„Na fu disi Gado ben seni mi kon”

1-4. (a) Na sortu moi fasi Yesus ben gi wan Samaria uma leri, èn san ben de a bakapisi? (b) Fa den apostel ben denki fu a tori disi?

YESUS nanga den apostel fu en de na pasi omeni yuru kaba. Den e komoto fu Yudea èn den e waka go na Galilea, na a noordsei fu Israel. A moro syatu pasi e teki sowan dri dei, èn a e tyari den pasa Samaria. Na a pisi ten fu twarfu yuru bakadina, den e doro wan pikin foto di nen Sikar, pe den e rostu èn nyan wan sani.

² Te den apostel e go bai nyanyan, dan Yesus e sidon rostu na wan peti dorosei fu a foto. Wan uma e kon drape fu kisi watra. Yesus ben kan bosroiti fu no taki nanga na uma, fu di a ’ben weri fu a waka’ (Yohanes 4:6). A no ben o fruwondru sma efu a ben libi a Samaria uma disi meki a kisi en watra èn gowe sondro fu taigi en wan sani. Soleki fa wi si kaba na ini Kapitel 4 fu a buku disi, dan kande na uma ben o fruwakti taki wan Dyu ben o wisiwasi en. Ma Yesus e bigin taki nanga en.

³ A e bigin a takimakandra nanga wan eksempre di abi fu du nanga wan sani di na uma gwenti du. Iya, a e taki fu wan sani di na uma e du na a momenti dati. Na uma de drape fu kisi watra, èn Yesus e taki nanga en fu watra di o gi en têgo libi. Difrenti leisi na uma e poti aksi di ben kan meki taki den e bigin haritaki.a Na wan koni fasi Yesus no e gi piki tapu den aksi dati, ma a e tan taki fu den sani di a abi na prakseri. A e poti prakseri na Yehovah Gado nanga a tru anbegi. Den sani di Yesus taki abi bun bakapisi, fu di na uma e go fruteri den sma fu a foto den sani dati èn densrefi wani arki Yesus tu.​—Yohanes 4:3-42.

⁴ Te den apostel drai kon baka, dan fa den e feni en taki Yesus e preiki na so wan moi fasi gi na uma? Bijbel no e sori taki den ben breiti. Den e fruwondru srefi taki Yesus e taki nanga na uma disi, èn soleki fa a e sori den no e taki nanga na uma. Baka di na uma gowe, dan den apostel tan begi Yesus fu nyan den sani di den bai. Ma Yesus e taigi den: „Mi abi nyanyan di unu no sabi.” Den disipel e denki taki Yesus e taki fu trutru nyanyan. Dan a e taigi den: „Mi nyanyan na taki mi musu du a wani fu a sma di seni mi kon èn fu klari a wroko fu en” (Yohanes 4:32, 34). Sobun, Yesus e leri den taki a abi wan tumusi prenspari wroko na ini en libi. A wroko dati prenspari moro nyanyan srefi. A wani taki den apostel musu abi a srefi denki dati. San na a wroko disi?

5. San ben de a moro prenspari wroko na ini Yesus en libi? San wi o go luku na ini a kapitel disi?

⁵ Wan leisi Yesus ben taki: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon” (Lukas 4:43). Iya, Gado ben seni Yesus kon fu preiki a bun nyunsu fu Gado Kownukondre èn fu gi sma leri.b Den bakaman fu Yesus na ini a ten disi musu du a srefi wroko. Dati meki a de tumusi prenspari fu go luku fu san ede Yesus ben e preiki, sortu boskopu a ben e preiki, èn fa a ben denki fu a wroko di a ben kisi fu du.

Fu san ede Yesus ben e preiki

6, 7. Fa Yesus wani taki „ibri leriman” musu denki fu a bun nyunsu di a e fruteri trawan? Gi wan eksempre.

⁶ Meki wi go luku fa Yesus ben e denki fu den tru tori di a ben leri sma. Baka dati wi o go luku fa a ben denki fu den sma di a ben gi leri. Yesus gebroiki wan moi agersitori fu sori fa a ben feni en fu fruteri trawan den tru tori di Yehovah ben leri en. A ben taki: „Ibri leriman di e kon sabi sani fu a kownukondre fu hemel, de leki wan man, wan masra fu wan oso, di e puru owru sani nanga nyun sani na ini a maksin fu en” (Mateyus 13:52). Fu san ede a masra fu na oso na ini na agersitori e puru sani na ini en maksin?

⁷ A masra fu na oso no e puru den gudu fu en fu di a wani prodo nanga den, neleki fa Kownu Heskia fu owruten ben du wan leisi, èn a sani disi tyari takru bakapisi kon gi en (2 Kownu 20:13-20). Fu san ede a masra fu na oso e du dati? Luku wan eksempre: Yu e go luku wan lespeki leriman na en oso. A e puru tu brifi na ini wan kasi. Wan fu den brifi gerigeri fu di a owru, èn a trawan no owru so. A ben kisi den brifi disi fu en papa. A wan a kisi wan tu tenti yari pasa di a ben yongu ete, èn a trawan a kisi no so langa pasa. Yu kan si na en fesi taki a breiti trutru te a e fruteri yu fa a lobi den brifi disi, fa den rai na ini den brifi kenki en libi èn fa den kan yepi yu tu. A de krin fu si taki a leriman lobi den brifi disi (Lukas 6:45). A leriman disi no e sori yu den brifi fu di a wani meki bigi, noso fu di a wani kisi wini fu dati, ma a wani yepi yu èn sori yu o furu wini yu kan kisi fu den brifi disi.

8. Sortu bun reide wi abi fu lobi den tru tori di wi e leri na ini Gado Wortu?

⁸ Na fu den srefi reide disi, Yesus, a Bigi Leriman, ben fruteri sma den tru tori fu Gado. Yesus ben si den tru tori disi leki tumusi prenspari sani. A ben lobi den èn a ben angri fu fruteri sma den. A ben wani taki ala den bakaman fu en, iya, „ibri leriman” ben musu abi a srefi denki dati. Fa a de nanga wi? Wi abi bun reide fu lobi ibri tru tori di wi e leri na ini Gado Wortu. Wi lobi den moi tru tori disi, awinsi na sani di wi e bribi langa ten kaba, noso awinsi na sani di wi kon frustan moro bun no so langa pasa. Te wi e taki fayafaya fu den sani disi di wi leri fu Yehovah èn te wi e tan lobi den, dan neleki Yesus, wi e sori taki wi lobi den tru tori dati.

9. (a) Fa Yesus ben denki fu den sma di a ben gi leri? (b) Fa wi kan sori taki wi e broko wi ede nanga sma, neleki fa Yesus ben du dati?

⁹ Yesus ben lobi den sma tu di a ben gi leri, soleki fa wi o si na ini Pisi 3 fu a buku disi. Profeititori ben taki na fesi dati a Mesias ben o „firi sari gi a mofinawan èn gi a pôtiwan” (Psalm 72:13). Iya, Yesus ben lobi sma. A ben wani sabi san ben meki taki sma ben e denki èn tyari densrefi na wan spesrutu fasi. Boiti dati, a ben e broko en ede nanga den hebi di ben kwinsi sma èn den sani di ben meki taki den no man frustan den tru tori di a ben fruteri den (Mateyus 11:28; 16:13; 23:13, 15). Fu eksempre, prakseri a Samaria uma. A no de fu taki dati a ben naki en ati trutru di Yesus sori taki a ben broko en ede nanga en. Fu di Yesus ben man si krin san na a situwâsi fu na uma disi, meki na uma ben man si en leki wan profeiti èn a go fruteri tra sma fu en (Yohanes 4:16-19, 39). A tru taki den bakaman fu Yesus na ini a ten disi no man sabi san de na ini na ati fu den sma di den e preiki gi. Ma neleki Yesus wi kan sori taki wi e broko wi ede nanga sma, te wi e taki nanga den fu sani di e hari den prakseri, fu den problema fu den, èn fu den sani di den abi fanowdu.

A boskopu di Yesus ben e preiki

10, 11. (a) Sortu boskopu Yesus ben e preiki? (b) Fa a du kon taki Gado ben musu seti wan Kownukondre?

¹⁰ Sortu boskopu Yesus ben e preiki? Efu yu ben o ondrosuku den leri fu den difrenti kerki di e taki dati den e bribi na ini Yesus, dan kande yu ben o taki dati Yesus ben e preiki taki wi musu du bun gi trawan. Noso kande yu ben o denki dati a ben wani tyari kenki kon na ini a politiek noso taki a ben si a frulusu fu en leki a moro prenspari sani. Ma soleki fa wi si kaba, dan Yesus ben taki krin: „Mi musu go fruteri a bun nyunsu fu Gado kownukondre.” San dati ben wani taki?

¹¹ Hori na prakseri taki Yesus ben de na ini hemel di Satan ben taki dati Yehovah no abi a reti fu tiri hemel nanga grontapu. A no de fu taki dati a ben hati Yesus srefisrefi fu si fa Satan ben taki ogri-ati lei fu en Tata di ala ten e du san reti! Iya, Satan ben taki dati Gado a no wan bun Tiriman èn taki a e hori bun sani na baka gi den pikin fu en! A no de fu taki dati a ben musu hati Gado en Manpikin fu si taki Adam nanga Eva, di ben o tron papa nanga mama fu ala libisma, bribi a lei fu Satan! A Manpikin fu Gado ben si taki fu di libisma opo densrefi teige Gado, meki dati tyari sondu nanga dede kon gi ala libisma (Romesma 5:12). Ma a ben breiti trutru fu kon sabi taki en Tata ben o seti sani kon bun baka wan dei!

12, 13. Sortu afersi a Kownukondre fu Gado o seti kon bun baka? Fa Yesus sori taki a Kownukondre na a moro prenspari sani na ini en diniwroko?

¹² Ma san ben de a moro prenspari afersi di musu seti kon bun baka? Yehovah nen ben musu kon santa. Iya, a nen fu en ben musu kon krin fu ala den lei di Satan nanga den wan di teki en sei, ben taki fu en. A ben musu kon na krin taki na Yehovah abi a reti fu tiri hemel nanga grontapu. Moro leki iniwan tra sma, Yesus ben frustan den tumusi prenspari afersi disi. Na ini a Wi Tata begi, a ben leri den bakaman fu en fu aksi fosi taki a nen fu en Tata musu kon santa. Baka dati den ben musu aksi taki a Kownukondre fu en Tata musu kon, èn taki a wani fu Gado musu pasa na grontapu (Mateyus 6:9, 10). Heri esi Gado Kownukondre, nanga Krestes Yesus leki Tiriman, o pori a kruka sistema fu Satan èn a bun tiri fu Yehovah o tan fu ala ten.​—Danièl 2:44.

¹³ A Kownukondre dati ben de a moro prenspari sani di Yesus ben taki fu en na ini en diniwroko. Ala den sani di a ben taki èn du ben sori krin san na a Kownukondre dati. Boiti dati, den ben sori fa a Kownukondre o meki den sani di Yehovah abi na prakseri, kon tru. Yesus no ben meki noti puru en prakseri na a moro prenspari wroko fu en, èn dati na fu preiki a bun nyunsu fu Gado Kownukondre. Na ini a ten fu Yesus, problema ben de na ini a libimakandra, èn furu kruktudu ben de. Ma toku Yesus ben poti prakseri na a boskopu fu en èn a wroko di a ben musu du. Disi ben wani taki dati Yesus no ben e broko en ede nanga nowan tra sani? A ben e taigi sma den srefi sani ibri tron baka, sondro taki a ben du muiti fu hari den prakseri? Dati no de so kwetikweti!

14, 15. (a) Fa Yesus sori taki a „bigi moro Salomo”? (b) Fa wi kan teki na eksempre fu Yesus te a abi fu du nanga a boskopu di wi e preiki?

¹⁴ Soleki fa wi o si na ini a heri pisi disi, Yesus ben e hari sma prakseri nanga den sani di a ben leri den èn a ben e taki fu difrenti sani. A ben e doro na ati fu sma. Kande dati e meki wi prakseri a koni Kownu Salomo, di ben e suku switi wortu, nanga yoisti wortu di tru, so taki a ben kan skrifi soifri san Yehovah ben taigi en (Preikiman 12:10). Yehovah ben meki taki a man dati di ben abi sondu „ben man si a fini fu iniwan tori”, èn fu dati ede a ben man taki fu furu sani, iya, a ben taki fu fowru, fisi, bon èn fu meti. Sma ben komoto fu farawe, fu kon yere san Salomo ben e taki (1 Kownu 4:29-34). Toku Yesus ben „bigi moro Salomo” (Mateyus 12:42). A ben koni moro en èn a „ben man si a fini fu iniwan tori”, moro krin. Te Yesus ben e gi leri, dan a ben e gebroiki a bigi sabi di a ben abi fu Gado Wortu, fu taki nanga sma. Boiti dati, a ben e taki fu fowru, meti, fisi, gronwroko, fu a weer, fu sani di ben e pasa, fu owruten tori, èn fu a situwâsi na ini a libimakandra. Na a srefi ten, Yesus noiti no ben e meki bigi nanga a sabi fu en fu sori sma o kefalek a de. A boskopu fu en ben de krin fu frustan. A no e fruwondru wi taki sma ben e arki Yesus nanga prisiri!​—Markus 12:37; Lukas 19:48.

¹⁵ Kresten na ini a ten disi e pruberi fu teki na eksempre fu Yesus. Wi no abi a bigi koni nanga sabi fu Yesus, ma wi alamala abi pikinso sabi nanga ondrofeni, di wi kan gebroiki te wi e taki nanga trawan fu den tru tori na ini Gado Wortu. Fu eksempre, papa nanga mama di kweki pikin, kan gebroiki na ondrofeni dati fu sori fa Yehovah lobi den pikin fu En. Trawan kan gebroiki eksempre noso agersitori fu den grontapuwroko, fu skoro, fu na ondrofeni di den abi nanga sma, èn fu a sabi di den abi fu sani di e pasa. Na a srefi ten wi e sorgu taki wi no e meki noti puru a prakseri fu sma na a boskopu fu wi, namku a bun nyunsu fu Gado Kownukondre.​—1 Timoteyus 4:16.

A fasi fa Yesus ben e denki fu a diniwroko fu en

16, 17. (a) Fa Yesus ben e denki fu a diniwroko fu en? (b) Fa Yesus sori taki a diniwroko fu en ben de a moro prenspari sani na ini en libi?

¹⁶ Yesus ben e si a diniwroko fu en leki wan warti gudu. A ben e prisiri fu yepi sma fu kon si en hemel Tata soleki fa a de trutru. A no ben e bruya den nanga den leri èn nanga den gwenti fu libisma, di ben meki taki sma no man kon sabi soifri fa Gado de trutru. Yesus ben lobi fu yepi sma fu kon abi wan bun matifasi nanga Yehovah èn fu kon abi a howpu fu libi fu têgo. A ben e prisiri fu fruteri sma a bun nyunsu di e gi trowstu nanga prisiri. Fa a ben e du dati? Poti prakseri na dri fasi fa a ben e du dati.

¹⁷ A fosiwan na taki Yesus ben meki a diniwroko fu en de a moro prenspari sani na ini en libi. Fu taki fu a Kownukondre ben de wan sani di a ben lobi srefisrefi, a ben de a moro prenspari wroko na ini en libi, èn a moro prenspari sani nanga san a ben e broko en ede. Fu dati ede, soleki fa wi ben si na ini Kapitel 5, dan a ben de wan koni sani taki Yesus libi soso nanga den sani di a abi trutru fanowdu. Neleki fa a ben e taigi trawan fu du, na so ensrefi ben e tan poti prakseri na sani di de moro prenspari. A no ben abi furu sani di a ben o abi fu pai gi, fu sorgu gi, noso fu meki baka te den broko. Iya, den sortu sani dati no ben e puru en prakseri na san de moro prenspari. A ben e libi soso nanga den sani di de trutru fanowdu, so taki noti no puru en prakseri na en diniwroko, sondro taki dati ben de fanowdu.​—Mateyus 6:22; 8:20.

18. Na sortu fasi Yesus ben du ala san a man na ini en diniwroko?

¹⁸ A di fu tu sani na taki Yesus ben e du ala san a man na ini en diniwroko. A ben e teki furu fu en krakti fu du a diniwroko. A ben e waka hondrohondro kilometer na ini heri Palestina fu suku sma di a ben kan fruteri a bun nyunsu. A ben e taki nanga den na ini den oso, na den pren, na wowoyo, èn na ala presi pe a ben e miti den. Yesus ben taki nanga sma srefi te a ben musu rostu, nyan, dringi, noso te a ben musu de nanga den bun mati fu en fu meki prisiri. A ben tan fruteri trawan a bun nyunsu fu Gado Kownukondre, srefi leti bifo a dede!​—Lukas 23:39-43.

19, 20. Fa Yesus sori taki a de tranga fanowdu fu du a preikiwroko?

¹⁹ A di fu dri sani na taki Yesus ben si a diniwroko fu en leki wan sani di de tranga fanowdu. Prakseri a takimakandra fu en nanga a Samaria uma na a peti na dorosei fu a foto Sikar. Soleki fa a sori, dan den apostel fu Yesus no ben si taki a ben de fanowdu na a momenti dati fu fruteri trawan a bun nyunsu. Yesus ben taigi den: „A no tru taki unu e taki dati fo mun de ete fosi a kotiwroko o bigin? Luku! Mi e taigi unu: Opo un ai luku den gron, dan unu o si taki a nyanyan lepi kaba fu koti.”​—Yohanes 4:35.

²⁰ Di Yesus gebroiki na agersitori dati, dan a ben de a pisi fu a yari pe nyanyan ben e lepi. Soleki fa a sori, dan dati ben de a mun Kislef (november/december). A ben o teki ete fo mun fosi den ben o bigin koti a nyanyan, èn dati ben o de na a ten fu a Paskafesa, tapu 14 Nisan. Sobun, den gronman no ben e si taki a de tranga fanowdu na a momenti dati fu du a kotiwroko. Den ben abi nofo ten ete. Ma fa a ben de nanga a kotiwroko na agersifasi? Furu sma ben de klariklari fu arki, fu teki leri, fu tron disipel fu Krestes èn fu kisi a moi howpu di Yehovah gi den. A ben de neleki Yesus ben man luku pasa den agersi gron dati èn si taki den ben weti nanga lepi tarwe di a winti e wai go-kon, èn dati ben e sori taki a ten doro fu du a kotiwroko.c A ten ben doro, èn a wroko ben musu du wantewante! Fu dati ede, di den sma fu wan foto ben pruberi fu meki Yesus tan drape nanga den, dan a taki: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon.”​—Lukas 4:43.

21. Fa wi kan teki na eksempre fu Yesus?

²¹ Wi kan teki na eksempre fu Yesus na ini ala den dri fasi di wi luku didyonsro. Wi kan meki a Kresten diniwroko tron a moro prenspari sani na ini wi libi. Srefi efu wi abi frantwortu fu di wi abi wan osofamiri noso wan grontapuwroko, toku wi kan sori taki wi e poti a diniwroko na a fosi presi na ini wi libi. Wi kan du dati te wi e teki prati na a diniwroko doronomo, neleki fa Yesus ben du dati (Mateyus 6:33; 1 Timoteyus 5:8). Wi kan du ala san wi man na ini a diniwroko, te wi e gi furu fu wi ten, wi krakti nanga den gudu di wi abi fu horibaka gi a wroko disi (Lukas 13:24). Èn ala ten wi kan hori na prakseri taki a de tumusi prenspari fu du a preikiwroko nownowde (2 Timoteyus 4:2). Wi musu preiki na ibri okasi di wi kisi!

22. San wi o go luku na ini a tra kapitel?

²² Yesus ben sori tu taki a ben si o prenspari a wroko de, èn fu dati ede a sorgu taki a wroko ben o tan go doro baka a dede fu en. A gi den bakaman fu en a komando fu preiki èn fu gi sma leri. Na ini a tra kapitel wi o go luku a tori dati.