Tan na ai èn hori yu frustan na wan
1 Nanga a prakseri taki a toneel fu na grontapu e kenki furutron, dan fa a fiti taki a nen fu a kringkonmakandra fu a dienstyari 1991 de: ’Tan na ai èn hori yu frustan na wan’(1 Tes. 5:6). Den lo kringkonmakandra disi o bigin na ini september. So esi leki wi kringopziener fruteri wi den dei fu a kringkonmakandra, dan wi alamala musu sreka sani fu de drape.
2 Wan fu den heymarki fu a programa o de wan symposium di abi fo pisi, di abi leki marki fu yepi unu „fu hori na ini ala sani wi frustan na wan” (2 Tim. 4:5). Fa wi kan kibri wi srefi now nanga bun bakapisi gi den trapu fu Satan èn kakafutu gi a yeye fu a grontapu, awasi wi ben handri kande takru ini a ten di psa? Sorgu fu no misi den tumusi prenspari bodoi disi. Na ini a tu dei konmakandra den sa poti wi prakseri ala ten tapu praktis rai fu a buku Yongu sma e aksi — Praktis piki. Kande yu sa wani tyari yu eigi buku kon nanga yu. Spesrutu den yonguwan sa wani poti spesrutu prakseri tapu den sani di a kringopziener abi fu taigi den satra. Akruderi a gwenti, dan satra sani sa seti gi a dopu, èn fu dati-ede meki den wan di wani sinbôliser a gi di den gi den srefi abra tapu a kringkonmakandra musu meki a fesiman opziener sabi disi so esi leki a kan.
3 Sonde mamanten wi sa kisi warti les di o de krin fu si nanga yepi fu wan lo demostrâsi di o sori fa wi kan abi winimarki fu gens, èn so srefi fu wi eigi fowtu. Bakadina a distriktsopziener sa hori wan publiki taki fu a tori: „Handri koni ini wan don grontapu”. Ala Kownukondre preikiman nanga sma di abi belangstelling musu du ala muiti fu de drape.
4 Fu di a druk fu a libi e tan gro, meki wi e bribi taki ala sma sa nyanbun èn feni kowru-ati fu a materiaal disi di sreka fu gi wi deki-ati. Wi sa si fa wi kan tan moro ete na ai ini a tori fu wi eigi yeye nowtu, a di fu wi osofamiri nanga a di fu trawan na ini a gemeente. Abi a fasti bosroiti fu de a heri kringkonmakandra drape èn fu tan arki bun na a heri programa, „bika now a frulusu fu wi kon moro krosibei leki di wi ben tron bribiman.” — Rom. 13:11.