Wi kisi leri foe doe Jehovah wani
„Leri mi foe doe joe wani, bika joe na mi Gado.” — PSALM 143:10.
1, 2. (a) O ten wi moesoe kisi leri, èn nanga sortoe troetroe sani na prakseri? (b) Foe san ede a de so prenspari foe kisi leri foe Jehovah?
IBRI DEI di wan sma de na libi èn e wroko, den kan leri en wan warti sani. Dati de so nanga joe, èn a de so nanga trawan. Ma san e pasa te wan sma dede? Na ini a situwâsi dati, sma no kan leri en wan sani noso en no man leri wan sani. Bijbel e taki krinkrin dati den dedewan „no sabi notinoti”. No wan sabi no de na ini Sjeol, a grebi foe a libisma famiri (Preikiman 9:5, 10). Disi wani taki, dati te wi e kisi leri, a kisi di wi e kisi moro sabi, dati de foe soso? Dati e anga foe san den e leri wi èn fa wi e gebroiki a sabi dati.
2 Efoe wi e kisi leri soso foe den sani di abi foe doe nanga grontapoe, dan wi no abi wan tamara di sa tan. Ma kolokoe taki miljoenmiljoen sma foe ala nâsi e kisi leri foe doe Gado wani nanga a libi foe têgo na ini den prakseri. A gron foe a howpoe disi de na ini a leri di wi e kisi foe Jehovah, a Fonten foe sabi di e gi libi. — Psalm 94:9-12.
3. (a) Foe san ede wi kan taki dati Jesus ben de a fosi studenti foe Gado? (b) Sortoe djaranti wi abi taki libisma ben o kisi leri foe Jehovah, èn nanga sortoe bakapisi?
3 A fosigebore Manpikin foe Gado ben kisi leri leki En fosi studenti, foe doe a wani foe en Tata (Odo 8:22-30; Johanes 8:28). Jesus foe en sei, ben sori taki foeroe tindoesoen sma ben o kisi leri foe a Tata foe en. San na a froewakti gi den wan foe wi di e kisi leri foe Gado? Jesus ben taki: „A skrifi na ini den profeititori: ’En den alamala sa kisi leri foe Jehovah.’ Ibriwan sma di jere foe a Tata èn leri foe en, e kon na mi. . . . Foe troe, foe troe, mi e taigi oenoe: A sma di e bribi, abi têgo libi.” — Johanes 6:45-47.
4. Fa a leri foe Gado abi krakti na tapoe miljoenmiljoen sma, èn san na a howpoe di den abi?
4 Jesus ben kari den wortoe foe Jesaja 54:13, di ben taki gi na agersi oema foe Gado, a hemel Sion. A profeititori dati wani taki wan spesroetoe sani gi den manpikin foe en, den 144.000 salfoe disipel foe Jesus Krestes. Wan fikapisi foe den jeje manpikin dati de fajafaja na ini a ten disi, èn den e teki fesi na ini wan leri programa na heri grontapoe. A bakapisi de, taki miljoenmiljoen tra sma di de foe „wan bigi ipi” e kisi wini toe foe a leri di den e kisi foe Jehovah. Den abi a toemoesi aparti howpoe foe leri sani sondro taki den o dede. Fa so? We, den na sma di kan pasa libilibi a „bigi banawtoe” di e kon esi-esi, èn den kan njan boen foe têgo foe a libi na ini wan paradijs na grontapoe. — Openbaring 7:9, 10, 13-17.
Moro krakti e poti na tapoe a doe foe Gado wani
5. (a) San na a jaritekst foe 1997? (b) Fa wi moesoe si a go di wi moesoe go na den kresten konmakandra?
5 Na ini 1997, na ini moro leki 80.000 gemeente na heri grontapoe, Jehovah Kotoigi sa hori den bigin wortoe foe Psalm 143:10 boen na prakseri: „Leri mi foe doe joe wani.” Dati sa de a jaritekst foe 1997. Den wortoe dati, di o de krin foe si na ini Kownoekondre zaal, sa de leki wan sani foe memre sma taki wan toemoesi aparti presi foe kisi leri foe Gado de na den gemeente konmakandra, pe wi kan abi prati na wan leri programa di e gi doronomo. Te wi e moksi wisrefi nanga den brada nanga sisa foe wi na konmakandra foe kan kisi leri foe wi Bigi Leriman, dan wi kan firi leki fa a psalm singiman ben firi, di ben skrifi: „Mi ben prisiri di den ben taigi mi: ’Meki wi go na a oso foe Jehovah.’” — Psalm 122:1; Jesaja 30:20.
6. San wi e erken na ini den wortoe foe David?
6 Ija, wi wani kisi leri foe doe Gado wani, na presi taki wi e leri a wani foe wi feanti Didibri noso a wani foe onvolmaakti libisma. So boen, neleki David, wi e erken a Gado di wi e anbegi èn e dini: „Bika joe na mi Gado. Joe jeje boen; meki a tjari mi na ini a kondre foe opregtifasi” (Psalm 143:10). Na presi taki David ben wani moksi ensrefi nanga sma di no ben lobi waarheid, a ben wani de pe sma ben anbegi Jehovah (Psalm 26:4-6). Foe di David ben abi a jeje foe Gado foe tjari en, meki a ben kan waka na ini den pasi foe regtfardikifasi. — Psalm 17:5; 23:3.
7. Fa a jeje foe Gado e wroko na tapoe a kresten gemeente?
7 A Moro Bigi David, Jesus Krestes, ben gi den apostel a djaranti taki a santa jeje ben o leri den ala sani èn tjari ala den sani di a ben taigi den, kon na ini den prakseri baka (Johanes 14:26). Foe bigin nanga a Pinksterfesa, Jehovah tjari „den dipi sani foe Gado” di de na ini en Wortoe di den skrifi poti na ini Boekoe, kon na krin safrisafri (1 Korentesma 2:10-13). Foe doe disi, a gebroiki wan kanaal di wi kan si èn di Jesus ben kari „a getrow èn koni srafoe”. A e sorgoe gi njanjan na jejefasi di den e poti prakseri na dati tapoe na ini a leri programa gi den gemeente foe Gado pipel na heri grontapoe. — Mateus 24:45-47.
Kisi leri di abi foe doe nanga Jehovah wani na den konmakandra foe wi
8. Foe san ede a de so prenspari foe teki prati na a Waktitoren-studie?
8 Den tori na ini na alawiki gemeente Waktitoren-studie nofo tron e taki foe a fasi fa wi moesoe gebroiki bijbel gronprakseri. Disi e jepi wi troetroe foe kakafoetoe gi den broko-ede foe a libi. Na ini tra studie wi e taki foe dipi waarheid na jejefasi noso bijbel profeititori. Omeni leri wi e kisi na den studie dati! Na foeroe kondre, Kownoekondre zaal foeroe boen na den konmakandra disi. Ma tokoe na wan toe kondre, a nomroe foe sma di e go na den konmakandra, saka. Foe san ede, joe denki? A ben sa kan de so, taki wan toe sma meki grontapoe wroko kon toeka nanga a kon di den moesoe kon makandra doronomo „foe gi makandra deki-ati foe sori lobi èn doe boen wroko”? Noso a ben sa kan de so, taki foeroe joeroe e gi na sociaal aktiviteit noso a loekoe di wan sma e loekoe telefisi, èn dati meki a schema foe en kon druk toemoesi foe go na ala den konmakandra? Memre a froemane na Hebrewsma 10:23-25 di Gado meki sma skrifi dati. A kon di wi moesoe kon makandra foe kisi leri foe Gado no de moro prenspari now di wi „e si a dei e kon krosibei”?
9. (a) Fa a diniwroko-konmakandra e meki wi bekwaam gi a diniwroko? (b) San moesoe de a fasi fa wi e si a kotoigiwroko?
9 Wan foe den moro prenspari frantiwortoe foe wi na foe dini leki bedinari foe Gado. A diniwroko-konmakandra de spesroetoe foe leri wi fa wi kan doe disi boen. Wi e leri fa foe taki nanga sma, san foe taki, fa foe doe te wan sma e sori belangstelling, èn srefi san foe doe te sma e weigri foe teki a boskopoe foe wi (Lukas 10:1-11). Foe di den e taki foe boen fasi foe wroko èn e sori dati na tapoe na alawiki konmakandra disi, dan wi e kon de srekasreka moro betre foe miti sma no wawan te wi e go oso foe oso, ma so srefi te wi e preiki na strati, na presi pe den e poti oto, na ini bus, na opolani-gron, na den wenkri, noso na skoro. Akroederi na aksi foe wi: „Leri mi foe doe joe wani”, wi sa wani gebroiki ibri okasi foe doe soleki fa a Meester foe wi ben gi tranga: „Meki oen leti skèin gi den sma, so taki den kan . . . gi glori na oen Tata di de na hemel.” — Mateus 5:16.
10. Fa wi kan jepi ’den wan di warti dati’ troetroe?
10 Na den konmakandra disi wi e kisi leri toe foe meki disipel foe tra sma. Te sma sori belangstelling noso sma e teki boekoe, dan te wi e go baka, a marki foe wi moesoe de foe bigin oso-bijbelstudie. Na wan fasi, disi de a srefi leki te den disipel ben ’e tan nanga den wan di warti en’, so taki den leri den den sani di Jesus ben komanderi (Mateus 10:11; 28:19, 20). Foe di wi abi toemoesi boen jepisani, soleki a boekoe Sabi di e tjari joe go na têgo libi, meki troetroe wi de srekasreka foe doe a diniwroko foe wi dorodoro (2 Timoteus 4:5). Proeberi ibri wiki te joe e go na a diniwroko-konmakandra èn na a theokrasia diniwroko-skoro, foe froestan èn baka dati gebroiki penti di sa meki joe kon de warti foe de wan bekwaam bedinari foe Gado di e doe en wani. — 2 Korentesma 3:3, 5; 4:1, 2.
11. Fa son sma ben sori bribi na ini den wortoe di de foe feni na Mateus 6:33?
11 A de Gado wani taki „wi e tan soekoe fosi a kownoekondre nanga en regtfardikifasi” (Mateus 6:33). Aksi joesrefi: ’Fa mi ben sa gebroiki a gronprakseri disi efoe den sani di a grontapoe wroko foe mi [noso foe a trowpatna foe mi] e aksi foe mi, e toeka nanga a go di mi moesoe go na den konmakandra?’ Foeroe sma di lepi na jejefasi ben o go taki foe a tori nanga den wrokobasi foe den. Wan foeroeten bedinari ben taigi en wrokobasi taki a ben abi ten fanowdoe ibri wiki foe man go na den gemeente konmakandra. A basi ben gi en san a ben aksi. Ma foe di a basi ben wani sabi nomonomo san e pasa na den konmakandra, meki a ben aksi foe go. Drape a ben jere wan sani ben meki bekènti foe wan distriktkongres di ben o de. A bakapisi ben de, taki a wrokobasi ben seti sani foe go wan heri dei na a kongres. Sortoe sani joe e leri foe na eksempre disi?
Papa nanga mama di e dini Gado, e gi leri foe doe Jehovah wani
12. San kresten papa nanga mama moesoe doe nanga pasensi èn na wan krakti fasi, efoe den wani taki pikin e kisi leri di abi foe doe nanga a wani foe Jehovah?
12 Ma gemeente konmakandra nanga kongres a no den wan-enkri sani di seti foe leri wi foe doe Gado wani. Papa nanga mama di e dini Gado, e kisi a komando foe gi den pikin foe den leri, foe gi den trangaleri èn foe kweki den foe prèise Jehovah èn doe en wani (Psalm 148:12, 13; Odo 22:6, 15). Efoe wi e doe disi, dan dati wani taki, dati wi e tjari den „pikin-nengre” foe wi go na den konmakandra pe den kan ’arki èn leri’, ma fa a de nanga a leri di joe e leri den foe den santa boekoe na oso? (Deuteronomium 31:12; 2 Timoteus 3:15) Foeroe osofamiri bigin opregti nanga osofamiri bijbelstudie programa di ben doe doronomo, ma sjatoe na baka den no ben doe en so foeroe moro noso den ben tapoe nanga disi. Joe ben ondrofeni so wan sani? Joe sa kon na a bosroiti taki a rai foe studeri doronomo no de wan joisti sani noso taki joe osofamiri libi de so difrenti taki a no sa wroko boen na ini joe situwâsi? Awansi san na a situwâsi, oen papa nanga mama, grantangi loekoe den moi artikel „Onze rijke geestelijke erfenis” nanga „De beloningen voor volharding” na ini De Wachttoren foe 1 augustus 1995.
13. Fa osofamiri kan kisi wini te den e loekoe a deitekst?
13 Osofamiri e kisi deki-ati foe meki a kon tron wan gwenti foe loekoe a deitekst foe Ondrosoekoe den Boekoe foe bijbel ala dei. A boen foe leisi soso a tekst nanga a komentaar, ma a moro boen foe taki foe a tekst èn doe san a e taki. Foe eksempre, efoe den e loekoe Efeisesma 5:15-17, dan osofamiri memre ben kan prakseri fa foe „bai a joisti ten” gi persoonlijk studie, gi a prati di den kan teki na wán noso tra fasi foe a foeroeten diniwroko, èn gi a sorgoe di den moesoe sorgoe gi tra theokrasia toewijzing. Ija, wan osofamiri takimakandra foe a deitekst ben kan meki taki wán noso foeroe sma e „si [moro] krin san na a wani foe Jehovah”.
14. Sortoe leriman papa nanga mama moesoe de, soleki fa Deuteronomium 6:6, 7 e sori dati, èn san disi wani taki?
14 Papa nanga mama moesoe de sma di e leri den pikin foe den fajafaja (Deuteronomium 6:6, 7). Ma a no soso wan sani foe piri-ai gi den pikin foe den noso foe gi den komando. Papa nanga mama moesoe arki toe, èn na a fasi dati den sa man sabi moro betre san den moesoe froeklari, tjari kon na krin, moesoe sori nanga eksempre, noso moesoe taki ete wan tron baka. Na ini wán kresten osofamiri, a papa nanga mama e gi deki-ati foe abi wan boen komunikâsi foe di den e poesoe den pikin foe den foe poti aksi te den no froestan wan sani noso te den e broko den ede nanga sani. Na a fasi dati den ben kon sabi taki wan tini manpikin ben abi moeiti foe froestan taki Jehovah no abi wan bigin. A papa nanga mama ben man gebroiki den tori di skrifi na ini den poeblikâsi foe a Waktitoren Genootschap èn sori taki sma e si ten nanga ruimte leki sani di no abi kaba. Dati ben de wan eksempre foe taki foe a tori, èn a manpikin foe den ben de tevrede. So boen, teki ten foe piki den aksi foe den pikin foe joe na wan krin fasi èn nanga jepi foe bijbel, èn jepi den foe si taki wan sma kan kisi foeroe prisiri te a e leri foe doe Gado wani. San moro a pipel foe Gado — jongoewan nanga owroewan — e kisi leri foe na ini a ten disi?
Den kisi leri foe lobi èn foe feti
15. O ten a troetroe fasi foe wi brada lobi ben sa kan kisi tesi?
15 Akroederi a njoen komando foe Jesus, ’Gado e leri wi foe lobi makandra’ (1 Tesalonikasma 4:9). Te broeja no de èn sani e go boen, dan wi kan denki taki wi lobi ala den brada foe wi. Ma san e pasa te persoonlijk problema e kon noso te wan sani di wan tra kresten e taki noso e doe, e hati wi? Dan now na opregtifasi foe a lobi foe wi kan kisi tesi. (Teki gersi 2 Korentesma 8:8.) San bijbel e leri wi foe doe na ini den sortoe situwâsi dati? Wan sani na foe proeberi foe sori lobi dorodoro (1 Petrus 4:8). Na presi taki wi e prakseri wi eigi afersi nomo, èn e atibron nanga pikin swakifasi, noso e hori wan sma na ati foe di a meki wan fowtoe, wi moesoe doe moeiti foe meki lobi tapoe wan heri ipi sondoe (1 Korentesma 13:5). Wi sabi taki disi na Gado wani, bika a de san en Wortoe e leri.
16. (a) Sortoe feti, kresten kisi leri foe feti? (b) Fa den e sreka wi?
16 Ala di foeroe sma no ben o moksi lobi nanga feti nanga makandra, tokoe a lastiwan na wan tra sani di wi e kisi leri foe, ma a de wan aparti sortoe feti. David ben erken taki a ben abi Jehovah fanowdoe foe leri en fa foe feti, ma na ini en ten, disi ben wani taki troetroe feti nanga den feanti foe Israèl (1 Samuèl 17:45-51; 19:8; 1 Kownoe 5:3; Psalm 144:1). Fa a de nanga a feti di wi e feti na ini a ten disi? Den fetisani foe wi no de troetroe fetisani (2 Korentesma 10:4). A feti foe wi de na jejefasi, èn foe dati wi abi fetisani na jejefasi fanowdoe (Efeisesma 6:10-13). Nanga en Wortoe èn a pipel foe en di kon na wán, Jehovah e leri wi foe feti wan feti na jejefasi nanga boen bakapisi.
17. (a) Sortoe taktik Didibri e gebroiki foe poeroe wi prakseri foe prenspari sani? (b) Sortoe sani wi moesoe wai pasi gi dati, na wan koni fasi?
17 Na triki fasi, Didibri e gebroiki nofo tron den tesi foe grontapoe, sma di fadon komoto na bribi, nanga tra gensman foe a waarheid foe proeberi poeroe wi prakseri poti en na tapoe tori di no de prenspari (1 Timoteus 6:3-5, 11; Titus 3:9-11). A de neleki a e si taki a no abi foeroe tjans foe wini te a e kon na wi tapoe langalanga, èn dati meki a e proeberi foe meki wi naki foetoe foe di a e meki wi kragi foeroe, èn e meki wi poti don aksi di no abi waarde na jejefasi. Neleki fetiman di de na ai, na so wi moesoe de klariklari foe si den kefar disi di e kon, na a srefi fasi leki te sma wani doe wi ogri langalanga. — 1 Timoteus 1:3, 4.
18. San a wani taki troetroe dati wi no e libi moro gi wisrefi?
18 Wi no e horibaka gi den lostoe foe libisma noso a wani foe den nâsi. Jehovah gebroiki Jesus eksempre foe leri wi taki wi no moesoe libi moro gi wisrefi; na presi foe dati wi moesoe abi a srefi fasi foe denki di Krestes Jesus ben abi èn libi gi a wani foe Gado (2 Korentesma 5:14, 15). Na ini a ten di pasa, wi libi na wan toemoesi loesoe fasi kande, èn ben froemorsoe diri ten. Bradjari fesa, dringi sopi pasa marki, nanga hoeroedoe na sani di e marki a godelowsoe grontapoe disi. Now di wi kisi leri foe doe Gado wani, wi no de nanga tangi taki wi de aparti foe a pori grontapoe disi? So boen meki wi feti wan tranga feti na jejefasi foe sorgoe taki wi no e kisi foe doe nanga den pori doe foe grontapoe. — 1 Petrus 4:1-3.
Wi e kisi leri foe gi wisrefi wini
19. Sortoe wini a e tjari kon te wi e kisi leri di abi foe doe nanga a wani foe Jehovah èn dan wi e doe en?
19 A de fanowdoe foe erken taki te wi e kisi leri foe doe Jehovah wani, dan dati sa tjari foeroe wini kon gi wi. Wi kan froestan taki wi moesoe doe wi pisi foe di wi e prakseri boen foe sani so taki wi kan leri èn baka dati doe den sani di wi e leri foe en Manpikin èn foe en Wortoe èn foe en pipel di kon makandra (Jesaja 48:17, 18; Hebrewsma 2:1). Te wi e doe disi, dan wi sa kon tranga foe kan tanapoe kánkan na ini den sari ten disi èn pasa den bigi winti di e wakti wi (Mateus 7:24-27). Srefi now, wi sa plisi Gado te wi e doe en wani èn wi sa abi a djaranti taki den begi foe wi sa kisi piki (Johanes 9:31; 1 Johanes 3:22). Èn wi sa ondrofeni troetroe kolokoe. — Johanes 13:17.
20. Foe sortoe sani a ben sa boen foe prakseri dipi, te joe e si a jaritekst a heri jari 1997?
20 Na ini 1997, wi sa kisi foeroe okasi foe leisi èn foe prakseri foe a jaritekst, Psalm 143:10: „Leri mi foe doe joe wani.” Te wi e doe disi, dan meki wi gebroiki wan toe foe den okasi foe prakseri foe den sani di Gado seti gi wi foe kan kisi leri, soleki fa skrifi na tapoesei. Èn meki wi gebroiki a prakseri di wi e prakseri dipi foe den wortoe dati, leki wan fasi foe poesoe wi foe doe doronomo san a tranga begi dati e taki, foe di wi sabi taki „a sma di e doe a wani foe Gado, e tan foe têgo”. — 1 Johanes 2:17.
Fa joe ben sa piki?
◻ Soema na ini a ten disi e kisi leri foe doe Jehovah wani?
◻ Fa Psalm 143:10 moesoe abi krakti na wi tapoe na ini 1997?
◻ Fa wi e kisi leri foe doe Jehovah wani?
◻ San a e aksi foe kresten papa nanga mama foe kan gi den pikin foe den leri?