„Mi gi unu na eksempre”

„Unu ben musu de bun leriman someni langa kaba.”​—HEBREWSMA 5:12.

1. Fu san ede den wortu fu Hebrewsma 5:12 ben kan meki wan Kresten broko en ede nanga san ensrefi e du ini na afersi disi?

TE YU e leisi den wortu fu a tekst di skrifi na tapusei, dan fa yu e firi? Den wortu disi di skrifi nanga yepi fu santa yeye, e meki yu broko yu ede nanga san yusrefi e du ini na afersi disi? Efu dati de so, dan yu no de yu wawan. Leki bakaman fu Krestes, wi sabi taki wi musu de leriman (Mateyus 28:19, 20). Wi sabi taki a ten di wi e libi na ini e meki taki a de prenspari srefisrefi, taki wi du ala san wi man fu gi trawan bun leri. Wi sabi sosrefi taki a leri di wi e gi tra sma, kan meki den kisi libi noso kan meki den kisi pori! (1 Timoteyus 4:16) Fu dati ede wi kan aksi wisrefi: ’Mi e du mi wroko leki leriman na a fasi fa mi musu du en? Fa mi kan tron wan moro bun leriman?’

2, 3. (a) San wan leriman ben taki dati wan sma abi fanowdu fu man gi bun leri? (b) Sortu eksempre Yesus gi wi na ini a fasi fa wi musu gi leri?

² Wi no abi fu lasi-ati te wi e broko wi ede nanga den sortu sani disi. Kande wi e si a wroko fu wan leriman leki wan sani di wan sma kan du soso te a kisi skoro fu man gi trawan leri. Efu dati de so, dan a prakseri dati kan meki wi kisi a firi taki a o hebi tumusi gi wi fu go na fesi fu tron bun leriman. Ma a sani di e meki wan sma tron wan bun leriman, a no a skoro di a kisi fu man gi leri, a de wan moro prenspari sani leki dati srefi. Luku san wan leriman di abi ondrofeni ben skrifi fu a pisi tori disi: „Fu man tron wan bun leriman, no wani taki dati wan sma musu kisi skoro fu man gi trawan leri nomo, noso taki a musu man denki èn du difrenti sortu sani fu doro a marki dati. . . . A moro prenspari sani di de fanowdu fu de wan bun leriman, na lobi.” A no de fu taki dati a fasi fa a leriman disi ben e si a tori, de a fasi fa wan sma di e gi leri na skoro e si en. Ma toku a sani di a ben tyari kon na fesi, e fiti moro srefi na a leriwroko di wi leki Kresten e du. Fa so?

³ A no de fu taki dati a moro bun Eksempre di wi abi fu kon sabi fa fu gi leri, na Yesus Krestes srefi. A ben taigi den bakaman fu en: „Mi gi unu na eksempre” (Yohanes 13:15). Nanga den wortu disi Yesus ben e poti prakseri na a eksempre di a ben gi den ini a sori di a ben sori sakafasi. Ma a no de fu taki dati Yesus ben de wan eksempre tu na ini a fasi fa a ben du a tumusi prenspari wroko di a ben kisi fu du leki wan libisma na grontapu; dati na a wroko fu meki sma kon sabi a bun nyunsu fu a Kownukondre fu Gado (Lukas 4:43). We dan, efu yu ben sa abi fu gebroiki wán wortu nomo fu sori fa a diniwroko fu Yesus ben de, dan yu ben sa gebroiki a wortu „lobi”, a no so? (Kolosesma 1:15; 1 Yohanes 4:8) A lobi di Yesus ben abi gi en hemel Tata, Yehovah, ben de a moro prenspari sani gi en (Yohanes 14:31). Ma leki leriman, Yesus sori lobi na tu tra fasi sosrefi. A ben lobi den tru tori di a ben e leri sma, èn a ben lobi den sma di a ben e gi leri. Meki wi go poti moro prakseri now na den tu fasi disi fa Yesus de leki wan eksempre gi wi.

Fu sensi a bigin a ben lobi den tru tori fu Gado

4. Fa Yesus ben kon lobi den sani di a ben leri fu Yehovah?

⁴ A fasi fa wan leriman e si den sani di a musu leri trawan, abi bigi krakti tapu a fasi fa a o gi leri. Awinsi a abi pikinso mi-no-ke fasi srefi, dan dati o de fu si tu na den studenti fu en. Yesus no ben abi wan mi-no-ke fasi gi den tru tori di a ben leri sma fu Yehovah, èn fu a Kownukondre fu En. Yesus ben lobi fu taki fu den tori disi trutru. A ben kon kisi a lobi dati di a ben de wan studenti ete. Na ini a heri pisi ten di a ben libi na hemel bifo a ben tron wan libisma, dan a wan-enkri gebore Manpikin ben de wan sma di ben e angri fu leri sani. Na ini Yesaya 50:4, 5 wi e leisi den moi wortu disi: „A Soeverein Masra Yehovah srefi gi mi a tongo fu den wan di kisi leri, so taki mi kan sabi fa fu piki den wan di weri, nanga wan wortu. A e wiki ibri mamanten baka; a e wiki mi yesi fu yere leki den wan di kisi leri. A Soeverein Masra Yehovah srefi opo mi yesi, èn mi fu mi sei, no ben opo misrefi teige en. Mi no ben drai go na a tra sei.”

5, 6. (a) San Yesus ben ondrofeni di a teki dopu, èn sortu krakti disi ben abi na en tapu? (b) Sortu bigi difrenti wi e si na ini a fasi fa Yesus ben gebroiki a Wortu fu Gado èn a fasi fa Satan ben du dati?

⁵ Di Yesus ben e gro kon bigi leki wan libisma dyaso na grontapu, dan a ben tan sori taki a lobi a koni fu Gado (Lukas 2:52). Ne, wan tumusi aparti sani ben pasa nanga en na a ten di a teki dopu. Lukas 3:21 e taki: „A hemel ben opo.” Soleki fa a sori, dan na a momenti dati Yesus ben man memre fa a libi fu en ben de na hemel fosi a ben tron wan libisma. Baka dati, a tan 40 dei na ini a gran sabana sondro fu nyan. A no de fu taki dati a ben abi bigi prisiri fu denki dipi fu den furu sani di a ben leri fu Yehovah di a ben de na hemel. Ma no tumusi langa baka dati a ben kisi tesi, di ben e meki taki a ben musu sori a lobi di a ben abi gi den tru tori fu Gado.

⁶ Di Yesus ben weri èn angri ben e kiri en, dan Satan suku fu tesi en. Wi e si trutru taki den tu manpikin disi fu Gado e difrenti fu makandra krinkrin! Den ala tu ben kari wan tu sani di teki puru fu den Hebrew Buku fu Bijbel, ma a fasi fa den ben e denki fu den tori dati, no ben de a srefi kwetikweti. Satan ben drai a Wortu fu Gado sondro fu sori lespeki gi dati, fu di a gebroiki en fu horibaka gi en eigi gridi lostu. Fu tru, na opruruman disi ben wisiwasi den tru tori fu Gado. Na a tra sei, a ben de krin taki Yesus ben taki sani di a teki puru fu den Buku fu Bijbel fu di a ben lobi a Wortu fu Gado. A ben gebroiki a Wortu fu Gado na wan yoisti fasi na ini ibriwan fu den piki fu en. Langa ten bifo Gado ben meki sma skrifi den wortu dati, dan Yesus ben de kaba. Toku a ben abi bigi lespeki gi den wortu dati. A ben e si den leki tumusi prenspari tru tori, di ben komoto fu en hemel Tata! A ben taigi Satan taki den wortu dati fu Yehovah ben prenspari moro leki nyanyan srefi (Mateyus 4:1-11). Iya, Yesus ben lobi ala den tru tori di Yehovah ben leri en. Ma na sortu fasi Yesus sori lobi gi den sma di a ben e gi leri?

A ben lobi den tru tori di a ben e leri trawan

7. Fu san ede meki Yesus no ben bigin leri sma en eigi denki?

⁷ Ala ten a ben de krin fu si, taki Yesus ben lobi den tru tori di a ben e leri trawan. Bika, te yu luku en bun, dan a ben makriki gi en fu kon kisi en eigi denki. A ben abi bun furu sabi nanga koni (Kolosesma 2:3). Toku a ben sori den arkiman fu en ibritron baka, taki ala den sani di a ben e leri den no ben e komoto fu ensrefi, ma fu en Tata di de na hemel (Yohanes 7:16; 8:28; 12:49; 14:10). A ben lobi den tru tori fu Gado so furu taki a no ben wani poti den na wan sei fu bigin leri sma en eigi denki.

8. Sortu eksempre Yesus gi na a bigin fu en diniwroko fu sori taki a ben e gebroiki a Wortu fu Gado te a ben e gi leri?

⁸ Fu sensi a bigin fu Yesus en diniwroko na grontapu, a ben de wan bun eksempre. Luku fa a taigi a pipel fu Gado a fosi leisi taki en ben de a Mesias di Gado ben pramisi taki a ben o kon. San a ben du? A ben de so taki a sori ensrefi na den ipi-ipi sma nomo, èn taki a ben taigi den taki en ben de a Krestes? A de so taki a ben bigin du ala sortu kefalek moi wondru fu sori taki en ben de a Mesias trutru? Nôno. A ben go na wan snoga pe a pipel fu Gado ben gwenti fu kon makandra fu leisi den sani komoto fu den Buku fu Bijbel. Drape a leisi nanga wan krakti sten komoto fu Yesaya 61:1, 2 èn a fruteri den sma taki den tru tori fu a profeititori dati ben abi fu du nanga en (Lukas 4:16-22). Den furu wondru di a du ben yepi fu sori taki Yehovah ben e horibaka gi en. Toku a ben tan gebroiki a Wortu fu Gado te a ben e gi sma leri.

9. Fa Yesus sori taki a ben e hori ensrefi na a Wortu fu Gado na wan getrow fasi, te a ben e taki nanga den Fariseiman?

⁹ Di Yesus kisi gens fu den kerki feanti fu en, dan a no go strei nanga den fu sori den taki a abi moro koni leki den, aladi a ben o de wan makriki sani gi en fu wini sowan strei. Ma na presi fu dati a gebroiki a Wortu fu Gado srefi fu sori taki den sani di den ben taki no ben tru. Prakseri fu eksempre a kragi di den Fariseiman ben kragi taki den bakaman fu Yesus no ben hori a wet fu a Sabadei, fu di den ben piki siri nyanyan di den ben e nyan aladi den ben e waka pasa na ini wan gron. Yesus ben piki den taki: „Unu no leisi san David du di angri ben e kiri en nanga den man fu en?” (Mateyus 12:1-5) A no de fu taki dati den man disi di ben e suku fu regtfardiki densrefi, ben musu sabi a pisi tori dati di Gado meki sma skrifi na 1 Samuel 21:1-6. Efu dati de so, dan den ben misi fu si san na a prenspari sani di den ben musu leri fu a tori dati. Ma Yesus no ben leisi a pisi tori dati nomo. A ben denki dipi fu en, èn a ben teki den gronprakseri di a ben leri fu dati. A ben lobi den gronprakseri di Yehovah ben wani leri sma nanga yepi fu a pisi tori dati. Sobun a ben gebroiki a Bijbel tori dati, makandra nanga wan eksempre di a teki komoto fu a Wet fu Moses, fu sori taki a no ben de so taki a Wet no ben e gi pasi fu du sani tra fasi efu dati ben de fanowdu. A getrow fasi fa Yesus hori ensrefi na a Wortu fu Gado, ben meki sosrefi taki a ben e opo taki gi a Wortu dati te den kerki fesiman ben e suku fu drai en fu kisi wini gi densrefi nomo, noso te den ben e suku fu tapu a Wortu dati gi tra sma nanga yepi fu ala den gwenti fu den.

10. Fa profeititori kon tru na ini Yesus te wi luku a moi fasi fa a ben gi leri?

¹⁰ A lobi di Yesus ben abi gi den tru tori di a ben e leri sma, ben e meki taki noiti a ben leri sma sani di a ben hori na ede nomo. Noiti a ben taki na wan fasi di soi, noso na wan fasi di ben e sori taki a no ben abi firi gi den sani di a ben e leri sma. Den profeititori di skrifi nanga yepi fu santa yeye, ben sori taki a Mesias ben o taki nanga ’switi fasi na tapu en mofobuba’, fu di a ben o gebroiki „tumusi moi wortu” (Psalm 45:2; Genesis 49:21). Den profeititori dati kon tru na ini Yesus, fu di a ben e tyari a boskopu fu en kon na fesi na wan fasi di ben e hari sma prakseri, sosrefi na wan fasi di ben meki sma wani sabi den sani di a ben e leri den. A ben e gebroiki „moi wortu” te a ben leri sma den tru tori di a ben lobi sote (Lukas 4:22). A no de fu taki dati a faya di a ben abi gi den sani di a ben e leri sma, ben de fu si na a fesi fu en, èn taki sma ben kan si na en ai taki a ben lobi den tori disi di a ben e fruteri sma. A ben musu de wan prisiri sani fu arki Yesus, èn fu tru, a ben gi wi wan tumusi moi eksempre na ini a fasi fa wisrefi kan taki nanga tra sma te wi e meki den kon sabi den sani di wisrefi leri!

11. Fu san ede meki den sani di Yesus ben man du leki leriman noiti no meki a kisi bigifasi?

¹¹ A ben de so taki Yesus ben kon kisi bigifasi, fu di a ben frustan den tru tori fu Gado bun èn fu di a ben man taki na wan tumusi moi fasi? Furu tron dati pasa nanga libisma leriman. Ma memre taki a koni di Yesus ben koni, ben abi fu du nanga a frede di a ben abi gi Gado. Te wan sma abi a koni dati, dan a no abi heimemre, bika „koni de na den sma di abi sakafasi” (Odo 11:2). Ma wan tra sani ben de tu di ben meki taki Yesus no tron wan sma di ben abi bigifasi noso heimemre.

Yesus ben lobi den sma di a ben e gi leri

12. Fa Yesus ben sori taki a no ben wani taki den bakaman fu en ben musu frede en?

¹² Ala ten a ben de so taki a bigi lobi di Yesus ben abi gi trawan ben de fu si na ini a fasi fa a ben e gi den leri. A fasi fa a ben e leri sma noiti no ben e meki sma firi taki den abi frede gi en, èn dati de heri tra fasi leki fa sma di abi bigifasi e gi leri (Preikiman 8:9). Baka di Petrus si wan fu den wondru fu Yesus, dan a ben fruwondru sote taki a fadon na a kindi fu Yesus. Ma Yesus no ben wani taki den bakaman fu en ben musu abi bigi frede gi en. Na wan switi fasi a ben taki: „No frede moro langa.” Dan a taigi Petrus fu a tumusi moi wroko di ben musu du fu meki disipel, wan wroko di Petrus srefi ben o yepi fu du (Lukas 5:8-10). Yesus ben wani taki a lobi di den disipel fu en ben abi gi den tru tori fu Gado, ben musu gi den deki-ati fu du den sani di Gado ben e aksi fu den. A no ben musu de so taki den ben e du Gado wani fu di den ben e frede a leriman fu den.

13, 14. Na sortu fasi Yesus sori taki a ben e frustan fa trawan e firi?

¹³ A lobi di Yesus ben abi gi den sma di a ben e gi leri, kon moi na fesi sosrefi na ini a fasi fa a ben e sori taki a e frustan fa trawan e firi. „Di a ben si na ipi [sma] a ben firi sari nanga den, bika den ben kisi kwinsi èn den ben e waka bruyabruya leki skapu sondro skapuman” (Mateyus 9:36). A ben e sari den fu di sma ben e pina den èn dati meki a ben wani yepi den.

¹⁴ Luku wan tra okasi sosrefi pe Yesus ben sori taki a e firi gi tra sma. Wan heri pisi ten kaba wan uma ben abi wan siki di ben meki a lasi furu brudu. Di na uma dati ben kon krosibei fu Yesus na ini na ipi sma fu kan fasi a franya fu a krosi fu en, dan na wan wondru fasi na uma disi ben kon betre wantewante baka di a fasi en. Yesus ben firi fa krakti ben e komoto na en, ma a no ben si suma na a sma di ben kon betre. A ben wani kon sabi nomonomo pe na uma ben de. Fu san ede? A no fu di a ben wani krutu na uma taki a no ben hori ensrefi na a Wet, noso taki a no hori ensrefi na den markitiki fu den leriman fu Wet nanga den wet fu den Fariseiman. A kan taki na uma ben frede taki na dati Yesus ben o taki. Ma na presi fu dati Yesus taigi en: „Umapikin, yu bribi meki yu kon betre. Go ini vrede, èn kon betre fu a seryusu siki fu yu” (Markus 5:25-34). Luku fa den wortu disi e sori taki a ben e frustan fa na uma ben e firi. A no ben taki nomo: „Kon betre.” Na presi fu dati a ben taki: „Kon betre fu a seryusu siki fu yu.” Dyaso Markus e gebroiki wan wortu di wani taki „krawasi”, di na wan fonfon di sma ben e gebroiki furu tron fu gi trawan skin-ati. Na a fasi dati Yesus sori taki a ben sabi taki a siki ben pina na uma disi, èn taki a siki ben gi en furu pen na skin sei ma sosrefi taki a ben meki a firi brokosaka. Yesus ben e frustan fa na uma ben e firi.

15, 16. Sortu sani di pasa na ini a diniwroko fu Yesus e sori taki a ben e meki muiti fu si den bun sani na ini tra sma?

¹⁵ Yesus ben sori sosrefi taki a ben abi lobi gi sma, fu di a ben e luku san na den bun fasi di den ben abi. Prakseri san pasa di a ben miti nanga Natanaèl, di bakaten ben tron wan apostel fu en. „Di Yesus si Natanaèl e kon na en, a taigi en: ’Luku! A man disi na trutru wan Israelsma di no e bedrigi sma.’” Na wan wondru fasi Yesus ben luku go na ini na ati fu Natanaèl èn na a fasi dati a ben kon sabi soifri suma na en. A no de fu taki dati Natanaèl no ben de wan volmaakti sma kwetikweti. A ben e meki fowtu, neleki fa wi alamala e meki fowtu. Fu taki en leti, di sma ben fruteri en fu Yesus, dan na wan fasi di ben grofu pikinso, a ben taki: „Wan bun kan komopo fu Nasaret?” (Yohanes 1:45-51) Ma fu ala den sani di sma ben kan taki fu Natanaèl, Yesus ben frukisi fu taki fu wan sani di Natanaèl ben du bun. Yesus ben poti prakseri na tapu taki a man disi no ben abi bedrigifasi.

¹⁶ Na so a ben pasa tu taki di wan legre edeman, kande wan man fu Rome di no ben de wan Dyu, ben kon na Yesus èn ben aksi en fu dresi wan srafu fu en di ben e siki, dan Yesus ben sabi taki a legre edeman disi ben e meki fowtu. A no de fu taki dati wan legre edeman na ini a ten dati ben e du ogri nanga tranga kande, noso a ben e kiri sma, èn kande a ben e anbegi kruktugado. Ma toku Yesus ben poti prakseri na wan bun sani, a ben poti prakseri na a tranga bribi fu a man disi (Mateyus 8:5-13). Bakaten, di Yesus ben e taki nanga na ogriman di ben anga na en sei na a pina-udu, dan Yesus no ben bigin krutu en taki fositen a ben de wan ogriman. Na presi fu dati a ben gi a man deki-ati fu di a ben gi en a howpu taki a ben o kisi wan moro bun tamara (Lukas 23:43). Yesus ben sabi heri bun taki sma ben o lasi-ati efu a ben o suku fowtu na den tapu nomo, èn efu a ben o krutu den nomo. A no de fu taki dati den muiti di a du fu si a bun na ini trawan, ben gi furu sma a deki-ati fu tron moro bun sma srefi.

A ben de klariklari fu dini trawan

17, 18. Fa Yesus sori taki a ben de klariklari fu dini tra sma di a ben kon na grontapu?

¹⁷ Wan tra krakti buweisi taki Yesus ben lobi den sma di a ben e gi leri, ben de a fasi fa a ben de klariklari fu dini den. Di a manpikin fu Gado ben e libi na hemel bifo a tron wan libisma, dan a ben sori kaba taki a ben lobi a libisma famiri trutru (Odo 8:30, 31). Fu di en na a „Wortu” noso a takiman fu Yehovah, dan a kan taki a ben kisi na okasi fu abi furu fu du nanga libisma (Yohanes 1:1). Ma wan fu den prenspari sani di meki taki a kon na grontapu ben de fu gi sma leri, dati meki a ben libi a hei posisi fu en na ini hemel èn „a ben kon de neleki wan srafu” (Filipisma 2:7; 2 Korentesma 8:9). Di Yesus ben de na grontapu, a no ben e fruwakti taki sma ben musu dini en. Na presi fu dati, a ben taki: „A Manpikin fu libisma no kon fu sma dini en, ma a kon fu dini sma èn fu gi en libi leki wan lusu-paiman gi furu sma” (Mateyus 20:28). Yesus ben libi akruderi den wortu dati trutru.

¹⁸ Nanga sakafasi Yesus ben dini den wan di a ben e gi leri te den ben abi yepi fanowdu, èn a ben de klariklari fu du ala san a man du fu yepi den. A ben e waka nanga futu fu a wan sei fu a Pramisi Kondre go te na a tra sei. A ben e waka hondrohondro kilometer te a ben e du a preikiwroko fu en, fu di a ben wani taki nanga so furu sma leki a ben man. Yesus ben de heri tra fasi leki den Fariseiman. Den sma disi ben abi bigifasi, ma Yesus ben tan sori sakafasi èn sma no ben e frede fu go na en. Ala sortu sma ben kon na Yesus. Heiheiman fu a kondre, srudati, afkati, umasma, pikin-nengre, pôtisma, sikisma, noso tra sma fu a libimakandra di trawan no ben wani si na ai, iya, den alamala ben prisiri fu kon na Yesus sondro taki den ben abi frede. Yesus ben de wan volmaakti sma, ma toku a ben de so taki a ben e kon weri èn taki angri ben e kiri en. Ma srefi te a ben weri noso te a ben abi pikinso rostu fanowdu noso te a ben abi ten fanowdu fu de en wawan fu begi, dan toku ete a ben de klariklari fu yepi trawan na presi fu broko en ede nanga en eigi afersi.—Markus 1:35-39.

19. Fa Yesus ben de wan eksempre gi den disipel fu en, na ini a fasi fa a ben sori taki a ben abi sakafasi, pasensi nanga switifasi?

¹⁹ Na so a de tu taki Yesus ben de klariklari fu dini den disipel fu en. Nanga pasensi èn na wan switi fasi a ben gi den leri. Te a ben e si taki a no ben makriki gi den fu frustan den prenspari tori di a ben wani leri den, dan a no ben e gi abra, a no ben e kisi bigi atibron, èn a no ben krutu den. A ben e tan suku tra fasi fu yepi den fu frustan den sani di a ben wani leri den. Prakseri pikinso, omeni leisi den disipel fu en ben e strei nanga makandra sortuwan fu den na a moro bigiwan. Ibritron baka, teleki a neti bifo sma kiri Yesus srefi, dan a ben suku nyun fasi fu leri den taki den musu libi makandra nanga sakafasi. Na ini a fasi fa Yesus ben sori sakafasi èn sosrefi na ini ala tra sani, a ben kan taki: „Mi gi unu na eksempre.”—Yohanes 13:5-15; Mateyus 20:25; Markus 9:34-37.

20. Sortu fasi fu gi leri di Yesus ben e gebroiki ben meki taki a ben e difrenti krinkrin fu den Fariseiman, èn fu san ede a ben abi bun bakapisi te a ben e gi leri na a fasi dati?

²⁰ Luku taki Yesus no ben taigi den disipel fu en nomo san den ben musu du, ma taki a ’gi den na eksempre’ sosrefi. Iya, nanga yepi fu na eksempre fu en a gi den leri. A no ben e taki nanga den neleki a ben de wan man di ben hei moro den. Noiti a ben du neleki ensrefi ben prenspari tumusi fu du den sani di a ben e taigi den fu du. Na so den Fariseiman ben de. Yesus ben taki fu den man dati: „Den e taki, ma den no e du” (Mateyus 23:3). Ma nanga sakafasi Yesus sori den studenti fu en soifri san den sani di a ben e leri den ben wani taki, fu di ensrefi ben e libi akruderi den sani dati. Iya, ensrefi ben e du san a ben leri den. Sobun, te a ben e gi den bakaman fu en deki-ati fu libi wan libi nanga soso den sani di den abi trutru fanowdu sondro fu feti na baka gudu nomo, dan den ben frustan heri bun san a ben wani taigi den. Den ben kan si krin taki a ben e du soifri leki fa a ben taki di a ben taigi den: „Den krabudagu abi olo èn den fowru fu hemel abi sribipresi, ma a Manpikin fu libisma no abi no wan presi srefi fu poti en ede” (Mateyus 8:20). Yesus ben e dini den disipel fu en fu di nanga sakafasi a ben e gi den na eksempre.

21. Fu san wi sa taki na ini na artikel di e kon?

²¹ A no de fu taki dati Yesus ben de a moro bigi leriman di oiti ben libi na grontapu! Ala den reti-ati sma di si èn arki Yesus, ben kan taki dati Yesus ben lobi den tori di a ben e leri den trutru, èn taki a ben lobi den sma di a ben e gi leri. Leki sma di e studeri na eksempre fu en na ini a ten disi, wi man fu si den srefi sani disi tu. Ma fa wi kan teki a volmaakti eksempre fu Krestes dan? Na artikel di e kon sa piki na aksi dati.

San yu ben sa piki?

• San na a moro prenspari sani di wi abi fanowdu fu man de wan bun leriman, èn suma gi wi na eksempre fu dati?

• Na sortu difrenti fasi Yesus ben e sori taki a ben lobi den tru tori di a ben e leri trawan?

• Fa Yesus ben sori lobi gi den wan di a ben e gi leri?

• Sortu eksempre e sori taki Yesus ben de klariklari fu dini den wan di a ben e gi leri nanga sakafasi?

[Prenki na tapu bladzijde 12]

Fa Yesus sori taki a ben lobi den gronprakseri di de fu feni na ini a Wortu fu Gado?