San yu musu du fu taki moro bun nanga trawan
YU E feni en makriki fu taki nanga trawan? Furu sma e frede pikinso te den e denki taki den musu taki nanga trawan, spesrutu te den musu taki nanga wan sma di den no sabi. Kande den sma dati e syensyen. Kande den e aksi densrefi: ’San mi musu taki? Fa mi kan bigin a takimakandra? Fa mi kan taki go doro nanga a sma?’ Tra sma baka di lobi taki èn di de seiker fu den sani di den e taki, kan abi a gwenti fu wani taki nomonomo, èn son leisi trawan no man taki nowan sani srefi. Kande den sma disi di lobi taki, sa musu meki muiti fu kisi tra sma so fara, taki den e taki. Dan den sma disi di lobi taki, musu leri fu arki san den tra sma disi e taki. Sobun, awansi wi na sma di e syensyen, noso wi na sma di lobi taki, toku wi alamala musu tan meki muiti fu kon kisi a koni fu leri taki nanga trawan.
Bigin na oso
Efu yu wani taki moro bun nanga trawan, dan fu san ede yu no e bigin na oso? Te wi e taki switi nanga den sma fu yu osofamiri, èn te wi e gi makandra deki-ati, dan dati kan yepi wi furu fu de moro koloku na ini na osofamiri.
A moro prenspari sani fu taki bun nanga makandra, na te wi e broko wi ede trutru nanga makandra (Deut. 6:6, 7; Odo 4:1-4). Te wi e broko wi ede nanga makandra, dan wi e taki fu frustan makandra, èn wi e arki te a tra sma wani taki wan sani. Wan tra prenspari sani fu taki bun nanga makandra, na te wi abi bun sani fu taki. Efu wi e leisi Bijbel èn e studeri en doronomo, dan wi sa abi furu sani di wi kan fruteri makandra. Efu wi e leisi a buku Ondrosuku den Buku fu Bijbel ala dei èn efu wi e gebroiki en bun, dan a kan yepi wi fu taki bun nanga makandra. Te a dei e pasa, dan kande wi ondrofeni wan moi sani na ini a preikiwroko. Kande wi leisi wan sani di wi no ben sabi ete, noso di e meki wi lafu pikinso. Te wi e taki nanga makandra leki osofamiri, dan wi musu teki a gwenti fu taki fu den sani disi. A sani disi sa yepi wi tu fu taki nanga sma di no de fu wi osofamiri.
Fa fu taki nanga wan sma di yu no sabi
Furu sma e draidrai fu bigin taki nanga wan sma di den no sabi. Ma fu di Yehovah Kotoigi lobi Gado nanga tra sma, dati meki den e meki bun furu muiti fu leri taki nanga trawan, so taki den kan fruteri den sma dati fu den tru tori di skrifi na ini Bijbel. San kan yepi yu fu du disi moro bun?
A gronprakseri di skrifi na Filipisma 2:4, na wan sani di wi kan gebroiki bun ini a tori disi. Drape wi e kisi a deki-ati fu ’no denki wisrefi wawan èn luku wi eigi tori nomo, ma neleki fa wi ben o du dati gi wisrefi, na so wi musu denki trawan tu èn luku fa a de nanga den’. Prakseri so fu a tori disi: Efu noiti yu miti nanga a sma dati ete, dan en e si yu leki wan sma di a no sabi. Fa yu kan meki a firi bun? Lafu pikinso nanga en, èn taki en odi na wan switi fasi. Ma moro sani de di yu kan du.
Kande a ben denki wan tori, èn now di yu taki en odi, dan yu hari en prakseri puru fu a sani di a ben denki. Efu now yu e pruberi fu taki fu sani di yu e denki, sondro fu abi bisi nanga san en e denki, dan san yu e prakseri? Yu e prakseri taki a sa wani arki yu? San Yesus ben du di a miti wan uma na wan peti na Samaria? Na uma ben abi na prakseri fu teki watra. Yesus bigin taki fu watra di a bigin taki nanga na uma, èn syatu baka dati a ben taki nanga na uma fu yeye afersi na wan libilibi fasi.—Yoh. 4:7-26.
Efu yu e luku sma bun, dan yusrefi sa man si san den sma e prakseri kande. Fa a sma fesi de? A luku koloku noso a luku sari? En na wan owru sma, noso kande a siki tu? Yu e si sani di e sori yu taki pikin-nengre musu de na ini na oso tu? Yu e si sani di e sori yu taki a sma na wan guduman? Noso yu kan si taki a sma musu wroko tranga fu tan na libi? Sani de na ini na oso fu a sma, noso a e weri gowtu sani di e sori yu taki a sma disi musu fu de wan kerkisma? Efu yu e denki fu ala den sani disi te yu e taki a sma odi, dan a kan taki a sa si yu leki wan sma di abi wan srefi sani na prakseri leki en.
Kande te yu e miti nanga wan sma, yu no si en fesi, ma yu e yere en sten baka wan doro di tapu. Dan san yu kan prakseri? We, a kan taki a sma frede. Yu kan gebroiki dati kande fu bigin taki nanga a sma na a doro?
Na wan tu presi yu kan bigin taki nanga tra sma fu di yu e fruteri den pikinso fu yusrefi. Kande yu e fruteri den fu pe yu komoto, fu san ede yu kon na en oso, fu san ede yu e bribi na ini Gado, fu san ede yu bigin studeri Bijbel, èn fa Bijbel yepi yu (Tori. 26:4-23). A tru taki te yu e du disi, dan yu musu de nanga koni, èn yu musu sabi bun fu san ede yu e du dati. Te yu du en so, dan dati kan meki taki a sma wani fruteri yu fa ensrefi de èn fa a e prakseri fu sani.
Na ini wan tu kulturu, dan a de wan aladei sani fu teki sma di yu no sabi, kon na ini yu oso. Kande wan tu sma sa de klariklari fu gi yu wan kari fu kon na ini den oso èn fu sidon nanga den. Te yu e sidon kaba, dan aksi na ososma na wan switi fasi fa a de nanga en èn nanga en osofamiri. Te yu e arki bun san a piki yu, dan kande na ososma sa wani arki tu san yu abi fu taki. Tra sma wani sabi moro fu den sma di kon fisiti den, sobun a kan taki yu sa abi fu taki moro langa, fosi yu taigi a sma fu san ede yu kon na en. Te yu e taki so nanga a sma, dan kande a sa si taki yu nanga en abi wan tu sani di unu ala tu lobi. Disi kan meki taki yu kan taki fu yeye afersi, èn dati kan abi winimarki.
San yu kan du te furu sma e taki wan tra tongo na a presi pe yu e libi? Fa yu kan taki nanga den sma disi? Efu yu leri fu taki odi na ini den tongo di den sma e taki, dan dati sa meki den si taki yu e poti prakseri na den. Disi kan opo a pasi fu taki moro fara nanga den.
Fa fu go doro nanga wan takimakandra
Efu yu wani, taki yu nanga a sma musu taki go doro, dan yu musu wani sabi san a sma abi na prakseri. Efu a sma wani taki, dan gi en deki-ati fu taki tu. Efu yu e poti bun aksi, dan dati kan yepi yu. Den moro bun aksi di yu kan poti, na te yu e fruteri a sma fu taki san ensrefi e denki fu wan tori. Den sortu aksi dati furu tron sa meki a sma taki moro leki iya, noso nôno nomo. Fu eksempre, baka te yu kari wan problema di de na ini a birti pe unu e tan, dan yu kan poti na aksi: „San yu e denki? San meki a problema disi du kon?” noso „San yu denki wi kan du fu lusu a problema disi?”
Te yu e poti wan aksi, dan arki bun san a sma e piki. Sori taki yu wani sabi trutru san en e denki, fu di yu e taki wan wortu fu sori taki yu e arki en, noso fu di yu e seki yu ede fu sori taki yu e agri nanga san a e taki. Te a sma e taki, dan yu no musu koti en mofo. No abi yu eigi denki fu den sani di a sma e taki, ma prakseri bun fu den sani di a e taki. „Ibri sma musu de esi fu yere, a no musu de esi fu taki” (Yak. 1:19). Dan, te yu e taki wan sani, sori taki yu ben arki en trutru di a ben taki.
Ma yu musu sabi tu, taki a no ala sma sa piki yu te yu e aksi den wan sani. Wan tu sma sa fruwondru taki yu e poti aksi gi den, noso trawan kan lafu pikinso srefi. Tra sma baka o piki yu nanga iya noso nôno nomo. No lasi yusrefi. Abi pasensi. No dwengi wan sma fu taki nanga yu. Efu a sma wani arki yu, dan teki na okasi fu sori en wan tu moi sani fu Bijbel di kan gi en deki-ati. Bakaten, a kan, taki a sma o si yu leki en mati. Dan kande a sma sa wani fruteri yu san en e prakseri.
Te yu e taki nanga sma, dan hori na prakseri taki yu wani go baka na den. Efu wan sma e aksi yu furu sani, dan piki wan tu aksi nomo, ma libi wán noso tu fu den aksi dati gi wan tra leisi te yu nanga a sma sa taki baka. Taigi a sma taki yu wani ondrosuku a tori fosi, èn baka dati yu wani fruteri en san yu feni. Ma efu a sma no e poti nowan aksi gi yu, dan kande te yu kaba taki nanga en, yu kan poti wan aksi gi en di yu denki taki a sa wani sabi a piki fu dati. Taigi en taki yu sa gi en a piki tapu na aksi dati, a tra leisi te yu sa kon na en. Furu sani di yu kan taki, yu kan feni na ini den buku Fa foe bigin èn go doro nanga bijbel takimakandra, San Gado e aksi foe wi?, èn na ini den nyun Waktitoren.
Te yu e taki nanga wan tra bribiman
Te yu e miti wan tra Yehovah Kotoigi a fosi leisi, dan yu e go taki nanga en fu kon sabi suma na en. Na dati yu e du tu? Noso yu e tan pî? Fu di wi lobi wi brada nanga wi sisa, dati meki wi wani kon sabi den (Yoh. 13:35). Fa yu kan bigin? Kande yu kan fruteri en fa yu nen, èn baka dati aksi en san na en nen. Te yu e aksi en fa a kon leri sabi waarheid, dan dati kan meki taki yu sa bigin taki moi nanga makandra. Disi sa yepi unu tu fu kon sabi makandra moro bun. Srefi efu yu e aka-aka pikinso te yu e taki, dan toku a muiti di yu meki fu go taki nanga a tra sma e sori en taki yu e broko yu ede nanga en, èn dati na san de prenspari.
San kan yepi yu fu taki nanga wan tra sma fu yu gemeente? Èn san kan yepi yu fu taki na so wan fasi taki unu e gi makandra deki-ati? Sori taki yu wani sabi trutru fa a de nanga a sma èn nanga en osofamiri. Na dyonsrode a konmakandra kaba? Taki nanga a sma fu wan tu sani di yu yere tapu a konmakandra èn di yu denki taki den sa yepi yu. Efu yu e du dati, dan yu nanga a tra sma sa feni winimarki. Kande yu wani kari wan sani di yu ben kan gebroiki bun èn di yu ben leisi na ini A Waktitoren fu no so langa pasa. Yu no musu du disi fu sori tra sma fa yu kefalek, noso fu luku o furu yu sabi. Ma yu musu du dati, fu di yu feni wan sani di e prisiri yu trutru. Kande yu, noso a tra sma, sa abi wan prati tapu a Theokrasia Diniwroko-skoro. Unu ben sa kan taki fu dati, èn na so unu kan kenki prakseri fu a fasi fa a prati disi musu hori. Unu kan fruteri makandra tu fu den sani di unu ondrofeni na ini a preikiwroko.
A no de fu taki, dati te wi wani sabi moro fu tra sma, dan furu tron wi e taki fu trawan tu, den sani di den e du nanga den sani di den e taki. Te wi e taki, dan wi kan lafu tu fu den sani di wi e taki. Den sani di wi sa taki sa gi tra sma deki-ati? Efu wi e hori na prakseri sortu rai Gado Wortu e gi wi èn efu wi lobi Gado, dan seiker wi sa gi trawan deki-ati te wi e taki.—Odo 16:27, 28; Ef. 4:25, 29; 5:3, 4; Yak. 1:26.
Bifo wi e go na ini a preikiwroko, dan wi e sreka wisrefi. Fu san ede wi no e sreka wisrefi tu fu taki nanga den mati fu wi? Te yu leisi noso te yu yere wan sani di yu kan gebroiki bun, dan pruberi fu memre dati so taki yu kan fruteri tra sma fu dati. Bakaten, yu sa abi furu sani fu san yu kan taki nanga trawan. Te yu e du den sani disi, dan yu sa man taki fu tra sani tu boiti fu taki nomo fu den sani di e pasa ala dei. Ma moro prenspari leki dati srefi, nanga den sani di yu e taki, yu musu sori taki Gado Wortu na trutru wan bigi gudu gi yu!— Ps. 139:17.