Pisi 1
Gado e broko en ede troetroe nanga wi?
1, 2. Sortoe aksi sma e aksi densrefi foe Gado, èn foe san ede?
WANWAN leisi na ini joe libi, kande joe aksi joesrefi: ’Efoe wan Gado de di e broko en ede troetroe nanga wi, dan foe san ede a e gi pasi meki so foeroe pina de?’ Wi alamala ondrofeni pina noso sabi wan sma di ondrofeni dati.
2 Ija, na ini a heri historia, sma pina foe pen nanga sari na ati di de a bakapisi foe feti, ogri-atidoe, ogridoe, onregtfardikifasi, pôtifasi, siki nanga a dede foe lobiwan. Na ini a di foe 20 jarihondro foe wi wawan, moro leki 100 miljoen sma dede na ini feti. Hondrohondro miljoen trawan kisi mankeri noso lasi oso nanga goedoe. Kefalek foeroe takroe sani pasa na ini a ten foe wi, di tjari bigi sari, foeroe watra-ai nanga wan firi foe de sondro howpoe kon gi wan heri ipi sma.
3, 4. Fa foeroe sma e denki foe a gi di Gado e gi pasi meki pina de?
3 Son sma kon kisi bita-ati èn e denki taki efoe wan Gado de, dan a no e broko en ede troetroe nanga wi. Noso kande den e denki srefi taki Gado no de. Foe eksempre, wan man di ben pina foe a froefolgoe di sma ben froefolgoe etnisch groepoe, san ben meki taki mati nanga famiri foe en ben dede na ini a Fosi Grontapoefeti, ben aksi: „Pe Gado ben de di wi ben abi en fanowdoe?” Wan trawan di ben tan na libi, di den Nazisma ben kiri miljoenmiljoen sma na ini a di foe Toe Grontapoefeti, ben kisi so wan bita-ati foe a pina di a ben si, meki a ben taki: „Efoe joe ben kan leki mi ati, a ben sa kiri joe leki vergif.”
4 So boen, foeroe sma no kan froestan foe san ede wan boen Gado ben sa gi pasi meki takroe sani e pasa. Den e tweifri efoe a e broko en ede troetroe nanga wi noso efoe a de troetroe. Èn foeroe foe den e denki taki pina sa de ala ten wan pisi foe a libisma libi.
[Prenki na tapoe bladzijde 2, 3]
Wan njoen grontapoe sondro pina de krosibei?