Foe san ede wi e dede?
„Now a de tiri na tapoe na ede foe ala den pikin bergi, pikinmoro joe no e jere wan sani di e bro na tapoe ala den ede foe den bon; den fowroe e sribi ini den bon: wakti; heri esi joe sa rostoe neleki den.” — JOHANN WOLFGANG VON GOETHE, WAN DOISRI POEWEMA SKRIFIMAN.
1, 2. (a) Gado ben kria libisma nanga na angri foe san? (b) Sortoe libi a fosi libisma paar ben abi?
GADO ben kria libisma nanga na angri foe libi foe têgo. Ija, bijbel e taki dati a ben poti „wan firi foe têgo ten na ini den ati” (Preikiman 3:11, Beck). Ma Gado ben doe moro leki foe gi libisma na angri nomo foe libi foe têgo. A ben gi den so srefi na okasi foe libi foe têgo.
2 Gado ben kria wi fosi papa nanga mama, Adam nanga Eva volmaakti, no wan sani ben mankeri den na froestan sei noso na skin sei (Deuteronomium 32:4). Prakseri foe disi — no wan siki nanga pen di e tan langa, no wan takroe sortoe frede noso broko-ede! Moro fara, Gado ben poti den na ini wan moi paradijs oso. Gado ben abi na prakseri taki libisma ben sa libi foe têgo èn taki baka ten grontapoe ben sa foeroe nanga den volmaakti pikin foe en (Genesis 1:31; 2:15). Foe san ede wi e dede dan?
Trangajesi e tjari dede kon
3. Foe san têgo libi gi Adam nanga Eva ben anga?
3 Gado ben komanderi Adam: „Foe ibri bon foe a djari joe mag njan te joe bere foeroe. Ma foe a bon foe sabi boen nanga ogri, foe dati joe no moesoe njan, bika na a dei di joe sa njan foe dati, joe sa dede nomonomo” (Genesis 2:16, 17). So boen, têgo libi gi Adam nanga Eva ben de nanga wan kondisi; a ben anga foe a gi di den ben o gi jesi na Gado.
4. Foe san ede Adam nanga Eva ben lasi a howpoe foe libi foe têgo na ini a Paradijs di den ben sondoe?
4 Ma na wan sari sani taki Adam nanga Eva ben trangajesi a wet foe Gado (Genesis 3:1-6). Foe di den ben doe dati, dan den ben tron sondari, bika „sondoe na kroektoedoe” (1 Johanes 3:4). A bakapisi foe dati ben de taki Adam nanga Eva no ben abi a howpoe moro foe libi foe têgo. Foe san ede? Bika „a pai foe sondoe na dede” (Romesma 6:23). Foe dati ede, di Gado ben meki a strafoe foe Adam nanga Eva bekènti, a ben taki: „Doti joe de èn na doti joe sa drai go baka.” Baka dati wi fosi papa nanga mama ben jagi komoto na a Paradijs oso foe den. A dei di Adam nanga Eva ben sondoe, den ben bigin dede safri-safri, ma na wan fasi di ben e go doro nomonomo. — Genesis 3:19, 23, 24.
„Dede panja go na ala libisma”
5. Fa dede ben panja go na a heri libisma famiri?
5 Now sondoe poti leki wan dipi marki na ini den gen foe Adam nanga Eva. Dati meki den no ben kan meki volmaakti pikin, neleki fa wan mal di no boen, no kan meki boen sani (Job 14:4). Foe troe, ibritron te wan sma gebore e boeweisi taki wi fosi papa nanga mama ben lasi volmaakti gosontoe nanga têgo libi gi densrefi èn gi den pikin foe den. A kresten apostel Paulus ben skrifi: „Nanga wán man, sondoe ben kon na grontapoe èn nanga sondoe dede kon, èn na so dede panja go na ala libisma, foe di den alamala ben sondoe.” — Romesma 5:12; teki gersi Psalm 51:5.
6. Foe san ede wi e dede?
6 Na ini a ten disi sabidensiman no sabi foe san ede libisma e kon owroe èn e dede. Ma bijbel e tjari kon na krin taki wi e dede bika wi gebore nanga sondoe, èn wi kisi a fasi disi foe wi fosi libisma papa nanga mama. Ma san e pasa nanga wi te wi dede?