A njoen programa foe a spesroetoe dei-konmakandra
1 „De sma di e kisi leri foe Jehovah” na a thema gi a njoen programa foe a spesroetoe dei-konmakandra di e bigin na ini september (Joh. 6:45). A leri foe Gado di e kon foe Jehovah e jepi wi troetroe foe abi wan libi di e gi wi satisfaksi. A e kweki wan fajafaja warderi ini wi gi a jeje goedoe di wi kisi. Den moeiti di wi e doe foe jepi tra sma foe jere a boen njoensoe, e meki wi de memre foe a libimakandra di e doe boen wroko. A spesroetoe dei-konmakandra disi sa poti krakti na tapoe den blesi di den sma abi di e kisi leri foe Jehovah.
2 A programa sa sori a difrenti na mindri den winimarki foe a leri foe Gado nanga den kefar foe grontapoe leri. Wi sa si moro krin fa Jehovah e gi a moro boen leri — leri di abi en gron tapoe en Wortoe, bijbel. Krakti sa poti na tapoe dri kontren foe na anbegi pe wi e ondrofeni prisiri foe a leri di wi e kisi foe Gado. Moro fara, den jongoewan sa kisi a deki-ati foe waka na baka den toemoesi aparti eksempre, soleki foe David nanga Timoteus èn foe meki den libi de lontoe aktiviteit na jejefasi. A bribi foe wi sa kon moro tranga te prakseri sa poti toe na tapoe a loyaalfasi foe den moro owroewan. Njoen sma di gi den libi abra na Gado, sa man teki dopoe. Langa ten bifo a dei-konmakandra sa hori, den moesoe taigi a fesiman opziener foe a winsi dati di den abi.
3 A moro prenspari lezing foe a spesroetoe dei-konmakandra abi leki titel: „Kisi leri foe Jehovah foe doe en wani.” A sa poti krakti na tapoe den reide foe san ede wi alamala moesoe tan kisi leri, foe kon de kankan na ini bribi, èn foe go doro foe go na fesi. Wi sa kisi deki-ati foe waka na baka na eksempre foe Jehovah, foe di wi e leri tra sma a waarheid di e tjari têgo libi kon. Ondrofenitori di e gi wi deki-ati sa de toe foe sori wi fa den poeblikâsi foe a Genootschap jepi foeroe sma foe kisi leri foe Jehovah. Krakti sa poti na tapoe den boen bakapisi foe a leri programa foe Jehovah na heri grontapoe.
4 Meki finifini plan foe de drape. Gi ala sma di abi belangstelling, deki-ati foe de drape. Abi a froewakti foe leri foeroe boen sani foe wi Gran Leriman. — Jes. 30:20.