Jehovah — Wan Gado di e gi leri
„Den alamala sa kisi leri foe Jehovah.” — JOHANES 6:45.
1. San Jesus e doe now na Kapernaum?
DIDJONSRO ete Jesus Krestes ben doe wondroe èn now den e si en e gi leri na ini wan snoga na Kapernaum, krosibei foe a se foe Galilea (Johanes 6:1-21, 59). Foeroe sma e sori taki den no e bribi te a e taki: „Mi saka kon foe hemel.” Den e kroetoe: „Disi a no Jesus, a manpikin foe Josef èn wi no sabi en papa nanga mama? Fa a kan taki now dati ’Mi saka kon foe hemel’?” (Johanes 6:38, 42). Jesus e piri-ai gi den te a e froeklari: „Nowan sma kan kon na mi, efoe a Tata di seni mi no e hari en kon; èn mi sa opo en baka na ini a lasti dei.” — Johanes 6:44.
2. Sortoe gron wi abi foe bribi a pramisi foe Jesus foe na opobaka?
2 O fa a de wan toemoesi moi pramisi — foe kisi wan opobaka na ini a lasti dei, te Gado Kownoekondre e tiri! Wi kan bribi a pramisi disi foe di a Tata, Jehovah Gado, e gi wi a djaranti disi (Job 14:13-15; Jesaja 26:19). Foe troe, Jehovah di e leri taki den dedewan sa opo baka, na „a moro bigi leriman foe alamala” (Job 36:22, Today’s English Version). Ne Jesus e taki moro fara, ala di a e poti prakseri na tapoe a leri di a Tata e gi: „A skrifi na ini den profeititori, ’Èn den alamala sa kisi leri foe Jehovah.’” — Johanes 6:45.
3. Sortoe aksi wi sa loekoe?
3 A ben sa de wan grani foe troe, foe de na mindri den wan foe soema a profeiti Jesaja ben skrifi: „Ala oen manpikin sa de sma di e kisi leri foe Jehovah” (Jesaja 54:13). Wi kan de den sma disi? Soema de leki manpikin gi en èn soema kisi den leri foe en? San na den toemoesi prenspari leri foe Jehovah di wi moesoe sabi èn di wi moesoe handri na tapoe foe kan kisi a blesi foe en? Fa Jehovah ben gi leri fositen, èn a e gi leri na a srefi fasi na ini a ten disi? Wi sa poti prakseri tapoe den aksi disi.
Tata, Leriman, Masra
4. Soema ben de den fosiwan foe den manpikin foe Jehovah di kisi den leri foe en?
4 Jehovah ben tron wan Tata èn so srefi wan Leriman a fosi leisi, di a ben meki en wan-enkri gebore Manpikin, Jesus, bifo a ben de wan libisma. A e kari en „a Wortoe” bikasi a de a Moro Prenspari Takiman foe Jehovah (Johanes 1:1, 14; 3:16). A Wortoe ben dini „sei [a Tata] leki wan meester wrokoman”, èn a ben leri boen foe den leri di a ben kisi foe en Tata (Odo 8:22, 30). Foe taki en leti, a ben kon tron a Wrokoman, noso a wrokosani, nanga jepi foe soema a Tata ben meki ala tra sani, so srefi den jeje „manpikin foe Gado”. Fa den ben moesoe prisiri srefisrefi foe kisi leri foe Gado! (Job 1:6; 2:1; 38:7; Kolosesma 1:15-17) Baka ten a ben meki a fosi libisma, Adam. En srefi ben de wan „manpikin foe Gado”, èn bijbel e tjari kon na krin taki Jehovah ben leri en. — Lukas 3:38; Genesis 2:7, 16, 17.
5. Sortoe grani di warti foeroe, Adam ben lasi, ma soema Jehovah ben gi leri, èn foe san ede?
5 A de wan sari taki Adam ben lasi a grani foe tan de wan manpikin foe Gado, foe di ensrefi no ben wani foe gi jesi. Foe dati ede den bakapikin foe en no ben kan abi a reti foe de manpikin foe Gado soso foe den geborte ede. Ma tokoe Jehovah ben leri den onvolmaakti sma di ben soekoe a leri foe En. Noa, foe eksempre, ben sori taki a ben de „wan regtfardiki man” di „ben waka nanga a troe Gado”, èn foe dati ede Jehovah ben leri en (Genesis 6:9, 13–7:5). Foe di Abraham ben gi jesi, meki a ben boeweisi taki a ben de „a mati foe Jehovah”, èn foe dati ede a ben kisi leri foe Jehovah toe. — Jakobus 2:23; Genesis 12:1-4; 15:1-8; 22:1, 2.
6. Soema Jehovah ben kon si leki a „manpikin” foe en, èn sortoe leriman a ben de gi den?
6 Langa ten baka dati, na ini den dei foe Moses, dan Jehovah ben kon na ini wan froebontoe matifasi nanga a nâsi Israèl. Leki wan bakapisi foe dati, a nâsi ben kon tron a pipel di a ben froekisi èn a ben si den leki a „manpikin” foe en. Gado ben taki: „Israèl na mi manpikin” (Exodus 4:22, 23; 19:3-6; Deuteronomium 14:1, 2). Tapoe gron foe a froebontoe matifasi disi, den Israèlsma ben kan taki soleki fa a profeiti Jesaja ben skrifi: „Joe, O Jehovah, na wi Tata” (Jesaja 63:16). Jehovah ben teki a frantiwortoe di a abi leki tata na en tapoe èn na wan lobi fasi a ben leri Israèl, den pikin foe en (Psalm 71:17; Jesaja 48:17, 18). Foe taki en leti, di den no ben de getrow moro, a ben begi den na wan sari-atifasi: „Drai kon baka, O oen manpikin di fadon komoto na bribi.” — Jeremia 3:14.
7. Sortoe matifasi Israèl ben abi nanga Jehovah?
7 Leki wan bakapisi foe a froebontoe matifasi di Jehovah ben abi nanga Israèl, dan na wan agersi fasi, Jehovah ben kon tron so srefi, a Masra foe a nâsi, èn a nâsi ben kon tron en wefi na agersifasi. A profeiti Jesaja ben skrifi foe a wefi: „Joe Gran Mekiman na joe masra-eiginari, Jehovah foe den legre na en nen” (Jesaja 54:5; Jeremia 31:32). Ala di Jehovah ben doe en ròl leki Masra na wan lespeki fasi, tokoe a nâsi Israèl ben kon tron wan wefi di no ben de getrow. Jehovah ben taki: „Neleki wan wefi di prati nanga en kompe na wan triki fasi, na so joe, O oso foe Israèl, ben handri na wan triki fasi nanga mi” (Jeremia 3:20). Jehovah ben tan aksi den manpikin foe en wefi di no ben de getrow; a ben tan de den „Bigi Leriman”. — Jesaja 30:20; 2 Kroniki 36:15.
8. Ala di Jehovah ben weigri foe erken Israèl leki wan nâsi, sortoe simbôlis wefi a abi ete?
8 Di Israèl ben weigri foe erken En Manpikin, Jesus Krestes, èn ben kiri en, dan Gado ben trowe den te foe kaba. So boen, a djoe nâsi dati no ben de moro langa wan wefi na wan agersi fasi gi en, èn so srefi A no ben de a Tata nanga Leriman foe den tranga-ede manpikin foe a wefi moro (Mateus 23:37, 38). Ma Israèl ben de soso wan simbôlis wefi. Na apostel Paulus ben teki den wortoe foe Jesaja 54:1 taki baka, di e taki foe wan „oema di no man meki pikin” di de difrenti èn aparti foe „na oema di abi wan masra-eiginari”, a nâsi Israèl na skinfasi. Paulus ben tjari kon na krin taki den salfoe kresten de den pikin foe na „oema di no man meki pikin”, di a e kari a „Jerusalem foe tapoesei”. A simbôlis oema disi de Gado en hemel organisâsi foe jeje mekisani. — Galasiasma 4:26, 27.
9. (a) Foe soema Jesus ben taki di a ben taki ’den manpikin foe joe sa de sma di e kisi leri foe Jehovah’? (b) Tapoe gron foe sortoe sani sma e tron manpikin foe Gado, na jejefasi?
9 So boen di Jesus ben teki a profeititori foe Jesaja taki baka, na ini a snoga na Kapernaum: „Ala den manpikin foe oenoe sa de sma di kisi leri foe Jehovah”, dan a ben e taki foe den wan di ben sa tron „manpikin” foe a „Jerusalem foe tapoesei”, a hemel organisâsi foe Gado di joe kan teki gersi nanga wan wefi. Te den djoe arkiman ben teki den leri foe Jesus Krestes, a sma di e teki presi gi Gado èn di ben kon foe hemel, dan den ben kan kon tron pikin foe a hemel oema foe Gado di no so langa ete no ben man meki pikin èn den ben kan tron „wan santa nâsi”, na „Israèl foe Gado” na jejefasi (1 Petrus 2:9, 10; Galasiasma 6:16). Na apostel Johanes ben skrifi foe a bigi okasi di Jesus ben opo foe sma kan tron manpikin foe Gado, na jejefasi: „A ben kon na en eigi oso, ma den eigi sma foe en no ben teki en. Ma na den wan di teki en a ben gi makti foe tron den pikin foe Gado, bikasi den ben bribi na ini en nen.” — Johanes 1:11, 12.
Toemoesi prenspari leri foe Jehovah
10. Wantewante baka di sma ben opo densrefi teige Gado na Eden, san Jehovah ben leri na ini a tori foe a „siri”, èn soema ben de a Siri disi te foe kaba?
10 Leki wan lobi Tata, Jehovah e meki den pikin foe en kon sabi den prakseri foe en. So boen, di wan engel di ben opo ensrefi teige Gado ben kori a fosi libisma paar foe trangajesi Gado, dan wantewante Jehovah ben taigi den san a ben sa doe foe meki a prakseri foe en, foe meki grontapoe tron wan paradijs, kon troe. A ben taki dati a ben sa poti feantifasi na mindri „a fosi sneki”, Satan Didibri, „èn na oema”. Dan a ben froeklari taki a „siri” foe na oema ben sa masi Satan „na ini en ede” te leki a dede (Genesis 3:1-6, 15; Openbaring 12:9; 20:9, 10). Soleki fa wi si kaba, na oema — di wi ben kon sabi bakaten leki a „Jerusalem foe tapoesei” — na Gado en hemel organisâsi foe jeje mekisani. Ma soema na en „siri”? Na Gado en Manpikin, Jesus Krestes, a wan di A ben seni kon foe hemel èn di sa pori Satan te foe kaba. — Galasiasma 4:4; Hebrewsma 2:14; 1 Johanes 3:8.
11, 12. Fa Jehovah ben gi moro foe a toemoesi prenspari leri disi foe a „siri”?
11 Jehovah ben gi moro leri foe a toemoesi prenspari leri disi di abi foe doe nanga a „siri” di a ben pramisi Abraham: „Seiker mi sa meki joe siri kon moro foeroe neleki den stari foe hemel . . . Èn nanga joe siri ala den nâsi foe grontapoe seiker sa blesi densrefi” (Genesis 22:17, 18). Jehovah ben gebroiki na apostel Paulus foe froeklari taki Jesus Krestes na a pramisi „siri” foe Abraham, ma taki tra sma so srefi ben sa tron wan pisi foe a Siri. Paulus ben skrifi: „Efoe oenoe na foe Krestes, dan oenoe de troetroe a siri foe Abraham, erfgenaam na ini a tori foe wan pramisi.” — Galasiasma 3:16, 29.
12 Jehovah ben tjari kon na krin toe taki Krestes, a Siri, ben sa kon foe a kownoe lin foe Juda èn taki na en „den pipel sa gi jesi” (Genesis 49:10). Jehovah ben pramisi foe Kownoe David foe a lo foe Juda: „Foe troe, foe têgo mi sa poti en siri èn en kownoestoeroe neleki den dei foe hemel. En siri srefi sa de te ten di no abi skotoe, èn en kownoestoeroe leki a son na mi fesi” (Psalm 89:3, 4, 29, 36). Di na engel Gabriel ben meki a geborte foe Jesus bekènti, dan a ben froeklari taki a pikin ben de a Tiriman di Gado ben poti, a Siri foe David. „A sa bigi èn den sa kari en a Manpikin foe a Moro Heiwan”, na so Gabriel ben taki, „èn Jehovah Gado sa gi en a kownoestoeroe foe en tata David, . . . èn en kownoekondre no sa kon na wan kaba”. — Lukas 1:32, 33; Jesaja 9:6, 7; Danièl 7:13, 14.
13. Fa wi moesoe handri na tapoe den leri foe Jehovah efoe wi wani kisi a blesi foe en?
13 Efoe wi wani kisi a blesi foe Jehovah, dan wi moesoe sabi èn wi moesoe handri na tapoe a toemoesi prenspari leri disi foe Gado Kownoekondre. Wi moesoe bribi taki Jesus ben saka kon foe hemel, èn taki en na a Kownoe di Gado poti — a kownoe Siri di sa sorgoe taki ala sani kon boen baka na a paradijs na grontapoe — èn taki a sa gi den dedewan wan opobaka (Lukas 23:42, 43; Johanes 18:33-37). Di Jesus ben taki na Kapernaum foe na opobaka foe den dedewan, dan a ben moesoe de krin gi den djoe taki a ben taki waarheid. Ija, wan toe wiki na fesi nomo, kande leti drape na Kapernaum, a ben gi a twarfoe jari oemapikin foe wan fesiman dinari foe a snoga, wan opobaka! (Lukas 8:49-56). Foe troe, wi toe abi nofo reide foe bribi èn foe handri akroederi den leri foe Jehovah di e gi wi howpoe èn di abi foe doe nanga en Kownoekondre!
14, 15. (a) O prenspari a Kownoekondre foe Jehovah de gi Jesus? (b) San wi moesoe froestan èn san wi moesoe man froeklari foe a Kownoekondre foe Jehovah?
14 Jesus ben gi a heri libi foe en na grontapoe foe gi leri foe a Kownoekondre foe Jehovah. A ben meki a de a thema foe en diniwroko, èn a ben leri den bakaman foe en srefi foe begi gi a Kownoekondre (Mateus 6:9, 10; Lukas 4:43). Den djoe na skinfasi ben de na ini a lin foe de „manpikin foe a kownoekondre”, ma foe di den no ben abi nofo bribi, meki moro foeroe foe den no ben kisi a grani dati (Mateus 8:12; 21:43). Jesus ben tjari kon na krin taki soso wan „pikin ipi” e kisi a grani foe tron „manpikin foe a kownoekondre”. Den „manpikin” disi e tron „kompe erfgenaam nanga Krestes” na ini en hemel Kownoekondre. — Lukas 12:32; Mateus 13:38; Romesma 8:14-17; Jakobus 2:5.
15 Omeni kownoekondre erfgenaam Krestes sa tjari go na hemel foe tiri grontapoe makandra nanga en? Den de 144.000 sma nomo, soleki fa bijbel e taki (Johanes 14:2, 3; 2 Timoteus 2:12; Openbaring 5:10; 14:1-3; 20:4). Ma Jesus ben taki dati a ben abi „tra skapoe” di sa de borgoe na grontapoe foe a Kownoekondre tiri dati. Den disi sa njan boen foe volmaakti gosontoe nanga vrede foe têgo tapoe wan paradijs grontapoe (Johanes 10:16; Psalm 37:29; Openbaring 21:3, 4). Wi moesoe froestan èn wi moesoe man froeklari den leri foe Jehovah di abi foe doe nanga a Kownoekondre.
16. Sortoe toemoesi prenspari leri foe Jehovah wi moesoe leri èn moesoe doe?
16 Na apostel Paulus ben meki wi kon sabi wan tra toemoesi prenspari leri foe Jehovah. A ben taki: „Na Gado ben leri oenoe foe lobi makandra” (1 Tesalonikasma 4:9). Efoe wi wani plisi Jehovah, dan wi moesoe sori a sortoe lobi disi. „Gado na lobi”, bijbel e taki, èn wi moesoe waka na baka na eksempre foe En foe sori lobi (1 Johanes 4:8; Efeisesma 5:1, 2). A de wan sari, taki moro foeroe sma no wani foe leri foe lobi den kompe libisma foe den soleki fa Gado ben leri wi foe doe dati. Fa a de nanga wi? Wi handri na tapoe a leri disi foe Jehovah?
17. A fasi foe denki foe soema wi moesoe waka na baka?
17 A de toemoesi prenspari taki wi e opo wisrefi gi ala den leri foe Jehovah. Meki a fasi fa wi e denki de leki fa a psalm singiman foe bijbel e denki, di a ben skrifi: „Meki mi sabi den eigi pasi foe joe, O Jehovah; leri mi den eigi foetoepasi foe joe. Meki mi waka na ini joe waarheid èn leri mi.” „Leri mi den wet foe joe. Leri mi boen-atifasi, koni nanga sabi srefi . . . Leri mi den eigi kroetoe bosroiti foe joe” (Psalm 25:4, 5; 119:12, 66, 108). Efoe den firi foe joe de a srefi leki den wan foe a psalm singiman, dan joe kan de na mindri a bigi groepoe sma di e kisi leri foe Jehovah.
Bigi ipi foe sma di kisi leri
18. San a profeiti Jesaja ben taki na fesi, di ben sa pasa na ini a ten foe wi?
18 A profeiti Jesaja ben taki na fesi san ben sa pasa na ini a ten foe wi: „A moesoe pasa na ini a lasti pisi foe den dei, taki a bergi foe na oso foe Jehovah sa poti steifi na tapoesei foe na ede foe den bergi . . . Èn foeroe sma sa go foe troe èn den sa taki: ’Kon, oen pipel, èn meki wi go na a bergi foe Jehovah, na a oso foe a Gado foe Jakob; èn a sa leri wi foe den pasi foe en’” (Jesaja 2:2, 3; Mika 4:2). Soema na den sma disi di kisi leri foe Jehovah?
19. Soema na ini a ten disi de na mindri den wan di e kisi leri foe Jehovah?
19 Boiti den wan di sa tiri na hemel makandra nanga Krestes, dan tra sma sa de na ini toe. Soleki fa wi ben si na fesi, Jesus ben taki dati a ben abi „tra skapoe” — borgoe na grontapoe foe a Kownoekondre — boiti a „pikin ipi” di sa de erfgenaam foe a Kownoekondre (Johanes 10:16; Lukas 12:32). A „bigi ipi” di e pasa „a bigi banawtoe” libilibi, de foe a tra skapoe groepoe, èn den e njan boen foe di den abi wan boen nen na fesi foe Jehovah tapoe a gron foe a bribi di den abi na ini Jesus broedoe di lon (Openbaring 7:9, 14). Ala di den tra skapoe no de langalanga na mindri den „manpikin” di Jesaja 54:13 e taki foe den, tokoe den blesi foe di den e kisi a leri foe Jehovah. Foe dati ede a fiti taki den e kari Gado „Tata”, bikasi, foe taki en leti, a sa de den Granpapa nanga jepi foe den „Têgo Tata”, Jesus Krestes. — Mateus 6:9; Jesaja 9:6.
Fa Jehovah e gi leri
20. Na sortoe fasi Jehovah e gi leri?
20 Jehovah e gi leri na foeroe fasi. Foe eksempre, a e doe disi nanga jepi foe den sani di a meki, di e gi kotoigi taki a de èn taki a abi foeroe koni (Job 12:7-9; Psalm 19:1, 2; Romesma 1:20). Moro fara, a e gi leri foe di a abi komunikâsi langalanga nanga wan sma, soleki fa a ben doe di a ben leri Jesus bifo a ben de wan libisma. Na a srefi fasi, na dri okasi di skrifi poti, a ben taki langalanga foe hemel nanga sma na grontapoe. — Mateus 3:17; 17:5; Johanes 12:28.
21. Sortoe engel Jehovah ben gebroiki spesroetoe leki a sma di e teki presi gi en, ma fa wi doe sabi taki a ben gebroiki trawan toe foe gi leri?
21 Jehovah gebroiki engel toe di teki presi gi en foe gi leri, èn so srefi en Fosi Geborewan, „a Wortoe” (Johanes 1:1-3). Ala di Jehovah ben kan taki langalanga nanga en volmaakti libisma manpikin, Adam, na ini a djari foe Eden, tokoe soleki fa a sori, a ben gebroiki Jesus foe taki gi en, bifo Jesus ben de wan libisma (Genesis 2:16, 17). A wan disi ben de kande „na engel foe a troe Gado di ben waka na fesi foe a kampoe foe Israèl”, èn foe soema Jehovah ben komanderi: „Arki en sten” (Exodus 14:19; 23:20, 21). Tweifri no de taki Jesus, bifo a ben de wan libisma, ben de so srefi a „granman foe a legre foe Jehovah” di ben kon na Josua foe tranga en (Josua 5:14, 15). Jehovah e gebroiki tra engel toe foe gi den leri foe en, soleki den wan di a ben gebroiki foe gi Moses a Wet foe en. — Exodus 20:1; Galasiasma 3:19; Hebrewsma 2:2, 3.
22. (a) Soema na grontapoe Jehovah gebroiki foe gi leri? (b) San na a moro prenspari sani nanga jepi foe san Jehovah e gi libisma leri na ini a ten disi?
22 Moro fara, Jehovah Gado e gebroiki libisma di e teki presi gi en foe gi leri. Den papa nanga mama na Israèl ben moesoe leri den pikin foe den; den profeiti, priester, granman, nanga Leifisma ben leri a nâsi a Wet foe Jehovah (Deuteronomium 11:18-21; 1 Samuèl 12:20-25; 2 Kroniki 17:7-9). Jesus ben de a moro prenspari Takiman foe Gado na grontapoe (Hebrewsma 1:1, 2). Foeroetron Jesus ben taki dati den sani di a ben leri sma ben de soifri san a ben leri foe en Tata, so boen, foe taki en leti, den arkiman foe en ben kisi leri foe Jehovah (Johanes 7:16; 8:28; 12:49; 14:9, 10). Jehovah ben meki den skrifi den sani di a ben taki, èn na ini a ten foe wi a e leri libisma moro foeroe nanga jepi foe den Boekoe foe bijbel di skrifi nanga jepi foe en santa jeje. — Romesma 15:4; 2 Timoteus 3:16.
23. Sortoe aksi wi sa loekoe na ini a tra artikel?
23 Wi e libi na ini prenspari ten, foe di den Boekoe foe bijbel e pramisi taki ’na ini a lasti pisi foe den dei [na ini san wi e libi] foeroe sma sa kisi leri foe den pasi foe Jehovah’ (Jesaja 2:2, 3). Fa den leri disi e gi? San wi moesoe doe foe abi winimarki èn foe abi wan prati na ini a bigi leri programa foe Jehovah di e gi now? Wi sa loekoe den aksi disi na ini a tra artikel.
Fa joe ben sa piki?
◻ Fa Jehovah ben kon tron wan Tata, wan Leriman, nanga wan Masra?
◻ San Jehovah e leri foe a „siri”?
◻ Sortoe toemoesi prenspari leri foe Jehovah wi moesoe ondrow?
◻ Fa Jehovah e gi leri?
[Prenki na tapoe bladzijde 9]
Na opo di Jesus ben opo na oemapikin foe Jai-rus baka, ben gi wan gron foe bribi na opobaka pramisi foe Jesus