Yesus E Frulusu Sma—Fa A E Du Dati?

„Yesus e frulusu sma!” „Yesus na wi Frulusuman!” Na ini furu kondre na grontapu, den sortu boskopu disi de fu leisi na tapu skotu fu gebow èn na ini tra presi pe furu sma e kon. Milyunmilyun sma e bribi trutru taki Yesus na den Frulusuman. Efu yu ben o aksi den, „Fa Yesus e frulusu wi?”, dan kande den ben o piki, „Yesus dede gi wi”, noso „Yesus dede gi den sondu fu wi”. Iya, a dede fu Yesus e meki taki wi kan kisi frulusu. Ma fa a dede fu wán-enkri man kan pai gi den sondu fu ipi-ipi sma? Efu wan sma ben o aksi yu, „Fa a dede fu Yesus kan frulusu wi?”, dan san yu ben o taki?

A PIKI di Bijbel e gi tapu na aksi disi na trutru wan sempel wan, ma a de wan krinkrin piki di wani taki furu. Ma fu man frustan o prenspari a piki disi de, dan wi musu si a libi nanga a dede fu Yesus fosi leki wan lusu gi wan tumusi muilek problema. Soso te wi e du dati, wi sa man frustan taki a dede fu Yesus abi furu waarde.

Fu di Adam ben sondu, meki wan situwâsi kon de na grontapu. Fu man du wan sani na dati, dan Gado meki Yesus gi a libi fu en. A sondu dati trutru ben de wan rampu! A fosi man nanga en wefi, Efa, ben de volmaakti sma. A moi dyari fu Eden ben de a tanpresi fu den. Gado ben gi den wan wroko di ben abi wan marki; den ben musu sorgu gi a dyari pe den ben tan na ini. Den ben musu tiri den tra mekisani di ben libi na grontapu, na wan lobi-ati fasi. Te den libisma ben o kisi pikin èn ben o furu grontapu nanga milyunmilyun sma, dan den ben musu meki a heri grontapu tron wan paradijs (Genesis 1:28). Dati trutru ben de wan switi èn prisiri wroko di den ben kisi! Boiti dati, den ben abi a lobi-ati matifasi nanga makandra (Genesis 2:18). Den no ben mankeri noti. Den ben kan fruwakti wan koloku têgo libi.

A muilek fu prakseri fa Adam noso Efa ben kan sondu. Ma a fosi libisma paar opo densrefi teige a sma di ben meki den — Yehovah Gado. A yeye mekisani Satan Didibri gebroiki wan sneki fu kori Efa, so taki a ben kan trangayesi Yehovah, èn Adam handri na a srefi fasi leki a wefi fu en.—Genesis 3:1-6.

Tweifri no ben de fu san a Mekiman ben o du nanga Adam nanga Efa. A ben taigi den krinkrin kaba san ben o de a bakapisi efu den ben o trangayesi en. A ben taki: „Fu ibri bon fu a dyari yu mag nyan te yu bere furu. Ma fu a bon fu sabi bun nanga ogri, fu dati yu no musu nyan, bika na a dei di yu sa nyan fu dati, yu sa dede nomonomo” (Genesis 2:16, 17). Now wan moro prenspari aksi ben musu kisi piki.

Wan Muilek Problema Miti a Libisma Famiri

A fosi sondu tyari wan trutru seryusu problema kon gi a libisma famiri. Na ini a bigin Adam ben de wan volmaakti libisma. Fu dati ede, den pikin fu en ben kan abi wan volmaakti libi fu têgo. Ma Adam ben sondu bifo a ben kisi pikin. A heri libisma ras ben de ete na ini en mindribere di a ben kisi a strafu disi: „Ini a sweti fu yu fesi yu sa nyan brede, teleki yu drai go baka na a gron, bika na drape Gado ben teki yu puru. Bika doti yu de èn na doti yu sa drai go baka” (Genesis 3:19). Fu dati ede, di Adam sondu dan a bigin dede neleki fa Gado ben taki dati a ben o pasa nanga en, èn a heri libisma famiri kisi a strafu fu dede makandra nanga en.

Fu dati ede, na apostel Paulus ben skrifi baka ten: „Nanga wán man [Adam], sondu ben kon na grontapu èn nanga sondu dede kon, èn na so dede panya go na ala libisma, fu di den alamala ben sondu” (Romesma 5:12). Iya, pikin-nengre ben musu gebore volmaakti èn den ben musu libi fu têgo. Ma a fosi sondu meki taki baka di den gebore, den kan fruwakti fu kisi siki, fu kon owru, èn fu dede srefi.

Ma kande wan sma sa taki: „Dati no de regtfardiki. A no wi teki a bosroiti fu trangayesi Gado — na Adam ben du dati. Fu san ede wi no kan abi howpu moro fu libi fu têgo èn fu de koloku?” Wi sabi taki efu wan krutubangi ben o poti wan manpikin na strafu fu di en papa ben fufuru wan oto, dan a manpikin ben kan kragi nanga reti: „Dati no de regtfardiki! Mi no du no wan ogri.”—Deuteronomium 24:16.

Fu di Satan kori a fosi mansma nanga umasma fu sondu, dan kande a prakseri taki a ben o poti Gado na ini wan muilek situwâsi. Libisma no ben de langa na grontapu ete di Didibri kon feti nanga den — den no ben meki pikin srefi ete. A momenti di Adam sondu, dan wan prenspari aksi opo kon. Na aksi disi ben de: San Yehovah o du nanga den pikin di Adam nanga Efa o kisi?

Yehovah Gado du san ben de reti èn san ben de regtfardiki. A regtfardiki man Elihu ben fruklari: „Na wan sani di de fara fu a tru Gado fu handri na wan kruktu fasi, èn fu na Almaktiwan fu handri onregtfardiki!” (Yob 34:10) A profeiti Moses ben skrifi fu Yehovah: „A Klepston, volmaakti en wroko de, bika ala den pasi fu en na retidu. Wan Gado fu getrowfasi, di na en no wan kruktudu de; regtfardiki èn opregti a de” (Deuteronomium 32:4). A tru Gado ben sorgu gi wan lusu fu a problema di a sondu fu Adam ben tyari kon. Toku wi abi na okasi ete fu libi fu têgo na tapu wan paradijs grontapu.

Gado E Sorgu gi wan Heri Bun Lusu

Poti prakseri na a lusu disi. A strafu di Gado o gi Satan Didibri e sori finifini fa A sa lusu a problema. Yehovah ben taigi Satan: „Mi sa poti feantifasi na mindri yu nanga na uma [Gado en hemel organisâsi] èn na mindri yu siri [a grontapu di Satan e tiri] nanga en siri [Yesus Krestes]. A sa masi yu [Satan] na a ede èn yu sa masi en na a bakafutu [Yesus en dede]” (Genesis 3:15). Ini a fosi profeititori disi fu Bijbel, Yehovah sori go na a marki di a ben abi fu meki en hemel yeye Manpikin kon na grontapu fu libi leki a volmaakti man Yesus èn fu dede — noso, Satan ben o masi en na ini en bakafutu, ala di a ben de wan sma sondro sondu.

Fu san ede Gado ben wani taki wan volmaakti mansma ben musu dede? We, sortu strafu Yehovah Gado ben o gi Adam efu a ben sondu? A ben musu dede, a no so? (Genesis 2:16, 17) „Sondu e pai nanga dede”, na so na apostel Paulus ben skrifi (Romesma 6:23). Adam dede, èn na so fasi a ben pai gi den sondu fu en. A ben kisi libi, ma a teki a bosroiti fu sondu, èn a dede leki strafu fu den sondu fu en (Genesis 3:19). Fa a de nanga a fluku di a sondu dati tyari kon tapu a heri libisma ras? Wan sma ben sa musu dede fu pai gi den sondu fu den. Ma a dede fu suma ben o man tapu den sondu fu a heri libisma famiri na wan reti fasi?

A Wet di Gado ben gi a nâsi Israèl fu owruten ben wani taki a pipel ben musu gi „sili fu sili [noso, libi gi libi]” (Exodus 21:23). Akruderi a wet disi, dan a sma di ben o dede fu tapu den sondu fu a libisma famiri, ben musu de wan sma di en libi ben abi a srefi waarde leki a volmaakti libi di Adam ben lasi. A dede fu wan tra volmaakti sma wawan ben kan pai a paiman fu sondu. Yesus ben de so wan man. Iya, Yesus ben de „wan srefi sortu lusu-paiman” di ben o kibri a heri libisma famiri di ben de bakapikin fu Adam, èn di ben warti fu kisi frulusu.—1 Timoteus 2:6; Romesma 5:16, 17.

A Dede fu Yesus Abi Furu Waarde

A dede fu Adam no ben abi waarde; a ben musu dede fu di a ben sondu. Ma a dede fu Yesus ben abi furu waarde, bika a dede leki wan sma sondro sondu. Yehovah Gado ben kan teki a waarde fu Yesus en volmaakti libi leki wan lusu-paiman gi den getrow bakapikin fu Adam di ben sondu. Èn a waarde fu na ofrandi fu Yesus no e pai fu den sondu wawan di wi du fosi. Efu dati ben de so dan wi no ben o abi howpu gi a ten di e kon. Fu di wi gebore na ini sondu, dan sondro tweifri wi sa sondu baka (Psalm 51:5). Wi musu de nanga tangi na ati trutru taki a dede fu Yesus e gi wi na okasi fu kisi a volmaaktifasi di Yehovah ben wani gi den bakapikin fu Adam nanga Efa na ini a bigin!

Wi kan agersi Adam nanga wan papa di dede èn di libi wi nanga so wan bigi paiman (sondu) taki na no wan fasi wi sa man pai a paiman dati. Na a tra sei, Yesus de leki wan bun papa di dede èn di libi wan bigi gudu gi wi. A gudu disi e frulusu wi fu a bigi paiman di Adam poti na wi tapu. Boiti dati, a e gi wi so srefi san wi abi fanowdu fu tan libi fu têgo. A dede fu Yesus no e tapu den sondu wawan di wi du fosi; a de wan moi seti so srefi gi a ten di e kon.

Yesus na a frulusuman fu a libisma famiri fu di a dede gi wi. Èn a dede fu en trutru abi furu waarde! Wi musu si a dede fu en leki wan fasi fa Gado e lusu a muilek problema fu a sondu di Adam sondu. Te wi e du dati, dan a bribi fu wi na ini Yehovah èn na ini a fasi fa a e du sani, e kon moro tranga! Iya, a dede fu Yesus na wan fasi fu frulusu „ibriwan sma di e sori bribi” na ini en. Den sa kisi frulusu fu sondu, siki, owru yari, nanga dede srefi (Yohanes 3:16). Yu de nanga tangi na ati taki Gado sorgu gi a lobi-ati seti disi di sa tyari frulusu kon gi wi?

[Prenki na tapu bladzijde 5]

Adam tyari sondu nanga dede kon tapu a libisma famiri

[Prenki na tapu bladzijde 6]

Yehovah sorgu gi wan heri bun lusu