu den sei e prati den gi den sma. Èn leki wan ferwondru sani gi ibriwansma dan ala sma e nyan te leki den bere furu!

Bakaten Yesus e taigi en disipel: „Tyari den fisi di tan abra kon a wan sodati noti lasi.” Te den e du dati, dan den e furu twarfu baskita fu san tan abra fu na nyanyan disi! Mattéus 14:13-21; Markus 6:30-44; Lukas 9:10-17; Johannes 6:1-13.

◆ Fu san-ede Yesus e suku gi en apostel wan presi pe den kan hari den srefi go?

◆ Pe Yesus e go nanga en disipel èn fa a du kon dati den no e kisi a rostu di den e abi fanowdu?

◆ San den disipel e aksi tranga te a e kon lati, ma fa Yesus e sorgu gi den sma?