Jehovah e leri wi te leki now ete
„Jehovah srefi gi mi a tongo foe den wan di kisi leri.” — JESAJA 50:4.
1, 2. (a) Gi san Jehovah ben sreka a skoropikin foe en di a lobi moro foeroe, èn san ben de a bakapisi? (b) Fa Jesus ben erken a Fonten foe den leri di a kisi?
JEHOVAH GADO de wan Leriman foe sensi a ben tron wan Tata. Wan pisi ten baka son wan foe den pikin foe en ben opo densrefi teige en, a ben sreka a skoropikin foe en di a lobi moro foeroe, en Fosi Geborewan, gi wan diniwroko na grontapoe (Odo 8:30). Jesaja kapitel 50 e taki na wan profeiti fasi foe a skoropikin disi, te a e taki: „A Soeverein Masra Jehovah srefi gi mi a tongo foe den wan di kisi leri, so taki mi kan sabi fa foe piki nanga wan wortoe den wan di weri” (Jesaja 50:4). Leki wan bakapisi foe a fiti di Jesus ben fiti den leri foe en Tata na ini en libi di a ben de na grontapoe, a ben de wan fonten foe kowroe-ati gi ala den wan di ben ’weri èn di ben abi hebi na den tapoe’. — Mateus 11:28-30.
2 Jesus ben doe foeroe krakti wroko na ini a fosi jarihondro. A ben opo den ai foe den breniwan èn a ben opo srefi dedewan, ma tokoe den sma foe en ten ben sabi en moro foeroe leki wan leriman. Den bakaman foe en èn so srefi den gensman foe en ben kari en wan leriman (Mateus 8:19; 9:11; 12:38; 19:16; Johanes 3:2). Jesus no ben teki a grani foe den sani di a ben leri sma, ma nanga sakafasi a ben erken: „Den sani di mi e leri no de foe mi, ma de foe a sma di ben seni mi kon.” „Neleki fa a Tata ben leri mi, mi e taki den sani disi.” — Johanes 7:16; 8:28; 12:49.
Wan heri boen banti na mindri a Leriman nanga a skoropikin
3. Fa a profeititori foe Jesaja e sori taki Jehovah abi belangstelling gi den wan di a e gi leri?
3 Wan heri boen leriman abi wan persoonlijk èn opregti belangstelling na wan lobi fasi, gi den skoropikin foe en. Jesaja kapitel 50 e tjari kon na krin taki Jehovah Gado abi a sortoe belangstelling dati gi den wan di a e gi leri. „Ibri mamanten a e wiki baka”, a profeiti e taki, „a e wiki mi jesi foe jere leki den wan di kisi leri” (Jesaja 50:4). Den wortoe di den gebroiki djaso, e sori tapoe wan leriman di e wiki den skoropikin foe en froekoe mamanten foe gi den leri. Wan bijbel sabiman e taki foe a fasi fa den gebroiki a profeititori disi: „A prakseri de, taki a Froeloesoeman ben sa de . . . wan sma di, foe taki en so, de na ini a skoro foe Gado; èn di ben sa de bekwaam foe gi leri na tra sma. . . . Nanga jepi foe a leri foe Gado, a Mesias ben sa de toemoesi bekwaam foe de a leriman foe a libisma famiri.”
4. Fa Jesus ben handri na tapoe a leri foe en Tata?
4 A ben sa de heri boen efoe skoropikin e handri na tapoe a leri di den kisi foe a leriman foe den. Fa Jesus ben handri na tapoe a leri di a ben kisi foe en Tata? A fasi fa a ben handri ben de akroederi a sani di wi e leisi na Jesaja 50:5: „A Soeverein Masra Jehovah srefi opo mi jesi, èn mi foe mi sei, no ben opo misrefi teige en. Mi no ben drai go na a tra sei.” Ija, Jesus ben angri foe kisi leri. Soleki fa sma e taki, a ben poti ala en jesi e arki. Moro fara, a ben de klariklari foe doe ala sani di en Tata ben aksi foe en. A no ben opo ensrefi teige en; na presi foe dati, a ben taki: „No meki mi wani, ma joe wani feni presi.” — Lukas 22:42.
5. (a) San e sori taki Jesus ben sabi na fesi kaba foe den tesi di a ben sa abi na grontapoe? (b) Fa a profeititori foe Jesaja 50:6 ben kon troe?
5 A profeititori e sori taki a Manpikin ben sabi san ben kan de den bakapisi te a ben e doe a wani foe Gado. Disi de foe si na san a wan di kisi leri e taki: „Mi baka mi ben gi na den wan di ben naki mi, èn den seifesi foe mi, mi gi na den wan di e hari a wiwiri poeroe. Mi no ben kibri mi fesi gi sani di e gi sjen èn gi spiti” (Jesaja 50:6). Soleki fa a profeititori e sori, den ben handri na wan ogri-atifasi nanga Jesus na grontapoe. „Den ben spiti na ini en fesi”, na so na apostel Mateus ben skrifi. „Tra sma ben klapoe en fesi” (Mateus 26:67). Disi ben pasa na den anoe foe den relisi fesiman tapoe a neti foe a Paska na ini a jari 33 G.T. A dei na baka, Jesus ben saka ensrefi na ondro a naki di den Rome sroedati ben naki en sondro sari-ati, bifo den ben anga en na wan postoe te leki a dede. — Johanes 19:1-3, 16-23.
6. San e sori taki noiti Jesus ben lasi froetrow na ini en Leriman, èn fa a ben kisi pai foe a froetrow disi ede?
6 A Manpikin di ben kisi boen leri na fesi, noiti no ben lasi froetrow na ini en Leriman. Disi wi e si na san a ben taki baka dati, akroederi a profeititori: „A Soeverein Masra Jehovah srefi sa jepi mi. Na foe dati ede mi no sa abi foe firi sjen” (Jesaja 50:7). A froetrow di Jesus ben abi na ini en Leriman ben tjari foeroe pai gi en. En Tata ben hei en, a ben blesi en nanga wan hei posisi, moro hei leki ala tra foetoeboi foe Gado (Filipisma 2:5-11). Bigi blesi e wakti wi toe, efoe wi e gi jesi na den leri foe Jehovah èn efoe wi no e „drai go na a tra sei”. Meki wi go loekoe san den doe, so taki wi kan kisi a leri dati te leki now ete.
Wan moro bigi leri programa
7. Fa Jehovah go doro nanga a leri foe en na grontapoe?
7 Soleki fa wi ben si na fesi kaba, Jehovah ben gebroiki a Sma di e teki presi gi en na grontapoe, Jesus Krestes, foe gi a leri foe Gado na ini a fosi jarihondro (Johanes 16:27, 28). Doronomo Jesus ben sori go na Gado Wortoe leki a fondamenti foe a leri di a ben gi èn nanga dati a poti wan eksempre gi den wan di a ben leri (Mateus 4:4, 7, 10; 21:13; 26:24, 31). Baka dati, a leri foe Jehovah ben go doro na grontapoe nanga jepi foe a diniwroko foe den wan di kisi leri. Memre taki Jesus ben komanderi den: „Go foe dati ede, èn meki disipel foe sma foe ala nâsi, . . . leri den foe ondrow ala den sani di mi ben komanderi oenoe” (Mateus 28:19, 20). Te disipel ben meki, dan den ben tron wan pisi foe na „osofamiri foe Gado, . . . a gemeente foe a Gado di de na libi” (1 Timoteus 3:15). Den ben seti so srefi na ini aparti gemeente pe den ben kisi leri foe Jehovah (Tori foe den Apostel 14:23; 15:41; 16:5; 1 Korentesma 11:16). A de so, taki a leri foe Gado go doro na a srefi fasi te leki now ete?
8. Fa Jesus ben sori taki den ben sa tiri a preikiwroko na grontapoe bifo a kaba ben sa kon?
8 Na so a de, a go doro te leki now ete! Dri dei bifo a dede foe en, Jesus ben taki na fesi taki bifo a kaba foe a seti foe sani disi, wan bigi preikiwroko ben sa de. „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi,” a ben taki, „èn dan a kaba sa kon.” Jesus ben go doro foe taki foe a wrokosani di ben o jepi foe tiri a preiki nanga leri programa disi na heri grontapoe. A ben taki foe „a getrow èn koni srafoe” di ben sa de leki a kanari noso a wrokosani foe gi den foetoeboi foe En a njanjan na jejefasi (Mateus 24:14, 45-47). Jehovah Gado gebroiki a „srafoe” disi foe tiri den Kownoekondre afersi na heri grontapoe.
9. Soema na a getrow èn koni srafoe?
9 Na ini a ten disi, a getrow èn koni srafoe meki foe a fikapisi foe den Kownoekondre erfgenaam. Den na den salfoe kresten, den wan foe den 144.000 di tan abra na grontapoe, di „de foe Krestes”, èn di de wan pisi foe a „siri foe Abraham” (Galasiasma 3:16, 29; Openbaring 14:1-3). Fa joe kan doe sabi a getrow èn koni srafoe? Moro foeroe nanga jepi foe a wroko di den e doe èn nanga jepi foe a hori di den e hori densrefi krosibei na a Wortoe foe Gado, bijbel.
10. Sortoe wrokosani a srafoe groepoe e gebroiki foe meki den leri foe Jehovah go na fesi?
10 Jehovah e gebroiki a „srafoe” disi leki a jepisani foe en foe leri sma na ini a ten disi. Den wan foe a srafoe groepoe teki a nen Jehovah Kotoigi na ini 1931. Foe sensi a ten dati, miljoenmiljoen sma moksi densrefi nanga den èn teki a nen dati èn wroko makandra nanga den foe meki a Kownoekondre foe Gado bekènti. A tijdschrift disi, A Waktitoren a e bariwroko gi Jehovah Kownoekondre, na a moro prenspari wrokosani di a „srafoe” e gebroiki na ini a leriwroko. Ma, den e gebroiki tra poeblikâsi toe, soleki boekoe, pikinboekoe, brochure, traktaat, nanga a tijdschrift Ontwaakt!
11. Sortoe skoro a „srafoe” orga, èn san na a marki foe ibriwan foe den skoro disi?
11 Moro fara, a „srafoe” e orga difrenti skoro. Wan foe den na a Waktitoren Bijbel Skoro Gilead, di de wan skoro foe feifi moen di e sreka jongoe dinari foe doe zendingwroko na dorosei kondre, èn so srefi a Bedinari Skoro foe toe moen, di e leri owroeman nanga dinari na ini a diniwroko di no trow, foe doe spesroetoe theokrasia wroko. Èn wi abi so srefi a Kownoekondre Diniwroko-Skoro na ini san kresten owroeman nanga dinari na ini a diniwroko e kisi leri ten na ten, na ini den frantiwortoe di den abi na ini a gemeente, èn so srefi a Pionier Skoro di e sreka foeroeten preikiman foe abi moro boen bakapisi na ini a preikiwroko foe den.
12. San na wan tra sani foe a leri programa di e hori ala wiki?
12 Wan tra sani foe a leri programa na den feifi konmakandra di wi abi ibri wiki, di e hori na ini moro leki 75.500 gemeente foe a pipel foe Jehovah na heri grontapoe. Joe e kisi so foeroe winimarki leki a kan, foe den konmakandra disi? Nanga jepi foe a fasi fa joe e poti prakseri na tapoe den leri disi di e gi, joe e sori taki joe e bribi troetroe, foe taki en so, taki joe de na ini a skoro foe Gado? A de so, taki a gro di joe e gro na jejefasi e meki a de krin gi trawan taki joe abi „a tongo foe den wan di kisi leri”? — Jesaja 50:4; 1 Timoteus 4:15, 16.
Leri na tapoe den gemeente konmakandra
13. (a) San na wan prenspari fasi fa Jehovah e leri a pipel foe en na ini a ten disi? (b) Fa wi kan sori taki wi e warderi A Waktitoren?
13 Jehovah e leri a pipel foe en spesroetoe nanga jepi foe a studeri di den e studeri bijbel ala wiki, ala di a e gebroiki A Waktitoren leki wan jepisani foe gi leri. Joe e si a konmakandra disi leki wan presi pe joe kan kisi leri foe Jehovah? Ala di Jesaja 50:4 abi foe doe moro foeroe nanga Jesus, a e fiti gi ala den wan toe di e meki gebroiki foe den sani di Gado sreka foe kan kisi „a tongo foe den wan di kisi leri”. Wán fasi fa joe kan sori taki joe e si A Waktitoren leki wan warti sani, na foe di joe e leisi ibri eksemplaar so esi leki joe kisi en. Dan, te den e studeri A Waktitoren na ini a gemeente, joe kan sori a warderi di joe abi gi Jehovah te joe de drape èn te joe sreka joesrefi foe meki a howpoe foe joe bekènti na poebliki. — Hebrewsma 10:23.
14. (a) Foe san ede a de so wan prenspari grani foe gi komentaar na tapoe den konmakandra? (b) Sortoe komentaar di den jongoewan e gi, e gi moro deki-ati?
14 Joe e froestan taki nanga jepi foe den komentaar foe joe na tapoe den konmakandra disi, taki joe kan abi wan prati na a bigi leri programa foe Jehovah? Seiker, foe gi komentaar na tapoe den konmakandra de wan prenspari fasi fa wi kan gi makandra deki-ati foe „sori lobi èn toemoesi boen wroko” (Hebrewsma 10:24, 25). Pikin-nengre kan abi wan prati na a leri programa disi toe? Ija, den kan. Foeroetron den opregti komentaar di den jongoewan e gi, de wan deki-ati gi den moro owroewan. Son tron, den komentaar foe den pikin-nengre ben boeweigi den moro njoenwan na tapoe den konmakandra foe wi, foe abi wan moro serjoesoe belangstelling na ini a waarheid foe bijbel. Wan toe jongoewan abi a gwenti foe leisi den komentaar foe den langalanga foe a paragraaf, noso foe taki baka san wan moro owroewan ben taigi den safri na ini den jesi. Ma, a e gi moro foeroe deki-ati te den komentaar foe den sreka heri boen na fesi. Den sortoe komentaar dati e tjari troetroe grani gi wi Bigi Leriman èn a hei leri programa foe en. — Jesaja 30:20, 21.
15. San papa nanga mama kan doe foe jepi den pikin foe gi moro boen komentaar?
15 A de wan prisiri foe si taki pikin-nengre e wani foe teki prati na a gi foe prèise na Gado. Jesus ben warderi den prèise wortoe foe den jongoewan (Mateus 21:15, 16). Wán kresten owroeman ben taki: „Di mi ben de wan pikin-nengre, mi ben wani foe gi komentaar na a Waktitoren-studie. Baka te mi papa ben jepi mi foe sreka wan komentaar, dan a ben wani taki mi ben moesoe oefen a komentaar no moro mendri leki seibi tron.” Kande na a osofamiri bijbelstudie, oenoe papa nanga mama ben kan jepi den pikin foe oenoe foe sreka komentaar di den kan gi nanga eigi wortoe foe spesroetoe paragraaf na ini A Waktitoren. Jepi den foe warderi a bigi grani di den abi foe abi wan prati na a leri programa foe Jehovah.
16. San ben de a winimarki foe a Theokrasia Diniwroko-Skoro, èn soema kan gi en nen foe kan abi wan prati na a skoro disi?
16 Den wan di abi a grani foe gi a bodoi èn so srefi den wan di e arki a bodoi di e gi, moesoe poti serjoesoe prakseri toe na tapoe den leri di e gi na tapoe den tra kresten konmakandra. Moro leki 50 jari kaba, Jehovah gebroiki na alawiki Theokrasia Diniwroko-Skoro foe leri miljoenmiljoen mansma nanga oemasma foe pristeri a Kownoekondre boskopoe moro boen. Den wan di de aktief nanga a gemeente kan gi den nen foe kan abi wan prati na a skoro disi, èn so srefi sma di no so langa pasa bigin foe fisiti den gemeente konmakandra, soso efoe den e libi akroederi kresten gronprakseri.
17. (a) Gi sortoe marki moro foeroe, a Poebliki Konmakandra ben seti? (b) San na wan toe sani di den poebliki takiman moesoe hori na prakseri?
17 Wan tra pisi foe a leri programa di de langa ten kaba, na a Poebliki Konmakandra. Soleki fa a nen e sori, a konmakandra disi ben seti spesroetoe foe meki sma di no de Kotoigi, kon sabi den prenspari bijbel leri. Foe dati ede, a sma di e gi a taki moesoe pristeri a bodoi na so wan fasi taki den sma di e jere a boskopoe gi a fosi leisi, kan froestan a poebliki taki. Disi wani taki dati a moesoe froeklari den wortoe soleki „tra skapoe”, „brada”, nanga „fikapisi”, wortoe di sma di no de Kotoigi no man froestan. Bikasi a de so, taki sma di e fisiti a Poebliki Konmakandra abi wan bribi noso wan fasi foe libi di de kontrari foe den Boekoe foe bijbel srefisrefi — ala di a de wan boen sani na ini a libimakandra foe a ten disi — tokoe ala ten a takiman moesoe abi takt èn noiti a no moesoe spotoe nanga den bribi disi noso den fasi disi foe libi. — Teki gersi 1 Korentesma 9:19-23.
18. Sortoe tra gemeente konmakandra e hori ibri wiki, èn san na den marki foe den?
18 A gemeente boekoestudie de wan konmakandra pe poeblikâsi di sreka na ondro a tiri foe a getrow èn koni srafoe, e studeri makandra nanga bijbel ibri wiki. A boekoe De Openbaring — Haar grootse climax is nabij! (Na Openbaring — En moro bigi heimarki de krosibei!) na a boekoe di wi e studeri now na ini foeroe kondre. A Diniwroko Konmakandra seti foe meki a pipel foe Jehovah abi wan heri boen prati na a preiki foe a Kownoekondre boen njoensoe èn foe meki disipel. — Mateus 28:19, 20; Markus 13:10.
Kisi leri na den moro bigi konmakandra
19. Sortoe bigi konmakandra a „srafoe” seti ibri jari?
19 Moro leki wán hondro jari kaba, a ’getrow srafoe’ seti kongres nanga kring konmakandra foe leri èn foe gi spesroetoe deki-ati na troe kresten. Dri foe den sortoe bigi konmakandra disi e hori ibri jari. Wan foe den na a wán-dei konmakandra pe wan groepoe gemeente di e meki wan kring, e fisiti. Na ini a jari, ibri kring abi so srefi wan toe-dei konmakandra, di wi e kari wan kringkonmakandra. Boiti dati, wan konmakandra de di wi e kari wan distriktkongres, di wan toe kring e fisiti. Ten na ten internationaal kongres kan de. Den bigi konmakandra disi di Kotoigi foe foeroe kondre e fisiti, e tranga a bribi foe a pipel foe Jehovah troetroe! — Teki gersi Deuteronomium 16:16.
20. Na tapoe san den ben poti krakti doronomo na den moro bigi konmakandra foe Jehovah Kotoigi?
20 Na ini 1922, di so wan 10.000 sma ben kon makandra na ini Cedar Point, Ohio, Amerkankondre, dan den fisitiman foe tra kondre ben kisi tranga foe den wortoe foe a takiman di e gi deki-ati: „Disi na a moro prenspari dei foe ala den dei. Loekoe, a Kownoe e tiri! Oenoe na den wrokoman foe en di e meki sani bekènti gi en. Foe dati ede, preiki, preiki, preiki a Kownoe nanga en kownoekondre.” Doronomo den sortoe bigi konmakandra disi poti krakti na tapoe a preikiwroko. Foe eksempre, na a internationaal kongres na ini New York City na ini 1953, den ben meki bekènti taki wan programa ben seti na ini ala gemeente, so taki den bekwaam preikiman ben kan jepi den njoen preikiman na ini a diniwroko. Foe di den ben doe dati, a sani disi ben abi wan heri boen krakti na tapoe a Kownoekondre preikiwroko na foeroe kondre.
Kisi leri foe Gado foe gi leri
21. Sortoe grani wi wani teki èn di wi no wani misi a marki foe en?
21 Foe troe, Jehovah abi wan heri boen leri programa na grontapoe na ini a ten disi! Ala sma di e meki gebroiki foe na okasi disi kan kisi leri foe Gado, Ija, den kan de na mindri den wan di kisi „a tongo foe den wan di kisi leri”. A de wan grani troetroe, foe taki en so, foe de na ini a skoro foe Gado! Ma tokoe, te wi e teki a grani disi, dan wi no moesoe misi a marki foe en. Jehovah ben leri Jesus so taki a ben kan leri tra sma, èn Jesus foe en sei ben leri den disipel foe en so taki den ben kan doe a srefi wroko leki san a ben doe, ma na wan moro bigi fasi srefi. Na so a de toe, wi e kisi leri na ini a bigi leri programa foe Jehovah nanga a marki foe leri tra sma. — Johanes 6:45; 14:12; 2 Korentesma 5:20, 21; 6:1; 2 Timoteus 2:2.
22. (a) Sortoe problema Moses nanga Jeremia ben abi, ma fa a ben loesoe? (b) Sortoe djaranti wi abi taki Gado sa sorgoe taki a Kownoekondre boskopoe sa doe dorodoro?
22 A de so, taki neleki Moses, joe e taki: „Mi no de wan takiman di e taki grati”, noso neleki fa Jeremia ben taki: „Foe taki en leti, mi no sabi fa foe taki”? Jehovah sa jepi joe neleki fa a ben jepi den. „Misrefi sa sori foe de nanga joe mofo”, a ben taigi Moses. Èn a ben taigi Jeremia: „No frede . . . Mi de nanga joe” (Exodus 4:10-12; Jeremia 1:6-8). Di den relisi fesiman ben wani foe tapoe a mofo foe den disipel foe Jesus, dan Jesus ben taki: „Efoe den disi ben sa hori den mofo, dan den ston ben sa bari taki” (Lukas 19:40). Ma den ston no ben abi foe bari taki na a ten dati, èn den no abi foe doe dati now toe, bikasi Jehovah e gebroiki a tongo foe den wan foe en di kisi leri, foe prati a Kownoekondre boskopoe foe en.
Joe kan piki?
◻ Jesaja kapitel 50 e poti krakti na tapoe sortoe toemoesi boen matifasi na mindri wan Leriman nanga en skoropikin?
◻ Fa Jehovah go doro nanga wan moro bigi leri programa?
◻ San na wan toe sani na ini a leri programa foe Jehovah?
◻ Foe san ede a de wan toemoesi moi grani foe abi wan prati na a leri programa foe Jehovah?
[Prenki na tapoe bladzijde 15]
Foeroetron den opregti komentaar foe jongoewan, de wan deki-ati gi den moro owroewan