A leri foe Gado e wini

„Oen ai moesoe tron ai di e si oen toemoesi Bigi Leriman. Èn oen eigi jeje sa jere wan wortoe na oen baka di e taki: ’Disi na a pasi. Waka na tapoe, oenoe pipel.’” — JESAJA 30:20, 21.

1. Foe san ede wi ben kan kari den sani di Jehovah e komanderi wi foe doe nanga leti, a leri foe Gado?

JEHOVAH GADO na a Fonten foe a moro boen leri di wan sma kan kisi. Efoe wi e arki te a e taki, spesroetoe nanga jepi foe en Santa Wortoe, a sa de wi Gran Leriman (Jesaja 30:20). A Hebrew bijbeltekst e kari en toe „a Gado Wan” (Psalm 50:1). Foe dati ede den sani di Jehovah e komanderi wi foe doe na leri foe Gado.

2. Na sortoe fasi a de troe taki Gado wawan koni?

² Grontapoe e prodo nanga den foeroe organisâsi di den abi foe leri sma, ma no wan foe den e gi a leri foe Gado. We, ala a koni foe grontapoe di den ben tjari kon makandra ini den jarihondro di pasa de pikinso nomo te joe teki en agersi nanga a leri foe Gado di abi en gron na tapoe a koni foe Jehovah di no abi skotoe. Romesma 16:27 e taki dati Gado wawan koni, èn disi de troe ini a fasi taki Jehovah wawan abi ala koni.

3. Foe san ede Jesus Krestes na a moro bigi leriman di ben waka oiti na grontapoe?

³ A Manpikin foe Gado, Jesus Krestes, na wan model foe koni èn a de a moro bigi leriman di oiti ben waka na grontapoe. A no de foe froewondroe! Foe wan ten di no abi marki, Jehovah ben de en Leriman ini hemel. Te joe loekoe en boen, dan a leri foe Gado ben bigin di Gado ben bigin gi leri na en fosi mekisani, na wan-enkri gebore Manpikin foe en. Foe dati ede Jesus ben kan taki: „So leki fa a Tata ben leri mi, na so mi e taki den sani disi” (Johanes 8:28; Odo 8:22, 30). Den eigi wortoe foe Krestes di den ben skrifi ini bijbel e meki wi kisi foeroe sabi foe a leri foe Gado. Te den e leri sma san Jesus ben leri, den salfoe kresten e gi jesi na den Bigi Leriman, o soema wani a de taki „a bigi koni foe Gado tapoe difrenti kontren” moesoe meki bekènti nanga jepi foe a gemeente. — Efeisesma 3:10, 11; 5:1; Lukas 6:40.

A soekoe di sma e soekoe koni

4. San den ben taki foe a mogelijkheid foe na ede-tonton?

⁴ Foe kisi a koni di de a bakapisi foe a leri foe Gado e aksi taki wi moesoe gebroiki na wan faja fasi a krakti di wi abi foe man denki, di wi kisi foe Gado. Disi na wan sani di kan, foe di libisma abi wan kefarlek bigi mogelijkheid foe gebroiki den ede-tonton. A boekoe The Incredible Machine e taki: „Srefi den computer di meki na wan dangra fasi èn di wi ben sa kan tjari kon na ini wi prakseri no soifri srefisrefi te wi sa teki den gersi nanga a libisma ede-tonton, di dangra èn di abi ala sortoe mogelijkheid, di pikinmoro de sondro skotoe — eigifasi di kan, foe di a abi wan dangra sistema foe elektrochemis sèin di prati na wan ordroe fasi. . . . Den miljoenmiljoen sèin di e koti pasa ini joe ede-tonton ibri momenti e tjari wan toemoesi bigi lai foe bodoi. Den e tjari bodoi foe san e pasa na ini joe skin èn na dorosei lontoe joe skin: foe wan krampoe ini joe foetoefinga, noso a smeri foe kofi, noso wan lafoetori foe wan mati. Ala di tra sèin e wroko èn e ondrosoekoe bodoi, den e meki spesroetoe firi, memre, prakseri noso plan kon, di e meki wan sma teki wan bosroiti. Pikinmoro wantronwantron, sèin foe joe ede-tonton e taigi tra pisi foe joe skin san den moesoe doe: sekiseki joe foetoefinga, dringi a kofi, lafoe noso gi wan piki di fiti. Na a srefi ten joe ede-tonton e sorgoe toe foe joe hari bro, den kenki nanga a krin wroko di e feni presi ini joe broedoe, a waran noso kowroe foe joe skin nanga tra prenspari wroko di e pasa sondro foe joesrefi sabi. A e gi komando di e hori joe skin tapoe wan srefi fasi so dati a kan wroko go doro na wan srefi fasi, ala di ala sortoe kenki e feni presi ini joe birti. A e sreka na fesi toe tapoe sani di de fanowdoe ete.” — Bladzijde 326.

5. Te joe e loekoe en na a fasi fa bijbel e taki foe en, san na koni?

⁵ Ala di a libisma ede-tonton abi toemoesi moi mogelijkheid, di no wan sma kan degedege na dati, fa wi kan gebroiki a froestan na wan moro boen fasi? No foe go dipi nomo ini a hebi stoeka foe tongo, historia, sabidensi, noso fa a wan relisi e kroederi nanga a trawan. Wi moesoe gebroiki wi krakti foe denki, spesroetoe foe kisi leri foe Gado. Dati wani abi leki bakapisi soifri koni. Ma san na troe koni? Te wi e loekoe fa bijbel e taki foe en, koni e poti krakti tapoe wan gosontoe kroetoe di abi en fondamenti tapoe soifri sabi nanga troetroe froestan foe sani. Koni e meki taki wi kan gebroiki sabi nanga a froestan foe sani na wan fasi di abi boen bakapisi, foe loesoe problema, foe meki taki wi wai pasi gi noso poeroe kefar, foe e jepi tra sma èn foe doro den marki di wi wani doro. Wan sani di e hari belangstelling de, taki bijbel e poti koni kontrari foe lawlawfasi nanga donfasi — eigifasi di troetroe wi wani wai pasi gi. — Deuteronomium 32:6; Odo 11:29; Preikiman 6:8.

Jehovah bigi leriboekoe

6. Efoe wi wani sori troe koni, san wi moesoe gebroiki na wan joisti fasi?

⁶ Foeroe grontapoe koni de lontoe wi (1 Korentesma 3:18, 19). We, a grontapoe disi abi bogobogo skoro nanga bibliotheek di abi miljoenmiljoen boekoe! Foeroe foe den boekoe disi na leriboekoe e gi bodoi foe leri tongo, wiskunde, sabidensi nanga tra kontren foe sabi. Ma a Bigi Leriman ben gi a leriboekoe di e pasa ala den trawan — a Wortoe foe en, di skrifi nanga jepi foe santa jeje, bijbel (2 Timoteus 3:16, 17). A de soifri no wawan te a e taki foe sani di abi foe doe nanga historia, aardrijkskunde nanga plantkunde, ma te a e taki toe foe a tamara. Moro fara, a e jepi wi foe libi wan kolokoe libi di abi toemoesi boen wini, marki srefi ini a ten disi. A no de foe taki dati neleki fa studenti na wan grontapoe skoro moesoe gebroiki den boekoe foe den, wi moesoe kon sabi a bigi Leriboekoe foe Gado heri boen efoe wi wani sori troetroe koni neleki den wan „di Jehovah e leri”. — Johanes 6:45.

7. Foe san ede joe ben sa kan taki dati sabi nanga joe froestan san skrifi ini bijbel no nofo?

⁷ Tokoe a sabi di wi kon sabi bijbel nanga wi froestan, no de a srefi leki troe koni nanga a gi di wi e gi jesi na a leri foe Gado. Foe gi wan eksempre: Ini a di foe 17 jarihondro Gewoon Teri, wan lomsoe man di ben nen Cornelius van der Steen ben meki moeiti foe tron wan Jesuiet, ma den no ben wani en bikasi a ben sjatoe toemoesi. Na so Manfred Bartel e taki ini en boekoe The Jesuits—History & Legend of the Society of Jesus: „A komte ben taigi Van der Steen taki den ben de klariklari foe libi a langa di a no ben langa, ma soso ondro a kondisi taki a ben moesoe foe leri foe taki a heri bijbel na en ede. A no ben sa warti foe froeteri a tori disi, efoe Van der Steen no ben agri nanga a troetroe asranti aksi disi.” Fa a ben teki foeroe moeiti foe memre a heri bijbel na ede! Foe troe, tokoe a de krinkrin moro prenspari foe froestan a Wortoe foe Gado leki foe sabi en na ede.

8. San sa jepi wi foe njanboen foe a leri foe Gado èn sori troe koni?

⁸ Efoe wi wani foe njanboen troetroe foe a leri foe Gado èn wi wani sori ini wi libi a troe koni, dan wi abi soifri sabi foe den Boekoe foe bijbel fanowdoe. Wi moesoe kisi tiri toe nanga jepi foe a santa jeje foe Jehovah, noso a wroko krakti foe en. Disi sa jepi wi foe leri den dipi waarheid, „den dipi sani foe Gado” (1 Korentesma 2:10). Foe dati ede, meki wi studeri a bigi Leriboekoe foe Jehovah fajafaja èn begi foe kisi a tiri foe en nanga jepi foe santa jeje. Akroederi nanga Odo 2:1-6, meki wi poti prakseri tapoe koni, boigi wi ati foe kisi a koni foe man si sani, èn bari kari foe kisi froestan. Wi moesoe doe disi neleki wi e soekoe goedoe di kibri, bikasi na soso dan wi sa ’froestan a frede gi Gado èn feni troetroe koni foe Gado’. Te wi sa loekoe wan toe wini nanga winimarki foe a leri foe Gado dati sa meki a warderi foe wi gi a koni di Gado e gi kon moro bigi.

A froestan foe sani di e kon ibritron pikinso moro dipi

9, 10. San Gado ben taki, so leki skrifi ini Genesis 3:15, èn san na a joisti fasi foe froestan den wortoe dati?

⁹ A leri foe Gado e wini foe di a e gi a pipel foe Jehovah ibritron pikinso moro froestan foe den Boekoe foe bijbel. Leki eksempre, wi ben leri taki a ben de Satan Didibri di ben taki nanga jepi foe a sneki ini Eden èn na wan falsi fasi a ben kragi Gado taki a ben lei di a ben taki dati dede ben sa de a strafoe foe a njan foe a froktoe di a ben tapoe den foe no njan foe en. Tokoe, wi e si taki trangajesi Jehovah Gado troetroe ben tjari dede kon tapoe a libisma famiri (Genesis 3:1-6; Romesma 5:12). Tokoe Gado ben gi libisma howpoe, di a ben taigi a sneki èn so boen Satan: „Mi sa poti feanti na mindri joe nanga na oema èn na mindri joe siri nanga en siri. A sa masi joe na ini na ede èn joe sa masi en na ini en bakafoetoe.” — Genesis 3:15.

¹⁰ Den wortoe dati ben abi wan kibritori na ini, di safrisafri ben kon pikinso moro na krin nanga jepi foe a leri foe Gado. Jehovah ben leri en pipel taki a moro prenspari thema foe bijbel de a regtfardiki foe a soevereiniteit foe en nanga jepi foe a Siri, wan bakapikin foe Abraham nanga David di abi a wettig reti tapoe a tiri foe a Kownoekondre (Genesis 22:15-18; 2 Samuèl 7:12, 13; Esekièl 21:25-27). Wi Bigi Leriman ben leri wi taki Jesus Krestes de a prenspari Siri foe na „oema”, na universeel organisâsi foe Gado (Galasiasma 3:16). Awansi ala den tesi di Satan tjari kon na en tapoe, Jesus ben kibri en soifri retifasi — srefi te na ini dede, san wani taki a masi foe a Siri na ini en bakafoetoe. Wi ben leri taki 144.000 Kownoekondre kompe-erfgenaam di teki poeroe na mindri libisma sa abi prati nanga Krestes ini a masi foe na ede foe Satan, „na owroe sneki” (Openbaring 14:1-4; 20:2; Romesma 16:20; Galasiasma 3:29; Efeisesma 3:4-6). Fa wi e warderi so wan sabi foe Gado Wortoe!

Ini a wondroefasi leti foe Gado

11. Foe san ede wi ben kan taki dati a leri foe Gado e wini foe di a e tjari sma kon ini jeje leti?

¹¹ A leri foe Gado e wini foe di a e tjari sma kon ini wan jeje leti. Salfoe kresten ben abi ondrofeni dati ini a kontroe foe 1 Petrus 2:9: „Oenoe na wan ’pipel di den ben teki poeroe na mindri trawan, wan kownoekondre priesterwroko, wan santa nâsi, wan pipel foe spesroetoe goedoe, dati oenoe sa meki bekènti na ala sei den kownoefasi’ foe a wan di kari oenoe komoto na doengroe ini wan wondroe leti.” Ini a ten disi, a leti di e komoto na Gado, „a bigi ipi” di sa libi foe têgo na wan paradijs grontapoe e njanboen foe en toe (Openbaring 7:9; Lukas 23:43). Foe di Gado e leri en pipel, Odo 4:18 e boeweisi taki a de troe: „A pasi foe den regtfardikiwan de leki a brenki leti, di e kon moro krin, te leki na dei kon de fasti.” A leri disi di e gi ibritron pikinso moro dipi e meki a froestan di libisma e froestan a leri foe Gado kon moro soifri, neleki den studenti di e meki go na fesi foe di den e kisi boen jepi foe a skoromeester ala di den e studeri gramatika, historia noso wan toe tra sani.

12, 13. Gi sortoe kefar foe falsi fasi foe bribi a leri foe Gado ben kibri Jehovah pipel?

¹² Wan tra wini foe a leri foe Gado de taki a e kibri den sakafasi sma di e teki a leri disi, foe den „sani di den ogri jeje e leri” (1 Timoteus 4:1). Na a tra sei, loekoe fa a krestenhèit de! Te wi e go baka na ini 1878, a lomsoe kerki fesiman, di ben abi wan hei posisi John Henri Newman ben skrifi: „Nanga a froetrow tapoe a krakti foe a krestendom foe man kakafoetoe gi a pori di san de takroe kan pori den èn foe kenki, den wrokosani nanga den tra sani di ben abi moro ete foe doe nanga den ogri jeje anbegi, poti den ini a gebroiki foe na evangelie. . . den tiriman foe a Kerki foe sensi a bigin, ben de srekasreka, efoe na okasi ben de, foe teki abra, noso waka na baka, noso meki kon santa den kerki doe nanga gwenti foe a pipel, so srefi toe a filosofie foe den groepoe sma di ben kisi hei leri.” Newman ben taki moro fara foe den sortoe sani so leki santa watra, den priesterkrosi di e meki sma e respeki den nanga den popki „alamala ben komoto foe den heiden èn den ben meki den kon santa foe di den ben teki den abra na ini a kerki.” Gado pipel de nanga tangi troetroe taki a leri foe Gado e kibri den foe den sortoe fadon komoto na bribi dati. A e wini ala sortoe foe anbegi foe ogri jeje. — Tori foe den Apostel 19:20.

¹³ A leri foe Gado e wini relisi fowtoe na ala fasi. Leki sma di ben kisi leri foe Gado, foe eksempre, wi no e bribi ini a Dri-wánfasi ma wi e erken taki Jehovah na a Moro Heiwan, Jesus na en Manpikin èn a santa jeje na Gado wroko krakti. Wi no frede helfaja, bikasi wi e froestan taki bijbel hèl na a grebi pe ala libisma e go na ini. Èn ala di den falsi relisisma e taki dati a libisma sili no kan dede, tokoe wi sabi taki den dedewan no sabi notinoti. Wi kan go doro foe kari wan bigi nomroe foe waarheid di wi ben kisi nanga jepi foe a leri foe Gado. Fa a de wan blesi foe de fri foe jeje katibo na Babilon a Bigiwan, a grontapoe tirimakti foe falsi relisi! — Johanes 8:31, 32; Openbaring 18:2, 4, 5.

14. Foe san ede den foetoeboi foe Gado kan go doro foe waka ini jeje leti?

¹⁴ Foe di a leri foe Gado e wini relisi fowtoe, a e meki taki den foetoeboi foe Gado kan waka ini a jeje leti. Te joe e loekoe en boen, den e jere wan wortoe na den baka di e taki: „Disi na a pasi. Waka na tapoe, oen pipel” (Jesaja 30:21). A leri foe Gado e kibri en foetoeboi toe foe falsi fasi foe denki. Te „falsi apostel” ben e meki problema kon ini a kresten gemeente na Korente, na apostel Paulus ben skrifi: „Den fetisani foe na feti foe wi no de na skinfasi, ma krakti foe a sei foe Gado foe trowe tranga skotoe sani. Bikasi wi e meki den prakseri tron noti nanga ala hei sani di den opo kontrari a leri foe Gado; èn wi e tjari ala prakseri ini katibo, foe meki en gi jesi na Krestes” (2 Korentesma 10:4, 5; 11:13-15). Den rai di den e gi nanga safri-atifasi ini a gemeente èn a preiki di den e preiki foe a boen njoensoe gi den sma di de na dorosei e trowe den prakseri di de kontrari a leri foe Gado go na gron. — 2 Timoteus 2:24-26.

Anbegi nanga jeje èn waarheid

15, 16. San a wani taki foe anbegi Gado nanga jeje èn waarheid?

¹⁵ Ala di a Kownoekondre preikiwroko e go na fesi, a leri foe Gado e wini foe di a e sori den safri-atisma fa den moesoe anbegi Gado „nanga jeje èn waarheid”. Na a Jakob-fonten, krosibei foe a foto Sichar, Jesus ben taigi wan Samaria oema taki a ben kan gi en watra di ben sa kan sorgoe taki a kisi têgo libi. Di a ben sori go tapoe den Samariasma, a ben taki moro fara: „Oenoe e anbegi san oenoe no sabi. . . A joeroe e kon èn a de now kaba, pe den troe anbegiman sa anbegi a Tata nanga jeje èn waarheid, bika foetroe a Tata e soekoe den sortoe sma disi foe anbegi en” (Johanes 4:7-15, 21-23). Baka dati, Jesus ben meki a kon sabi taki en na a Messias.

¹⁶ Ma fa wi kan anbegi Gado nanga jeje? Foe di wi e anbegi Gado fajafaja komoto foe wi ati di foeroe nanga tangi nanga lobi foe Gado, di abi en gron tapoe soifri sabi foe en Wortoe. Wi kan anbegi en nanga waarheid foe di wi e trowe den relisi falsi leri èn foe di wi e doe a wani foe Gado so leki fa a e kon na krin ini a bigi Leriboekoe foe Jehovah.

A wini di wi e wini tesi nanga grontapoe

17. Fa joe ben sa kan boeweisi taki a leri foe Gado ben jepi den foetoeboi foe Jehovah foe tanapoe na fesi foe tesi?

¹⁷ Te a pipel foe Gado e tanapoe na fesi tesi, a leri foe Gado e wini ibri tron baka. Prakseri a tori disi boen: Na a bigin foe a di foe Toe Grontapoe Orloekoe ini september 1939, den foetoeboi foe Jehovah ben abi wan spesroetoe koni foe man si sani ini a bigi Leriboekoe disi foe en fanowdoe. Wan artikel ini A Waktitoren foe 1 november 1939 (Ingrisitongo) ben de wan bigi jepi, foe di a ben tjari a leri foe Gado na wan krin fasi kon na fesi tapoe na afersi foe a kresten neutraliteit (Johanes 17:16). Na a srefi fasi, ini den bigin jari foe 1960, den Waktitoren-artikel (Ingrisitongo) di ben go foe a saka di joe moesoe saka joesrefi na wan skotoefasi gi den lanti „tirimakti”, ben jepi a pipel foe Gado foe gi jesi na a leri foe Gado te den ben kon tanapoe na fesi foe sociaal broeja. — Romesma 13:1-7; Tori foe den Apostel 5:29.

18. Fa sma di ben taki dati den na kresten ini a di foe toe nanga a di foe dri jarihondro foe wi Gewoon Teri, ben prakseri foe lagi njan prisiri, èn sortoe jepi a leri foe Gado e gi ini a tori disi ini a ten disi?

¹⁸ A leri foe Gado e jepi wi toe foe wini tesi, so leki den kori foe soekoe lagi njan prisiri. Loekoe san sma di ben taki dati den na kresten ini a di foe toe nanga a di foe dri jarihondro foe wi Gewoon Teri, ben taki. Tertullianus ben skrifi: „Wi no abi noti foe doe, ini wi taki, ini san wi e si noso jere, nanga a takroefasi foe a circus, a sondro sjen fasi foe kino, den ogri-ati sani di ben pasa ini na arena.” Wan tra skrifiman foe a ten dati ben aksi: „San wan getrow kresten e doe na mindri den sani disi, foe di a no moesoe prakseri ogridoe srefisrefi? Foe san ede a e feni prisiri ini den sortoe presenteri di den e presenteri den prei foe lostoe?” Ala di den skrifiman disi ben libi wan toe jari baka den fosi jarihondro kresten, den ben kroetoe a lagi fasi disi foe njan prisiri. Ini a ten disi, a leri foe Gado e gi wi koni foe wai pasi gi njan prisiri di doti, prisiri di no de akroederi den boen gwenti nanga wet èn di ogri.

19. Fa a leri foe Gado e jepi wi foe wini grontapoe?

¹⁹ A gi di wi e gi jesi na a leri foe Gado e meki taki wi kan wini a grontapoe srefi. Ija, a poti di wi e poti den leri foe wi Bigi Leriman ini wi libi e meki taki wi e tron winiman foe den ogri krakti foe a grontapoe disi, di didon ini a makti foe Satan (2 Korentesma 4:4; 1 Johanes 5:19). Efeisesma 2:1-3 e taki dati Gado ben meki wi kon a libi, ala di wi ben dede ini a pasa di wi ben pasa a wet nanga den sondoe foe wi, te wi ben waka akroederi a tiriman foe a makti foe loktoe. Wi e taki Jehovah tangi taki a leri foe Gado e jepi wi foe wini den grontapoe lostoe èn a jeje di e kon foe a feanti foe en èn a di foe wi — a bigi koriman, Satan Didibri!

20. Sortoe aksi moesoe abi wi prakseri moro fara?

²⁰ A de krin taki, a leri foe Gado e wini na foeroe fasi. Te joe loekoe en boen, a ben sa sori leki a no kan foe kari ala den wini foe en. A abi krakti tapoe libisma na ala sei foe grontapoe. Ma san a e doe gi joe? Fa a leri foe Gado abi krakti tapoe joe libi?

San joe ben leri?

◻ Fa joe kan gi wan finifini froeklari foe troe koni?

◻ San Gado ben tjari ibritron pikinso moro dipi kon na krin ini a tori foe Genesis 3:15?

◻ Fa a leri foe Gado ben wini ini jeje afersi?

◻ San a wani taki foe anbegi Gado nanga jeje èn waarheid?

◻ Fa a leri foe Gado ben jepi den foetoeboi foe Jehovah foe wini tesi nanga grontapoe?

[Prenki na tapoe bladzijde 10]

Jesus ben kibri en soifri retifasi te na dede — a masi foe na bakafoetoe foe a Siri