A leri foe Gado kontrari den leri di e kon foe den ogri jeje
„Son sma sa fadon komoto na a bribi, foe di den sa poti prakseri tapoe bidrigi wortoe èn den leri di e kon foe den ogri jeje.” — 1 TIMOTEUS 4:1.
1. Na ini sortoe feti kresten de leti na mindri?
GO PRAKSERI taki joe e libi joe heri libi langa ini wan kontren pe orlokoe de. Fa a ben sa de foe go sribi ala di joe e jere a babari foe kanoe di e soetoe èn e wiki nanga a babari foe gon? A de wan sari sani, taki na ini son pisi foe grontapoe, dati na troetroe fa sma e libi. Ma na wan jeje fasi, ala kresten e libi na a fasi disi. Den de leti na mindri wan bigi feti di e feti foe so wan 6000 jari kaba èn di e kon moro faja ini a ten foe wi. San na a orlokoe disi di e feti so wan langa pisi ten kaba? Na a feti foe waarheid kontrari lei, foe a leri foe Gado kontrari den leri di e kon foe den ogri jeje. A no de pasa marki foe kari a feti disi — awansi fa a no fa na a sei foe wan foe den prenspari fetiman — a moro bita-ati strei di kiri sma moro ala tra strei ini a historia foe a libisma famiri.
2. (a) Sortoe toe sei de kontrari makandra, so leki fa Paulus e taki? (b) San Paulus ben wani taki nanga „a bribi”?
2 Na apostel Paulus ben taki foe den toe sei foe a strei disi di a ben skrifi Timoteus: „Den wortoe di taki nanga jepi foe santa jeje e taki krin taki ini den pisi ten di e kon baka ten, son sma sa fadon komoto na a bribi, foe di den sa poti prakseri tapoe bidrigi wortoe èn den leri di e kon foe den ogri jeje” (1 Timoteus 4:1). Loekoe taki den leri di e kon foe den ogri jeje ben sa abi en krakti spesroetoe ini „den pisi ten di e kon baka ten”. Efoe wi e loekoe fa sani ben de ini a ten foe Paulus, dan wi e libi ini so wan ten. Loekoe toe, san de kontrari den leri di e kon foe den ogri jeje, dati na „a bribi”. Djaso, „a bribi” e prenki a leri foe Gado, di abi en gron tapoe den wortoe di Gado taki nanga jepi foe santa jeje, so leki fa a de foe feni ini bijbel. So wan bribi na wan sani di e gi libi. A e leri wan kresten foe doe a wani foe Gado. A de waarheid di abi têgo libi leki bakapisi. — Johanes 3:16; 6:40.
3. (a) San e pasa nanga sma di dede na ini a feti na mindri waarheid nanga lei? (b) Soema de baka den leri di e kon foe den ogri jeje?
3 Iniwan sma di e fadon komoto na bribi, e lasi a têgo libi. Den na sma di e dede ini na orlokoe. Fa dati de wan sari bakapisi, foe di wan sma gi ensrefi pasi foe den leri di e kon foe den ogri jeje kori en! (Mateus 24:24) Fa wi leki aparti sma kan tan farawe foe dede ini na orlokoe? Foe di wi e weigri krinkrin foe teki den lei leri disi, di de soso foe doe a wani foe Satan Didibri „a tiriman foe den ogri jeje” (Mateus 12:24). So leki fa wi kan froewakti kaba, dan den leri foe Satan na lei, foe di Satan na „a papa foe lei” (Johanes 8:44). Loekoe fa a ben gebroiki lei na wan konifasi foe kori a fosi papa nanga mama foe wi.
Den e meki den leri di e kon foe den ogri jeje kon na krin
4, 5. Sortoe lei Satan ben froeteri Eva èn foe san ede dati ben de so wan ogri sani?
4 Den sani di pasa, skrifi ini bijbel ini Genesis 3:1-5. Satan ben go na a oema Eva, di a ben gebroiki wan sneki, èn a ben aksi en: „A de troetroe so, taki Gado taki dati oenoe no mag njan foe ala bon foe a djari?” Na aksi no gersi wan ogri sani, ma loekoe na aksi baka. „A de troetroe so?” A gersi leki Satan e froewondroe, neleki a wani aksi: ’Foe san ede Gado ben sa taki so wan sani?’
5 Foe di Eva ben abi wan krin ati, a ben sori taki disi ben de so. A ben sabi a leri foe Gado ini a tori disi, taki Gado ben taigi Adam taki den ben sa dede, efoe den ben njan foe a bon foe sabi boen nanga ogri (Genesis 2:16, 17). A de krin, taki na aksi foe Satan ben wiki a belangstelling foe Eva, so boen a ben arki di Satan ben doro pe a ben wani kon: „Ne a sneki taigi na oema taki: ’Joe no sa dede kwetikweti.’” Fa dati ben de wan ogri sani foe taki! Satan ben gi Jehovah, a Gado foe waarheid, a Gado foe lobi, a Mekiman, a nen taki a ben lei gi den libisma pikin foe En! — Psalm 31:5; 1 Johanes 4:16; Openbaring 4:11.
6. Fa Satan ben meki sma tweifri na a boenfasi nanga a soevereinfasi foe Jehovah?
6 Ma Satan ben taki moro. A ben go doro: „Bika Gado sabi taki na a dei ete di oenoe e njan foe en, oen ai troetroe sa kon opo èn oenoe sa de leki Gado, ala di oenoe sabi boen nanga ogri.” So leki fa Satan ben taki, dan Jehovah Gado — di ben gi someni sani na a fosi papa nanga mama foe wi — no ben wani foe den kisi wan moi sani. A ben wani tapoe den foe den de leki gado. So boen, Satan ben meki sma tweifri na a boenfasi foe Gado. A ben meki a firi go na fesi toe foe sma de tevrede nanga densrefi èn a poti di sma foe espresi no e poti prakseri tapoe den wet foe Gado, foe di a ben taki dati efoe sma ben sa doe na a fasi disi, dan dati ben sa tjari wini kon gi den. Foe taki en leti, Satan ben taki dati Gado no abi a reti foe de Soeverein foe En eigi mekisani, sondro foe a ben man boeweisi taki Gado no ben abi a reti foe poti skotoe gi san libisma ben doe.
7. Oten sma ben jere foe a fositron foe den leri di e kon foe den ogri jeje èn fa den leri de a srefi ini a ten disi?
7 Nanga den wortoe dati foe Satan, sma ben bigin jere den leri di e kon foe den ogri jeje. Den ogri leri disi, te now ete e meki den srefi gronprakseri di no de foe Gado, go na fesi. Neleki fa Satan ben doe na ini a djari foe Eden, na so, makandra nanga den tra jeje di opo densrefi kontrari Gado, a e taki te now ete dati Gado no abi a reti foe poti markitiki di abi foe doe nanga fa sma moesoe tjari densrefi. Te now ete Satan e meki sma tweifri na a soevereinfasi foe Jehovah èn a e proeberi foe meki libisma trangajesi a hemel Tata foe den. — 1 Johanes 3:8, 10.
8. San Adam nanga Eva ben lasi na ini Eden, ma fa a ben kon na krin taki Jehovah ben abi leti?
8 Ini a fosi strei dati ini a feti di e go na mindri a leri foe Gado èn den leri di e kon foe den ogri jeje, Adam nanga Eva ben teki wan fowtoe bosroiti èn den ben lasi a howpoe foe den foe libi foe têgo (Genesis 3:19). Ala di ten ben e pasa gowe èn a skin foe den ben bigin foe go na baka, boeweisi ben de nofo gi den foe sori soema ben lei èn soema ben froeteri a waarheid drape na ini Eden. Ma hondrohondro jari bifo den dede na wan skin fasi, den ben tron den fosi sma di dede ini a feti na mindri waarheid nanga lei, di a Mekiman foe den, a Fonten foe libi, ben gi den a kroetoe taki den no ben warti foe libi. Dati ben de, di den dede na wan jeje fasi. — Psalm 36:9; teki gersi Efeisesma 2:1.
Den leri di e kon foe den ogri jeje ini a ten disi
9. Omeni bakapisi den leri di e kon foe den ogri jeje ben abi ini ala den jarihondro?
9 So leki fa a skrifi ini a boekoe Openbaring, dan den ben tjari na apostel Johanes, nanga jepi foe santa jeje, go ini „a dei foe Masra”, di ben bigin ini 1914 (Openbaring 1:10). Na a ten dati den ben trowe Satan nanga den ogri jeje foe en komoto na hemel, kon ini a kontren foe grontapoe — wan bigi lasi gi a gensman disi foe wi Gran Mekiman. En sten no ben de foe jere moro na hemel, pe a ben kragi den foetoeboi foe Jehovah doronomo (Openbaring 12:10). Ma fa den leri di e kon foe den ogri jeje ben go na fesi na grontapoe foe sensi a ten foe Eden? A tori e taki: „Den ben iti a bigi draak kon, a fosi sneki, di nen Didibri nanga Satan, di e kori a heri grontapoe pe sma e libi” (Openbaring 12:9). Wan heri grontapoe broko kindi gi den lei foe Satan! A no de foe froewondroe, taki den e kari Satan „a tiriman foe a grontapoe disi”! — Johanes 12:31; 16:11.
10, 11. Na sortoe fasi Satan nanga den ogri jeje foe en e wroko ini a ten disi?
10 A de so taki, Satan ben erken taki a ben lasi, baka di den jagi en komoto na hemel? Kwetikweti! A ben abi a fasti bosroiti foe tan feti nanga a leri foe Gado èn nanga den sma di e tan hori densrefi steifi na disi. Baka di den trowe Satan komoto na hemel, a ben go doro nanga a feti foe en: „A draak [Satan] ati ben bron nanga na oema, èn a ben go foe feti nanga denwan foe en siri di ben tan abra, di e doe den komando foe Gado, èn di abi a wroko foe gi kotoigi foe Jesus.” — Openbaring 12:17.
11 Na tapoe foe dati Satan e feti nanga den foetoeboi foe Gado, a e foeroe grontapoe pasa marki nanga ala den leri foe en, foe di a e doe moeiti foe hori en makti tapoe a libisma famiri. Ini wan foe den fisjoen ini na Openbaring di na apostel Johanes ben kisi foe a dei foe Masra, a ben si dri werdri meti di na wan agersifasi ben prenki Satan, en grontapoe politiek organisâsi, nanga a tranga grontapoe makti foe wi ten. Todo ben komoto na a mofo foe den dri meti disi. San den todo disi ben agersi? Johanes e skrifi: „Foe taki en leti, den na wortoe di taki nanga jepi foe ogri jeje èn den e doe marki, èn den e go na den kownoe foe a heri grontapoe pe sma e libi, foe tjari den kon na wán gi a feti foe a bigi dei foe Gado na Almaktiwan” (Openbaring 16:14). A de krin, taki den leri di e kon foe den ogri jeje e wroko boen srefisrefi na grontapoe. Satan nanga den ogri jeje foe en e feti te now ete nanga a leri foe Gado èn den sa go doro te leki Jesus Krestes, a Mesias Kownoe, tapoe den nanga tranga. — Openbaring 20:2.
Kon sabi den leri di e kon foe den ogri jeje
12. (a) Foe san ede sma man kakafoetoe gi den leri foe den ogri jeje? (b) Fa Satan e proeberi foe doe san a abi na prakseri nanga den foetoeboi foe Gado?
12 Sma di abi frede gi Gado kan kakafoetoe gi den leri di e kon foe den ogri jeje? Foe troe den kan doe disi, èn foe toe reide ede. A fosi reide na foe di a leri foe Gado de moro tranga; èn a di foe toe reide na foe di Jehovah ben tjari den fasi fa Satan e wroko kon na krin, so taki wi kan kakafoetoe gi den. So leki fa na apostel Paulus ben taki, dan „wi no de sondro sabi foe san a abi na prakseri” (2 Korentesma 2:11). Wi sabi taki Satan e gebroiki froefolgoe leki wan fasi foe doe san a abi na prakseri (2 Timoteus 3:12). Ma san de wan moro triki sani, na taki a e proeberi foe abi krakti tapoe a froestan nanga na ati foe den sma di e dini Gado. A ben kori Eva èn a ben poti fowtoe angri na ini en ati. Ini a ten disi a e proeberi a srefi sani. Paulus ben skrifi gi den sma foe Korente: „Mi e frede taki na a wan noso tra fasi, neleki fa a sneki ben kori Eva nanga triki, na so oen froestan ben sa kon pori èn ben sa drifi komoto na a opregtifasi èn a krinfasi di fiti Krestes” (2 Korentesma 11:3). Go prakseri fa a ben pori a denki foe a libisma famiri ini algemeen.
13. Sortoe lei Satan ben froeteri a libisma famiri foe sensi Eden?
13 Na fesi foe Eva, Satan ben gi Jehovah a nen foe wan leiman èn a ben taki dati libisma ben man de leki gado efoe den ben trangajesi a Mekiman foe den. A sondoe fasi foe a libisma famiri ini a ten disi, e boeweisi taki Satan ben de a leiman èn no Jehovah. Libisma ini a ten disi a no gado! Ma Satan ben meki tra lei kon na baka a fosi lei dati. Na en ben meki sma kon kisi a prakseri taki a sili foe libisma no man dede. Na so fasi a ben pristeri a libisma famiri na wan korifasi wan tra fasi fa den ben kan de leki gado. Baka dati, tapoe gron foe a falsi leri dati, a ben meki den leri foe hèlfaja, vagevuur, afkodrei, nanga na anbegi foe den fositen tata, go na fesi. Te now ete hondrohondro miljoen sma de leki srafoe foe den lei disi. — Deuteronomium 18: 9-13.
14, 15. San na a waarheid ini a tori foe dede èn a howpoe gi libisma ini a ten di e kon?
14 A no de foe taki, dati san Jehovah ben froeteri Adam ben de waarheid. Adam dede troetroe di a ben sondoe teige Gado (Genesis 5:5). Di Adam nanga den pikin foe en dede, den ben tron dede sili, den no ben sabi notinoti èn den no ben man doe noti (Genesis 2:7; Preikiman 9:5, 10; Esekièl 18:4). Foe di ala libisma sili kisi sondoe foe Adam, meki den e dede (Romesma 5:12). Ma drape na ini Eden, Jehovah ben pramisi taki wan siri ben sa kon di ben sa feti nanga den wroko foe Didibri (Genesis 3:15). A Siri dati ben de Jesus Krestes, Gado en eigi wan-enkri gebore Manpikin. Jesus dede sondro sondoe, èn a libi foe en di a ben gi leki ofrandi, ben tron wan froeloesoe-paiman foe loesoe a libisma famiri foe a fasi foe den taki den e dede. Den sma di e poti bribi na ini Jesus foe di den e gi jesi, abi na okasi foe kisi a têgo libi di Adam ben lasi. — Johanes 3:36; Romesma 6:23; 1 Timoteus 2:5, 6.
15 A froeloesoe-paiman na a troetroe howpoe gi a libisma famiri, èn no wan dangra prakseri taki a sili e tan na libi baka dede. Disi na a leri foe Gado. A de waarheid. A e sori a lobi nanga a koni foe Jehovah na wan heri moi fasi toe (Johanes 3:16). Fa wi moesoe de grantangi taki wi ben leri a waarheid disi èn ben kon fri foe den leri di e kon foe den ogri jeje ini a tori foe den afersi disi! — Johanes 8:32.
16. San na den bakapisi di de foe wan langa pisi ten te libisma e waka baka den eigi koni?
16 Nanga jepi foe den lei di Satan ben lei ini a djari foe Eden, a ben gi Adam nanga Eva a deki-ati foe soekoe foe no abi foe gi frantiwortoe moro na Gado èn foe froetrow tapoe den eigi koni. Ini a ten disi, wi e si den bakapisi foe dati, di de foe wan langa pisi ten, ini na ogridoe, den problema na ekonomia sei, den orlokoe, nanga a de di sani no de ini balansi srefisrefi ini a grontapoe foe a ten disi. A no de foe froewondroe taki bijbel e taki: „A koni foe a grontapoe disi na wan law sani na Gado!” (1 Korentesma 3:19) Ma tokoe moro foeroe libisma e froekisi na wan lawfasi foe njan pina na presi foe poti prakseri tapoe den leri foe Jehovah (Psalm 14:1-3; 107:17). Kresten di teki den leri foe Gado, e tan farawe foe no fadon go ini a trapoe dati.
17. Sortoe „sokari falsi sabi” Satan meki go na fesi èn san na den froktoe foe dati?
17 Paulus ben skrifi Timoteus: „O Timoteus, hori boen na ai san den ben froetrow na joe, drai joe baka gi a leigi takitaki di e doe ogri na santa sani èn gi a broeja di e kon foe a sokari falsi ’sabi’. Foe di son sma e prodo nanga a sortoe sabi dati, meki den ben drifi komoto na bribi” (1 Timoteus 6:20, 21). A „sabi” dati e prenki den leri toe di e kon foe den ogri jeje. Ini a ten foe Paulus, a ben sori kande tapoe den prakseri di son sma ini den gemeente, di ben fadon komoto na bribi, ben meki go na fesi (2 Timoteus 2:16-18). Baka ten, a sokari falsi sabi, so leki a filosofie foe den Gnostis-sma nanga a Griki filosofie, ben pori a gemeente. Ini a grontapoe foe a ten disi, atheïst-fasi, agnostisfasi, evolutie leri nanga a moro hei leri foe sma di e sori tapoe fowtoe foe bijbel, na eksempre foe a sokari falsi sabi, so leki fa a de nanga den prakseri di no de ini bijbel, di disiten sma di fadon komoto na bribi e meki go na fesi. Den froktoe foe ala a sokari falsi sabi disi, de foe si ini a go di boen gwenti nanga wet e go na baka, na abi di sma na ala sei no abi lespeki gi makti, na oneerlijkfasi foe sma, nanga a prakseri di den e prakseri densrefi nomo, di de eigifasi foe Satan seti foe sani.
Hori fasti na a leri foe Gado
18. Soema ini a ten disi e soekoe a leri foe Gado?
18 Ala di Satan ben foeroe grontapoe pasa marki nanga den leri di e kon foe den ogri jeje sensi a ten foe Eden, tokoe ala ten wan toe sma ben de di ben soekoe a leri foe Gado. Miljoenmiljoen foe den sortoe sma dati de ini a ten disi. Na den mindri joe abi den salfoe kresten di tan abra, di abi a seiker howpoe foe tiri nanga Jesus ini en hemel Kownoekondre èn a bigi ipi „tra skapoe” di e gro nomonomo, di abi a howpoe foe kisi a grontapoe kontren foe a Kownoekondre dati (Mateus 25:34; Johanes 10:16; Openbaring 7:3, 9). Ini a ten disi, den disi ben tjari kon makandra na ini wán organisâsi na heri grontapoe, den di den wortoe foe Jesaja e fiti: „Ala den manpikin foe oenoe sa de sma di Jehovah e gi leri, èn a vrede foe den manpikin foe oenoe sa de pasa marki.” — Jesaja 54:13.
19. San a leri di wi e kisi foe Jehovah abi na ini toe?
19 Foe kisi leri foe Jehovah wani taki moro leki foe sabi troe leri — ala di dati de prenspari. Jehovah e leri wi fa foe libi, fa foe poti a leri foe en ini wi eigi libi. Foe eksempre, wi e kakafoetoe gi a prakseri di sma e prakseri densrefi nomo, hoeroedoe, nanga a jeje foe no gi frantiwortoe, di panja so ini a grontapoe lontoe wi. Wi e si a feti di sma e feti na wan bita-atifasi na baka goedoe ini a grontapoe disi, leki san a de troetroe — wan sani di abi dede leki bakapisi (Jakobus 5:1-3). Noiti wi e frigiti a leri foe Gado di na apostel Johanes ben taki ini den wortoe: „No lobi grontapoe, èn no den sani ini grontapoe. Efoe wan sma lobi grontapoe, dan a lobi foe a Tata no de na ini en.” — 1 Johanes 2:15.
20, 21. (a) San Satan e gebroiki ini a moeiti foe en foe breni libisma? (b) Sortoe blesi e kon gi denwan di e hori fasti na a leri foe Gado?
20 A bakapisi di den leri di e kon foe den ogri jeje abi tapoe den sma di e teki den, de foe si ini den wortoe foe Paulus gi den sma foe Korente: „[Satan] breni a froestan foe den sma di no e bribi, so taki a leti foe a glori boen njoensoe foe a Krestes, di de a prenki foe Gado, no kan skèin go na ini” (2 Korentesma 4:4). Satan ben sa wani foe breni troe kresten na a fasi disi toe. Drape na ini Eden, a ben gebroiki wan sneki foe kori wan foe den foetoeboi foe Gado. Ini a ten disi, a e gebroiki felem nanga telefisi programa di e sori ogridoe noso hoeroedoe. A e meki wan fowtoe gebroiki foe radio, boekoe nanga pokoe. Wan tranga wrokosani di a abi foe gebroiki dati, na takroe demakandra (Odo 4:14; 28:7; 29:3). Si den sani dati ala ten leki san den de troetroe — triki wrokosani èn leri di e kon foe den ogri jeje.
21 Memre taki den wortoe foe Satan na ini Eden ben de lei; den wortoe foe Jehovah ben sori foe de troe. Foe sensi owroeten a srefi sani ben go doro. Ala ten Satan ben sori foe de wan leiman, èn sondro misi a leri di e kon foe Gado ben troe (Romesma 3:4). Efoe wi e hori fasti na a Wortoe foe Gado, dan wi sa wini ala ten ini a feti na mindri waarheid nanga lei (2 Korentesma 10:4, 5). Meki wi, foe dati ede, abi a fasti bosroiti foe weigri foe teki ala den leri foe den ogri jeje. Na a fasi dati wi sa horidoro te leki a ten pasa foe na orlokoe di e go na mindri waarheid nanga lei. Waarheid sa wini. Satan no sa de moro èn soso a leri foe Gado sa de foe jere na grontapoe. — Jesaja 11:9.
Joe kan tjari disi kon na krin?
◻ Oten den leri di e kon foe den ogri jeje ben de foe jere foe a fositron?
◻ San na wan toe lei di Satan nanga den ogri jeje foe en ben meki go na fesi?
◻ Na sortoe fasi Satan e wroko boen tranga ini a ten disi?
◻ San Satan e gebroiki foe meki den leri di e kon foe den ogri jeje go na fesi?
◻ Sortoe blesi de gi denwan di e hori fasti na a leri foe Gado?
[Prenki na tapoe bladzijde 9]
A leri di e kon foe den ogri jeje ben de foe jere foe a fositron na ini a djari foe Eden
[Prenki na tapoe bladzijde 10]
A leri foe Gado ini a tori foe a froeloesoe-paiman nanga a Kownoekondre de a wan-enkri howpoe gi a libisma famiri