„Figa” di e gi prisiri srefi na Gado
„Disi Jehovah, na Gado foe Israël, ben taki: ’Leki den boen figa disi, na so mi sa loekoe tapoe wan boen fasi den katiboman foe Juda, di mi ben seni komoto foe na presi disi go na a kondre foe den Chaldéa-soema.’” — Jer. 24:5.
1. Fa na figabon kon tron wan pisi foe na libi-ondrofeni foe wi?
NA FIGABON ben de wan foe den bon ini na fosi djari di ben prani oiti tapoe wi grontapoe. Den fosi libisoema papa nanga mama foe wi ben waka na wi fesi foe na njan na switi froktoe foe hen, na figa. Na figabon ben kan gro ooktoe na dorosé foe na fosi djari dati? Ja, en foe dati wi kan prisiri. Soboen, ooktoe now wi nanga prisiri wi kan tesi na switi disi. Na aparti sani ini disi ben de, dati na fosi krosi di wi fosi papa nanga mama, Adam nanga Eva, ben weri wan pisi ten leki pangi, ben de figa-wiwiri di ben nai miti makandra. Disi ben de let bifo Gado ben poti den dorosé na Paradijs foe Prisiri, bikasi den ben meki oproeroe nanga na Soema di ben prani en abi na djari foe Eden. — Gen. 2:8; 3:1-7.
2. Fa Jotham ben gebroiki na figabon ini hen gersitori, en nanga sortoe switi betekenis gi wi?
2 Di Jotham, na manpikin foe kroetoebakra Gideon, langaten baka disi ben gebroiki wan agersitori, a ben meki na figabon taki. Na figabon ben aksi: „Mi moe libi na switi foe mi nanga mi boen froktoe en mi moe go wai na den tra bon tapoe?” (Recht. 9:11). Ini na agersitori foe Jotham na figabon ben wégri foe libi den boen égifasi foe hen. Ooktoe ini disi ten na figabon e meki te now ete hen boen en switi soekroe froktoe. Ini disi a de dini te now ete den boen prakseri foe Gado.
3. San Jotham ben wani agersi nanga na figabon, ma foe agersi san Jezus ben gebroiki na bon disi en ini sortoe agersitori?
3 Jotham ben gebroiki na figabon foe agersi wan soema, wan getrouw Israëlsoema di ben wégri foe den poti hen leki edeman foe na rigeri nanga jepi foe wan democratisch, nationaal verkiezing. Boen langa na baka disi, Jezus ben gebroiki na figabon foe agersi na naatsi Israël. Ini wan gersitori a taki:
„Wan soema ben abi wan figabon, di ben prani ini hen froktoe-djari, en a ben kon foe soekoe froktoe na hen, ma a no ben feni no wan. Dan a ben taki gi na froktoe-djariman: ’Mi e kon dri jari kaba foe soekoe froktoe foe na figabon disi, ma mi no feni no wan. Koti hen trowe! Foe sainde a moe pori na gron disi ete?’ A ben piki hen: ’Masra, meki a tanapoe ooktoe na jari disi ete, te leki mi diki lontoe hen en poti mest; en efoe a meki froktoe ini na ten di e kon, dan a boen; ma efoe a no de so, dan joe moe koti hen trowe.’” — Luk. 13:6-9.
4. Na sortoe fasi na Soema di ben prani no ben feni froktoe na a agersi figabon, baka di na vertegenwoordiger foe hen ben doe diniwroko dri nanga afoe jari?
4 Jezus ben taki na agersitori dati ini 32 G.T., en sjatoe baka den djoe ben hori na loofhutten-(Sukkoth)-fesa di ben kon ini na herfst, soboen dri jari baka di a ben bigin nanga hen publiki diniwroko ini na kondre Israël. A ben de now ini na di foe fo jari foe na evangelie-wroko foe hen. A no kisi srefi siksi moen na baka, dati na naatsi Israël ben sa trowe hen en kiri hen na dorosé den skotoe foe Jeruzalem na wan postoe. Baka di a ben wroko dri nanga afoe jari mindri den Israëlsoema, dan na froktoe foe hen wroko ben de soso wan toe hondro discipel. Hen hemel Tata, Jehovah Gado, ben prani na agersi bon, Israël. Baka dri nanga afoe jari foe spesroetoe sorgoe nanga aandacht foe na sé foe hen Manpikin nanga vertegenwoordiger tapoe grontapoe, a ben kan verwakti nanga reti foe piki froktoe. Ma te joe loekoe hen nanga tra sani, dan a no ben feni froktoe leki foetoeboi foe hen Manpikin, na Messias. Soleki na froktoe-djariman ini na agersitori, dan hen Manpikin te leki na mindri foe na di foe fo jari foe hen diniwroko ben tan „diki” lontoe na agersi figabon. Ma a no ben jepi.
5, 6. Fa Jezus ben sori di a ben gebroiki wan troe troe figabon, dati na gersi figabon ben sa koti trowe? (b) Oten na agersi figabon dati ben koti trowe, soleki sortoe sani be sori dati?
5 Na mindri foe na di foe fo jari Jezus ben sori dati na „figabon”, na naatsi, ben sa koti trowe. Moende 10 Nisan 33 G.T. Jezus ben go loekoe foe krosibé wan bepaalde figabon di a ben de na pasi foe go na Jeruzalem. Aladi na bon disi ben abi wiwiri, a no ben meki froktoe. Jezus ben froekoe na figabon foe datede nanga den wortoe: „Dati foe tégo no wan soema njan wan froktoe foe joe moro.” San ben pasa? Wi e lési: „Di den ben pasa mamanten froekoe, den ben si dati na figabon ben dré kaba te na a roetoe. Foe datede meki Petrus ben taki gi hen, di a ben memre san Jezus ben doe: ’Rabbi, loekoe! Na figabon di joe ben froekoe dré.’” — Mark. 11:12-21.
6 We, Jezus ben teki wraak tapoe wan bon di no ben abi verstan? Nono, ma a ben gebroiki na figabon dati di no ben meki froktoe leki wan agersifasi. Na figabon dati ben agersi na naatsi Israël, di Jehovah ben seni hen Manpikin go na hen foe tjari froktoe kon makandra ini na vorm foe ondersteuners (jepiman) foe na Messias. Di na naatsi ben trowe Jezus leki vertegenwoordiger foe Gado kownoekondre en dati ben de ondro na tiri foe na hépriester nanga tra kerki tjariman, dan den wan toe hondro soema di ben teki hen wel, ben de leki noti. Leki wan bon di belasting ben pai foe hen, ma di ben teki presi tapoe na gron foe soso, dan na agersi figabon dati ben verdini foe koti trowe, foedi Gado ben froekoe hen. (Loekoe Deut. 28:15-68) Féfi-tenti-na-wan dé baka di den ben kiri Jezus tapoe na gron foe na kragi foe wan falsi Messias, na Djoe „figa-bon” ben koti trowe. Gado ben meki wan njoen naatsi kon gebore, na kristen, jeje Israël, wan naatsi di ben sa meki kownoekondre-froktoe (Matt. 21:43; 1 Petr. 2:9; Gal. 6:16; Jak. 1:1). Na „figabon” di ben koti trowe ben gi abra na faja na a ten foe na pori foe Jeruzalem ini 70 G.T.
DEN TOE MANKI NANGA FIGA
7. Fa Jehovah ben sori na Jeremia ini 617 bifo G.T. tapoe wan agersi figabon ini wan visioen?
7 Jeruzalem ben pori wan tron kaba, en dati ben de ini 607 bifo G.T. nanga anoe foe den Babylon soema ondro kownoe Nebukadnezar. Tin jari bifo na nationaal rampoe dati, ofoe ini 617 bifo G.T., Gado ben gebroiki na figabon leki wan agersitori foe na naatsi Israël. A ben gi hen proféti Jeremia wan visioen foe na ten di e kon en di ben wani taki foeroe en di Jeremia e verteri wi disi foe hen:
„En Jehovah ben meki mi si, en loekoe! Toe manki nanga figa, di ben poti fesi na tempel foe Jehovah, baka di Nebukadnezar ben tjari komoto foe Jeruzalem go ini katibo, Jechonja, (ofoe Jojachin) na manpikin foe Jojakim, na kownoe foe Juda nanga den granman foe Juda, en den temreman foe oso nanga smeti, foe a ben kan tjari den go na Babylon. Foe taki foe na wan manki, den figa ben de heri boen, leki fosi lepi figa; en foe taki foe na tra manki, den figa ben takroe srefi srefi, sodati den no ben de foe njan foe na takroe di den ben takroe.” — Jer. 24:1, 2.
8. Fa Jehovah tjari kon na krin san na manki nanga boen figa ben wani taki?
8 Di soema ben aksi Jeremia san a ben si ini na visioen, a ben ferteri fini fini foe dati (Jer. 24:3). Ma san den figa dati ben e agersi? Israëlsoema di ben sa tjari go na Babylon. Wi e lési:
„Disi Jehovah, na Gado foe Israël ben taki: ’Leki den boen figa disi, na so mi sa loekoe tapoe wan boen fasi den katiboman foe Juda, di mi ben seni komoto foe na presi disi go na a kondre foe den Chaldéa soema. En mi wani poti mi ai tapoe wan boen fasi tapoe den en troe troe mi sa meki den drai kon baka na a kondre disi. En mi wani bow den en mi no sa broko trowe; en mi wani prani den en no hari den poeroe. En mi wani gi den wan ati foe sabi mi, dati mi de Jehovah, en den moe tron mi pipel en mi srefi sa tron na Gado foe den, bikasi de sa drai kon baka na mi nanga den heri ati.’” — Jer. 24:5-7.
9. Foe sortoe agersi bon den „figa dati” ben de, en soema ben de ooktoe na mindri?
9 Den agersi „figa” dati ben kon foe wan agersi bon. Foe sortoe „bon”? Foe na naatsi Israël, di Jojachin, na manpikin foe Jojakim, ben de kownoe na tapoe hen soso dri moen nanga tin dé (2 Kron. 36:9, 10; Matt. 1:11, 12). Na mindri den soema di na kownoe foe Babylon ben tjari go ini katibo, ben de Daniël, hen dri Hebrew kompe Hananja, Misaël nanga Azarja en Ezechiël (Dan. 1:11-17; Ezech. 1:1-3). Ini na ten dati ini Jeremia ten Jehovah ben gebroiki soboen na figabon foe agersi na naatsi foe hen pipel di a ben verkisi. Ini na ten foe den katiboman dati Jeremia ben taki profétitori dri-tenti jari kaba.
10. Fa Jehovah ben handri akroederi na prakseri foe he nanga den „boen figa” en fa den ben sori hen dati den abi „switi” ini den?
10 Nanga san Jehovah ben taki foe na visioen foe den boen figa, a ben sori dati boen ten ben de foe kon. A ben taki foe boen sani di a ben sa doe gi na fika pisi foe hen verbontoe-pipel. Disi ben sa pasa na a kaba foe den „sébi-tenti jari”, wan pisiten di a ben taki foe hen na fesi soso aiti jari bifo na visioen (Jer. 25:11, 12). Jehovah de na Gado foe waarheid en den skrifi tori foe historia e sori dati ini 537 bifo G.T. a ben handri akroederi na prakseri foe hen di a ben meki bekenti. A ben gebroiki na Pers Cyrus de Grote foe meki Babylon fadon ini 539 bifo G.T. en a ben bewégi Cyrus foe poti den agersi „boen figa” baka ini na kondre pe na agersi bon ben prani na a bigin en di den ben komoto foe hen. Drape den ben bow Jeruzalem baka en ben opo wan njoen tempel foe aanbegi baka gi Jehovah. Foe di den doe ala den sani disi, den ben sori na Gado foe den en na Praniman foe na naatsi foe den di ben gersi wan bon, dati den abi na „switi” foe toemsi boen figa.
11, 12. (a) Nanga soema nen den kari den „boen figa”? (b) San ben de na politiek Babylon foe owroeten en san na a Bigi Babylon?
11 Disi wani taki wan sani gi wi ini na ten disi? Ja, ini na twintigste eeuw disi na kriboi kon troe foe na profétitori di Jehovah ben taki nanga mofo foe Jeremia, de, soso a de moro bigi. Dati wani taki, dati kristen de ete dja na grontapoe, di e akroederi nanga den „boen figa”. Na Gado foe Jeremia „ben loekoe tapoe wan boen fasi” tapoe den disi toe. A ben verloesoe den poeroe foe na Bigi Babylon. Dati Jehovah ben kari den nanga hen nen no ben de sondro wan eksempel. Ini na ten foe Jeremia den agersi „’boen figa” ben de Israëlsoema di den ben kari nanga na nen foe na Gado foe Jeremia. Srefi ini na nen foe na proféti Jeremia, na nen foe Gado ben de na ini, bikasi na nen disi wani taki „Jehovah e meki na moeroe-bere kon loesoe”. Ini na ten foe Jeremia, Babylon leki politiek organisatie ben tron na grontapoe-makti. Na kownoekondre disi ben de moro leki négi-tenti jari ini makti en a ben man foe meki na falsi religie di ben komoto foe na ten foe Nimrod, kan gro moro. Na kerki afersi disi e kon moro na fesi ini na laatste boekoe foe na bijbel, di e taki foe na Bigi Babylon, en di e skrifi foe hen leki na seksueel dinari foe den politiek makti. Soleki na Babylon foe owroeten ben teki presi foe wan kownoekondre, na so na Bigi Babylon e teki presi foe wan kownoekondre, na grontapoe kownoekondre foe falsi religie.
12 Na owroe politiek Babylon ben fadon, en ben komoto krin krin na pasi te foe kaba, ma na kerki Babylon ben tan. Soboen, a de te now ete na grontapoe kownoekondre foe falsi religie. — Openb. 14:8; 17:18.
13. Sortoe komando na pipel foe Gado e kisi foe na Bigi Babylon, en fa a kon droengoe foe na broedoe foe den kotoigi?
13 Ma na Bigi Babylon sa kisi pori ooktoe? Ja, na laatste boekoe foe bijbel ben taki dati na fesi. Ini Openbaring 18:4, 5 na pipel foe Gado di de ini katibo, na kristen gemeente, e kisi foe datede na komando disi: „Komoto foe hen, mi pipel, efoe joe no wani kisi afoe foe hen sondoe en efoe joe no wani kisi afoe foe hen plaag. Bikasi den sondoe foe hen ben hé go te na hemel en Gado ben tjari den ongeregtigheid foe hen kon na prakseri.” Ini Openbaring 17:6, pe wan toe foe hen sondoe e kari, den skrifi foe na kerki kownoekondre dati leki a „droengoe foe na broedoe foe den santawan en foe na broedoe foe den kotoigi foe Jezus”. Ini na ten foe na Fosi Grontapoefeti (foe 1914-1918) a ben meki na fowtoe foe trowe na broedoe foe na pipel foe Jehovah di ben gi densrefi abra na Gado en a ben kisi foeroe foe den foe meki den tapoe nanga na prékiwroko foe Gado kownoekondre.
14. Fa a ben go nanga den agersi „boen figa” foedi den ben doe leki fa Gado ben gi komando en soema ben go moksi densrefi nanga den ini na jeje toestand foe den?
14 Den strafoeman disi foe na Bigi Babylon di den ben kwinsi ben de leki den „boen figa” foe na visioen foe Jeremia. Baka di na Fosi Grontapoefeti ben kon na wa kaba, Jehovah ben broko na makti foe na Bigi Babylon ini 1919 en a ben opo na pasi gi hen dienstknegti foe handri akroederi nanga hen komando: „Komoto foe hen mindri, mi pipel”. Den jeje Israëlsoema di ben teki na rai disi en ben loesoe densrefi foe ibri matifasi nanga na Bigi Babylon (ooktoe na kristenheid), ben kon baka ini na boen-ati foe Jehovah en den ben poti baka ini hen kownoekondre diniwroko. Nanga den heri ati den ben teki fesi ini na grontapoe prékiwroko foe na „boen njoensoe disi foe na kownoekondre”, soleki Jezus ben taki disi na fesi ini Matteus 24:14 nanga Markus 13:10. Jehovah ben sorgoe te leki na dé foe tide, dati no wan soema ben kan poeroe den ini na jeje paradijs toestand di den de na ini. Integendeel, moro leki 2.000.000 soema di no de jeje Israëlsoema, ben teki na kownoekondre tapoe wan boen fasi en den ben teki na bosroiti foe moksi densrefi nanga a pipel foe Jehovah ini na jeje toestand foe den. Na so fasi, den go libi ini moro leki toe hondro kondre ondro wan agersi figabon, nanga boen-fasi nanga switi.
„TAKROE FROKTOE”
15, 16. (a) Sortoe soema ini na ten foe Jeremia ben de leki agersi „boen figa”? (b) Sortoe „figa” kownoe Zedekia ben de, en san Jehovah ben taki na fesi foe den „takroe figa”?
15 Ooktoe kownoe Jojachin (ofoe Jechonja) foe Juda ben de na mindri na klasse foe „boen figa”. Jezus Kristus na skin fasi ben de wan baka ten pikin foe kownoe Jojachin via hen barinen bakapikin Zerubbabel, di ben de leki wan „boen figa” (1 Kron. 3:17-19; Matt. 1:12; Luk. 3:23-27). Baka di kownoe Jojachin ben gi Jeruzalem abra ini 617 bifo G.T. na a kownoe foe Babylon, dan Nebukadnezer ben meki Zedekia, na omoe foe Jojachin, de na njoen kownoe foe Juda en a meki a sweri na a fesi foe Jehovah foe de wan loyaal vazal foe Babylon. Ma kownoe Zedekia bakaten ben sori dati a de wan „takroe figa”. Jehovah, na Gado di a ben sweri ini hen nen, ben agersi hen foe datede nanga wan figa di no kan njan, di a taki:
16 „En leki den takroe figa, di no de foe njan foe takroedoe ede, ja, disi Jehovah ben taki: ’So mi sa meki Zedekia, na kownoe foe Juda, en hen granman en na fikapisi foe Jeruzalem, di tan abra ini a kondre disi (baka di den poti Jojachin ini katibo) en den di e libi ini na kondre Egypte (pe den djoe ben lowe go foedi den ben frede den Babylon soema) — mi wani meki den ooktoe leki wan skreki, leki wan rampoe, ini ala den kownoekondre foe grontapoe, leki wan sjen en leki wan odo, leki wan spotoe en leki wan froekoe, ini ala den presi pe mi sa troesoe den go. Mi wani seni den go gi den wan fet’owroe, na angri nanga na pestsiki, te leki den kon na den kaba tapoe na gron di mi ben gi den nanga den fositen papa foe den.’” — Jer. 24:8-10.
17. Sortoe „takroe figa” Zedekia ben de te foe kaba en nanga sortoe bakapisi?
17 Jehovah no ben feni boen srefi srefi den agersi „takroe figa” dati. A ben teki foe datede na bosroiti foe tjari wan ogri kaba kon, sodati den ben sa de gi internationaal sjen nanga veragti. Fa Zedekia te foe kaba ben kon takroe! A ben broko na sweri di a ben meki en meki oproeroe nanga Babylon, en ondro na druk foe hen granman a ben meki den poti Jeremia ini doengroe-oso leki wan nationaal gevaar. Boiti nanga na fet’owroe foe den Babylon fetiman en boiti nanga na pest-siki na mindri den djoe di den ben lontoe, ma na krakti foe den man di ben feti gi Jeruzalem ben broko baka tina-aiti moen nanga na ogri angriten. Na victori kownoe ben meki den kiri prenspari politiek nanga priester lantiman. Na so Zedekia, di den ben kisi, ben moe si fa hen égi manpikin ben slagti na hen fesi. Moro fara den ben meki a kon breni en den ben tjari hen go na Babylon, pe a ben dede ini sjen.
18. Te wi loekoe so wan warskow eksempel, dan san wi moe doe now foe tan na libi te na „bigi benawtoe” kon?
18 Wi e béfi now te wi e jere foe na ogri bakapisi gi den „takroe agersi figa” dati? Meki den de leki wan warskow eksempel gi wi foe wi no waka na pasi foe den. Efoe jeje Israëlsoema no sa libi ini disi ten akroederi na njoen verbontoe, efoe den no hori hé na universele soevereiniteit foe Jehovah en efoe den no e ondersteun na Messias kownoekondre foe hen manpikin, dan ini na „bigi benawtoe” di e kon, a sa go na a srefi fasi nanga den leki den „takroe figa” foe owroeten (Matt. 24:21, 22). Ooktoe den kerki soema foe na kristenheid, di e taki dati den de jeje Israëlsoema, sa kon na a ogri kaba foe hen leki „takroe figa”. Wi e doe boen foe de leki Jeremia, hen sekretarsi Baruch en nanga wan toe mati foe hen, man di ben de trouw na Jehovah en di ben pasa libi-libi na pori foe Jeruzalem. — 1 Kor. 10:11.