Aksi fu leisiman

Efu wan Kresten e yere sten neleki wan sma e taki nanga en, dan disi wani taki dati ogri yeye e trobi en?

Nôno. A tru taki sma fruteri dati ogri yeye ben taki nanga den. Ma toku furu fu den sma di ben yere sten noso ben ondrofeni tra fruferi sani di den no man fruklari, ben kon frustan bakaten di den ondrosuku a tori finifini, taki den abi wan problema nanga a gosontu fu den.

A sori taki srefi na ini a fosi yarihondro sma ben e erken taki son leisi den sani di wan sma e ondrofeni te ogri yeye e trobi en, kan gersi den sani di wan sma e ondrofeni te a abi problema nanga a gosontu fu en. Ini Mateyus 17:14-18 wi e leisi a tori fu wan yongu boi di Yesus ben dresi. Aladi a ben gersi taki a boi disi ben abi wan hebi sortu fadonsiki, toku a ben de wan ogri yeye di ben e trobi a boi disi so kefalek. Ma na wan okasi na fesi di sma ben tyari furu siki sma kon na Yesus fu dresi den, dan sonwan fu den sma disi ben de sma di ’ben abi ogri yeye na den tapu èn sma di ben abi fadonsiki’ (Mateyus 4:24). Soleki fa a e sori, dan a no ala sma di ben abi fadonsiki, ben abi ogri yeye na den tapu. Den problema fu den ben abi fu du nanga a gosontu fu den.

Son sma di abi schizofrenie, wan siki na frustan sei gi san datra abi dresi, e fruteri taki den e yere sten noso e ondrofeni sani di kande wi no man frustan èn di wi no man fruklari.a Tra siki di wan sma abi kan meki tu taki a bruya na frustan sei èn trawan ben sa kan abi a fowtu prakseri taki na ogri yeye e trobi a sma. Sobun, wan sma di e fruteri taki a e yere sten noso abi tra sani di e bruya en, no wani bribi taki na ogri yeye e trobi en kande. Toku a ben o bun fu gi a sma dati deki-ati fu go ondrosuku efu den sani di a e ondrofeni e kon fu di a abi wan problema nanga en gosontu.

[Futuwortu]