Kibri yu frustan
1. San na a nen fu a kring konmakandra fu a dienstyari 2013, èn fa a programa disi o yepi wi?
1 Yesus ben taigi den disipel fu en fu lobi Yehovah nanga den heri ati, den heri libi, èn nanga den heri frustan (Mat. 22:37, 38). A kongres, a kring konmakandra, nanga a spesrutu dei konmakandra programa seti spesrutu fu yepi wi fu tranga a sma di wi de na inisei. Soleki fa yu sabi, a thema fu a distrikt kongres na „Kibri yu ati!” A programa fu a spesrutu dei konmakandra fu a dienstyari 2013, nen „Kibri yu konsensi”. Den kring konmakandra di o hori nen „Kibri yu frustan”, èn a teki puru fu Mateyus 22:37. A programa disi meki fu yepi ibriwan fu wi fu ondrosuku a denki fu wi so taki Yehovah feni wi bun.
2. Sortu aksi o kisi piki na a kring konmakandra?
2 San wi o leri: Te wi o arki a programa fu a kring konmakandra, dan wi musu luku efu wi kan feni den piki tapu den aksi disi di e sori san na den moro prenspari sani fu a programa:
• San wi kan du fu no denki ’leki fa libisma e denki’?
• Fa wi kan yepi fu puru a duku di e breni a frustan fu sma di no e bribi?
• Sortu denki wi musu abi?
• Sortu wini wi e kisi te wi e denki dipi fu bun sani?
• Fa wi kan meki Yehovah abi krakti na tapu wi denki?
• San masra, wefi, papa, mama, nanga pikin kan du fu abi wan koloku osofamiri libi?
• Fa wi kan sreka wisrefi gi a dei fu Yehovah?
• San a wani taki fu sreka wi frustan fu wroko tranga?
• Sortu wini wi o kisi te wi du san wi leri?
3. Fu san ede a de prenspari taki wi go ala tu dei na a kring konmakandra, taki wi poti ala wi prakseri na a programa, èn taki wi du san wi leri?
3 Satan e feti fu pori wi frustan (2 Kor. 11:3). Fu dati ede wi musu kibri wi frustan so taki wi e plisi Yehovah. Wi musu tan meki muiti fu denki soleki fa Krestes e denki èn wi musu tan meki muiti so taki na ogri grontapu disi no abi krakti na wi tapu (1 Kor. 2:16). Fu dati ede sreka sani so taki yu kan go ala tu dei na a kring konmakandra. Poti ala yu prakseri na a programa. Te wi e du san wi leri drape, dan dati o yepi wi fu sreka wi frustan fu wroko tranga na ini Kownukondre diniwroko.—1 Petr. 1:13.