Wrokoman foe ogri

SAN bijbel e froeklari foe a ròl foe ogri jeje ini den afersi foe libisma, e gi piki tapoe fondamenti aksi di e taki foe ogri, di na wan tra fasi wi no ben sa kisi wan piki tapoe den. Loekoe foe eksempre a froeklari disi foe na International Herald Tribune ini a tori foe na orlokoe di e go nanga langa na ini den Balkan: „Wan groepoe foe ondrosoekoeman foe na E.E.G. (na Ekonomia Gemeenschap foe Europa), ben kon na a bosroiti taki [sroedati] ben didon nanga tranga na 20.000 moslim oema nanga oema-pikin . . . leki wan pisi foe wan sistema foe handri na wan toemoesi takroe fasi nanga a marki foe meki sma kon frede, broko den saka èn jagi den foe den oso.”

Wan sjatoe tori di skrifi ini a tijdschrift Time ben abi moeiti foe gi wan froeklari foe a situwâsi disi: „Sontron den jonkoeman na ini orlokoe kan go didon nanga tranga na wan oema foe plisi den owroewan foe den, den ofsiri foe den èn foe meki taki den sa feni den boen ini wan sortoe papa-nanga-manpikin matifasi. A didon di den e go didon nanga tranga na wan oema na wan boeweisi foe a froeplekti di den ben poti gi densrefi na a spesroetoe sroedati groepoe pe den de na ini èn di e doe ogri pasa marki. Wan jonkoeman di wani doe toemoesi takroe sani, poti en eigi konsensi na wan sei so taki a kan kon de wán nanga den tranga-ede prakseri foe a groepoe. Wan man e meki en loyaalfasi kon tranga nanga jepi foe toemoesi takroe doe.”

Ma foe san ede den „tranga-ede prakseri foe a groepoe” de moro lagi leki den konsensi foe den memre srefi? Leki wan aparti sma, pikinmoro ibri sma wani libi ini vrede nanga a sma na en sei. So boen, foe san ede ini ten foe orlokoe sma e go didon nanga tranga na trawan sjen, e gi hebi skin-ati na trawan èn e kiri makandra? Wan prenspari reide de taki ogri jeje krakti e wroko.

A froestan di wi e froestan a ròl foe den ogri jeje, e gi wi wan loesoe toe ini san sonwan e kari wan „problema foe wan theoloog”. A problema de fa foe tjari dri sani di sma ben taki kon ini akroederi nanga makandra: (1) Gado abi ala makti; (2) Gado na lobi èn a boen; èn (3) takroe sani e pasa. Son sma e denki taki a kan foe tjari toe foe den sani di sma taki disi kon ini akroederi nanga makandra, ma noiti joe sa man foe tjari ala dri kon ini akroederi nanga makandra. A Wortoe foe Gado srefi e gi a piki èn a piki dati abi foe doe nanga jeje di joe no man si, wrokoman foe ogri.

A fosi wan di ben opo ensrefi kontrari Gado

Bijbel e froeteri wi taki Gado srefi na wan jeje (Johanes 4:24). Baka ten a ben tron a Mekiman foe miljoenmiljoen tra jeje mekisani, engel manpikin. Ini wan fisjoen, Danièl, wan foetoeboi foe Gado, ben si wan hondro miljoen engel. Ala den jeje sma di Jehovah ben meki, ben de regtfardiki èn ini akroederi nanga en wani. — Danièl 7:10; Hebrewsma 1:7.

Baka ten, di Gado ben „poti a fondamenti foe grontapoe”, den engel manpikin disi foe Gado „ben opo makandra wan prisiri babari” èn „bigin bari nanga wán mofo foe breitifasi” (Job 38:4-7). Ma wán foe den ben kweki wan angri foe graboe gi ensrefi na anbegi di a Mekiman nomo abi reti na tapoe. Foe di a ben opo ensrefi kontrari Gado, na engel disi ben meki ensrefi wan satan (dati wani taki „gensman”) èn wan didibri (dati wani taki wan „leiman di e pori sma nen”). — Teki gersi Esekièl 28:13-15.

Di a ben gebroiki wan sneki na ini Eden foe taki nanga a fosi oema, Eva, Satan ben hari en go na en sei foe tranga jesi a gebod di Gado srefi ben gi, foe no njan a froktoe foe wan seiker bon ini a djari. Baka dati en masra ben teki en sei. Na so fasi, a fosi libisma paar ben teki a sei foe na engel ini na opo di a ben opo ensrefi kontrari Jehovah. — Genesis 2:17; 3:1-6.

Ala di den sani di ben pasa na ini Eden ben gersi leki a de wan krin lès ini a gi di wi moesoe gi jesi, Satan ben tjari toe prenspari strei-aksi kon na fesi di abi foe doe nanga boen gwenti nanga wet. Na fosi presi, Satan ben strei efoe a tiri foe Jehovah na tapoe den mekisani foe en ben de regtfardiki èn efoe a ben de foe den eigi boen. Kande libisma ben kan tiri densrefi moro boen. Na a di foe toe presi, Satan ben strei efoe ibriwan koni mekisani ben sa tan getrow èn de loyaal na Gado te a e sori leki a gi di den e gi jesi no e tjari wini gi den na a sei foe goedoe.a

Wan krin froestan foe den strei-aksi di ben tjari kon na fesi ini Eden, makandra nanga a sabi di wi sabi den eigifasi foe Jehovah, e jepi wi foe froestan a loesoe foe a „problema foe wan theoloog”, dati wani taki, foe tjari a de di ogri de kon ini akroederi nanga den eigifasi foe Gado foe makti nanga lobi. Ala di a de troe taki Jehovah abi makti di no abi skotoe èn En de a personifikâsi srefi foe lobi, a koni èn regtfardiki toe. A e sori den fo eigifasi disi ini volmaakti balansifasi. So boen, a no ben gebroiki en makti, di no wan sma kan gens, foe pori den dri sma disi di ben opo densrefi kontrari en, wantewante. Dati ben sa de regtfardiki ma a e taki foe ensrefi taki a no ben sa de wan koni sani noso wan lobi sani. Moro fara, a no ben gi pardon èn frigiti nomo, wan fasi di sonwan ben kan firi taki dati ben sa de a fasi di a teki na wan lobi fasi. Efoe a ben doe dati, dan a no ben sa de wan koni sani noso wan regtfardiki sani.

Ten ben de fanowdoe foe loesoe den strei-aksi di Satan ben tjari kon na fesi. A ben sa teki ten foe boeweisi efoe libisma ben kan tiri densrefi fri foe Gado. Foe di a ben gi pasi na den dri sma di ben opo densrefi kontrari en, foe tan na libi, Jehovah so srefi ben meki taki a kan taki den mekisani abi wan prati ini a boeweisi di den ben sa boeweisi taki san Satan ben taki, dati libisma no ben sa dini Gado na wan getrowfasi te den e kon ondro moeilek situwâsi, no ben de troe.b

Jehovah ben taki krin gi Adam nanga Eva taki, efoe den ben sa njan foe a froktoe di den no ben mag njan, dan den ben sa dede. Èn den ben dede troetroe, ala di Satan ben gi Eva a djaranti taki a no ben sa dede. Satan so srefi de ondro kroetoe foe dede; disiten a e go doro foe kori libisma famiri. Te joe loekoe en boen, bijbel e taki: „Heri grontapoe didon ini a makti foe na ogriwan.” — 1 Johanes 5:19; Genesis 2:16, 17; 3:4; 5:5.

Tra engel e opo densrefi kontrari Gado

No so langa baka den sani di ben pasa ini Eden, tra engel ben teki a sei foe na opo di den ben opo densrefi kontrari a soevereiniteit foe Jehovah. Bijbel e froeklari: „Na a ten di libisma ben e kon foeroe na grontapoe èn den ben e meki oemapikin, dan den manpikin foe a troe Gado ben bigin poti prakseri tapoe den oemapikin foe libisma èn ben si taki den ben moi; èn den ben go teki oema gi densrefi, dati wani taki, ala oema di den ben wani nomo.” Nanga tra wortoe, den engel disi „ben libi den eigi reti tanpresi [ini hemel]” èn ben kon na grontapoe, ben teki libisma skin, èn ben e njan prisiri ini ogri seks lostoe nanga den oema. — Genesis 6:1, 2; Judas 6.

A tori e go moro fara ini Genesis 6:4: „Ini a ten dati den Nefilim ben de na grontapoe, èn baka dati toe, di den manpikin foe a troe Gado ben go doro foe libi nanga den oemapikin foe libisma èn den ben meki manpikin gi den, disi ben de den tranga man di ben de na owroeten, den man foe barinen.” Den basra manpikin disi di den oema ben meki nanga den engel, ben de tranga na wan aparti fasi, „tranga man”. Den ben de man di ben doe ogri nanga tranga, noso Nephi·limʹ, wan Hebrew wortoe di wani taki „den wan di e meki trawan fadon na gron”.

A boen foe taki dati den sani disi di ben pasa, den ben feni skrifi bakaten ini den fositen anansitori foe den boen kweki di sma ben kisi ini owroeten. Foe eksempre, wan tori foe Babilon di owroe 4000 jari, e taki foe den deki-ati doe di hei moro libisma krakti, foe Gilgamesh, wan makti, ogri kroektoe gado di „a lostoe foe en no ben meki en libi no wan jongoewenke gi en freiri”. Wan tra eksempre, foe Griki fositen anansitori, na Hercules di hei moro libisma (noso Heracles). A mama foe en ben de Alcmene, wan libisma èn en papa ben de a gado Zeus. Hercules ben abi wan plan foe go doe wan ipi ogri sani, baka di a ben kiri en oema nanga den pikin foe en, di a ben bigin rigeri leki wan lawman. Ala di den ben taki den sortoe tori disi heri tra fasi, tokoe te den ben froeteri den na a wan geslakti go miti a tra geslakti, den e kroederi nanga san bijbel e taki foe den Nefilim nanga den engel papa foe den di ben opo densrefi kontrari Gado.

Foe di a makti foe den takroe engel nanga den manpikin foe den ben hei moro libisma, dati ben meki grontapoe ben kon so foeroe nanga takroedoe dati Jehovah ben bosroiti foe pori grontapoe nanga jepi foe wan bigi froedoe. Den Nefilim nanga ala den ogri libisma ben dede; den wan-enkri libisma di ben tan na libi ben de a regtfardiki Noa nanga en famiri. — Genesis 6:11; 7:23.

Ma den ogri engel no ben dede. Na presi foe dati, den ben libi den libisma skin foe den èn ben drai go baka na a jejekondre. Foe di den ben trangajesi, meki den no ben kisi pasi foe go baka na ini na osofamiri foe Gado foe regtfardiki engel; so srefi den no ben kisi pasi moro foe teki libisma skin so leki fa den ben doe ini den dei foe Noa. Tokoe den ben go doro foe abi wan pori krakti na tapoe den afersi foe libisma famiri, na ondro a makti foe „a tiriman foe den ogri jeje”, Satan Didibri. — Mateus 9:34; 2 Petrus 2:4; Judas 6.

Feanti foe a libisma famiri

Satan nanga den ogri jeje ala ten ben lobi foe kiri sma èn abi ogri-ati. Satan ben kiri den meti nanga den foetoeboi foe Job. Baka dati a ben kiri den tin pikin foe Job foe di a ben meki „wan bigi winti” naki na oso broko pe den ben de na ini. Baka dati, Satan ben pina Job nanga „takroe soro, komoto na en ondrofoetoe te go na en ede”. — Job 1:7-19; 2:3, 7. 

Den ogri jeje e sori wan srefi sortoe takroe eigifasi. Ini den dei foe Jesus den ben meki sma babaw èn breni. Den ben meki wan man koti en skin nanga ston. Den ben naki wan boi trowe na gron èn „ben meki en skin hari-go-hari-kon hebi”. — Lukas 9:42; Mateus 9:32, 33; 12:22; Markus 5:5.

Njoensoe foe heri grontapoe e sori taki Satan nanga den ogri jeje ogri moro leki ini wan ten. Sonsma den e naki nanga siki. Trawan den e trobi foe di den meki den no man sribi, noso den e meki den dren takroe dren, noso den e gebroiki den na seks fasi. Trawan baka den e meki kon law, meki den kiri sma noso e kiri densrefi.

Olanga moro den sa kisi pasi ete?

Den no sa gi Satan nanga den ogri jeje foe en pasi foe têgo. Nanga boen reide Jehovah ben gi den pasi foe tan te ini wi ten, ma now a ten foe den kon sjatoe. Moro froekoe ini a jarihondro disi, wan prenspari sani ben doe foe skotoe a kontren pe den e wroko. A boekoe Openbaring e froeklari: „Orlokoe ben kon na hemel: Mikaèl [a Jesus di ben opo baka na dede] nanga en [boen] engel ben feti nanga a draak [Satan], èn a draak nanga en engel ben feti, ma a no ben wini èn presi no ben de foe feni moro gi den na hemel. Foe dati ede den ben fringi a bigi draak go na ondro, a fosi sneki, a wan di den e kari Didibri nanga Satan, di e kori a heri grontapoe pe sma e libi; na en den ben fringi go na grontapoe, èn den [ogri] engel foe en den ben fringi go nanga en.” — Openbaring 12:7-9.

San ben de a bakapisi? A tori e go moro fara: „Oen prisiri foe disi, oen hemel nanga oenoe di e libi drape!” Den regtfardiki engel ben kan prisiri, bika Satan nanga den ogri jeje foe en, no ben de moro na hemel. Ma fa a de nanga den sma na grontapoe? Bijbel e taki: „Heloe foe grontapoe nanga se, bika Didibri saka kon na oenoe, a abi bigi atibron, foe di a sabi taki a abi wan sjatoe pisi ten nomo.” — Openbaring 12:12.

Ini den atibron, Satan nanga en foetoeboi abi a prakseri foe tjari someni heloe kon leki den kan, bifo den kon na a kaba foe den di de krosibei. Ini a jarihondro disi toe grontapoe orlokoe ben de èn moro leki 150 moro pikin orlokoe ben de, sensi a kaba foe a di foe toe grontapoe orlokoe. Ini den wortoe di wi e gebroiki te wi e taki, wortoe e kon di e sori na ogri di doe nanga tranga foe a geslakti disi: „a gebroiki foe bacterie di e gi sma mankeri, leki fetisani ini orlokoe, „a Holocaust”, „den kiri gron” (wan nen di den ben gi a kondre Kambodja, foe di den ben kiri sma pasa marki drape), „den kampoe pe sroedati e didon nanga tranga na oemasma ini a kondre di ben de Joegoslavia fosi”, „kiriman di e kiri a wan sma baka a trawan ini wan pisi ten” èn „na atoombom”. A njoensoe kon moro foeroe nanga tori foe drug, a kiri di den e kiri sma, a fringi di den e fringi bòm, a njan di sma di law e njan libisma meti, a kiri di den e kiri foeroe sma na wan takroe fasi, angriten, nanga a gi di den e gi trawan hebi skin-ati.

A boen njoensoe de taki den sani disi de foe wan pisi ten. Ini a krosibei tamara, Gado sa opo doe sani baka nanga Satan nanga den ogri jeje foe en. Di a ben taki foe wan fisjoen, di Gado ben gi, na apostel Johanes ben taki: „Èn mi ben si wan engel di saka komoto na hemel nanga a sroto foe a peti di no abi gron èn wan bigi keti na en anoe. Èn a ben graboe a draak, a fosi sneki, di de Didibri nanga Satan, èn ben tai en doesoen jari langa. Èn a ben fringi en go na ini a peti di no abi gron èn ben sroto en èn laki disi na en tapoe, so taki a no kan kori den nâsi moro te leki den doesoen jari ben kon na wan kaba.” — Openbaring 20:1-3.

Baka dati, Didibri nanga den ogri jeje foe en sa „loesoe foe wan sjatoe pisi ten”, èn dan den sa kisi pori foe têgo (Openbaring 20:3, 10). Fa dati sa de wan toemoesi moi ten! Te Satan nanga den ogri jeje foe en sa komoto na pasi foe alaten, Jehovah sa de „ala sani gi ibri sma”. Èn foetroe ibri sma sa „feni den switi prisiri ini vrede pasa marki”. — 1 Korentesma 15:28; Psalm 37:11.

[Foetoewortoe]

[Prenki na tapoe bladzijde 7]

Libisma wawan de frantiwortoe gi den sortoe sani disi, noso wan ogri krakti, di sma no man si, moesoe kisi a pori nen toe?

[Sma di abi a reti foe a prenki]

Oli peti di e bron ini Koeweit, 1991: Chamussy/Sipa Press

[Prenki na tapoe bladzijde 7]

Fa a sa de wan toemoesi moi ten te den ogri jeje no e trobi libisma famiri moro langa!