San yu kan du fu memre sani moro bun
YEHOVAH GADO ben meki a libisma edetonton so kefalek taki a kan memre sani. A ben meki en neleki wan maksin pe yu kan puru sani sondro taki yu o lasi den warti sani di de kaba na ini a maksin. A fasi fa na edetonton meki, e sori taki Gado abi na prakseri taki libisma musu libi fu têgo.—Ps. 139:14; Yoh. 17:3.
Ma kande yu e firi taki yu e frigiti tumusi furu fu den sani di yu e leri. A gersi taki te yu wani memre wan sani di yu ben leri, dan yu no man memre en moro. San yu kan du fu memre sani moro bun?
Sori taki yu wani sabi moro
Efu wi wani memre sani moro bun, dan a de prenspari fu sori taki wi wani sabi moro fu den sani dati. Efu wi meki en wan gwenti fu luku san e pasa lontu wi èn efu wi e sori taki wi wani sabi fa a e go nanga sma, dan dati sa gi wi a deki-ati fu kon sabi moro fu den. Dan a sa de moro makriki gi wi fu wani kon sabi moro fu tra sani tu di wi e leisi, noso di wi e yere èn di warti trutru.
A e pasa furu tron nanga sma, taki den no man memre den nen fu trawan. Ma toku, leki Kresten wi sabi taki libisma de prenspari. Dati na libisma soleki den Kresten brada nanga sisa fu wi, den sma di wi e gi kotoigi, nanga tra sma di wi e miti te wi e sorgu gi den sani di wi abi fanowdu na ini wi aladei libi. San sa yepi wi fu memre den nen di wi musu memre trutru? Na apostel Paulus ben kari 26 nen fu sma na ini wan gemeente di a ben skrifi wan brifi go na den. Wi kan si taki Paulus ben wani sabi moro fu den, fu di a ben kari den na den nen. Ma boiti dati, a ben kari spesrutu sani di den sma dati ben du (Rom. 16:3-16). Yehovah Kotoigi abi opziener di e reis na ini a ten disi. Wan tu fu den opziener disi e memre den nen fu trawan kefalek bun. Aladi den musu de na ini wan tra gemeente ibri wiki, toku den kan memre ala den nen disi. San e yepi den fu memre den nen? Den e teki a gwenti fu kari a sma na en nen moro leki wán tron, a fosi leisi te den e taki nanga a sma. Den e meki muiti fu memre a fesi fu wan sma te den e kari en nen. Moro fara, den abi demakandra nanga furu sma na ini a preikiwroko èn te den e nyan nanga makandra. Te yu e miti nanga wan sma, dan yu sa memre en nen? Sabi fu san ede yu wani memre en nen; baka dati pruberi wan tu fu den rai di wi kari didyonsro.
A de prenspari tu fu memre san yu e leisi. San kan yepi yu fu memre moro bun san yu leisi? Tu sani de prenspari. A fosiwan na taki yu musu wani fu kon sabi moro fu wan tori. A tra sani na taki yu musu frustan a tori. Efu trutru yu wani poti ala yu prakseri na san yu e leisi, dan yu sa musu wani fu kon sabi moro fu den sani di yu e leisi. Yu no sa man memre wan tori efu yu e prakseri tra sani te yu e leisi. Yu sa man frustan wan tori moro bun, te yu e luku san yu sabi kaba fu a tori di yu e leisi. Aksi yusrefi: ’Fa mi kan gebroiki a sani disi na ini mi eigi libi? O ten mi kan gebroiki en? Fa mi kan gebroiki en fu yepi wan tra sma?’ Yu o frustan sani moro bun tu te yu e leisi wan tu wortu di wani sori yu wán prakseri, na presi fu yu leisi ibri wortu wán-fru-wán. Yu sa man frustan prenspari prakseri moro esi, èn a sa de moro makriki gi yu fu memre den.
Teki ten fu luku baka san yu leisi
Den sma di sabi gi leri heri bun, e poti krakti tapu o warti a de fu luku wan tori baka. Wan professor na wan heiskoro ben sori, taki efu wan sma e teki wán miniti fu luku wan tori baka, wantewante baka di a kaba leisi, dan a sa man memre moro furu fu a tori dati. Sobun, wantewante baka di yu kaba leisi, noso te yu leisi wan moi pisi kaba, dan go prakseri san na den prenspari sani di yu ben leisi so taki yu no frigiti den. Te yu leri wan nyun sani, dan go prakseri fa yu ben o taki dati nanga yu eigi wortu. Te yu e luku san yu e memre ete syatu baka te yu leisi wan sani, dan dati sa yepi yu fu memre a tori moro langa.
Dan na ini den dei di e kon baka dati, suku wan okasi fu taki nanga wan sma fu den sani di yu ben leisi. Kande yu kan taki nanga yu famiri, nanga wan sma na ini a gemeente, nanga wan sma di yu e wroko nanga en, wan skoromati, wan birtisma, noso wan sma di yu e miti na ini a preikiwroko. Pruberi fu taki nanga a sma fu trutru prenspari sani. Ma boiti dati, pruberi fu taki-go-taki-kon nanga en fu sori en taki den sani di yu e taki, skrifi na ini Bijbel tu. Te yu e du disi, dan dati sa yepi yu fu memre prenspari sani; trawan sa nyan bun tu fu den sani disi.
Prakseri dipi fu prenspari sani
Boiti taki yu e luku baka san yu leisi èn boiti taki yu e fruteri trawan fu dati, dan yu sa si taki a sa tyari winimarki kon te yu e denki dipi fu prenspari sani di yu leri. Den Bijbel skrifiman Asaf nanga David ben du dati. Asaf ben taki: „Mi sa memre den wroko fu Yah; bika mi sa memre den tumusi moi wroko di yu du sensi owruten. Èn seiker mi sa prakseri dipi fu ala yu wroko, èn mi sa prakseri furu fu a fasi fa yu e du sani” (Ps. 77:11, 12). David ben skrifi wan srefi sortu sani: „Mi e prakseri dipi fu yu na ini den wakti fu a neti”, èn „mi memre den dei fu granwe; mi prakseri dipi fu ala den sani di yu e du” (Ps. 63:6; 143:5). Na dati yu e du tu?
Yu musu prakseri dipi fu den sani di Yehovah e du, a fasi fa a de, èn den sani di skrifi fu a wani fu en. A fasi disi fu prakseri dipi fu sani, sa yepi yu fu memre tru tori. Ma a sa du moro srefi. Efu yu teki a gwenti fu prakseri dipi fu wan sani na a fasi disi, dan den trutru prenspari tori disi sa naki yu ati. A sa kenki a sma di yu de na inisei fu tron wan moro bun sma. Den sani di yu sa memre dan, sa sori trawan den sani di yu e prakseri trutru.—Ps. 119:16.
San Gado en yeye e du na ini disi
Te wi wani memre den sani di Yehovah du èn sosrefi den sani di Yesus Krestes ben taki, dan wi abi wan sani di kan yepi wi. Tapu a neti bifo Yesus dede, dan a ben taigi den bakaman fu en: „Ala den sani disi mi taigi unu, so langa mi ben de nanga unu ete. Ma a yepiman, a santa yeye, di a Tata sa seni kon na ini mi nen, a wan dati sa leri unu ala den sani èn a sa tyari ala den sani di mi ben fruteri unu, kon baka na ini un prakseri” (Yoh. 14:25, 26). Mateyus nanga Yohanes ben drape tu. A santa yeye ben yepi den trutru? Iya, a yepi den fu tyari sani kon baka na ini den prakseri! Sowan aiti yari baka dati, dan Mateyus ben kaba skrifi a fosi tori di e fruteri finifini fu Krestes en libi. A skrifi tori soleki a moi Bergitaki, den marki fu a denoya fu Krestes, èn a bosroiti fu a grontapu sistema disi. Siksi tenti na feifi yari baka di Yesus dede, dan na apostel Yohanes ben skrifi na Evangelie fu en. Drape Yohanes ben skrifi finifini fu sani di Yesus ben taki tapu a lasti neti di den apostel ben de nanga a Masra, bifo a ben gi en libi. Sondro tweifri, dan Mateyus nanga Yohanes ben kan memre bunbun den sani di Yesus taki di a ben de nanga den. Ma a santa yeye ben du furu fu meki taki den no frigiti prenspari finifini tori di Yehovah ben wani den fu skrifi na ini en Wortu.
A santa yeye e yepi futuboi fu Gado na ini ten disi? Seiker dati de so! Nôno, a santa yeye no e poti sani ini wi prakseri di noiti wi leri, ma a e yepi wi fu memre prenspari sani di wi ben studeri kaba na ini a ten di pasa (Luk. 11:13; 1 Yoh. 5:14). Te a de fanowdu, dan a santa yeye e yepi wi, so taki wi kan „memre den sani di den santa profeiti ben taki fositen èn a komando fu a Masra nanga Frulusuman di gi nanga yepi fu den apostel”.—2 Petr. 3:1, 2.
’Yu no musu frigiti’
A no wan tron nomo, ma ibri tron baka, Yehovah ben warskow Israel: ’Yu no musu frigiti.’ Yehovah no ben fruwakti fu den taki den ben musu memre ala sani na wan volmaakti fasi. Ma den no ben musu go so dipi na ini a suku di den ben suku den eigi sani nomo, taki den ben o frigiti san Yehovah du. Den ben musu tan memre fa Yehovah ben frulusu den di na engel fu En ben kiri ala den fosi geborewan fu Egepte. Den ben musu memre sosrefi fa Yehovah ben opo a Redi Se èn ben tapu dati baka, èn na so fasi Farao nanga a legre fu en ben sungu èn den dede drape. Den Israelsma ben musu memre taki Gado ben gi den a Wet fu en na tapu a Sinaibergi èn taki a ben tyari den komoto na a sabana go na ini a Pramisi Kondre. Den no ben musu frigiti den sani disi, sobun, den ben musu memre den sani disi so taki dati ben sa tan abi wan bun krakti tapu na aladei libi fu den.—Deut. 4:9, 10; 8:10-18; Ex. 12:24-27; Ps. 136:15.
Wi tu musu luku bun taki wi no e frigiti. Te den hebi fu a libi e kon na wi tapu, dan wi musu memre Yehovah, èn wi musu hori na prakseri sortu Gado a de èn a lobi di a sori di a gi en Manpikin. Disi meki taki a lusu-paiman ben kan pai gi den sondu fu wi èn taki wi sa man libi volmaakti fu têgo (Ps. 103:2, 8; 106:7, 13; Yoh. 3:16; Rom. 6:23). Te wi e leisi Bijbel doronomo èn te wi e teki prati na den gemeente konmakandra èn na a preikiwroko, dan dati sa meki taki den moi tru tori disi sa de libilibi gi wi.
Te yu abi fu teki bosroiti, awansi na pikinwan noso bigiwan, dan prakseri den prenspari tru tori dati, èn meki den abi krakti tapu a fasi fa yu e denki. No frigiti den prenspari tru tori dati. Luku go na Yehovah te yu abi yepi fanowdu. Yu kan luku a tori na wan fasi fa libisma e prakseri fu sani, noso yu kan teki wan bosroiti fu di yu e du san yu onvolmaakti ati firi fu du. Ma na presi fu yu du dati, dan aksi yusrefi: ’Sortu rai noso sortu gronprakseri fu Gado en Wortu musu abi krakti tapu a bosroiti di mi o teki?’ (Odo 3:5-7; 28:26). Yu no sa man memre sani di noiti yu no leisi noso di noiti yu no yere. Ma te yu e kon sabi sani moro soifri èn te yu e kisi moro lobi gi Yehovah, dan Gado en yeye sa yepi yu fu memre moro sani. Te yu lobi gi Yehovah e kon moro bigi, dan dati sa gi yu deki-ati fu du soifri san Gado en yeye e sori yu.