Boen froktoe nanga takroe froktoe
„Jehovah ben sori mi, èn loekoe! toe baskita nanga figa . . . Foe taki foe a wan baskita, den figa ben de heri boen, leki fosi lepi figa; èn foe taki foe a tra baskita, den figa ben takroe srefisrefi, so taki den no ben de foe njan foe a takroe di den ben takroe.” — JEREMIA 24:1, 2.
1. Fa Jehovah ben sori sari-ati gi en pipel Israèl, ma san den ben doe na tapoe dati?
A BEN de a jari 617 bifo Gewoon Teri. A ben de soso tin jari bifo Jehovah ben tjari en kroetoe kon tapoe Jerusalem nanga a pipel foe en, di ben fiti foe kisi a kroetoe dati. Dritenti jari kaba Jeremia ben preiki fajafaja sondro foe weri. Loekoe a libilibi fasi fa Esra e skrifi foe a situwâsi, so leki fa a de foe feni ini 2 Kroniki 36:15: „Ibritron baka, Jehovah, a Gado foe den fositen tata foe den, ben tan seni [warskow] gi den nanga jepi foe den boskopoeman foe en, bika a ben firi sari-ati gi a pipel foe en èn gi a tanpresi foe en.” Èn san ben de a bakapisi foe ala a moeiti disi? A sari foe taki, dati Esra e go doro foe froeteri ini 2 Kr 36 vers 16: „Ma doronomo den ben dreigi den boskopoeman foe a troe Gado èn ben wisiwasi den wortoe foe en èn ben spotoe den profeiti foe en, te leki na atibron foe Jehovah ben kon na tapoe en pipel, te leki den no ben man kon betre moro.”
2, 3. Taki foe a fisjoen di Jehovah ben sori Jeremia na wan heri moi fasi.
2 Disi ben wani taki dati den ben sa poeroe a nâsi Juda na pasi krinkrin? Foe feni a piki, meki wi go loekoe wan prenspari fisjoen di Jeremia ben kisi now èn di skrifi ini kapitel 24 foe a boekoe di e tjari en nen. Gado ben gebroiki toe baskita nanga figa ini a fisjoen disi, foe agersi fa sani ben sa waka nanga en pipel di a ben abi wan froebontoe nanga den. Toe difrenti sortoe froktoe ben sa prenki a pipel disi, boenwan nanga takroewan.
3 Jeremia kapitel 24, vers 1 nanga 2, e taki san a profeiti foe Gado ben si: „Jehovah ben sori mi, èn loekoe! toe baskita nanga figa ben poti na fesi foe a tempel foe Jehovah, baka di Nebukadresar, a kownoe foe Babilon, ben tjari Jekonja, a manpikin foe Jojakim, a kownoe foe Juda, komoto na Jerusalem go ini katibo, nanga den granman foe Juda nanga den temreman foe oso nanga smeti, foe a ben kan tjari den go na Babilon. Foe taki foe a wan baskita, den figa ben de heri boen, leki fosi lepi figa; èn foe taki foe a tra baskita, den figa ben takroe srefisrefi, so taki den no ben de foe njan foe a takroe di den ben takroe.”
Boen figa ini wan fisjoen
4. Sortoe boskopoe di e gi trowstoe, a fisjoen foe den figa ben abi gi den getrow Israèlsma?
4 Baka di Jehovah ben aksi Jeremia foe san a ben si, a ben go doro foe taki ini vers 5 te nanga 7: „Leki den boen figa disi, na so mi sa loekoe den katiboman foe Juda na wan boen fasi, di mi sa seni gowe na a presi disi go na a kondre foe den Kaldewsma. Na wan boen fasi mi sa poti mi ai na den tapoe, èn troetroe mi sa meki den drai kon baka na a kondre disi. Èn mi sa bow den, èn mi no sa broko poeroe; en mi sa prani den èn mi no sa hari den poeroe. Èn mi sa gi den wan ati foe sabi mi, taki mi na Jehovah; èn den moesoe tron mi pipel èn misrefi sa tron den Gado, bika den sa drai kon baka na mi nanga den heri ati.”
5, 6. (a) Fa den ben seni wan toe Israèlsma ’gowe [na Kaldea] na wan boen fasi’? (b) Fa Jehovah ben ’poti en ai na wan boen fasi’ na tapoe getrow Israèlsma di ben de ini katibo?
5 So boen, a gersi foe san Jehovah ben taki dja, taki moro betre ten ben de na pasi e kon, taki a nâsi Juda no ben sa poeroe na pasi krinkrin. Ma san a baskita disi nanga boen figa wani taki?
6 Soso dri moen nanga tin dei, Jekonja noso Jojakin ben de kownoe foe Juda bifo a ben gi Jerusalem abra na kownoe Nebukadnesar nanga en friwani. Na mindri denwan di kownoe Nebukadnesar ben tjari gowe nanga en ini katibo, joe ben abi Danièl nanga en dri Hebrew kompe Hananja, Misaèl nanga Asarja, nanga Esekièl toe. A kownoe foe Babilon ben kibri a libi foe ala den sma disi di den ben teki ini katibo, èn na so sma ben kan taki, dati Jehovah ben sorgoe taki den ben seni den gowe na wan boen fasi na a kondre foe den Kaldewsma. Joe ben si taki Jehovah ben pramisi toe, foe ’poti en ai na den tapoe na wan boen fasi’? Fa disi ben kon troe? Ini 537 bifo Gewoon Teri, 80 jari na baka, Jehovah ben meki kownoe Cirus skrifi wan wet, di ben gi pasi na wan fikapisi foe den bakapikin foe den, foe drai go baka na a kondre Juda. Den getrow djoe disi ben bow a foto Jerusalem baka; den ben opo wan njoen tempel foe anbegi Jehovah, a Gado foe den; èn nanga den heri ati den ben drai go baka na en. So boen, ini ala den sani disi, den sma disi di ben de ini katibo nanga den bakapikin foe den, ben de gi Jehovah leki heri boen fosi lepi figa.
7. Oten èn fa Jehovah ai ben de „na wan boen fasi” na tapoe a disiten Jeremia-groepoe?
7 Joe e memre kande, taki ini a fosi artikel di e taki foe den profeiti wortoe foe Jeremia, wi ben leri taki den wani taki wan sani gi a di foe twenti jarihondro foe wi. Èn nanga kapitel 24 a no de tra fasi. Ini den doengroe jari foe a Fosi Grontapoe Orlokoe, foeroe foetoeboi foe Jehovah, di ben gi densrefi abra na en, ben kon ondro a makti foe Babilon a Bigiwan na a wan noso tra fasi. Ma Jehovah ai di e loekoe sani boen, ’ben de na den tapoe na wan boen fasi’. So boen, a ben de nanga jepi foe a Moro Bigi Cirus, Krestes Jesus, taki Jehovah ben broko a makti di Babilon a Bigiwan ben abi na den tapoe èn safrisafri a ben tjari den go na ini wan paradijs na jeje fasi. Den Israèlsma disi na jeje fasi ben handri boen na tapoe disi èn nanga den heri ati den ben drai go baka na Jehovah. Baka dati, ini 1931, den ben prisiri foe teki a nen Jehovah Kotoigi. Foe troe, now sma ben kan taki dati ini Jehovah ai den ben tron leki wan baskita nanga heri boen figa.
8. Na sortoe fasi Jehovah Kotoigi meki a Kownoekondre boskopoe, di gersi a soekroe foe figa, bekènti na ala sei?
8 Èn Jehovah Kotoigi no misi a reide foe san ede Gado, ini en no-froedini boen-atifasi, ben froeloesoe den foe Babilon a Bigiwan. Den no hori a Kownoekondre boskopoe foe boen njoensoe, di gersi a soekroe foe figa, gi densrefi, ma den meki en bekènti na ala sei, foe di den ben doe so leki fa den wortoe foe Jesus e taki ini Mateus 24:14: „A boen njoensoe disi foe a kownoekondre sa preiki na heri grontapoe pe libisma e libi leki wan kotoigi gi ala nâsi.” Èn san ben de a bakapisi? Moro leki 4.700.000 sma, di joe kan teki gersi nanga skapoe èn di no de Israèlsma na jeje fasi, kon fri foe Babilon a Bigiwan!
Takroe figa ini wan fisjoen
9. Soema den takroe figa foe a fisjoen foe Jeremia ben prenki èn san ben de foe pasa nanga den?
9 Ma san wi kan taki foe a baskita nanga takroe figa ini a fisjoen foe Jeremia? Now Jeremia e poti en prakseri na tapoe den wortoe foe Jehovah di de foe feni ini Jeremia kapitel 24, vers 8 te nanga 10: „Leki den takroe figa, di no de foe njan foe a takroe di den takroe, foe taki en leti, dan disi na san Jehovah taki: ’So mi sa gi Sedekia, a kownoe foe Juda, nanga den granman foe en nanga a fikapisi foe Jerusalem di e tan abra ini a kondre disi nanga denwan di e libi ini a kondre Egipti — mi sa gi den abra toe na beifi, na rampoe, ini ala den kownoekondre foe grontapoe, leki wan sjen èn leki wan odo, leki wan spotoe èn leki wan froekoe, ini ala den presi pe mi sa jagi den. Èn mi sa seni gi den a feti-owroe, na angriten, a pestsiki, te leki den kon na den kaba tapoe a gron di mi ben gi den nanga den fositen tata foe den.’”
10. Foe san ede Jehovah ben teki Sedekia leki wan ’takroe figa’?
10 So boen, ini Jehovah ai Sedekia troetroe ben sori taki a de wan ’takroe figa’. No wawan a ben opo ensrefi kontrari kownoe Nebukadnesar, foe di a ben broko a sweri foe loyaalfasi di a ben meki nanga a kownoe dati ini Jehovah nen, ma a ben trowe a sari-ati toe di Jehovah ben sori en nanga jepi foe Jeremia. Foe taki en leti, dan a ben go srefi so fara foe meki den sroto Jeremia! A no de foe froewondroe, taki Esra e taki foe a fasi fa a kownoe ben tjari ensrefi, so leki fa a e doe disi ini 2 Kroniki 36:12: „A ben go doro foe doe san takroe ini den ai foe Jehovah, en Gado. A no ben saka ensrefi.” Ini Jehovah ai Sedekia nanga denwan di ben tan abra ini Jerusalem, ben de leki wan baskita nanga takroe, pori figa!
Agersi pori figa ini wi ten
11, 12. Soema den ben kon sabi leki takroe figa ini a ten disi èn san sa pasa nanga den?
11 Now, loekoe grontapoe ini a ten disi. Joe e prakseri taki wi kan feni wan agersi baskita nanga takroe figa? Meki wi go loekoe den troetori, te wi e teki a ten foe wi gersi nanga di foe Jeremia. Ini a di foe twenti jarihondro disi, Jehovah gebroiki a Jeremia-groepoe, a salfoe fikapisi, foe warskow den nâsi doronomo foe en atibron di de na pasi e kon, ini a bigi banawtoe. A gi den nationaal groepoe tranga foe gi en nen a glori di a warti foe kisi, foe anbegi en nanga jeje èn nanga waarheid, èn foe erken en Manpikin di e tiri, Krestes Jesus, leki a reti Tiriman foe grontapoe. San den ben doe na tapoe dati? Neleki fa a ben de ini a ten foe Jeremia. Den nâsi e go doro foe doe san takroe ini Jehovah ai.
12 Soema na denwan di e gi tranga na a fasi disi foe opo densrefi kontrari Jehovah? Soema e tan dreigi den boskopoeman disi foe Gado di joe kan teki gersi nanga Jeremia, foe di den e degedege na a reti di den boskopoeman disi abi foe handri leki dinari foe Gado? Soema e tan wisiwasi a Wortoe foe Gado? Soema ini a ten disi de na baka moro foeroe foe a froefolgoe di den e froefolgoe Jehovah Kotoigi? A piki de krin foe si gi ala sma — na krestenhèit, spesroetoe den tiriman foe den! Èn loekoe nomo na ala den pori, takroe froktoe foe krestenhèit, di wi ben taki foe den ini na artikel na fesi. O, ija, foe troe wan agersi baskita nanga takroe figa de na grontapoe ini a ten disi. Foe taki en leti, dan Jehovah e taki dati sma no kan ’njan den, foe a takroe di den takroe’. Den wortoe di Jehovah ben taki nanga jepi foe Jeremia de foe jere te na ini a ten foe wi: ’Den sa kon na den kaba!’ Na atibron foe Jehovah tapoe krestenhèit no sa man kon betre moro.
Wan leri di de wan warskow gi wi
13. Fa wi moesoe froestan a fisjoen foe den toe baskita nanga figa, te wi e loekoe den wortoe foe Paulus di de foe feni ini 1 Korentesma 10:11?
13 Te wi e ondrosoekoe san a boskopoe foe warskow sma wani taki, di Jeremia ben taki ondro krakti foe santa jeje, dan wi e jere den wortoe foe na apostel Paulus ini 1 Korentesma 10:11: „Den sani disi now ben tan pasa nanga den leki eksempre èn den ben skrifi den leki wan warskow gi wi, di doro den kaba foe den seti foe sani.” Wisrefi gi jesi na a warskow, di ben tjari kon na krin ini a fisjoen disi foe den toe baskita nanga figa? San wi ben taki, na wan prenspari pisi foe den sani di ben pasa nanga Israèl, leki wan eksempre di de wan warskow gi wi.
14. San Israèl ben doe na tapoe a fasi fa Jehovah ben sorgoe gi den na wan switifasi?
14 Te foe kaba, meki wi memre den wortoe di Jehovah ben taigi kownoe David ini a tori foe Israèl, so leki fa a de foe feni ini 2 Samuèl 7:10: „Foe troe mi sa poti wan presi foe de gi mi pipel Israèl èn prani den.” Na wan switifasi Jehovah ben sorgoe gi ala sani gi en pipel Israèl. Den Israèlsma ben abi ala reide foe meki boen froktoe ini den libi. Den ben moesoe arki nomo na a leri di Jehovah ben gi èn den moesoe doe den komando foe en. Ma tokoe, soso wan toe foe den ben doe dati. A moro bigi pisi foe den ben de so tranga-ede èn trangajesi, taki den ben meki takroe, pori froktoe.
15. San Israèl na jeje fasi ini a ten disi nanga den kompe foe den, di joe kan teki gersi nanga skapoe, doe na tapoe a sari-ati foe Jehovah?
15 We dan, fa a de nanga a ten foe wi? Jehovah ben sori foeroe sari-ati gi en fikapisi foe Israèl na jeje fasi nanga den kompe foe den, di joe kan teki gersi nanga skapoe. En ai ben de doronomo na den tapoe, sensi di a ben froeloesoe den na jeje fasi ini 1919. So leki fa a ben froeteri na fesi nanga jepi foe Jesaja, dan ala dei den e kisi leri foe a moro bigi Leriman foe na universum, Jehovah Gado (Jesaja 54:13). A leri disi foe Gado, di en lobi Manpikin, Jesus Krestes e teki fesi na ini, abi leki bakapisi taki vrede de pasa marki na mindri den èn doronomo a tjari den kon ini wan moro krosibei matifasi nanga Jehovah. Fa disi e sorgoe gi wan toemoesi moi situwâsi na jeje fasi gi wi alamala foe sabi Jehovah, foe arki na en, èn foe tan meki boen froktoe ini wi libi — froktoe di e gi Jehovah prèise! Disi wani taki a libi foe wi!
16. Fa ibriwan foe wi kan fiti tapoe wisrefi, a fisjoen foe den toe baskita nanga figa?
16 Ma awansi ala a no-froedini boen-atifasi di Gado ben gi, tokoe wan toe sma de ete di e opo densrefi kontrari en èn den ati tranga, so leki fa foeroe sma ben doe ini Juda foe owroeten, èn di e meki takroe, pori froktoe ini den libi. Fa disi na wan rampoe sani! Meki no wan foe wi kon frigiti a leri di de wan warskow, di den tjari krin kon na ondro wi prakseri nanga jepi foe den toe baskita disi nanga figa nanga a froktoe foe den — boenwan nanga takroewan. Ala di Jehovah en kroetoe, di a krestenhèit di fadon komoto na bribi fiti foe kisi, esi-esi e kon moro krosibei, meki wi poti prakseri na tapoe a froemane foe na apostel Paulus: „Waka na wan fasi di fiti Jehovah, foe plisi en dorodoro, ala di oenoe e tan meki froktoe ini ibri boen wroko.” — Kolosesma 1:10.
Wan sjatoe loekoe tapoe „Boen froktoe nanga takroe froktoe” èn paragraaf 1-4 foe „A trobi di Jehovah abi nanga den nâsi”
◻ San a baskita nanga boen figa e prenki?
◻ Fa a baskita nanga takroe figa ini wan fisjoen kon de foe si?
◻ Sortoe leri di de wan warskow, a boskopoe foe Jeremia e gi wi?
◻ San ben de so aparti na a jari 607 bifo Gewoon Teri? èn 1914 Gewoon Teri?
[Prenki na tapoe bladzijde 14]
Leki boen figa, a pipel foe Gado meki soekroe Kownoekondre froktoe
[Prenki na tapoe bladzijde 14]
Krestenhèit sori taki a de leki wan baskita nanga takroe figa