Joe e memre disi ete?
Joe ben njan boen di joe leisi den uitgave foe A Waktitoren foe den moen di pasa? Efoe a de so, dan joe sa feni en wan moi sani foe memre den sani di e kon now:
▫ Foe san ede den spion foe Israèl ben teki a bosroiti foe tan na a oso foe Rakab, a hoeroe-oema?
Den spion foe Israèl ben libi akroederi a Wet foe Gado, foe dati ede den no ben tan na Rakab oso foe hoeroedoe reide. Sondro misi den ben denki taki, te sma ini a foto si den ini na oso foe wan hoeroe-oema, dan den no ben sa prakseri wan sani. Dati na oso foe en ben bow na tapoe a skotoe foe a foto, ben kan meki a de moro makriki foe lowe. Ma san de moro prenspari, na taki Jehovah ben tjari den go na wan sondoe sma, di en ati ben naki en, di a ben jere den njoensoe fa Gado ben handri nanga den Israèlsma, so taki a ben sori berow èn ben kenki en fasi foe libi. — 1/12, bladzijde 31.
▫ Sortoe rai kan jepi wi foe prati moro tijdschrift foe a Waktitoren nanga Ontwaakt!?
Hori a Waktitoren nanga Ontwaakt! boen na prakseri; hori a pristeri eenvoudig; joe moesoe man kenki joe pristeri foe di joe sreka wan toe sjatoe pristeri; poti wan marki gi joesrefi. — 1/1, bladzijde 20, 21.
▫ Foe san ede Moses de so wan boen theokrasia eksempre, foe wi waka na dati baka?
Moses ben soekoe a tiri foe Jehovah ini afersi. A no ben abi no wan sani di a ben feti na baka gi ensrefi ma a ben broko en ede nanga a glori foe Jehovah. A ben abi wan tranga bribi, èn a no ben frigiti noiti taki Jehovah ben de a troetroe Tiriman foe a nâsi Israel. — 1/1, bladzijde 23.
▫ San na wan toe fasi fa a leri foe Gado e wini?
A leri foe Gado e wini foe di a e gi a pipel foe Jehovah ibritron pikinso moro froestan foe a waarheid. A e tjari sma kon ini wan jeje leti, èn a e sori den safri-atisma fa den moesoe anbegi Gado „nanga jeje èn nanga waarheid” (Johanes 4:24). A leri foe Gado e wini tesi toe nanga na ogri grontapoe. — 1/2, bladzijde 11, 12.
▫ San den toe baskita nanga figa ini Jeremia kapitel 24, den boen figa nanga denwan di ben takroe, ben prenki?
Den boen figa e prenki den djoe di, ini a bigin, den ben teki tjari go ini katibo go na Babilon. Wan fikapisi foe den ben o drai go baka na Juda. Den takroe figa ben prenki kownoe Sedekia nanga denwan di makandra nanga en ben opo densrefi kontrari kownoe Nebukadnesar, ala di den ben meki wan sweri ini a nen foe Gado. Wi abi so srefi, ini a ten disi, a fikapisi foe Israèl na jeje fasi, di meki boen froktoe ini den libi, tra fasi leki den tiriman foe krestenhèit, di ben meki pori froktoe. — 1/3, bladzijde 14, 15.
▫ Soema na den Kwartodecenniasma, èn foe san ede den de prenspari gi kresten foe a ten disi?
Baka a ten foe den apostel, dan wan toe sma ben de di ben hori na Avondmaal foe Masra ala jari tapoe 14 Nisan, di ben waki baka na eksempre foe den apostel. Sma ben kon sabi den leki „den Tinafosma” noso Kwartodecenniasma. Disi de prenspari ini a ten disi, foe di a e sori taki srefi baka di den apostel dede, wan toe sma ben de di ben hori fasti na a joisti fasi foe memre a dede foe Jesus, wán tron wan jari tapoe 14 Nisan. — 1/3, bladzijde 4.