Prisiri nanga Gado Wortu

KOLOKU fu a man di „en prisiri de na ini a wet fu Yehovah”. So wan man e leisi Gado Wortu „nanga wan safri sten dei nanga neti” (Ps. 1:1, 2). Yu e prisiri na so wan fasi tu? Fa yu kan abi moro prisiri nanga Gado Wortu?

Arki te Yehovah e taki

Yu no musu leisi den wortu wawan. Ma te yu e leisi, dan pruberi fu si san e pasa. Prakseri taki yu e yere den sten fu den sma di e taki drape. Te yu e leisi den fosi kapitel fu Bijbel, dan yere fa Yehovah srefi e fruteri san a ben du fu meki taki safrisafri, grontapu ben kan tron wan presi pe libisma kan tan. Arki te a e taigi en Manpikin, a Meester Wrokoman, taki a ten doro fu meki den fosi libisma. Pruberi fu si san e pasa: Adam nanga Efa e opo densrefi teige Gado, Gado e tyari krutustrafu kon tapu den; baka dati, a e yagi den puru fu a Paradijs (Genesis, kapitel 1-3). Firi taki na wan kefalek sani e pasa te yu e leisi fu wan sten fu hemel di e taki dati Yesus Krestes na a Manpikin fu Gado, a lobiwan di Gado seni kon fu gi en libi gi a bun fu libisma (Mat. 3:16, 17). Pruberi fu si fa Yohanes e poti en fesi te a e yere Yehovah e meki bekènti: „Luku! Mi e meki ala sani kon nyun” (Openb. 21:5). Fu tru, te wan sma e leisi Gado Wortu na so wan fasi, dan a o prisiri trutru!

Tan leisi den wortu di komoto fu Gado, dan yu sa kon leri sabi Yehovah di yu sa lespeki furu fu di a bigi trutru. Yehovah trutru sa hari yu, bika En na a Wan di lobi wi, èn te a e du sani gi wi, dan a e du dati nanga sari-ati. A e yepi wi efu wi e saka wisrefi fu pruberi fu du a wani fu en, èn a e sori wi fa sani kan waka bun nanga wi.​—Yos. 1:8; Ps. 8:1; Yes. 41:10.

O moro ten yu e teki fu leisi Bijbel, o moro yu sa prisiri te yu e kon sabi moro fu san Gado wani gi yu. Ma a prisiri fu yu sa kon bigi moro leki dati srefi. Te yu e leisi èn yu e feni a yepi di yu abi fanowdu fu lusu yu problema na wan koni fasi, dan yu sa firi neleki fa a psalm skrifiman ben firi, di ben taki: „Den sani di yu skrifi fu memre wi, na wondru sani. Dati meki mi sili hori ensrefi na den” (Ps. 119:129). Yu tu sa prisiri te yu e kon frustan den gronprakseri fu den Buku fu Bijbel di e srapu a denki fu yu èn di e meki yu wani du sani na a fasi fu Gado.​—Yes. 55:8, 9.

Bijbel e sori wi san na bun gwenti èn san na bun gronprakseri. Den sani disi e kibri wi gi ogri èn den e sori wi san na a reti pasi fu waka. Te wi e leisi Bijbel, dan wi e kon frustan taki Yehovah na wan Tata di sabi sortu problema wi sa kisi te wi ben o du sani di a sondu skin wani. Te wi no sa lespeki den kefalek bun gwenti nanga gronprakseri fu Yehovah, dan wi o pina fu ogri di o miti wi trutru. Yehovah no wani taki dati musu pasa nanga wi. A e broko en ede nanga wi èn a wani taki wi musu abi a moro bun libi. Te wi e leisi a Wortu fu en, dan dati e yepi wi frustan moro bun taki a de wan blesi trutru fu abi en leki wi Gado nanga wi hemel Tata.

Leisi Bijbel ibri dei

A psalm skrifiman ben taki fu a man di e leisi Gado Wortu ibri dei: „Ala san a e du sa waka bun” (Ps. 1:3). Iya, wi de onvolmaakti, wi e libi na ini Satan en ogri seti fu sani, èn Didibri e meki muiti fu pori wi. Ma aladi den sani disi de, toku te wi e leisi Gado Wortu doronomo èn te wi e du den sani di wi e leisi, dan dati sa yepi wi fu meki ala sani waka bun nanga a matifasi di wi abi nanga Yehovah.

Fu di na owru seti disi e kwinsi wi, dati meki wi kan kisi krakti te wi e teki a denki fu a Mekiman na ini wi, awansi wi e du dati gi wan tu momenti nomo ibri dei. Wan tu sma ben poti na ini dungru-oso fu di den ben poti bribi na ini Yehovah. Den sma disi ben feni wan tu bijbelvers di ben skrifi na ini koranti. Den ben koti den puru ini a koranti, den ben leri den bun so taki den ben kan memre den bijbelvers disi, èn den ben prakseri dipi fu den. Yehovah ben blesi den gi a muiti di den ben du, bika den ben du ala san den ben man fu kon sabi san Gado Wortu e taki (Mat. 5:3). Ma furu fu wi kan du moro srefi fu kon sabi san Gado Wortu e taki. Wi no musu denki taki te wi e leisi wan bijbelvers gawgaw ibri dei, dan dati sa du wan wondru gi wi. Ma wi sa feni blesi nomo te wi e luku san na den moro prenspari sani na ini wi libi, so taki wi kan sorgu taki ibri dei wi e leisi wan pisi fu Bijbel, wi e prakseri fu dati, èn gebroiki dati na ini wi libi.

A tru taki den moro bun sani di wi abi na prakseri, sontron no man go doro. Te dati e pasa, dan wi sa du den sani fosi di prenspari trutru gi wi. Fu eksempre, a no sa pasa taki fu espresi wan dei noso tu dei, wi no o dringi watra. Sobun, awansi san e pasa na ini wi libi ibri dei, toku wi musu teki ten fu dringi den switi watra fu waarheid di e gi wi krakti baka.​—Tori. 17:11.

Leisi ala sani fu Gado Wortu

Yusrefi leisi a heri Bijbel kaba? Di wan tu sma ben denki a tori fu leisi fu Genesis te go miti Openbaring, dan den ben firi taki dati na wan sani di den no kan du. Fu dati ede, furu sma di wani leisi a heri Bijbel, bigin leisi den Kresten Griki Buku fu Bijbel fosi. Fu san ede den e du dati? Kande fu di den ben kan si esi-esi fa den Bijbel buku dati abi fu du nanga den te den e suku fu waka baka na eksempre fu Krestes. Noso kande fu di den Kresten Griki Buku fu Bijbel no de so furu fu leisi, namku sowan di fu fo pisi fu a Bijbel nomo. Ma baka di den ben kaba leisi den 27 buku dati, dan den ben poti den prakseri na den 39 buku fu den Hebrew Buku fu Bijbel. Di den bigin leisi dati, dan den ben prisiri trutru. Baka di den kaba leisi den Hebrew Buku fu Bijbel, dan den ben kisi wan gwenti now fu leisi Bijbel doronomo. Dati meki den ben go doro, èn den ben bigin leisi den Kresten Griki Buku fu Bijbel baka, èn noiti moro den tapu fu leisi Bijbel. Meki a de so, taki yu tu e teki a gwenti fu leisi Gado Wortu yu heri libi langa ibri dei.

Wan sma fu yu osofamiri no man leisi? Noso wan sma na ini yu gemeente no man leisi? Fu san ede yu no e aksi a sma dati efu yu mag leisi Bijbel gi en doronomo? Yu sa feni winimarki, ma a sma srefi sa feni winimarki tu te a e prakseri dipi fu den sani di a yere èn te a e gebroiki den sani dati na ini en libi.​—Openb. 1:3.

Bakaten, kande yu wani du tra spesrutu sani di abi fu du nanga a leisi di yu e leisi Bijbel. Wan tu fu den sani disi kan meki taki yu e kisi moro warderi gi a fasi fa den difrenti pisi fu Bijbel, abi fu du nanga makandra. Efu yu Bijbel abi verwijstekst tu, dan yu kan leisi fu finifini tori fu fositen èn yu kan feni tra Bijbel tori di abi fu du nanga a tori di yu e leisi. Den tori disi kan yepi yu frustan den difrenti situwâsi di ben meki den psalm skrifiman skrifi den psalmsingi. Den o yepi yu fu frustan sosrefi fu san ede den apostel fu Yesus Krestes skrifi den brifi fu den. Inzicht in de Schrift e fruteri wi furu fu sma nanga presi di Bijbel e kari. A e fruteri wi sosrefi sortu fasi nanga maniri sma ben abi di ben libi na ini Bijbel ten. Karta e sori wi fa Bijbel profeititori kon tru, sortu kownu nanga profeiti ben libi na ini a srefi ten, èn den karta disi e sori wi tu na ini sortu ten furu fu den sani ben pasa di skrifi na ini Bijbel.

Te yu e prakseri dipi fu den sani di yu e leri, dan yu sa frustan fu san ede wan tu spesrutu sani kon de na mindri a pipel fu Gado. Yu sa kon sabi tu fu san ede Yehovah ben du so nanga en pipel. Moro fara, yu sa si fa Yehovah e krutu den sani di lanti tirimakti e du, sosrefi den sani di tra pipel nanga tra sma e du. Te yu e kon frustan den sani disi, dan dati sa yepi yu fu frustan moro krin san na a denki fu Yehovah.

Den sani di ben pasa fositen soleki fa den skrifi na ini Bijbel, sa hari yu moro te yu e pruberi fu si a presi pe den sani disi ben pasa. Karta fu kondre di skrifi ini Bijbel, e sori krin fa a kondre ben de èn sosrefi o fara den presi ben de fu makandra. Fu eksempre, pe den Israelsma ben abra a Redi Se? O bigi a Pramisi Kondre ben de? O fara Yesus ben waka di a ben du en diniwroko dya na grontapu? Sortu sani Paulus ben si di a ben teki waka leki zendeling? Te yu e si karta fu den kondre nanga presi, dan dati sa meki a leisi di yu e leisi Bijbel, kon moro span. Pe yu kan feni karta fu den kondre di skrifi na ini Bijbel? Wan tu fu den karta dati yu kan feni na ini a Nieuwe-Wereldvertaling van de Heilige Schrift. Na ini den tu pisi fu a buku Inzicht in de Schrift yu kan feni sowan 70 karta. Na a kaba fu pisi wán fu a buku, a skrifi pe yu kan feni ala den karta di de na ini den tu buku. Gebroiki na Index van Wachttoren-publikaties fu feni tra karta. Efu nowan fu den buku disi de na ini a tongo fu yu, dan pruberi gebroiki den karta di yu kan feni na ini A Waktitoren fu yepi yu nanga a leisi di yu e leisi Bijbel.

Na ini den Hebrew Buku fu Bijbel, Kownu David ben prèise Yehovah fayafaya, di a taki: „Den prakseri fu yu warti furu gi mi! O Gado, a nomru fu den prakseri fu yu, bigi trutru!” (Ps. 139:17) Na ini den Kresten Griki Buku fu Bijbel, na apostel Paulus ben prèise Yehovah, bika A „skèin kon na tapu wi ati fu gi na ati leti nanga a glori sabi fu Gado nanga yepi fu a fesi fu Krestes” (2 Kor. 4:6). Paulus ben libi hondrohondro yari baka David, ma toku, den ala tu ben prisiri nanga a Wortu fu Gado. Na so yusrefi kan feni prisiri tu te yu e teki ten fu leisi ala sani di Yehovah gi yu na ini a Wortu fu en.