Wan kring konmakandra di e yepi wi fu tan du san a yeye fu Gado wani
1. San na wán sani di Yehovah e gi wi fu tan preiki a bun nyunsu?
1 Yehovah e meki wi kon sabi bun furu sani, a e gi wi furu leri, èn a e gi wi a deki-ati di wi abi fanowdu fu teki prati na a wroko di a gi wi fu preiki a bun nyunsu (Mat. 24:14; 2 Tim. 4:17). Wán fu den sani di Yehovah e gi wi fu du dati, na a kring konmakandra di e hori ala yari. A thema fu a nyun programa gi a dienstyari 2010 na: „Tan du san a yeye fu Gado wani”, èn a teki puru fu Romesma 8:5 nanga Yudas 17-19.
2. (a) Na sortu fasi a kring konmakandra o gi wi wini? (b) Fa den kring konmakandra di pasa, yepi yu na ini yu diniwroko?
2 Den wini di wi o kisi: A programa sa sori wi nanga sortu sani wi musu luku bun, soleki sani di o nyan furu fu wi ten èn di o puru wi prakseri na sani di de trutru prenspari. Wi sa leri fu luku bun taki wi no tron sma di e feni taki ala sani bun, èn wi sa go luku san a wani taki fu de wan sma di e du san a yeye fu Gado wani. A symposium fu sonde, o sori wi san ibri sma èn sosrefi ibri osofamiri kan du fu kon abi wan moro tranga bribi aladi sani e kon moro hebi èn aladi wi e kisi hebi tesi tapu wi bribi. A programa sa yepi wi fu kibri wi ati gi den sani fu a grontapu, fu tan abi wan tranga bribi, èn fu tan hori bun na prakseri sortu blesi e wakti den sma di e tan du san a yeye fu Gado wani.
3. O ten a kring konmakandra fu yu o hori, èn san musu de a bosroiti fu yu?
3 Te yu kon sabi kaba o ten èn pe a kring konmakandra o hori, dan yu kan bigin seti sani fu de drape ala den tu dei. Yu kan abi a dyaranti taki Yehovah e blesi den sma di e wroko tranga.—Odo 21:5.
4. San wi o kisi seiker na a kring konmakandra fu wi di e kon?
4 Iya, Yehovah na a Sma di e gi a bun presenti disi. A programa disi di a getrow srafu grupu seti, o de soifri san wi abi fanowdu fu tan du wi wroko leki Kresten. Wi de Yehovah tangi gi ala den seti di a gi wi na wan lobi-ati fasi, fu yepi wi fu „tan fruteri sma fu a howpu fu wi sondro fu degedege”.—Hebr. 10:23-25; Yak. 1:17.