Wan seti gi Kresten futuboi
1. Sortu nyun seti bigin na ini 1938, èn san ben de a marki?
1 Na ini 1938, na organisâsi fu Yehovah bigin nanga wan nyun seti. Difrenti grupu fu gemeente ben kisi wan kari fu go na zone konmakandra, di wi e kari now kring konmakandra. San ben de a marki? Na ini na Informant (now a nen Wi Kownukondre diniwroko) fu yanuari 1939, skrifi: „Den konmakandra disi de wan pisi fu Yehovah en Theokrasia Organisâsi di e sori fa fu du a Kownukondre diniwroko. Den rai di wi e kisi na a konmakandra de tumusi prenspari gi ibri sma, fu di a e sori fa fu du a wroko di den kisi na a yoisti fasi.” Te wi e luku fa a nomru fu Kownukondre preikiman gro fu 58.000 sma na ini 1938 te go miti moro leki 7.000.000 sma na ini 2009, dan a de krin taki den kring konmakandra doro a marki fu den. Iya, den e yepi futuboi fu Gado fu „du a wroko di den kisi”!
2. San na wan tu sani fu a kring konmakandra fu a dienstyari disi?
2 A thema fu a kring konmakandra: A nyun kring konmakandra programa bigin na ini september èn a no de fu taki dati wi wani de drape fu kisi deki-ati fu a programa. A thema na „Unu no de wan pisi fu grontapu”, èn a teki puru fu Yohanes 15:19. San na wan tu fu den lezing di o meki taki Kresten futuboi kisi wini? Tapu satra wi o arki a lezing di nen „Fa a furuten diniwroko e kibri wi?” Wi o abi sosrefi wan symposium di abi dri pisi na ini èn di nen „No meki a denki fu yu kon pori—Luku bun nanga. . . ” „Na ogri meti”, „A bigi huru-uma”, „’Den bisnisman di e waka e seri sani’”. Tapu sonde wi o arki a symposium di nen „No lobi grontapu, ma lobi Yehovah”. Tra lezing na „’Libi na ini a grontapu disi leki sma di kon fu tan wan syatu pisi ten nomo’”, èn „Hori deki-ati! Yu kan wini grontapu”.
3. Sortu wini wi kan kisi te wi de na a kring konmakandra?
3 Wan sisa di no ben e du a diniwroko so fayafaya moro, ben go na wan kring konmakandra èn baka dati a ben skrifi taki a programa ben meki taki a ben luku a situwâsi fu en baka. Disi ben meki taki a bosroiti fu „go na ini a preikiwroko èn fu no suku reide fu no du dati”! A no de fu taki dati a kring konmakandra programa fu a dienstyari disi o yepi wi alamala fu no lobi grontapu, ma fu lobi Yehovah (1 Yoh. 2:15-17). Sorgu taki yu o de drape èn taki yu e arki bun so taki yu kisi wini dorodoro fu a lobi-ati seti disi gi Kresten futuboi!