Njoen kringkonmakandra programa
1 Foe bigin nanga september, a thema foe den kringkonmakandra sa de: „Arki èn leri foe doe san Gado Wortoe e taki.” A thema disi, di gron tapoe Deuteronomium 31:12, 13, e gi wan gron di fiti gi a heri programa foe poti krakti na tapoe sani di wi moesoe leri èn di wi moesoe doe.
2 Ala di moro foeroe sma na ini a ten disi e arki bidrigi wortoe, tokoe a de toemoesi prenspari gi ibriwan foe wi foe arki Gado Wortoe èn foe doe san a e taki (Luk. 11:28; 1 Tim. 4:1). Nanga disi na ini prakseri, a kringkonmakandra programa meki foe gi deki-ati nanga jepi na preikiman, osofamiri, owroeman, nanga pionier. Tapoe satra, wan symposium foe fo pisi sa hori, èn a sa abi leki nen: „Kakafoetoe gi den problema foe wi—Foe di wi e poti prakseri na tapoe Gado Wortoe.” Èn tapoe sonde mamanten, wan symposium sa hori nanga a nen: „Fa den Boekoe foe bijbel e gi wi tranga leri na ini regtfardikifasi.” A heri programa sa gi deki-ati na jejefasi di joe nanga joe osofamiri no moesoe misi.
3 Tapoe satra nanga sonde, praktis rai gi a velddienst sa gi, èn den sa hori demonstrâsi toe. Den sa froeteri ondrofenitori èn pristeri interview di sa gi wi deki-ati èn di sa gi wi leri. So boen, foe di joe de drape èn foe di joe e arki nanga a marki foe doe san joe e leri, meki joe sa de na ini wan moro betre posisi foe doe den komandofoeGadoWortoedorodoro.
4 Wan foe den heimarki foe a kringkonmakandra sa de a teki di njoen brada nanga sisa di gi densrefi abra na Gado, sa teki dopoe. Langa ten bifo den o sori na poebliki taki den gi densrefi abra na Gado, den wan di wani teki dopoe moesoe taki foe disi nanga a fesiman opziener, so taki a kan seti sani foe den owroeman miti nanga den.
5 A poebliki taki gi den kringkonmakandra disi abi leki nen: „Foe san ede bijbel moesoe tiri wi?” Gi den sma di sori belangstelling wan kari foe de drape. Ala di wi e wakti foe kan kisi a deki-ati di wi abi so foeroe fanowdoe, nanga a jepi di wi nanga wi osofamiri sa kisi, sreka sani boen foe de drape gi a heri programa.