Gado Wortu bun fu gi leri

1. San na a thema fu a kring konmakandra fu a dienstyari 2014, èn sortu aksi wi o piki na a programa?

¹ Wi „Gran Leriman” Yehovah, man gi leri moro leki iniwan tra sma na hemel nanga grontapu (Yes. 30:20, 21). Ma fa Yehovah e gi wi leri? A gi wi a moro bun buku di de, Bijbel, di sma skrifi nanga yepi fu en santa yeye. Fa a leri fu Gado kan yepi wi fu abi wan bun gosontu, fu abi prisiri, wan krin frustan, èn wan tranga bribi? Na wi kring konmakandra fu a dienstyari 2014 wi sa piki na aksi disi. A thema fu a kring konmakandra na „Gado Wortu bun fu gi leri”, èn a teki puru fu 2 Timoteyus 3:16.

2. Sortu aksi o tyari den moro prenspari penti kon na krin?

² Suku den moro prenspari penti disi: Den moro prenspari penti fu a programa o kon na krin te wi e piki den aksi disi:

• Sortu krakti den leri di wi e kisi fu Gado abi na wi tapu? (Yes. 48:17, 18)

• Efu wi e du muiti fu kenki sani na ini wi libi so taki wi kan du moro gi Yehovah, dan san wi kan de seiker taki wi o kisi? (Mal. 3:10)

• San wi musu du te wi e yere ala sortu ’leri di wi no sabi’? (Hebr. 13:9)

• Fa wi kan gi leri leki ’fa Yesus ben gi leri’? (Mat. 7:28, 29)

• Fu san ede den wan di e gi leri na ini a gemeente, musu leri densrefi tu? (Rom. 2:21)

• Sortu wini wi e kisi fu Gado Wortu? (2 Tim. 3:16)

• Sortu bakapisi a o abi tapu sma te Gado „seki” den pipel? (Hag. 2:6, 7)

• San Yehovah sabi taki wi man du? (Ef. 5:1)

• Fu san ede wi musu du muiti fu tan na ini a leri fu Yehovah? (Luk. 13:24)

3. Fu san ede a prenspari taki wi de na a kring konmakandra èn poti prakseri na a programa di kon na a yoisti ten?

³ Wan tu vers fosi 2 Timoteyus 3:16, di e horibaka gi a thema fu a programa, Paulus ben skrifi taki den lasti dei disi ben o muilek srefisrefi. A skrifi: „Ogri sma nanga bedrigiman o kon ogri moro nanga moro. Den o kori trawan èn trawan o kori den” (2 Tim. 3:13). Fu no meki sma kori wi, dan a de prenspari fu arki èn du den sani di wi leri fu Gado! Fu dati ede a bun fu du ala san wi man fu de na a kring konmakandra èn poti ala wi prakseri na a programa disi di kon na a yoisti ten.