„A pasi, a waarheid nanga a libi”

1, 2. Fu san ede wisrefi noiti no ben o man go na Yehovah, èn san Yesus Krestes du fu yepi wi ini a tori dati?

A PASA wan leisi kaba taki yu lasi pasi? Kande yu e prakseri a leisi di yu ben o go luku wan mati noso wan famiriman èn yu no ben man feni a pasi. Di yu ben rèi na ini wan pasi di yu no sabi, dan yu stop fu aksi wan sma sortu pasi yu musu teki? Prakseri fa yu ben o feni en efu a sma no taigi yu nomo pe yu musu rèi, ma a taki: „Rèi na mi baka, dan mi o tyari yu go drape.” A no de fu taki dati yu ben o breiti fu di a sma dati du yu wan bun!

² Te yu luku en bun, Yesus Krestes du wan srefi sortu sani gi wi. Wisrefi noiti no ben o man kon na Gado. Fu di libisma abi sondu, meki den lasi pasi, iya, „den no man kisi a libi di Gado e gi” (Efeisesma 4:17, 18). Wan sma musu sori wi a pasi. Yesus, a bun Eksempre fu wi, no e gi wi rai nomo, èn a no e taigi wi nomo san wi musu du, ma a e du moro. Soleki fa wi ben si na ini Kapitel 1, dan Yesus e gi wi a kari disi: „Kon nanga mi èn tron wan bakaman fu mi” (Markus 10:21). A e sori wi tu fu san ede a de tranga fanowdu fu teki a kari dati. Wan leisi Yesus ben taki: „Mi na a pasi, a waarheid nanga a libi. Nowan sma kan kon na a Tata, efu mi no yepi en” (Yohanes 14:6). Meki wi luku fu san ede a de so taki nanga yepi fu a Manpikin wawan, wi kan go na a Tata. Nanga den sani dati na prakseri wi sa luku na sortu fasi Yesus trutru na „a pasi, a waarheid nanga a libi”.

Yesus abi wan tumusi prenspari frantwortu fu meki a wani fu Yehovah kon tru

3. Fu san ede wi kan go na Gado nanga yepi fu Yesus?

³ A moro prenspari reide fu san ede wi kan go na Gado nanga yepi fu Yesus, na fu di Yehovah feni en Manpikin bun fu tyari a moro prenspari frantwortu disi.a A Tata poti en Manpikin leki a moro prenspari sma fu meki a wani fu En kon tru (2 Korentesma 1:20; Kolosesma 1:18-20). Fu man frustan a tumusi prenspari frantwortu fu a Manpikin, wi musu luku san ben pasa na ini a dyari fu Eden, pe a fosi libisma paar ben teki a sei fu Satan di a opo ensrefi teige Yehovah.​—Genesis 2:16, 17; 3:1-6.

4. Sortu aksi opo kon di sma opo densrefi teige Yehovah na ini Eden, èn san Yehovah bosroiti fu du fu lusu a problema disi?

⁴ Di sma opo densrefi na ini Eden, dan wan tumusi prenspari aksi opo kon di abi fu du nanga ala den sani di Gado meki. Na aksi dati na: Yehovah Gado e tiri den sani di a meki na wan yoisti fasi? Fu gi piki tapu na aksi disi, Yehovah bosroiti fu seni wan yeye manpikin fu en di no abi sondu, kon na grontapu. A manpikin disi ben o abi fu du wan tumusi prenspari sani. A ben o gi en libi fu sori taki na Yehovah abi a reti fu tiri ala sani, èn fu pai wan lusu-paiman fu frulusu libisma. A manpikin disi ben o abi fu tan gi yesi na Gado te na dede, fu lusu ala den problema di kon fu di Satan opo ensrefi teige Gado (Hebrewsma 2:14, 15; 1 Yohanes 3:8). Ma Yehovah abi milyunmilyun yeye manpikin di no abi sondu (Danièl 7:9, 10). Sortuwan fu den a teki fu tyari a moro prenspari frantwortu disi? Yehovah teki a „wan-enkri Manpikin” di ensrefi meki, èn di sma kon sabi bakaten leki Yesus Krestes.​—Yohanes 3:16.

5, 6. Fa Yehovah sori taki a abi frutrow na ini en Manpikin, èn fu san ede a e frutrow en so?

⁵ Wi musu fruwondru taki Yehovah teki a Manpikin dati? Nôno, kwetikweti! A Tata abi ala frutrow na ini en wan-enkri Manpikin. Hondrohondro yari fosi a Manpikin kon na grontapu, Yehovah ben taki na fesi dati a Manpikin disi ben o tan gi yesi na en, aladi a ben o nyan pina na difrenti fasi (Yesaya 53:3-7, 10-12; Tori fu den Apostel 8:32-35). Poti prakseri na a tori disi. Neleki ala tra engel nanga libisma, a Manpikin kan teki en eigi bosroiti. Ma toku, Yehovah ben abi so wan frutrow na ini a Manpikin fu en, taki a ben taki dati a ben o tan gi yesi na en. Fu san ede Yehovah e frutrow en Manpikin so? Na fu di a sabi en. Yehovah sabi en Manpikin dorodoro èn a sabi taki ala ten en Manpikin wani plisi En (Yohanes 8:29; 14:31). A Manpikin lobi en Tata, èn Yehovah lobi en Manpikin tu (Yohanes 3:35). A Tata nanga a Manpikin abi so wan tranga lobi gi makandra, taki noti no kan prati a matifasi fu den èn noti no kan pori a frutrow di den abi na ini makandra.​—Kolosesma 3:14.

⁶ Te wi e luku a prenspari frantwortu di a Manpikin abi, a frutrow di en Tata abi na ini en, èn a tranga lobi di den abi gi makandra, dan a no e fruwondru wi taki wi kan go na Gado nanga yepi fu Yesus wawan. Ma wan tra reide de fu san ede a Manpikin wawan kan meki taki wi go na a Tata.

A Manpikin wawan sabi a Tata trutru

7, 8. Fu san ede Yesus ben man taki nanga leti taki nowan sma sabi a Tata trutru, „boiti a Manpikin”?

⁷ Wi musu du wan tu sani efu wi wani go na Yehovah (Psalm 15:1-5). Boiti a Manpikin, suma sabi moro bun san wi musu du fu Gado feni wi bun èn fu kisi a bun-ati fu En? Yesus ben taki: „Mi Tata gi mi ala sani, èn nowan sma boiti a Tata sabi a Manpikin trutru; sosrefi nowan sma sabi a Tata trutru, boiti a Manpikin èn a sma di a Manpikin wani fu a kon sabi a Tata” (Mateyus 11:27). Meki wi go luku fu san ede Yesus ben man taki nanga leti, sondro fu meki bigi, taki nowan sma sabi a Tata trutru, „boiti a Manpikin”.

⁸ Leki „a fosiwan fu ala sani di Gado meki”, a Manpikin abi wan aparti matifasi nanga Yehovah (Kolosesma 1:15). Prakseri o bun a matifasi fu a Tata nanga a Manpikin ben kon de na ini den milyunmilyun yari di den tu wawan ben de, iya, sensi a ten di Gado bigin meki sani teleki a ten di A meki den tra engel (Yohanes 1:3; Kolosesma 1:16, 17). Prakseri a tumusi moi okasi di a Manpikin ben abi di a ben de nanga en Tata. A ben man leri fa en Tata e prakseri fu sani, a ben kon leri sabi a wani fu En, den sani di a feni bun èn a fasi fa a e handri. Sobun, Yesus no ben e meki bigi di a taki dati nowan tra sma sabi a Tata moro bun leki en. A no de fu taki dati a bun matifasi di den abi, meki taki nowan tra sma, boiti Yesus, ben man sori wi fa a Tata de trutru.

9, 10. (a) Na sortu fasi Yesus meki sma kon sabi en Tata? (b) San wi musu du so taki Yehovah feni wi bun?

⁹ Den leri fu Yesus e sori taki a ben sabi heri bun fa Yehovah e denki, fa a e firi èn san a e fruwakti fu den anbegiman fu en.b Ma Yesus meki sma kon sabi en Tata na wan tra moi fasi. Yesus ben taki: „A sma di si mi, si a Tata tu” (Yohanes 14:9). Na ini ala den sani di Yesus ben e taki èn e du, a ben e sori fa en Tata de trutru. Bijbel e sori taki a fasi fa Yesus ben e gi leri ben meki sma fruwondru èn a ben naki den ati. Boiti dati, a ben e dresi sma fu di a ben sari den, èn wan leisi a ben krei srefi, fu di a ben e frustan fa sma e firi. Te wi e leisi den sani disi, dan wi e kon frustan taki Yehovah ben o taki èn a ben o du a srefi tu (Mateyus 7:28, 29; Markus 1:40-42; Yohanes 11:32-36). Den sani di a Manpikin taki èn den sani di a du, e sori na wan tumusi bun fasi fa a Tata e handri èn san na a wani fu en (Yohanes 5:19; 8:28; 12:49, 50). Sobun, efu wi wani taki Yehovah feni wi bun, dan wi musu du san Yesus leri èn wi musu teki na eksempre fu en.​—Yohanes 14:23.

¹⁰ Fu di Yesus sabi Yehovah trutru èn fu di a e handri soifri leki en, meki a no e fruwondru wi taki Yehovah bosroiti taki wi kan go na a En nanga yepi fu a Manpikin wawan. Now di wi kon sabi fu san ede wi kan go na Yehovah nanga yepi fu Yesus wawan, dan meki wi go luku san den wortu disi fu Yesus wani taki: „Mi na a pasi, a waarheid nanga a libi. Nowan sma kan kon na a Tata, efu mi no yepi en.”​—Yohanes 14:6.

„Mi na a pasi”

11. (a) Fu san ede na Yesus wawan kan yepi wi fu abi wan bun matifasi nanga Gado? (b) Fa den wortu di skrifi na Yohanes 14:6 e sori taki Yesus abi wan aparti frantwortu? (Luku sosrefi san skrifi na ondrosei fu bladzijde 22.)

¹¹ Wi leri kaba taki wi no man go na Gado efu Yesus no yepi wi. Meki wi go luku finifini, san disi wani taki gi wi. Yesus na „a pasi”, fu di na en wawan kan yepi wi fu abi wan bun matifasi nanga Gado. Fu san ede dati de so? Fu di Yesus tan gi yesi na Gado te na dede, meki a gi en libi leki wan frulusu-ofrandi (Mateyus 20:28). Sondro a lusu-paiman disi, wi no ben o man go na Gado. Sondu e prati libisma fu Gado, èn fu di Yehovah santa, meki a no man si sondu na ai kwetikweti (Yesaya 6:3; 59:2). Ma na ofrandi fu Yesus e meki taki wi kan go na Gado, èn taki wi kan kon krin fu ala sondu (Hebrewsma 10:12; 1 Yohanes 1:7). Te wi e poti bribi na ini a sani disi di Gado seti nanga yepi fu Krestes, dan wi kan kisi a bun-ati fu Yehovah. Fu taki en leti, nowan tra fasi no de fu kon „bun baka nanga Gado”.c​—Romesma 5:6-11.

12. Na sortu fasi Yesus na „a pasi”?

¹² Yesus na „a pasi” te a abi fu du nanga begi. Nanga yepi fu Yesus wawan, wi kan begi Yehovah èn wi kan abi a dyaranti taki a sa yere den begi di komoto fu wi ati (1 Yohanes 5:13, 14). Yesus ben taki: „Iniwan sani di unu e aksi a Tata, a o gi unu na ini mi nen. . . . Aksi, dan unu o kisi, so taki unu sa prisiri pasa marki” (Yohanes 16:23, 24). Fu dati ede, wi kan begi Yehovah na ini a nen fu Yesus èn wi kan kari En „Wi Tata” (Mateyus 6:9). Wan tra reide de fu san ede Yesus na „a pasi”, èn dati na a eksempre fu en. Soleki fa wi si kaba, dan Yesus ben handri soifri leki en Tata. Sobun, na eksempre fu Yesus e sori wi fa wi musu libi so taki wi plisi Yehovah. Fu dati ede, wi musu waka soifri baka Yesus fu man go na Yehovah.​—1 Petrus 2:21.

„Mi na . . . a waarheid”

13, 14. (a) Na sortu fasi Yesus ben taki san tru ala ten? (b) San Yesus ben musu du fu de „a waarheid”, èn fu san ede?

¹³ Ala ten Yesus ben taki san tru te a abi fu du nanga den profeiti wortu fu en Tata (Yohanes 8:40, 45, 46). Noiti a ben taki wan bedrigi sani (1 Petrus 2:22). Srefi den gensman fu en ben taki dati a ben e leri sma „a pasi fu Gado soleki fa a de trutru” (Markus 12:13, 14). Ma di Yesus taki „mi na . . . a waarheid”, dan a no ben wani taki nomo dati a ben e meki sma kon sabi san tru te a ben e taki, te a ben e preiki, èn te a ben e gi leri. Nôno, moro ben de ini a tori.

¹⁴ Memre taki na ini den hondrohondro yari na fesi, Yehovah ben meki Bijbel skrifiman skrifi furu profeititori fu a Mesias, noso Krestes. Den profeititori disi ben taki finifini fu Yesus en libi, en diniwroko, nanga a dede fu en. Boiti dati, a Wet di Gado ben gi Moses ben e taki fu sani di ben sori go na a Mesias (Hebrewsma 10:1). Yesus ben o tan gi yesi te na dede, fu meki ala den profeititori disi kon tru? Na a fasi dati wawan a ben o sori taki Yehovah na a Gado fu tru profeititori. Na a tumusi prenspari frantwortu disi Yesus ben abi. Yesus ben sori nanga a fasi fa a ben e libi, iya, nanga ala sani di a ben taki èn du, dati den sani di ben sori go na en, na tru tori (2 Korentesma 1:20). Sobun, Yesus ben de „a waarheid”. A ben de neleki den profeititori di Yehovah ben taki, kon tru di Yesus kon na grontapu.​—Yohanes 1:17; Kolosesma 2:16, 17.

„Mi na . . . a libi”

15. San a wani taki fu bribi na ini a Manpikin, èn san o de a bakapisi te wi du dati?

¹⁵ Yesus na „a libi”, fu di nanga yepi fu en wawan wi kan kisi libi, dati na „a trutru libi” (1 Timoteyus 6:19). Bijbel e taki: „A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu” (Yohanes 3:36). San a wani taki fu bribi na ini a Manpikin fu Gado? A wani taki dati wi abi na overtoigi taki sondro en wi no kan kisi libi. Boiti dati, wi musu du sani fu sori taki wi abi bribi, wi musu tan teki leri fu Yesus, wi musu meki muiti fu du den sani di a leri wi, èn wi musu teki na eksempre fu en (Yakobus 2:26). Sobun, te wi e bribi na ini a Manpikin fu Gado, dan wi sa kisi têgo libi. Gi a „pikin ipi” fu salfu Kresten, disi wani taki dati den o libi na ini hemel leki yeye di no man dede, èn gi „a bigi ipi” fu „tra skapu” disi wani taki dati den o libi na ini wan paradijs na grontapu leki libisma di no abi sondu.​—Lukas 12:32; 23:43; Openbaring 7:9-17; Yohanes 10:16.

16, 17. (a) Fa Yesus o sori taki en na „a libi”, srefi gi sma di dede? (b) Sortu dyaranti wi kan abi?

¹⁶ Fa a de nanga den sma di dede? Srefi gi den sma disi, Yesus na „a libi”. Syatu bifo Yesus gi en mati Lasarus wan opobaka, a taigi Marta, a sisa fu Lasarus, a sani disi: „Mi na a opobaka nanga a libi. A sma di e bribi na ini mi, sa kon na libi baka, awansi a dede” (Yohanes 11:25). Yehovah gi en Manpikin „den sroto fu dede èn fu Hades”, fu di a gi en a makti fu gi den dedewan wan opobaka (Openbaring 1:17, 18). Nanga den sroto disi, Yesus di kisi glori sa opo den doro fu Hades, èn na so fasi ala den sma di de na ini den grebi sa kon na doro.​—Yohanes 5:28, 29.

¹⁷ „Mi na a pasi, a waarheid nanga a libi.” Nanga den wortu disi, Yesus tyari kon na krin fu san ede a kon na grontapu. Den wortu disi wani taki furu gi wi na ini a ten disi. Memre taki Yesus taki moro fara: „Nowan sma kan kon na a Tata, efu mi no yepi en” (Yohanes 14:6). Neleki fa den wortu fu Yesus ben de prenspari na ini a ten dati, na so a de tu na ini a ten disi. Fu dati ede, wi kan abi a dyaranti taki noiti wi o lasi pasi te wi e waka baka Yesus. Iya, na en wawan o sori wi a pasi fu go „na a Tata”.

San yu o du?

18. San a wani taki fu de wan tru bakaman fu Yesus?

¹⁸ Te wi e luku a tumusi prenspari frantwortu fu Yesus, èn te wi e luku taki a sabi a Tata bun, dan wi abi bun reide fu waka baka a Manpikin. Soleki fa wi ben si na ini Kapitel 1, dan a no den sani di wi e taki noso e firi e meki taki wi na bakaman fu Yesus, ma na den sani di wi e du e sori dati. Fu waka baka Krestes wani taki dati wi musu du den sani di a leri wi èn wi musu teki na eksempre fu en (Yohanes 13:15). A buku di yu e leisi now, kan yepi yu fu du dati.

19, 20. San na wan tu sani na ini a buku disi di kan yepi yu fu du muiti fu waka baka Krestes?

¹⁹ Na ini den kapitel di e kon wi sa go luku a libi nanga a diniwroko fu Yesus finifini. Den kapitel disi prati na ini dri pisi. Wi sa go luku fosi sortu fasi a ben abi èn fa a ben e handri. Baka dati, wi sa go luku fa a ben e preiki èn gi leri fayafaya. Na ini a lasti pisi wi sa poti prakseri na a fasi fa a ben e sori lobi. Bigin nanga Kapitel 3, wan faki de di nen „Fa yu kan waka baka Yesus?” Den Bijbeltekst nanga den aksi na ini a faki disi na fu yepi wi fu denki dipi fu a fasi fa wi kan teki na eksempre fu Yesus te a abi fu du nanga den sani di wi e taki èn e du.

²⁰ Tangi fu Yehovah Gado taki yu no abi fu lasi pasi, èn taki sondu no abi fu tapu yu fu kon krosibei na en. Aladi a ben de wan bigi sani gi Yehovah, toku a sori lobi gi wi, fu di a seni en Manpikin kon na grontapu fu sori wi a pasi, so taki wi kan kon abi wan bun matifasi nanga Gado (1 Yohanes 4:9, 10). Meki a de so taki yu e sori warderi gi a bigi lobi di Gado sori yu. Iya, yu kan du dati te yu e teki a kari disi fu Yesus: „Kon waka na mi baka.”​—Yohanes 1:43.