Lès 3
Soema na Jesus Krestes?
Foe san ede den e kari Jesus a „fosi gebore” Manpikin foe Gado? (1)
Foe san ede den e kari en „a Wortoe”? (1)
Foe san ede Jesus ben kon na grontapoe leki wan libisma? (2-4)
Foe san ede a ben doe wondroe? (5)
San Jesus o doe na ini a krosibei ten di e kon? (6)
1. Jesus ben libi na hemel leki wan jeje sma bifo a ben kon na grontapoe. A ben de a fosi sani di Gado ben meki, èn foe dati ede den e kari en a „fosi gebore” Manpikin foe Gado (Kolosesma 1:15; Openbaring 3:14). Jesus na a wan-enkri Manpikin di Gado srefi ben meki. Jehovah ben gebroiki Jesus, bifo a ben de wan libisma, leki a „meester wrokoman” foe en foe meki ala tra sani na hemel èn na grontapoe (Odo 8:22-31; Kolosesma 1:16, 17). Gado ben gebroiki en toe leki a prenspari takiman foe En. Dati meki den e kari Jesus „a Wortoe”. — Johanes 1:1-3; Openbaring 19:13.
2. Gado ben seni En Manpikin go na grontapoe foe di A ben tjari a libi foe en go na a moeroe foe Maria. So boen, Jesus no ben abi wan libisma papa. Dati meki a no ben kisi no wan sondoe noso onvolmaaktifasi. Gado ben seni Jesus kon na grontapoe foe dri sani ede: (1) Foe leri wi a waarheid di abi foe doe nanga Gado (Johanes 18:37), (2) foe tan hori volmaakti soifri retifasi èn gi wi wan model foe waka na baka (1 Petrus 2:21), èn (3) foe òfer en libi foe froeloesoe wi foe sondoe nanga dede. Foe san ede disi ben de fanowdoe? — Mateus 20:28.
3. Foe di a fosi man, Adam, ben trangajesi a komando foe Gado, a ben doe san bijbel e kari „sondoe”. So boen, Gado ben leisi strafoe gi en taki a ben o dede (Genesis 3:17-19). A no ben doro den markitiki foe Gado moro, dati meki a no ben de volmaakti moro. Safrisafri a ben kon owroe èn dede. Adam ben gi sondoe abra na ala den pikin foe en. Dati meki wi toe e kon owroe, e kon siki, èn e dede. Fa a libisma famiri ben kan kisi froeloesoe? — Romesma 3:23; 5:12.
4. Jesus ben de wan volmaakti libisma neleki Adam. Ma tra fasi leki Adam, Jesus ben gi jesi na Gado na wan volmaakti fasi na ondro srefi a moro hebi tesi. Foe dati ede a ben kan òfer en volmaakti libisma libi foe pai gi a sondoe foe Adam. Disi na san bijbel e sori go na en leki a „loesoe-paiman”. Dati meki den pikin foe Adam ben kan kon fri foe a strafoe foe dede. Ala sma di e poti bribi na ini Jesus, kan kisi pardon foe den sondoe foe den èn kisi têgo libi. — 1 Timoteus 2:5, 6; Johanes 3:16; Romesma 5:18, 19.
5. Di Jesus ben de na grontapoe, a ben dresi den sikiwan, ben gi njanjan na den angriberewan, èn ben bedari bigi winti. A ben opo srefi den dedewan. Foe san ede a ben doe wondroe? (1) A ben firi sari gi sma di ben e pina, èn a ben wani jepi den. (2) Den wondroe foe en ben sori taki a ben de a Manpikin foe Gado. (3) Den ben sori san a sa doe gi a libisma famiri di e gi jesi, te a e tiri grontapoe leki Kownoe. — Mateus 14:14; Markus 2:10-12; Johanes 5:28, 29.
6. Jesus ben dede èn Gado ben opo en baka leki wan jeje mekisani, èn a ben drai go baka na hemel (1 Petrus 3:18). Sensi a ten dati, Gado meki a tron wan Kownoe. Heri esi Jesus sa poeroe ala ogridoe nanga pina na a grontapoe disi. — Psalm 37:9-11; Odo 2:21, 22.
[Prenki na tapoe bladzijde 7]
A leri di Jesus ben leri sma, den wondroe di a ben doe, èn srefi na òfer di a ben òfer en libi gi wi, ben de wan pisi foe a diniwroko foe en