„Tron wan bakaman fu mi”​—San Yesus ben wani taki nanga dati?

1, 2. San na a moro prenspari kari di wan sma kan kisi, èn san wi kan aksi wisrefi?

SAN na a moro moi kari di yu ben kisi? Kande yu e prakseri wan leisi di yu ben kisi wan kari gi wan spesrutu okasi, soleki wan trow-oso fu tu sma di yu lobi srefisrefi. Noso yu e prakseri a dei di yu kisi a kari fu bigin du wan prenspari wroko. Efu yu ben kisi wan fu den kari disi, dan yu ben breiti srefisrefi, a no so? Ma fu taki en leti, yu kisi wan moro prenspari kari. Ibriwan fu wi kisi a kari dati. A fasi fa wi o handri o abi furu krakti tapu wi. Disi na a moro prenspari bosroiti di wi o teki na ini a libi.

² San na a kari dati? Wi e kisi a kari disi fu Yesus Krestes, a wan-enkri Manpikin fu na Almakti Gado, Yehovah. A kari disi skrifi na ini Bijbel na Markus 10:21, pe wi e leisi den wortu disi fu Yesus: „Kon nanga mi èn tron wan bakaman fu mi.” Fu taki en leti, Yesus e gi ibriwan fu wi a kari disi. A ben o bun fu aksi wisrefi: ’San mi o du nanga a kari disi?’ Kande yu e prakseri: ’Suma no ben o teki so wan moi kari?’ Ma toku a de so taki furu sma no wani teki a kari disi. Fu san ede?

3, 4. (a) Fu san ede sma ben o wani de leki a man di ben aksi Yesus san a musu du fu kisi têgo libi? (b) Sortu bun fasi Yesus ben si kande na a yongu gudu tiriman disi?

³ Luku fu eksempre a tori fu wan man di ben kisi a kari disi sowan 2000 yari pasa. Sma ben abi furu lespeki gi a man disi. Furu sma ben wani de leki en, fu di a ben yongu, a ben gudu, èn a ben abi makti. Iya, den dri sani disi na prenspari sani gi sma. Bijbel e kari en wan „yonkuman” di ben „gudu srefisrefi” èn di ben de wan „tiriman” (Mateyus 19:20; Lukas 18:18, 23). Ma a yonkuman disi ben abi wan tra sani di ben de moro prenspari. A ben yere fu a Bigi Leriman, Yesus, èn a ben lobi den sani di a yere.

⁴ Furu fu den tiriman na ini a ten dati, no ben gi Yesus a grani di a ben musu kisi (Yohanes 7:48; 12:42). Ma a tiriman disi ben de tra fasi. Bijbel e fruteri wi: „Di [Yesus] ben de na pasi e gowe, wan man lon kon na en, a saka kindi na fesi Yesus èn a aksi en: ’Bun Leriman, san mi musu du fu kisi têgo libi?’” (Markus 10:17) Luku fa a man disi ben de nomonomo fu taki nanga Yesus. A ben lon go na Yesus aladi furu sma ben de drape, iya, a ben handri leki den pôtisma noso den sma di no ben de so prenspari. Boiti dati, a saka kindi na fesi Krestes na wan lespeki fasi. Sobun, a ben abi sakafasi èn a ben frustan taki a musu du moro fu kon abi wan bun matifasi nanga Gado. Yesus ben abi warderi gi sma di ben abi den sortu bun fasi disi (Mateyus 5:3; 18:4). Fu dati ede, wi kan frustan taki „Yesus luku a man, [èn] a kon firi lobi gi en” (Markus 10:21). Fa Yesus piki na aksi fu a yonkuman disi?

Wan tumusi prenspari kari

5. San Yesus piki a yongu gudu man, èn fa wi du sabi taki Yesus no ben wani taki a man disi ben musu tron wan pôtisma? (Luku sosrefi san skrifi na ondrosei fu a bladzijde.)

⁵ Yesus ben sori taki en Tata ben meki sma kon sabi kaba san den musu du fu kisi têgo libi. Yesus ben sori go na den Santa Buku, èn a yonkuman ben taigi en taki a ben e du ala sani di skrifi na ini a Wet di Gado gi Moses. Ma Yesus, di ben sabi heri bun fa sma e denki, ben man si san de trutru na ini a man disi en ati (Yohanes 2:25). Yesus ben si taki a tiriman disi ben abi wan seryusu problema di ben abi krakti tapu a matifasi di a abi nanga Gado. Fu dati ede, Yesus taki: „Wan sani de ete di yu no e du.” San ben de a sani dati? Yesus taki: „Go seri den sani di yu abi èn prati a moni gi den pôtisma” (Markus 10:21). Yesus ben wani taki dati wan sma musu pôti fu man dini Gado? Nôno.a Krestes ben taki fu wan moro prenspari sani.

6. Sortu kari Yesus ben gi a gudu yongu tiriman, èn fa a sani di a du sori san ben de na ini en ati?

⁶ Fu di Yesus ben wani sori a man taki a ben musu du ete wan sani, meki a gi en wan moi okasi. Yesus taigi en: „Kon nanga mi èn tron wan bakaman fu mi.” Prakseri a sani disi, a Manpikin fu a Moro Hei Gado, taki langalanga nanga a man dati èn a gi en wan kari fu waka na en baka! Yesus ben pramisi a man tu taki a ben o kisi wan kefalek bigi blesi. Yesus ben taki: „Yu sa kisi wan gudu na hemel.” A gudu yongu tiriman disi ben teki a tumusi moi kari disi wantewante? A tori e taki: „A man ben firi sari di a yere san Yesus taki, èn a gowe nanga bigi sari, bika a ben abi furu gudu” (Markus 10:21, 22). Sobun, den wortu disi di a man no ben fruwakti fu Yesus, ben tyari kon na krin san ben de na ini na ati fu en. A ben lobi den gudu fu en tumusi, èn a no de fu taki dati a ben lobi a makti nanga a barinen di a ben kisi. A de wan sari sani taki a ben lobi den sani disi moro Krestes. Sobun, a sani di a ben musu du ete, na taki a ben musu lobi Yesus nanga Yehovah nanga en heri ati, èn a ben musu de klariklari fu du iniwan sani fu sori taki a lobi den. Fu di a yonkuman disi no ben abi a lobi dati, meki a no teki a tumusi prenspari kari disi! Ma, san a kari disi abi fu du nanga yu?

7. Fu san ede wi kan de seiker taki a kari fu Yesus, abi fu du tu nanga wi na ini a ten disi?

⁷ A kari di Yesus ben gi no ben de gi a man dati wawan, èn a no ben de sosrefi gi wan tu sma nomo. Yesus ben taki: „Efu wan sma wani kon na mi baka, dan . . . meki a tan waka na mi baka” (Lukas 9:23). Luku taki iniwan sma di „wani”, kan tron wan bakaman fu Krestes. Gado e hari den sortu reti-ati sma disi kon na en Manpikin (Yohanes 6:44). A no den gudusma wawan, den pôtisma, den sma fu wan spesrutu ras noso pipel, noso den sma di ben e libi na ini a ten dati, kisi a kari disi. Ma na ala sma e kisi na okasi fu teki a kari fu Yesus. Sobun, di Yesus taki „kon nanga mi èn tron wan bakaman fu mi”, dan dati abi fu du nanga yu tu. Fu san ede yu musu wani waka baka Krestes? San a wani taki fu waka baka en?

Fu san ede wi musu waka baka Krestes?

8. San ala libisma abi fanowdu, èn fu san ede?

⁸ Wi alamala musu agri nanga a sani disi: Wi leki libisma abi wan bun tiriman fanowdu. Aladi a no ala sma e agri nanga a sani disi, toku dati de so. Yeremia, a profeiti fu Yehovah, ben skrifi a prenspari tru tori disi: „Mi sabi heri bun, o Yehovah, taki a no de na libisma fu luku gi ensrefi sortu pasi a wani teki. A no de na wan libisma di e waka srefi fu taki pe a wani poti en futu” (Yeremia 10:23). Libisma no man tiri densrefi èn den no abi a reti fu du dati tu. Iya, na ini a heri historia wi si taki sma no ben tiri bun (Preikiman 8:9). Na ini a ten fu Yesus, den tiriman ben e pina a pipel, den ben handri na wan ogri-ati fasi nanga den, èn den ben kori den. Yesus ben taki soifri fa a situwâsi fu a pipel ben de, di a taki dati den „de leki skapu di no abi wan skapuman” (Markus 6:34). A srefi sani dati e pasa na ini a ten disi. Leki grupu èn sosrefi ibriwan fu wi, abi wan tiriman fanowdu di wi kan frutrow èn lespeki. Yesus na so wan tiriman? Iya. Luku wan tu sani di e sori dati.

9. Fu san ede Yesus no de leki den tra tiriman?

⁹ A fosi sani, na taki Yehovah Gado ben teki Yesus fu de tiriman. Furu libisma tiriman e kon na a makti, fu di tra sondu libisma di no man krutu sani bun, poti den drape. Nofo tron den tiriman disi e kori den sma tu. Yesus na wan tra sortu tiriman. A nen di a abi e sori dati krin. A wortu „Krestes” èn sosrefi a wortu „Mesias”, wani taki „Salfuwan”. Iya, Yesus ben salfu, noso a ben kisi wan spesrutu wroko fu du. A sma di gi en a wroko dati na A Moro Hei Masra fu hemel nanga grontapu. Yehovah Gado ben taki disi fu en Manpikin: „Luku! En na a sma di mi teki leki mi futuboi, mi lobiwan, a wan di mi feni bun! Mi sa poti mi yeye na en tapu” (Mateyus 12:18). Wi Mekiman na a moro bun sma di sabi sortu tiriman wi abi fanowdu. Yehovah koni pasa marki, èn fu dati ede wi kan abi a frutrow taki a teki wan bun tiriman gi wi.​—Odo 3:5, 6.

10. Fu san ede na eksempre fu Yesus na a moro bunwan di libisma kan waka na baka?

¹⁰ A di fu tu sani, na taki Yesus gi a moro bun eksempre di e gi wi deki-ati fu waka na en baka. A moro bun tiriman, abi moi fasi di den borgu lobi èn di den kan waka na baka. A e tiri den nanga na eksempre fu en, di e gi den borgu deki-ati fu tron moro bun sma. Sortu moi fasi yu ben o wani taki wan tiriman abi? Yu wani taki a abi deki-ati, taki a koni, noso taki a abi sari-ati? Fa yu e denki fu a fasi fa a e horidoro na ini muilek situwâsi? Te yu e ondrosuku fa Yesus ben e libi na grontapu, dan yu sa kon si taki a ben abi den fasi dati, èn a ben abi tra moi fasi tu. Yesus ben sori den fasi fu Gado dorodoro. Na ala fasi a ben sori taki a no abi nowan enkri sondu. Sobun, a gi wi wan eksempre na ini ala san a ben du, na ini ala san a ben taki, èn na ini ala firi di a ben sori. Bijbel e taki dati a gi wi ’wan eksempre, so taki wi kan waka soifri na en baka’.​—1 Petrus 2:21.

11. Fa Yesus sori taki en na „a tumusi bun skapuman”?

¹¹ A di fu dri sani, na taki Krestes ben libi trutru soleki fa ensrefi taki: „Mi na a tumusi bun skapuman” (Yohanes 10:14). Sma na ini Bijbel ten ben sabi san dati wani taki. Skapuman ben e wroko tranga fu sorgu gi den skapu di den ben musu luku. Wan „bun skapuman” e du ala san a man so taki sani waka bun nanga den skapu fu en, srefi efu ogri ben kan miti en. Fu eksempre, David, wan afo fu Yesus, ben de wan skapuman di a ben yongu. Moro leki wán leisi, a feti nanga ogri meti fu man kibri en skapu. A du dati aladi a ben kan lasi en libi (1 Samuel 17:34-36). Yesus ben du moro leki dati gi den bakaman fu en. A dede gi den (Yohanes 10:15). Omeni tiriman de klariklari fu du so wan sani gi den borgu fu den?

12, 13. (a) Na sortu fasi wan skapuman sabi den skapu fu en, èn na sortu fasi den skapu sabi a skapuman fu den? (b) Fu san ede yu wani taki a Tumusi Bun Skapuman tiri yu?

¹² Yesus ben de „a tumusi bun skapuman” na wan tra fasi tu. A ben taki: „Mi sabi mi skapu èn mi skapu sabi mi” (Yohanes 10:14). Prakseri san Yesus ben wani taki nanga dati. Wan sma kan si wan ipi skapu leki wan grupu meti nomo. Ma wan skapuman sabi ibriwan fu den skapu fu en. A sabi sortuwan fu den umaskapu o abi yepi fanowdu te a o meki pikin, a sabi sortu pikin skapu a musu opo fu di den yongu noso swaki tumusi fu waka fara, èn a sabi sortu skapu siki noso kisi mankeri. Den skapu sabi den skapuman tu. Den sabi a sten fu den skapuman, èn noiti den e meki a sten fu wan tra skapuman kori den. Den skapu e arki wantewante te den e yere na a sten fu den skapuman taki wan ogri kan miti den. Pe a e tyari den go, na drape den e go tu. A sabi soifri pe a musu tyari den skapu go. A sabi pe a grasi fatu, pe krin watra de, èn na sortu weigron ogri no o miti den. Te a skapuman e luku den skapu, dan den skapu e firi taki ogri no o miti den.​—Psalm 23.

¹³ Yu no ben sa wani abi so wan tiriman? Nowan tiriman man handri soleki fa a Tumusi Bun Skapuman e handri nanga den bakaman fu en. A pramisi fu tiri yu, so taki yu kan abi wan koloku libi now èn fu têgo! (Yohanes 10:10, 11; Openbaring 7:16, 17) Fu dati ede wi musu kon sabi san a wani taki fu waka baka Krestes.

San a wani taki fu waka baka Krestes

14, 15. Efu wan sma wani de wan bakaman fu Krestes, dan fu san ede a no nofo fu taki dati en na wan Kresten noso fu taki dati a lobi Yesus?

¹⁴ Milyunmilyun sma na ini a ten disi, feni taki den teki a kari fu Krestes. Fu taki en leti, den e kari densrefi Kresten. Kande den de fu a kerki pe den papa nanga mama dopu den. Noso den e taki dati den lobi Yesus èn taki den teki en leki den Frulusuman. Ma na dati e meki taki den na bakaman fu Krestes? Na dati Yesus ben abi na prakseri di a gi wi a kari fu tron en bakaman? Moro de ini a tori.

¹⁵ Prakseri den kondre pe pikinmoro ala sma e taki dati den na bakaman fu Krestes. Den sma disi e du san Yesus Krestes leri? Noso a de so taki na ini den kondre dati sma abi bita-ati gi makandra, den e pina trawan, den e du ogri, den no e du san reti, neleki fa a de na ini tra kondre na grontapu? A lespeki Hindu fesiman Mohandas Gandhi, ben taki wan leisi: „Boiti Yesus, mi no sabi nowan tra sma di du so furu gi libisma. Fu taki en leti, a fowtu no de na a Kresten bribi.” A ben taki tu: „A problema de na unu, leki Kresten. Unu no e libi kwetikweti soleki fa unu e leri.”

16, 17. San den sma di e kari densrefi Kresten no e du nofo tron? San e sori taki wan sma na wan tru bakaman fu Krestes?

¹⁶ Yesus ben taki dati den tru bakaman fu en, no ben o taki nomo dati den e waka na en baka, ma san de moro prenspari na taki den ben o du san Yesus taki. Fu eksempre a ben taki: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini” (Mateyus 7:21). Fu san ede furu sma di e taki dati Yesus na den Masra, no e du a wani fu en Tata? Memre a gudu yongu tiriman. Nofo tron, a sani di den sma di e kari densrefi Kresten no e du, na disi: Den no e sori nanga den heri ati taki den lobi Yesus nanga a Sma di seni en kon.

¹⁷ Fa dati du kon? Milyunmilyun sma di e taki dati den na Kresten e taki tu dati den lobi Krestes, a no so? Iya, na so den e taki. Ma a no nofo fu taki nomo dati wi lobi Yesus nanga Yehovah. Yesus ben taki: „Efu wan sma lobi mi, dan a o du san mi taki” (Yohanes 14:23). Leki wan skapuman, Yesus e taki tu: „Mi skapu e arki mi sten; mi sabi den èn den e waka na mi baka” (Yohanes 10:27). Iya, a no den sani di wi e taki noso e firi e sori taki wi lobi Krestes, ma san de moro prenspari, na den sani di wi e du.

18, 19. (a) Sortu krakti a musu abi tapu wi te wi e leri sabi Yesus? (b) Fu san ede a buku disi meki, èn fa a sa yepi den sma di e si densrefi bun langa kaba leki bakaman fu Krestes?

¹⁸ Ma den sani di wi e du no e kon fu densrefi. Den sani dati e sori sortu sma wi de trutru, noso fa wi ati de. Na drape wi musu bigin tyari kenki kon. Yesus ben taki: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Te wi e leri sabi Yesus trutru, èn te wi e denki dipi fu den sani di wi leri, dan dati sa abi krakti tapu wi ati. Wi sa kon lobi en moro nanga moro, èn wi o wani waka na en baka, ibri dei.

¹⁹ A buku disi meki fu yepi wi du dati. A buku disi a no fu taki finifini fu a libi nanga a diniwroko fu Yesus, ma na fu yepi wi fu si moro krin fa wi kan waka na en baka.b A meki fu yepi wi fu ondrosuku wisrefi nanga yepi fu Bijbel, èn fu aksi wisrefi: ’Mi e waka trutru baka Yesus?’ (Yakobus 1:23-25) Kande yu e si yusrefi bun langa kaba, leki wan skapu di e waka baka a Tumusi Bun Skapuman. Ma a no de fu taki dati wi alamala kan tron moro bun sma, a no so? Bijbel e gi wi a deki-ati disi: „Tan ondrosuku efu unu de na bribi; tan buweisi sortu sma unu de” (2 Korentesma 13:5). A no de fu soso te wi e du muiti fu sorgu taki trutru wi e waka baka Yesus, wi Tumusi Bun Skapuman di lobi wi, èn di Yehovah srefi poti fu tiri wi.

20. San wi sa go luku na ini a tra kapitel?

²⁰ Meki a de so taki a lobi di yu abi gi Yesus èn gi Yehovah, kon moro tranga te yu e studeri a buku disi. Te yu abi a lobi disi, dan yu o kon abi wan korostu firi èn yu o de koloku na ini na owru grontapu disi. Boiti dati, yu sa prèise Yehovah fu têgo, fu di a gi wi a Tumusi Bun Skapuman. A no de fu taki dati te wi o ondrosuku fa Krestes ben e libi, dan wi musu kon sabi soifri sortu frantwortu a abi fu meki a wani fu Yehovah kon tru. Fu dati ede, a fiti fu go luku dati na ini kapitel 2.