Aksi foe leisiman
Soleki fa Mateus 17:20 e taki, dan den apostel no ben man dresi wan boi di ben e pina ’bika den no ben abi nofo bribi’. Ma na Markus 9:29, a man di den no ben man doe disi abi foe doe nanga a abi di den ben abi begi fanowdoe. Foe san ede den e gi difrenti reide na ini difrenti Evangelie tori?
Te joe loekoe en boen, dan den toe tori e fiti na makandra, den no de kontrari makandra. Loekoe Mateus 17:14-20 fosi. Wan man ben froeteri taki en manpikin ben abi fadon siki, èn taki den disipel foe Jesus no ben man dresi a boi. Baka dati Jesus ben dresi a boi foe di a ben e jagi wan ogri jeje poeroe di ben kwinsi a boi. Den disipel ben aksi foe san ede den no ben man jagi na ogri jeje poeroe di ben e pina a boi. Soleki fa a verslag foe Mateus e taki, dan Jesus ben piki: „Bika oenoe no abi nofo bribi. Foe troe mi e taigi oenoe: Efoe oenoe ben abi bribi di bigi neleki wan pikin mosterdsiri, dan oenoe sa taigi a bergi disi: ’Opo joesrefi poeroe foe dja èn go drape’, èn a sa opo ensrefi poeroe, èn no wan sani no sa de di oenoe no man doe.”
Go now na Markus 9:14-29, pe wi e feni moro finifini pisi foe a tori. Foe eksempre, Markus 9:17 e gi a finifini pisi foe a tori, taki ini a kefal disi, wan ogri jeje ben meki a sortoe fadon siki disi doe kon. A boen foe loekoe taki bijbel e taki na wan tra presi dati Jesus ben e dresi sma di ben abi fadon siki, nanga sma di ogri jeje ben de na den tapoe (Mateus 4:24). Ini na aparti situwâsi disi, a siki ben kon foe wan „babaw èn dofoe jeje”, dati na wan ogri jeje, èn datra Lukas ben taki dati a troe (Lukas 9:39; Kolosesma 4:14). Loekoe den wortoe na Markus 9:18, „awansi pe a [na ogri jeje] e kisi en”. So boen, na ogri jeje no ben trobi a boi doronomo, soso wanwan leisi. Tokoe den disipel no ben man jagi na ogri jeje poeroe èn dresi a boi na so wan fasi. Di den ben aksi foe san ede, dan Jesus ben piki: „A sortoe disi, sma no kan poeroe nanga no wan tra sani, boiti nanga begi.”
Ma efoe wi e leisi a tori foe Markus boen, dan wi e si a no de kontrari san Mateus ben skrifi. Na Markus 9:19, wi e leisi taki Jesus ben sari foe a geslakti dati taki a no ben abi bribi. Èn na ini vers 23 skrifi taki Jesus ben taigi a papa foe a boi: „Ala sani kan gi wan sma di abi bribi.” So boen, so srefi Markus e poti krakti na tapoe o prenspari bribi de. A de nomo, taki na ini vers 29, Markus e gi ete wan fini pisi foe a tori. Markus e taki toe san Jesus ben taki foe begi, sani di Mateus nanga Lukas no ben taki foe dati.
San wi kan taki dan? Na tra okasi den 12 apostel nanga den 70 disipel ben poeroe ogri jeje na sma tapoe (Markus 3:15; 6:13; Lukas 10:17). Ma ini a kefal disi den disipel no ben man jagi na ogri jeje poeroe. Foe san ede? Efoe wi e moksi den finifini pisi tori di kari na ini den difrenti verslag kon makandra, dan wi moesoe kon na a bosroiti taki den no ben de srekasreka foe doe so ini a kefal disi. Kande wan pisi foe a problema ben de a sortoe ogri jeje di ben de ini a tori foe di a gersi taki ogri jeje kan difrenti foe a fasi fa den de, den sani di e hari den belangstelling, èn srefi a man di den man doe sani. Nanga na ogri jeje disi, dan spesroetoe tranga bribi nanga fajafaja begi foe kisi a jepi foe Gado ben de fanowdoe. A no de foe taki, dati Jesus ben abi so wan sortoe bribi. Èn so srefi a Jereman foe begi, en Tata, ben horibaka gi en (Psalm 65:2). No wawan a ben de so taki Jesus ben kan poeroe na ogri jeje foe kan dresi a boi di ben e pina, ma Jesus ben doe dati toe.