Suma Na den Feanti fu Gado?

A moro bigi feanti fu Gado na Satan Didibri. En na wan yeye di ben opo feti nanga Yehovah. Satan e tan feti nanga Gado èn e tyari bun bigi problema kon gi libisma. Satan ogri trutru. A de wan leiman èn wan kiriman.​—Yohanes 8:44.

Tra yeye ben span anu makandra nanga Satan fu opo feti nanga Gado. Bijbel e kari den ogri yeye. Neleki Satan, na so den ogri yeye na feanti fu libisma tu. Den lobi fu du sma ogri (Mateus 9:32, 33; 12:22). Yehovah sa kiri Satan nanga den ogri yeye fu en fu têgo. Wan syatu ten nomo tan abra gi den fu tyari problema kon gi libisma.​—Openbaring 12:12.

Efu yu wani de Gado mati, dan yu no musu du san Satan wani fu du. Satan nanga den ogri yeye fu en no lobi Yehovah kwetikweti. Den na feanti fu Gado, èn den wani meki yu tron wan feanti fu Gado. Yu musu luku suma yu wani plisi — Satan noso Yehovah. Efu yu wani têgo libi, dan yu musu du Gado wani. Satan abi furu triki èn a sabi furu fasi fu kori sma. A e kori moro furu sma.​—Openbaring 12:9.