Kapitel 61

Wan boi, di wan ogri jeje de na en tapoe, e kon betre

NA INI a pisi ten di Jesus, Petrus, Jakobus nanga Johanes gowe, kande den de na tapoe wan pisi foe a bergi Hermon, den tra disipel e kon na ini wan problema. Te Jesus drai kon baka, a e si wantewante taki wan sani no boen. Wan ipi sma de lontoe den disipel foe en, èn den leriman foe Wet e hari taki nanga den. Te den sma e si Jesus, dan den e froewondroe srefisrefi èn den e lon go na en foe gi en odi. „Foe san oenoe e haritaki nanga den?”, a e aksi.

Ini na ipi sma wan man e kon na fesi, di e saka kindi na fesi Jesus. A e tjari kon na krin: „Leriman, mi ben tjari mi manpikin kon na joe, foe di a de ini a makti foe wan babaw jeje; èn awansi pe na ogri jeje disi graboe en toe, a e trowe en na gron, èn a pikin e kisi skoema na ini en mofo, a e kaw tifi, èn a e lasi en krakti. Èn mi ben taigi den disipel foe joe foe poeroe en na a [boi] tapoe, ma den no ben man doe dati.”

Soleki fa a sori, dan den leriman foe Wet e meki boen gebroiki foe na okasi disi taki den disipel no man foe dresi a boi, èn kande den e spotoe nanga a moeiti di den disipel e doe. Joisti te a tori disi kon moeilek srefisrefi, Jesus e doro. „O geslakti foe sma di no e bribi,” a e taki, „o langa mi moesoe tan na oenoe ete? O langa mi moesoe froedrage oenoe ete?”

A gersi leki den wortoe foe Jesus de gi ala sma di de drape, ma a no abi misi taki den de spesroetoe gi den leriman foe Wet, di ben moeilek den disipel foe en. Ne Jesus e taki foe a boi: „Tjari en kon na mi.” Ma te a boi e kon na Jesus, dan na ogri jeje di de na en tapoe, e naki en trowe na gron èn e meki a kisi boen hebi stoipi. A boi e lolo na tapoe a gron èn en mofo e poeroe skoema.

„O langa a abi disi kaba?”, Jesus e aksi.

„Foe sensi en pikin-nengre ten kaba”, a papa e piki. „Ibri tron baka [na ogri jeje] ben trowe en go na ini faja, so srefi na ini watra toe foe kiri en.” Dan a papa e begi: „Efoe joe kan doe wan sani, sari wi èn jepi wi.”

Kande a papa ben soekoe jepi jari langa kaba. Èn now, di den disipel foe Jesus no man jepi en, a no sabi moro san foe doe. Jesus e go doro nanga san a man di no sabi moro san foe doe, e aksi en tangitangi, èn a e taki foe gi en deki-ati: „Den wortoe dati: ’Efoe joe kan’! We, ala sani kan, gi a sma di abi bribi.”

„Mi abi bribi!”, a papa e bari taki wantewante, ma a e begi: „ Jepi mi pe mi e mankeri bribi!”

Jesus e si taki na ipi sma e hari kon na den na ipi-ipi èn a e piri-ai gi na ogri jeje. „Joe babaw èn dofoe jeje, mi e komanderi joe, komoto na en tapoe èn no kon na ini en moro.” Te na ogri jeje e gowe, dan ete wan tron a e meki a boi e bari tranga èn e meki en kisi foeroe stoipi. Baka dati a boi e didon na gron sondro foe boeweigi, so taki moro foeroe foe den sma e taki: „A dede!” Ma Jesus e teki a boi na en anoe, èn a boi e opo tanapoe.

Bifo disi, di a ben seni den disipel go foe preiki, den ben poeroe ogri jeje na sma tapoe. So boen, te den e go na ini wan oso èn den de den wawan, dan den e aksi Jesus: „Foe san ede wi no ben man poeroe en na a [boi] tapoe?”

Jesus e froeteri taki disi ben doe kon, foe di den ben mankeri bribi, èn a e piki: „ A sortoe disi, joe no kan jagi poeroe tra fasi, boiti nanga begi.” A de krin, taki den ben moesoe sreka densrefi foe poeroe na ogri jeje disi na a boi tapoe, foe di na ogri jeje ben tranga srefisrefi. Tranga bribi ben de fanowdoe foe disi, makandra nanga begi pe den ben aksi a jepi foe Gado di e gi tranga.

Èn baka dati Jesus e taki moro fara: „Foe troe mi e taigi oenoe: Efoe oenoe abi bribi di bigi neleki wan pikin mosterdsiri, dan oenoe sa taigi a bergi disi: ’Opo joesrefi poeroe foe dja go drape’, èn a sa opo ensrefi poeroe, èn no wan sani sa de di oenoe no man doe.” Ai, bribi kan de troetroe wan krakti sani!

Sani di e hendri, nanga problema di e tapoe sma foe go na fesi ini a diniwroko foe Jehovah, kan gersi sani di wi no kan pasa en abra èn di wi no kan poeroe na pasi, neleki fa a de nanga wan troetroe bigi bergi. Tokoe Jesus e sori, taki efoe wi e kweki bribi ini wi ati, foe di wi, foe taki en so, e nati a bribi èn e meki a gro, dan a sa gro kon tranga èn a sa meki wi kon so fara foe wini den sortoe problema di joe kan teki gersi wan bergi. Markus 9:14-29; Mateus 17:19, 20; Lukas 9:37-43.

▪ Sortoe situwâsi Jesus e miti te a e drai kon baka foe a bergi Hermon?

▪ Sortoe deki-ati Jesus e gi a papa foe a boi, di wan ogri jeje de na en tapoe?

▪ Foe san ede den disipel no ben man foe poeroe na ogri jeje na a boi tapoe?

▪ O tranga bribi kan kon, soleki fa Jesus e sori?