Ondrofeni den winimarki foe a leri foe Gado
„Mi, Jehovah, na joe Gado, a Sma di e leri joe fa foe kisi wini gi joesrefi.” — JESAJA 48:17.
1. Fa a sa go nanga wi efoe wi e poti a leri foe Gado ini wi libi?
JEHOVAH GADO sabi san moro betre. No wan sma man pasa en ini prakseri, wortoe nanga doe. Leki wi Mekiman, a sabi boen san na wi fanowdoe èn a e sorgoe taki wi kisi den pasa marki. Foe troe a sabi fa foe gi wi leri. Èn efoe wi e poti a leri foe Gado ini wi libi, wi e kisi wini gi wisrefi èn e ondrofeni troetroe kolokoe.
2, 3. (a) Fa a pipel foe Gado foe owroeten ben kisi wini gi densrefi efoe den ben gi jesi na den komando foe en? (b) San sa pasa efoe wi poti a leri foe Gado ini wi libi ini a ten disi?
2 A leri foe Gado e meki wi kon sabi a serjoesoe wani foe Gado taki en foetoeboi wai pasi gi rampoe èn njanboen foe a libi, foe di den e gi jesi na den wet nanga gronprakseri foe en. Efoe a pipel foe Jehovah foe owroeten ben arki na en, den ben sa ondrofeni foeroe blesi, bikasi a ben taigi den: „Mi, Jehovah, na joe Gado, a Sma di e leri joe fa foe kisi wini gi joesrefi, a Sma di e meki joe waka na a pasi di joe moesoe waka. O, efoe nomonomo joe sa poti prakseri tapoe mi komando! Dan a vrede foe joe ben sa kon tron leki wan liba, èn a regtfardikifasi foe joe leki den skwala foe se.” — Jesaja 48:17, 18.
3 A pipel foe Gado foe owroeten ben sa kisi wini gi densrefi efoe den ben poti prakseri tapoe den komando nanga leri foe en. Na presi foe njan pina foe rampoe foe na anoe foe den Babilonsma, den ben sa ondrofeni vrede nanga kolokoe, so foeroe, so dipi èn foe alaten leki wan liba. Boiti dati, den regtfardiki doe foe den ben sa de pasa marki leki den skwala foe se. Na a srefi fasi, efoe wi e poti a leri foe Gado ini wi libi, wi kan ondrofeni den foeroe winimarki foe en. San na wan toe foe disi?
A kan kenki libi
4. Fa a leri foe Gado ben abi krakti na tapoe a fasi fa sma e libi?
4 A leri foe Gado ben e jepi foeroe sma, foe di a e meki a libi foe den kon moro betre. Den sma di e poti a leri foe Jehovah ini den libi e libi „den wroko foe a skin”, so leki wèrdri fasi foe tjari densrefi, afkodrei, bonoe, strei nanga djaroesoe. Na presi foe dati, den e sori den froktoe foe a jeje foe lobi, prisiri, vrede, langa pasensi, switifasi, boen-atifasi, bribi, safri-atifasi nanga dwengi joesrefi (Galasiasma 5:19-26). Den e poti prakseri tapoe a rai toe foe Efeisesma 4:17-24, pe Paulus e gi kompe-bribiman a deki-ati foe no waka leki fa den sma foe den nâsi e waka, ini den lawfasi foe den prakseri èn ini a doengroe foe den froestan, farawe foe a libi di de foe Gado. Foe di sma di abi a fasi foe Krestes no e meki ati di de sondro firi tjari den, den ’e poeroe na owroe sma di de akroederi a waka nanga libi foe den di den ben abi fosi èn den e kon tron njoen ini a krakti di e meki den froestan wroko’. Den e ’weri a njoen sma di den de, di ben meki akroederi a wani foe Gado nanga a troetroe regtfardikifasi nanga loyaalfasi’.
5. Fa a leri foe Gado abi krakti na tapoe a fasi fa sma e waka?
5 Wan moi winimarki di a poti di wi e poti a leri foe Gado ini wi libi de, taki a e sori wi fa foe waka nanga Gado. Efoe wi e waka nanga Gado so leki fa Noa ben doe, wi e waka na baka a fasi foe libi di wi Bigi Leriman ben seti gi wi (Genesis 6:9; Jesaja 30:20, 21). Den sma foe den nâsi „e waka ini den lawfasi foe den prakseri”, so leki na apostel Paulus ben taki. Èn fa sonwan foe den sani di den e skrifi foe den prakseri foe den de lawfasi! Di a si san tra sma skrifi tapoe a skotoe ini a foto Pompeii, wan sma di ben teki notisi foe sani, ensrefi ben skrifi: „A de wan froewondroe sani, o skotoe, taki joe no ben broko fadon ondro a hebi foe someni dondon sani di den skrifi.” Ma dondon sani no de ini „a leri foe Jehovah” èn a Kownoekondre preikiwroko di a leri disi e meki taki a kan (Tori foe den Apostel 13:12). Nanga jepi foe a wroko dati, sma di lobi waarheid ben kisi jepi foe kon handri nanga froestan. Den ben kisi leri fa foe no waka moro ini den sondoe pasi foe den, ini a sabi di den no ben sabi den prakseri foe Gado. Den no de ini doengroe na froestan sei moro, noso den no abi ati di de sondro firi di e poesoe den foe soekoe marki di no abi wini.
6. Sortoe demakandra de na mindri a gi di wi e gi jesi na a leri foe Jehovah èn a kolokoe foe wi?
6 Leri foe Gado e jepi wi toe, foe di a e meki wi kon sabi Jehovah nanga den afersi foe en. A sortoe sabi disi e tjari wi kon moro krosibei foe Gado, e meki a lobi foe wi gi en kon moro bigi, èn e meki a wani di wi wani gi jesi na en kon moro tranga. 1 Johanes 5:3 e taki: „Disi wani taki a lobi foe Gado, taki wi e hori den komando foe en; èn tokoe den komando foe en no de hebi.” Wi e gi jesi toe na den komando foe Jesus bikasi wi sabi taki a leri foe en e komoto na Gado (Johanes 7:16-18). A sortoe gi di wi e gi jesi dati e kibri wi foe no kisi mankeri na jeje fasi èn a e meki a kolokoe foe wi kon moro foeroe.
Wan troetroe marki ini libi
7, 8. (a) Fa wi moesoe froestan Psalm 90:12? (b) Fa wi kan kisi wan ati foe koni?
7 A leri foe Jehovah e tjari wini kon foe di a e sori wi fa foe gebroiki wi libi na wan fasi di abi marki. Te joe loekoe en boen a leri foe Gado e sori wi fa foe teri den dei foe wi na wan spesroetoe fasi. Wan froewakti foe libi 70 jari abi wan pramisi na ini foe so wan 25.550 dei. Wan sma di abi 50 jari gebroiki 18.250 foe den kaba, èn den 7300 dei di a e froewakti foe libi ete, sori taki den de pikinso, foe troe. Spesroetoe, na a ten dati, a kan warderi moro foeroe foe san ede a profeiti Moses ben begi Gado na Psalm 90:12: „Sori wi fa foe teri den dei foe wi joisti na so wan fasi dati wi kan kisi wan ati foe koni.” Ma san Moses ben bedoel nanga dati?
8 Moses no ben bedoel taki Gado ben sa meki den kon sabi a soifri nomroe foe den dei di ben sa de ini a libiten foe ibri Israèlsma. Akroederi Psalm 90, den vers 9 nanga 10, a Hebrew profeiti dati ben froestan taki wan libiten ben sa kan de so wan 70 noso 80 jari — sjatoe foe troe. So leki fa a sori dan den wortoe foe Psalm 90:12 ben sori a winsi foe Moses ini begi taki Jehovah sori noso leri en nanga En pipel foe gebroiki koni te den e teri ’den dei foe den jari foe den’ èn gebroiki den na wan fasi di Gado feni boen. We, dan, fa a de nanga wi? Wi e warderi ibri warti dei? Wi e tjari wan ati foe koni kon, foe di wi e meki moeiti foe gebroiki ibri dei na wan wartifasi foe gi glori na wi Bigi Leriman, Jehovah Gado? Leri foe Gado e jepi wi foe doe joisti dati.
9. San wi kan froewakti efoe wi e leri foe teri den dei foe wi foe a glori foe Jehovah?
9 Efoe wi leri foe teri den dei foe wi foe a glori foe Jehovah, wi sa kan go doro foe teri den dei foe wi, bikasi a leri foe Gado e gi sabi foe libi foe têgo. „Disi wani taki têgo libi”, Jesus ben taki, „dati den teki doronomo sabi foe joe, a wan-enkri troe Gado, èn foe en di joe ben seni kon, Jesus Krestes” (Johanes 17:3). A no de foe taki, dati efoe wi kisi ala sabi foe grontapoe di de foe kisi, a no sa gi wi a libi foe têgo. Ma wi kan kisi têgo libi efoe wi e kisi èn e poti soifri sabi foe den toe moro prenspari sma ini hemel nanga grontapoe ini wi libi èn troetroe e poti bribi ini den.
10. San wan encyclopedia e taki foe a gi foe leri, èn fa disi kan agersi nanga den winimarki foe a leri foe Gado?
10 A no trobi o langa wi libi kaba, meki wi memre a warti winimarki disi foe a leri foe Gado: A e gi den sma di e poti en ini den libi wan troetroe marki ini libi. The World Book Encyclopedia e taki: „Leri di sma e kisi ben moesoe jepi sma foe kon tron boen memre foe a libimakandra di. A ben sa moesoe jepi den toe foe kweki wan warderi gi san den ben kisi abra na a sei foe koeltoeroe èn libi den libi foe den nanga moro satisfaksi.” Leri foe Gado e tjari wini kon foe di a e jepi wi foe libi den libi foe wi nanga satisfaksi. A e kweki ini wi warderi troetroe foe san wi kisi abra na jeje fasi leki a pipel foe Gado. Èn foe troe a e meki wi de boen memre foe a libimakandra, bikasi a e meki taki wi e plèi wan prenspari ròl foe satisferi den fanowdoe foe sma na heri grontapoe. Foe san ede wi kan taki dati?
Wan leri programa na heri grontapoe
11. Fa Thomas Jefferson ben poti krakti na tapoe a fanowdoe foe wan boen leri?
11 So leki no wan tra programa foe gi leri man doe, leri foe Gado e satisferi den fanowdoe tapoe a kontren foe gi leri na a pipel. A fanowdoe foe gi sma leri ben de wan sani di Thomas Jefferson, di ben tron a di foe dri presidenti foe Amerkankondre, ben poti prakseri na tapoe. Ini wan brifi foe 13 augustus 1786 na George Wythe, wan mati èn wan kompe di ben skrifi en nen na ondro a Srefidensi Froeklari, Jefferson ben skrifi: „Mi e denki taki a troetroe moro prenspari wet ini a heri wetboekoe foe wi na a wet foe a prati foe sabi na mindri a pipel. No wan tra seikerseiker fondamenti wi ben sa kan poti, foe kisi wan djaranti foe fri nanga kolokoe. . . . Preiki, mi lespeki masra, wan faja waka foe feti nanga na abi di sma no abi sabi; meki a wet foe gi a gewoon pipel leri kon tanapoe steifi èn kon de moro boen. Meki wi kondreman kon sabi . . . taki na edemoni di den sa moesoe pai, di abi a marki foe gi leri, no de moro leki a di foe doesoen pisi foe san den sa moesoe pai na kownoe, priester nanga heiman di sa opo kon na mindri wi efoe wi meki a pipel tan ini don, sondro foe gi den leri.”
12. Foe san ede wi kan taki dati a leri foe Gado na a programa nanga a moro boen bakapisi èn moro boen winimarki foe leri na heri grontapoe?
12 Na presi foe libi sma, di abi wan regtfardiki firi, ini don, a leri foe Jehovah e sorgoe foe a moro boen programa foe gi leri na heri grontapoe, di e tjari wini kon gi den. Di a di foe Toe Grontapoe Orlokoe ben e feti ete 50 jari pasa, na U.S. Committee on Educational Reconstruction (Amerkankondre Komte foe orga a Gi leri) ben si wan tranga fanowdoe foe „gi leri na heri grontapoe”. A fanowdoe dati de te now ete, ma a leri foe Gado na a wan-enkri progama di abi boen bakapisi foe gi leri na heri grontapoe. A leri foe Gado e tjari wini kon toe, bikasi a e poeroe sma komoto foe lasi-ati, e opo den na moreel èn na jejefasi, e kibri den foe a heimemrefasi nanga a prakseri di den e prakseri sani na fesi sondro foe ondroesoekoe fosi, di a grontapoe disi abi, èn a e gi sabi foe têgo libi. San de moro prenspari, a programa disi e tjari wini kon gi ala sma, foe di a e leri den fa foe dini Jehovah Gado.
13. Fa Jesaja 2:2-4 e kon troe ini a ten disi?
13 Den ipi-ipi sma di e tron foetoeboi foe Gado now e njanboen foe den winimarki foe a leri foe Gado. Den sabi den jeje nowtoe èn den sabi krinkrin taki a dei foe Jehovah de krosibei (Mateus 5:3; 1 Tesalonikasma 5:1-6). Nownow, „na a lasti pisi foe den dei”, den sma disi foe ala nâsi e lon go na a bergi foe Jehovah, en soifri anbegi. A tanapoe steifi èn a de hei pasa ala anbegi di de kontrari a wani foe Gado (Jesaja 2:2-4). Efoe joe na wan Kotoigi foe Jehovah di gi ensrefi abra, joe no e breiti foe de na mindri foe den ipi-ipi anbegiman di e kon moro nanga moro èn di e kisi wini foe a leri foe Gado? Fa a de wan moi sani foe de na mindri denwan di e bari taki: „Prèise Jah, oen pipel!” — Psalm 150:6.
A abi boen bakapisi tapoe wi jeje
14. Sortoe winimarki a abi foe waka baka a rai foe Paulus ini 1 Korentesma 14:20?
14 Na mindri den foeroe winimarki di a leri foe Gado kan abi gi wi, de a boen krakti di a kan abi tapoe wi denki nanga jeje. A e poesoe wi foe prakseri sani di de regtfardiki, krin, boen èn di de foe prèise (Filipisma 4:8). A leri foe Jehovah e jepi wi foe waka baka a rai foe Paulus: „De pikin-negre na ini san ogri; ma na a tra sei de bigisma na ini froestan” (1 Korentesma 14:20). Efoe wi e poti a froemane disi ini wi libi, wi no sa soekoe sabi ini ogridoe. Paulus ben skrifi toe: „Poeroe ala takroe bita-atifasi nanga atibron nanga babari nanga skempi taki na oen mindri, makandra nanga ala takroe doe” (Efeisesma 4:31). Te wi e teki a rai disi dan a sa jepi wi foe no go doe hoeroedoe nanga tra sortoe bigi sondoe. Ala di disi kan abi boen bakapisi na skinfasi èn na froestan sei, a sa tjari spesroetoe prisiri, foe di wi sabi taki Gado e feni wi boen.
15. San kan jepi wi foe tan na wan boenfasi ini wi prakseri?
15 Efoe wi wani tan na wan boenfasi ini wi prakseri, wan sani di kan jepi de foe wai pasi gi ’takroe kompe di e pori boen gwenti’ (1 Korentesma 15:33). Leki krestensma, wi no ben sa abi leki kompe den hoeroeman, soetaman nanga tra sortoe ogridoeman. Dati a no foe prakseri dan, taki wi no moesoe abi den sortoe sma dati leki kompe, foe di wi e leisi foe den foe satisferi den lostoe foe wi noso foe loekoe den tapoe telefisi noso na tapoe film ini kino. Na ati na wan bidrigi sani, koemakriki a kan kweki wan lostoe foe takroe sani èn a kan kon na ini tesi foe doe den (Jeremia 17:9). Foe dati ede, meki wi wai pasi gi den sortoe tesi dati, foe di wi e tan hori wisrefi na a leri foe Gado. A kan abi krakti na so wan boen fasi tapoe a denki foe „sma di lobi Jehovah” taki den „no wani si ogri na ai”. — Psalm 97:10.
16. Fa a leri foe Gado kan abi krakti tapoe a jeje di wi e sori?
16 Paulus ben taigi en kompe-wrokoman Timoteus: „Meki Masra de nanga a jeje di joe e sori. Meki en no-froedini boen-atifasi de nanga oenoe pipel” (2 Timoteus 4:22). Na apostel ben abi a winsi taki Gado, nanga jepi foe Masra Jesus Krestes, sa feni a krakti boen di e wroko èn di e boeweigi Timoteus nanga tra krestensma. A leri foe Gado e jepi wi foe sori wan lobi, switi, safoe jeje (Kolosesma 3:9-14). Èn fa dati de difrenti foe a jeje foe foeroe sma ini den lasti dei! Den abi heimemre, no abi tangi, e mankeri natuurlek firi foe lobi, no de foe feni foe sroto kroederi, tranga-ede, a lobi di den lobi prisiri nanga a hari di den hari a troetroe gi di den moesoe gi densrefi na Gado poeroe foe den (2 Timoteus 3:1-5). Ma, efoe wi e go doro foe poti den winimarki foe a leri foe Gado ini wi libi, dan, wi e sori wan jeje di e meki taki Gado nanga den sma na wi sei e sori lobi gi wi.
A e jepi foe abi matifasi nanga libisma
17. Foe san ede sakafasi wrokomakandra de so prenspari?
17 A leri foe Jehovah e jepi wi foe si den winimarki foe sakafasi wrokomakandra nanga kompe-bribiman (Psalm 138:6). Tra fasi leki foeroe sma ini a ten disi, wi no e pasa den regtfardiki gronprakseri, ma wi de klariklari foe taki wan mofo makandra. Foe eksempre, a abi foeroe boen bakapisi bikasi owroeman di den poti na wroko de klariklari foe taki wan mofo makandra te den abi konmakandra foe owroeman. Den man disi kan taki bedari ini a belang foe waarheid, ala di den no e gi den firi foe den okasi foe basi logis fasi foe denki noso foe meki trobi kon. Ala memre foe a gemeente sa kisi wini foe a jeje wanfasi di wi e ondrofeni efoe wi alamala e tan poti a leri foe Gado ini wi libi. — Psalm 133:1-3.
18. Sortoe fasi foe si kompe-bribiman, a leri foe Gado e jepi wi foe abi?
18 A leri foe Gado abi winimarki toe, foe di a e jepi wi foe abi wan joisti fasi foe si wi kompe-bribiman. Jesus ben taki: „No wan sma kan kon na mi, efoe a Tata di ben seni mi kon no hari en” (Johanes 6:44). Spesroetoe sensi 1919, Jehovah ben meki den foetoeboi foe en preikiwroko gi den kroetoe foe en èn a warskow disi di ben e go na heri grontapoe ben meki skwala nanga seki miti a grontapoe seti foe Satan. Na a srefi ten, sma di e frede Gado — „den sani di sma wani troetroe — ben e hari kon na Gado foe poti densrefi aparti foe den nâsi èn foe abi wan prati makandra nanga den salfoe kresten foe foeroe na oso foe anbegi foe Jehovah nanga glori (Hagai 2:7). Foe troe, wi moesoe si denwan disi di sma wani troetroe di Gado ben hari kon na en, leki lobi kompe.
19. San a leri foe Gado e meki wi kon sabi ini a tori foe loesoe persoonlijk problema nanga kompe-bribiman?
19 Ma foe di wi alamala no de volmaakti, a no kan de tra fasi, taki a libi no sa de alaten sondro problema. Sjatoe bifo Paulus ben de klariklari foe gowe foe doe en di foe toe zendingwaka, Barnabas ben teki a fasti bosroiti foe teki Markus nanga en. Paulus no ben agri bikasi Markus „ben gowe libi den na ini Pamfilia èn a no ben go doro nanga den foe doe a wroko”. Foe a sani dati, „wan bigi ati-bron broko na mindri den”. Barnabas ben teki Markus nanga en go na Ciprus, ala di Paulus ben meki Silas go leki en kompe na ini Siria nanga Cilisia (Tori foe den Apostel 15:36-41). Bakaten, a de krin taki a prati disi ben kon boen baka, bikasi Markus ben de nanga Paulus ini Rome, èn na apostel Paulus ben taki boen foe en (Kolosesma 4:10). Wan winimarki di a leri foe Gado e gi de, taki a e sori wi fa foe loesoe persoonlijk problema na mindri kresten, foe di den e waka baka a sortoe rai so leki Jesus ben gi na Mateus 5:23, 24 nanga Mateus 18:15-17.
A sa abi boen bakapisi èn a sa wini alaten
20, 21. A loekoe di wi ben loekoe a leri foe Gado moesoe boeweigi wi foe doe san?
20 Srefi foe a sjatoe loekoe di wi ben loekoe sonwan foe den boen bakapisi nanga wini foe a leri foe Gado, sondro tweifri wi alamala kan si a fanowdoe foe tan horidoro foe poti den ini wi libi. Nanga wan jeje foe begi, dan, meki wi tan go doro foe leri foe wi Gran Leriman. Heri esi a leri foe Gado sa wini so leki noiti bifo. A sa e wini te den sma foe a grontapoe disi di kisi heileri ben bro den lasti bro. (Teki gersi 1 Korentesma 1:19.) Boiti dati, ala di miljoenmiljoen sma moro e leri èn e doe Gado wani, a sabi foe Jehovah sa foeroe grontapoe so leki a watra e foeroe a se troetroe (Jesaja 11:9). Fa disi abi winimarki srefisrefi gi a libisma famiri di e gi jesi èn a sa regtfardiki Jehovah leki a Soeverein foe hemel nanga grontapoe!
21 A leri foe Jehovah sa abi boen bakapisi èn a sa wini alaten. Joe sa tan go doro foe kisi wini foe en leki wan fajafaja studenti foe a bigi Leriboekoe foe Gado? Joe e libi akroederi bijbel èn e prati den waarheid foe en nanga tra sma? Efoe dati de so, joe kan loekoe go na fesi foe si a heri wini foe a leri foe Gado, foe a glori foe wi Gran Leriman, Soeverein Masra Jehovah.
San joe ben leri?
◻ Sortoe krakti a leri foe Gado kan abi na tapoe wi libi?
◻ Fa a leri foe Jehovah e satisferi den fanowdoe foe gi leri?
◻ Sortoe krakti di e gi winimarki a leri foe Gado kan abi na tapoe wi denki nanga a fasi fa wi e handri?
◻ Fa a leri foe Gado e boeweisi taki a e jepi ini a tori foe a matifasi nanga libisma?
[Prenki na tapoe bladzijde 15]
A leri foe Gado e sori wi fa foe waka nanga Gado, so leki fa Noach ben doe
[Prenki na tapoe bladzijde 17]
Sma foe ala nâsi e lon kon na a bergi foe Jehovah