Gado a Manpikin ofoe „a Manpikin foe Gado”?
„Joe na a Kristus, na Manpikin foe a libi Gado”. — MATTÉUS 16:16.
1. (a) Fa foeroe kerkisma e si Jezus? (b) Sortoe moi sani Jezus ben taki na ini a tori disi?
JEZUS ben de Gado? Foeroe kerkisma foe den kerki foe na kristenheid sa piki ja. Ma joe sabi taki wan sma de di Jezus ben kari en Gado? Opo joe bijbel pikinso na Johannes 20:17, pe na a kaba foe na vers dati joe kan lési jezus égi wortoe: „Mi e opo go na mi Tata nanga oen Tata, na mi Gado nanga oen Gado.” Efoe disi e meki joe ferwondroe, kande joe sa ferwondroe moro foe wantoe foe den tra sani di a bijbel e taki foe Jezus nanga Gado.
2. Sortoe tra moi sani na bijbel e taki foe na fasi di de na mindri Jezus nanga Gado?
2 Prakseri pikinso na engel di ben ferteri Maria taki Jezus ben sa gebore. A no ben taki, taki a pikin foe Maria ben sa de Gado, ma taki a ben sa de „a Manpikin foe Gado” (Lukas 1:35). Èn na presi taki „Gado srefi” ben kon na grontapoe foe gi na loesoeprijs, soleki son sma taki, den Boekoe foe na bijbel e taki, taki ’Gado ben seni en Manpikin’ foe doe disi. — Galaciasma 4:4, 5; 1 Johannes 4:9, 10.
3, 4. Fa sani di Petrus nanga Johannes na Dopoeman taki de kontrari na leri foe na kristenheid di e go foe na Dri-wanfasi?
3 Jezus ben aksi en discipel soema den ben prakseri taki a de. Simon Petrus ben piki: „Joe na Gado”? Nono. Petrus ben taki: „Joe de na Kristus, na Manpikin foe na libi Gado.” Jezus taigi Petrus taki a no ben piki boen? Nono, Jezus ben taki: „Kolokoe joe de Simon, manpikin foe Jona, bikasi skin nanga broedoe no ben tjari disi na krin gi joe, ma mi Tata, di de na ini den hemel.” — Mattéus 16:15-17.
4 Kerki skrifiman di e bribi taki Gado de wan Dri-wan-fasi e taki foe „Gado a Manpikin”. Johannes na Dopoeman no ben kari Jezus „Gado na Manpikin”, ma „na Manpikin foe Gado”. Den discipel foe Jezus no ben taki: „Joe de Gado na Manpikin”, ma: „Joe de troetroe a Manpikin foe Gado”. Wan bigi difrenti de na mindri den wortoe di taki dja. — Johannes 1:34; Mattéus 14:33.
Na Tata de moro bigi?
5. San wi kan taki foe na hemel positsi foe Jezus?
5 Na bijbel e taki foe a libi foe Jezus bifo a ben tron wan libisma. A ben de kaba bifo Abraham, a ben de na en hemel Tata bifo „na grontapoe ben de”, a ben de „na fosi Geborewan foe heri den sani di meki”, „nanga jepi foe en ala tra sani ben meki” (Johannes 17:5; 8:58; Kolossesma 1:15-17). Jezus „ben . . . saka ensrefi, gi jesi na dede, ija, na a dede na wan pina-oedoe. Foe dat’ede joisti meki Gado ben poti en moro hé go na wan moro hé presi, gi en na nen nanga boen-ati, di de tapoe ibri tra nen”. A bijbel e taki ooktoe taki „na Gado foe wi Masra Jezus Kristus . . . ben opo en foe dede, ben meki a sidon na en reti-anoe na ini den hemelkontren, fara tapoesé foe ibri tiri nanga makti nanga krakti nanga tirimakti nanga ibri nen di ben kari, no wawan na ini na seti foe sani disi, ma ooktoe na ini di e kon”. — Filipisma 2:8, 9; Efesesma 1:17, 20, 21.
6-8. San Jezus ben taki foe en positsi nanga di foe en Tata?
6 Tokoe Jezus ben sori ala ten baka taki a no ben de speri foe na Tata ma ben saka ensrefi na en ondro. A ben taki, taki en Tata ben seni en, taki en Tata ben gi en leri nanga taki en Tata ben komanderi en san a ben moesoe taki (Johannes 3:17; 5:36; 6:38; 12:49, 50). Jezus ben taki, taki a ben ’klari na wroko’ di en Tata ben gi en foe doe, taki en bakaman „ben kon sabi taki na Tata ben seni en kon”. — Johannes 17:4, 6, 18, 25.
7 Srefi den féjanti foe Jezus no ben feni fowtoe na en dati a ben taki, taki a de Gado. Na presi foe dati den ben taki, taki „a ben meki ensrefi de leki Gado” foédi a kari en Tata Gado. Den ben wani kiri Jezus foe di ’a ben kari en égi Tata Gado èn nanga dati a ben meki ensrefi de leki Gado’ soleki wan lomsoe vertaling di ala sma sabi e taki. Jezus ben taki: „Foe troe, foe troe, mi e taki gi oenoe: na Manpikin no kan doe wan sani foe foe ensrefi. ma soso na sani san a e si a Tata e doe. Èn ala sani san disi e doe, a Manpikin e doe toe.” — Johannes 5:18, 19, Willibrordvertaling.
8 Ala di a ben abi wan toemsi hépresi, Jezus ben taki gi en apostel: „Na Tata bigi moro leki mi” (Johannes 14:28). Son sma e taki, taki disi ben de troe soso foe di Jezus ben de ete na grontapoe, taki now, di a opo go na hemel, dati no de moro langa so. Ma na bijbel no e taki dati.
Baka di Jezus ben opo go na hemel
9. Fa Paulus ben sori taki srefi na Jezus di ben opo komoto foe dede ben de tra fasi leki Gado?
9 Baka di Jezus ben opo go na hemel, en bakaman ben tan leri sma taki na Tata moro bigi leki na Manpikin. Moro leki twenti jari na baka Paulus ben skrifi foe „na Gado nanga Tata foe wi Masra Jezus Kristus” (Romeini 15:6). Loekoe den wortoe dati pikinso. Paulus ben taki foe a Gado foe Jezus. Dati meki Paulus e meki na difrenti disi no wawan na mindri na Tata nanga Jezus, ma na mindri Gado nanga Jezus. A e skrifi foe Gado nanga Kristus. Na fasi fa Paulus ben gwenti foe gi odi na ini en brifi ben de: „Meki oenoe kisi no-ferdini boenfasi nanga vréde foe Gado, oen Tata nanga foe Masra Jezus Kristus” (Romeini 1:7; 1 Korintesma 1:3; 2 Korintesma 1:2; Galaciasma 1:3; Efesesma 1:2; Fillipisma 1:2). Na wan tra presi Paulus skrifi, nono, no taki Kristus na Gado, ma taki en „de na prenki foe Gado” èn na a fasi dati e teki presi gi en na wan volmaaktifasi (2 Korintesma 4:4). Na vertaler foe The Living Bible di e bribi taki Gado na wan Driwanfasi ben kenki na pisi disi kon de: „Kristus, di de Gado.” Ma foe di dati no tanapoe drape troetroe, meki na sani di ben skrifi na ondrosé ben de: „Letterlek: ’di de a prenki foe Gado.’”
10. Fa Openbaring e sori krin wan difrenti na mindri Jezus nanga Gado?
10 A bijbelboekoe Openbaring toe no wawan meki wan difrenti a mindri Jezus nanga na Tata ma na mindri Jezus nanga Gado. A e bigin so: „Wan openbaring nanga jepi foe Jezus Kristus, di Gado ben gi en” (Openbaring 1:1). Moro leki siksi tenti jari baka di Jezus ben opo go na hemel, a Jezus di ben poti na hé ben taki leki fa Openbaring sori a sani disi: „Na soema di wini — mi sa meki a de wan postoe na ini na tempel foe mi Gado . . . mi sa skrifi na tapoe en na nen foe mi Gado èn na nen foe na foto foe mi Gado, na Njoen Jeruzalem di e saka komoto foe hemel foe mi Gado, èn na njoen nen di mi e tjari.” — Openbaring 3:12.
11. Fa wan difrenti e meki na ini na laatste kapitel foe na bijbel na mindri Jezus nanga Gado?
11 Na difrenti disi na mindri Gado nanga na Lam Kristus e go doro te na a laatste kapitel foe na bijbel, pe na bigi hemel troon foe na moi njoen Jeruzalem den no ben skrifi foe en leki troon foe wan Driwanfasi, na ini wan sma prakseri, ma leki na „troon foe Gado èn foe na Lam” (Openbaring 22:1, 3). Den sani di taki dja no de moeilek foe ferstan, efoe wan sma no ben leri joe foe proberi foe joe taki wan sani di no skrifi drape.
„Na a retianoe foe na krakti”
12. (a) Fa Jezus ben sori sortoe positsi a ben sa abi baka en opobaka? (b) Fa Psalm 110:1 e sori taki Jezus a no Jehovah?
12 Den féjanti foe Jezus, di ben soekoe wan réde foe kiri en, no ben aksi efoe a ben taki, dati en a Gado, ma ofoe en ben de „na Kristus, na Manpikin foe Gado”. A ben piki: „Oenoe srefi ben taki en. Ma mi e taki gi oenoe: foe bigin foe now oen sa si na Manpikin foe libisma sidon na a retianoe foe na krakti, èn si en kon na tapoe den wolkoe foe hemel” (Mattéus 26:63, 64). A fesi Jezus ben teki den wortoe foe David èn ben tjari den kon na tapoe ensrefi: „Den wortoe foe Jehovah gi mi Masra e taki: ’Sidon na mi retianoe, te leki mi poti joe féjanti leki wan foetoebangi gi joe foetoe.’” Jezus no ben taki, taki a ben de Jehovah, ofoe wan pisi foe wan tra Dri-wanfasi gado na ini bijbel, ma taki a ben sa sidon èn ben sa wakti na Jehovah reti-anoe te leki a ten foe Gado ben doro èn en prakseri ben sa kon troe. — Psalm 110:1; Mattéus 22:42-44.
13. San Stéfanus ben si leti bifo a ben dede gi en bribi?
13 Stéfanus, na fosi wan di foe en bribi ede na ini Kristus Jezus ben sa dede, ben kisi wan visioen foe na Jezus di ben kisi wan opobaka. A ben si Jezus leki Gado ofoe na pisi foe na wan ofoe tra dri-na-wan gado? Nono. Soleki Jezus nanga David ben taki a fesi, a ben si Jezus na „a reti-anoe foe Gado”. Leki fa na Living Bible e taki, Stéfanus ben si „Jezus na Messias tanapoe sé Gado, na en reti-anoe!” — Tori foe den Apostel 7:55, 56.
14. San na visioen foe Daniël e meki wi si foe „wan sma di de leki wan manpikin foe libisma”?
14 Na toemsi moi visioen foe Daniël foe na owroe sma foe dé e gi oenoe dja wan moro boen prenki. Daniël ben skrifi: „Mi ben tan loekoe na ini den visioen foe neti, èn loekoe drape! Nanga den wolkoe foe hemel wan sma di gersi wan manpikin foe libisma ben kon; èn a ben kisi pasi foe go na a Owroe Sma foe dé èn den ben tjari en go krosbé foe en, fesi a wan disi. Èn a ben kisi tirimakti nanga wartifasi èn wan kownoekondre, sodati den folkoe, nationaal groepoe nanga tongo ben sa dini en. En tirimakti na wan tirimakti di no abi marki di no sa pasa èn en kownoekondre wan di no sa kon na wan kaba” (Daniël 7:13, 14). Jezus no ben de na Owroe sma foe dé, Jehovab Gado, ma a ben de na manpikin foe libisma. Èn loekoe pikinso taki a ben tjari go leti sé en hemel Tata foe kisi tirimakti, nanga wartifasi nanga wan kownoekondre sodati den folkoe, nationonaal groepoe sa dini en. — Teki gersi Mattéus 25:31.
15. San na bigi ipi ben sa sabi leki fa Openbaring taki?
15 Na bijbelboekoe Openbaring e sori krin taki na bigi ipi di komoto foe ala naatsi nanga tongo èn di e kon tanapoe na ondro na tirimakti foe Kristus, sa de toe sma di sabi na difrenti na mindri Gado nanga na Lam, Jezus Kristus, bika den e bari nanga wan sten di e prijse: „Ferloesoe wi abi foe taki tangi na wi Gado, di sidon na tapoe a troon, nanga na Lam.” Boiti foe dati den 144.000 di tanapoe nanga na Lam Jezus Kristus tapoe na bergi Sion, „e tjari en nen èn na nen foe en Tata tapoe den fesi-ede”. — Openbaring 7:9, 10; 14:1.
A pikin foe soema?
16. San den djoe ben ferstan di Jezus ben taki, taki a sma di den ben kari den Gado, ben de en Tata?
16 Den djoe ben sabi a nen foe Gado. Den ben sabi foe soema Jezus ben taki di a ben taki: „A de mi Tata, di mi e gi glori, foe soema oenoe e taki, dati en de oenoe Gado” (Johannes 8:54). Soema ben de na Gado disi? Ofoe den ben kari of no kari a hen foe Gado, te na a ten dati, den ben e si a nen disi na ini den eksemplaar foe den foe den boekoe. A ben de foe si na ini den lolo na ini den djoe kerki foe den èn a ben tanapoe na ini Hebrew letter teken na ini na Griki Septuaginta Vertaling di den ben e lési èn ben e gebroiki. (Loekoe na artikel „A nen foe Gado na ini den kristen Boekoe foe a bijbel” bladzijde 7 foe na Wachttoren foe 1 maart na ini Bakratongo.) Jehovah no de wan tra nen foe Jezus. Efoe Jezus ben kari „Gado en égi Tata” èn ensrefi „na manpikin foe Gado”, dan den djoe arkiman foe en ben ferstan taki a ben taki, taki a ben de na Manpikin foe na sma di en nen ben skrifi nanga den fo Hebrew letter JHWH. A no ben taki, taki en ben de Jehovah, ma dati a ben de a Manpikin foe Jehovah. — Johannes 5:18; 11:4.
A njoen ferbontoe gi kristen
17, 18. (a) Sortoe kernpunt e kon na fesi na ini a profétitori foe Jeremia foe na njoen ferbontoe, èn o prenspari na profétitori disi de? (b) San na mindriman foe na ferbontoe disi ben doe?
17 Na prenspari profétitori foe Jeremia foe na njoen ferbontoe ben sori taki no wawan djoe ma ooktoe kristen ben sa de wan pipel gi Jehovah nen. Efoe den vertalers foe a bijbel foe joe nanga reti ben gebroiki a nen foe Gado pe disi ben moe si na ini na Hebrewtongo di ben gebroiki na bigin, dan joe e lési drape:
„’Loekoe! Dé e kon’, den wortoe foe Jehovah, ’èn troetroe mi sa meki nanga na oso foe Juda wan njoen ferbontoe . . . Bikasi disi na a ferbontoe di mi sa meki nanga na oso foe Israël baka den dé dati’, na so den wortoe foe Jehovah de. ’Mi wani poti mi wet na den inisé, èn na ini den ati mi sa skrifi den. Mi wani tron na Gado foe den èn den sa tron na pipel foe mi. Èn den no sa leri moro a wan en kompe èn a wan en brada foe taki: „Sabi Jehovah!” Bika den alamala sa sabi mi foe na moro mendriwan ba mindri den te go srefi na moro bigiwan na mindri den’, na so den wortoe foe Jehovah de.” — Jeremia 31:31-34.
18 Na kristen apostel Paulus e skrifi fo kapitel foe na boekoe Hebrewsma (kap. 7-10) foe taki foe na njoen ferbontoe disi, di Gado e meki nanga na jeje Israël. Paulus no e taki, taki na Kristus ben de a mekiman foe na ferbontoe dati (di e kisi krakti nanga en broedoe), ma a e taki dati Kristus ben de na „mindriman”. Na Mekiman foe en ben de Jehovah Gado. Foe na mindriman foe na njoen ferbontoe Paulus ben skrifi: „Kristus ben go . . . na ini hemel srefi foe kon na fesi foe na persoon foe Gado foe na boen foe wi.” — Hebrewsma 8:6; 9:15, 24.
19. Leki fa na profétitori disi taki dan soema ben sa de na Gado foe den sma di den teki na ini na kristelek njoen ferbontoe?
19 Leki fa Jeremia sori, dan soema ben sa de na Gado foe den, kristen di ben teki poti na ini na njoen ferbontoe? Jehovah! Jehovah ben de na sma di ben taki: ’Mi sa meki . . . mi wani poti . . . mi wani tron den Gado.’ Èn foe den kristen na ini na njoen ferbontoe a profétitori e taki: „’Den alamala sa sabi mi foe na moro mendriwan na mindri den te go doro a moro bigi wan a mindri den,’ na so den wortoe foe Jehovah de.” Soboen ala sma di de troetroe na ini na kristelek njoen ferbontoe — sotoe tra getrow kristen di moksi makandra nanga den ben sa de sma di sabi èn e dini Jehovah! Moro leki fo hondro jari pasa kaba Johannes Calvijn ben skrifi: „Den wortoe dati, ’Sabi Jehovah’, e sori tapoe den fosi elementi foe na bribi.” Commentaries on the Book df the Prophet Jeremiah and the Lamentations, foe na anoe foe Johannes Calvijn, di John Owen vertaal, blz. 136.
Wan situwasi di kenki
20. San de arkiman foe Jezus ben moe ferstan?
20 Na ini a ten foe Jezus den arkiman ben sabi na Gado foe Abraham, Izaäk nanga Jakob. Den fosten Tata foe den ben anbegi Jehovah èn den ben abi na tempel foe Jehovah na den mindri. Den ben moe leri o prenspari a de foe gi Jezus grani èn waka na en baka. Foe dat’ede meki Jezus ben taki dat ala sma „[moe] gi grani na a Manpikin neleki fa den e gi grani na a Tata. A sma di no e gi grani na a Manpikin no e gi grani na a Tata.” — Johannes 5:23.
21, 22. (a) Foe san-ede na situwasi de now heri tra fesi? (b) San wi no moe loekoe psa?
21 Now na situwasi de tra fasi. Den sma foe na kristenheid e taki foeroe foe na Manpikin ma e „loekoe psa na Tata di ben seni en kon”. Gado na a sma di ben hé „Jezus go na wan moro hé positsi èn ben gi en na nen nanga en boen-ati di de tapoe ala trawan, sodati na ini na nen foe Jezus ibri kindi ben sa boigi foe den sma di de na ini hemel èn den di de na grontapoe èn den di de na ondro na gron, èn ibri tongo ben sa erken na publiki dati Jezus Kristus, na Masra, meki Gado, na Tata kisi glori”. — Filipisma 2:9-11.
22 Wi no mag loekoe psa soleki foeroe sma e doe a tori taki a belijdenis foe wi foe Jezus „e dini leki glori foe Gado, na Tata.” Foeroe foe den kerkifesiman na ini disiten, èn leki wan bakapisi foe dati den ipi foe den, ben fergiti pikinmoro na Tata. Tokoe Jezus ben taki na ini begi gi en hemel Tata: „Disi wani taki tégo libi, dati den teki na ini den ala ten, sabi foe joe, na wan enkri troe Gado.” Ma dati no nofo. Wi moe leri sabi na sma di Gado ben seni kon èn waka na en baka. Foe dat’ede meki Jezus ben taki moro fara: „Èn foe en di joe ben seni kon Jezus Kristus.” — Johannes 17:3.
Aksi foe loekoe sjatoe san wi ben leri
◻ Sortoe wortoe foe bijbel e sori taki difrenti de na mindri Jezus nanga Gado?
◻ Den wortoe foe Jezus „na Tata moro bigi leki mi” ben de troe ete baka di Jezus ben drai go baka na hemel?
◻ Sortoe wortoe foe David nanga Daniël e jepi wi foe ferstan na positsi foe Jezus na ini hemel?
◻ San troe kristen leki fa na profétitori foe Jeremia di e go foe na njone ferbontoe ben sa sabi foe Gado?