Pisi 2
Wan grontapoe sondro pina
1, 2. Sortoe tra fasi foe si sani foeroe sma abi?
MA MILJOENMILJOEN sma na heri grontapoe abi wan heri tra fasi foe si sani. Den e froewakti wan toemoesi moi tamara gi a libisma famiri. Den e taki dati leti djaso na grontapoe heri esi wan grontapoe sa de di de krinkrin sondro godelowsoefasi nanga pina. Den abi a froetrow taki san takroe sa poeroe heri esi na pasi èn wan grontapoe di njoen dorodoro sa seti. Den e taki srefi dati a fondamenti foe a njoen grontapoe disi e poti nownow kaba!
2 Den sma disi e bribi taki a njoen grontapoe sa de sondro feti, ogri-atidoe, ogridoe, onregtfardikifasi nanga pôtifasi. A sa de wan grontapoe sondro siki, sari, watra-ai èn srefi sondro dede. Na a ten dati, sma sa gro kon de volmaakti èn libi foe têgo ini kolokoe na ini wan paradijs na grontapoe. Ija, den wan di dede sa kisi wan opobaka srefi èn kisi na okasi foe libi foe têgo!
3, 4. Foe san ede den sma disi abi froetrow ini a fasi fa den e si sani?
3 A fasi disi foe si a tamara na soso wan dren, soso wan winsi di no kan kon troe? Nôno, kwetikweti. A abi en gron tapoe wan bribi di abi wan steifi fondamenti, taki a Paradijs disi di e kon, na wan sani di no de foe tapoe (Hebrewsma 11:1). Foe san ede den de so seiker foe dati? Bika na almakti Kriaman foe na universum pramisi dati.
4 Bijbel e taki foe den pramisi foe Gado: „No wán wortoe foe ala den boen wortoe di Jehovah, oen Gado, taigi oenoe, tan sondro foe a kon troe. Den alamala kon troe gi oenoe. No wán wortoe foe den tan sondro foe kon troe.” „Gado a no wan libisma, taki a ben sa froeteri lei . . . Ensrefi taki en èn a no sa doe en, èn en taki èn a no sa meki a pasa?” „Jehovah foe den legre sweri, taki: ’Foe troe, joisti soleki fa mi prakseri, na so a moesoe pasa; èn joisti soleki fa mi gi rai, na dati sa kon troe.’ ” — Josua 23:14; Numeri 23:19; Jesaja 14:24.
5. Sortoe aksi moesoe kisi wan piki?
5 Ma efoe Gado ben abi na prakseri foe seti wan paradijs na grontapoe sondro pina, dan foe san ede a ben gi pasi meki takroe sani pasa na ini a bigin? Foe san ede a ben wakti siksi doesoen jari langa te leki now, foe poti san fowtoe kon reti baka? Ala den foeroe hondro jari disi foe pina ben sa sori kande taki Gado no e broko en ede troetroe nanga wi, noso taki a no de srefi?