’Kon, èn tron wan bakaman fu mi’
1. Sortu okasi wi o abi na a Gemeente Bijbelstudie na ini den mun di e kon?
1 Den fo Evangelietori di e taki fu a libi fu Yesus di a ben de na grontapu, e leri wi furu moi sani fu a Manpikin fu Gado. Fu di Kresten musu „waka soifri na en baka”, meki wi musu sreka wisrefi bun èn wi musu poti bun prakseri na den sani di wi o leri te wi o studeri a buku ’Kon, èn tron wan bakaman fu mi’ na a Gemeente Bijbelstudie. Wi o bigin studeri a buku disi na ini a wiki fu 18 oktober (1 Petr. 2:21; Mark. 10:21). Wi o poti prakseri spesrutu na sani di Yesus ben du èn di e gi wi deki-ati na ini a diniwroko.
2. Sortu wini wi e kisi te wi e luku a fasi fa Yesus horidoro?
2 Na eksempre di Yesus gi wi: A pasa kaba wan leisi di yu ben e preiki oso fu oso, taki sma no handri bun nanga yu? Te wi e kisi fu du nanga so wan situwâsi, dan wi o frustan o prenspari den wortu disi de di Yesus ben taki: „Efu den frufolgu mi, dan den o frufolgu unu tu” (Yoh. 15:20). A tru taki te sma no handri bun nanga wi, dan a no ala ten dati wani taki dati den e frufolgu wi. Ma na ini a situwâsi fu Yesus a ben man horidoro di a ben kisi ala sortu tesi nanga problema, fu di a ben prakseri a prisiri di ben wakti en. Wi tu kan du ala muiti fu sorgu taki Yehovah feni wi bun, èn taki a blesi wi fu di wi e tan gi yesi na en. Na so fasi wi no sa „kon weri èn lasi-ati” (Hebr. 12:2, 3; Odo 27:11). Wi kan de seiker taki Krestes Yesus o horibaka gi wi te wi e horidoro na ini a diniwroko.—Mat. 28:20.
3. Fa wi kan abi a srefi denki leki Yesus te a abi fu du nanga a diniwroko?
3 „Na fu disi Gado ben seni mi kon”: A Kownukondre preikiwroko ben de a moro prenspari sani na ini Yesus en libi (Luk. 4:43). A ben du ala san a man na ini a diniwroko. A ben si a diniwroko fu en leki wan prenspari sani, èn ala ten a ben suku okasi fu taki fu a Kownukondre. Fa wi leki bakaman fu Yesus, kan waka baka na eksempre fu en? Te wi e du wi sani na ini na aladei libi, dan wi e miti sma di wi kan fruteri a bun nyunsu? Meki a de so, taki a lobi di Krestes abi e naki wi ati so taki wi e preiki a bun nyunsu so furu leki wi man!—2 Kor. 5:14.
4. Fa wi kan du wi diniwroko moro bun?
4 „Noiti ete wan sma taki leki a man disi”: A fasi fa Yesus ben e gi leri ben meki den arkiman fu en fruwondru srefisrefi (Yoh. 7:46; Mat. 7:28, 29). San ben meki taki a ben difrenti fu tra leriman? A ben lobi den tru tori di a ben e leri sma, a ben lobi den sma di a ben gi leri, èn a ben e gi sma leri na difrenti fasi. Te wi e teki na eksempre fu a Gran Leriman, dan wi o man du wi diniwroko moro bun.—Luk. 6:40.
5. Sortu marki wi musu abi te wi o studeri a buku ’Kon, èn tron wan bakaman fu mi’?
5 Disi na wan tu moi sani di wi e leri te wi e luku a libi fu Yesus. Sortu tra moi sani yu kan leri fu en? Te yu e ondrosuku a libi fu Yesus na a Gemeente Bijbelstudie, dan poti en leki marki fu kon sabi „a lobi fu Krestes”, fu di yu e teki na eksempre fu en na ini den sani di yu e taki èn du.—Ef. 3:19.