Sabi fa yu musu piki wan sma

WAN tu aksi di sma e poti, na moro leki aksi nomo. Sontron a moro prenspari pisi fu na aksi di a sma e poti, de moro dipi. Furu tron a de moro prenspari fu sabi fu san ede a sma poti na aksi, leki fu sabi san a aksi yu.

Srefi efu a sma di poti na aksi, wani sabi nomonomo san yu o piki en, toku yu musu sabi fa yu o piki en. Efu yu wani piki en bun, dan yu musu man sabi ofuru yu musu taki èn fu sortu sei yu musu teki a tori (Yoh. 16:12). Wanwan leisi, soleki fa Yesus ben sori den apostel fu en, dan wan sma kan aksi sani di a no mag sabi noso a kan aksi sani di no bun gi en fu yere.​—Tori. 1:6, 7.

Den Buku fu Bijbel e gi wi leki rai: „Unu musu taki na wan switi fasi ala ten, èn a fasi fa unu e taki musu de nanga sowtu, so taki unu sabi fa unu musu piki ibriwan sma” (Kol. 4:6). Sobun, bifo wi piki wan sma, dan boiti taki wi musu prakseri san wi o piki a sma, wi musu prakseri tu fa wi o piki a sma.

Si fu san ede a sma poti na aksi gi yu

Den Saduseisma ben pruberi fu kisi Yesus nanga wan aksi di den ben poti gi en. Dati meki den ben aksi en fa a de nanga na opobaka fu wan uma di trow furu tron. Ma Yesus ben sabi taki den Saduseisma no ben bribi na ini na opobaka trutru. Sobun, di a piki den, dan a piki den na so wan fasi fu meki den frustan taki den ben abi wan fowtu denki, bika Yesus ben sabi taki na a fowtu denki dati ben meki den poti na aksi dati gi en. Yesus ben taki-go-taki-kon na wan kefalek bun fasi nanga den, èn a ben gebroiki wan Bijbel tori di den ben sabi kaba, fu sori den wan sani di den no ben denki ete. Yesus ben sori den krinkrin taki trutru Gado o meki libisma di dede, kisi wan opobaka. Den gensman fu en no ben man bribi san den yere di a piki den, èn dati meki den ben kon frede fu aksi en moro sani.​—Luk. 20:27-40.

Efu yu wani sabi fa yu musu piki wan sma, dan yu musu man si san a sma e denki fu a tori, èn nanga sortu sani a e broko en ede. Fu eksempre, a kan taki wan skoromati noso wan mati na wrokope e aksi yu fu san ede yu no e hori Kresneti. Fu san ede a e aksi yu dati? A wani sabi trutru fu san ede yu no e hori Kresneti? Noso a wani sabi nomo efu yu mag abi prisiri? Fu kon sabi dati, dan kande yu sa musu aksi en san meki taki a aksi yu so wan sani. Baka dati yu kan piki en tapu san a e taki. Yu kan teki na okasi sosrefi fu sori en taki te wi e teki a rai fu Bijbel, dan dati e kibri wi fu tra sani di e miti trawan di e hori a fesadei disi, namku sani di e meki taki so wan fesadei e tron wan hebi gi den èn wan dei di e tyari problema kon.

Kon meki wi taki dati yu kisi a kari fu taki fu Yehovah Kotoigi na fesi wan grupu skoropikin. Te yu kaba taki, dan kande den e poti wan tu aksi gi yu. Efu a de krin san den e aksi èn efu den e aksi na wan opregti fasi, dan a moro bun sani di yu kan du na fu piki den langalanga sondro fu meki en muilek gi den fu frustan. Den kan aksi yu sani tu di furu sma e taki na ini a libimakandra, ma di no tru. Bifo yu e piki na aksi, dan a ben o moro bun fu taki syatu fu wan tu sani di kan yepi den si fa a sani de trutru èn fu san ede Yehovah Kotoigi e meki Bijbel sori den san den musu du. Furu tron, a moro bun fu si den sortu aksi disi leki aksi di sma e poti fu di den e broko den ede nanga sani di e pasa. A no bun fu si den aksi disi leki aksi di poti fu strei fu wan tori, aladi kande a fasi fa a sma poti na aksi kan gersi leki na strei a wani strei nanga yu. Sobun, nanga a piki di yu o gi den, yu kan yepi yu arkiman fu frustan sani moro bun. Yu kan yepi den sosrefi fu kon sabi soifri tori, èn yu kan sori den taki den sani di wi e bribi, komoto fu Bijbel.

San yu sa du te wan wrokobasi no wani gi yu wan tu dei fri so taki yu kan go na a kongres? Na a fosi presi, luku fosi fa a e si sani. Yu denki taki a sa yepi te yu e aksi en fu wroko moro langa tapu wan tu tra dei? Yu kan sori en taki san wi e leri na a kongres e yepi wi fu de wan wrokoman di trawan kan frutrow. San yu e prakseri, yu denki taki dati sa yepi? Efu yu sori en taki yu wani hori yusrefi na den sani di de prenspari gi en, dan kande ensrefi sa wani yepi yu fu di a e frustan den sani di de prenspari na ini yu libi. Ma dan san yu musu du efu a wrokobasi wani meki yu du wan sani di no fiti? We, yu kan taigi en krinkrin taki yu no sa du dati èn nanga a Bijbel yu kan sori en fu san ede yu no o du dati. Ma san yu e prakseri fu disi? Yu no denki taki a ben sa moro bun fu taki-go-taki-kon nanga en èn sori en taki efu wan sma wani lei gi en noso wani fufuru gi en, dan a sma dati no sa wani taki leitori fu en noso fufuru fu en sosrefi?

Na a tra sei, kande yu na wan studenti di no wani teki prati na wan tu sani di den e du na skoro, fu di den sani dati no e kruderi nanga Bijbel. Memre tu, taki furu tron a skoromeester no e denki leki fa yu e denki, èn a musu sorgu taki ala sani e go bun na ini a klas. Yu e kisi fu du nanga dri sani tapu so wan momenti namku: (1) fu poti prakseri na sani di a skoromeester e broko en ede nanga dati, (2) fu sori en nanga ala lespeki na san yu wani hori yusrefi, èn (3) fu prakseri san e plisi Yehovah èn fu tanapu kánkan gi dati. Efu yu wani taki sani waka heri bun, dan yu sa musu du moro leki fu taigi en nomo san yu e bribi (Odo 15:28). Efu yu yongu ete, dan sondro tweifri, yu papa noso yu mama sa yepi yu fu sreka yusrefi so taki yu sa man taki wan sani.

Sontron, a kan pasa taki wan sma di abi makti na ini a kondre, e taki dati yu no e hori yusrefi na wan tu wet. Fu dati ede a kan taki den wani leisi strafu gi yu. Sobun, yu sa musu man sori den taki dati no de tru. A kan de wan skowtu, wan sma fu Gran Lanti, noso wan krutuman di e aksi yu fu piki wan tu aksi di abi fu du nanga a gi di yu musu gi yesi na wan spesrutu wet. Den kan aksi yu tu fu san ede yu leki Kresten no e bumui kwetikweti nanga wan tu afersi fu a kondre, fu san ede yu no e taki a fraga odi, noso fu san ede yu no e singi a singi fu a kondre. Fa yu ben o piki den aksi disi? Bijbel e gi wi a rai fu piki „na wan safrifasi èn nanga dipi lespeki” (1 Petr. 3:15). Yu kan aksi yusrefi tu fu san ede den sma e broko den ede nanga den afersi disi, èn dan yu musu sori nanga ala lespeki taki yu e frustan fu san ede den e denki so. Baka dati, dan san yu musu du? Na apostel Paulus ben sori tapu a reti di a ben abi akruderi a wet fu Rome; sobun, yusrefi kan sori tapu wan tu reti di yu abi akruderi a wet fu a kondre pe yu e libi (Tori. 22:25-29). Kande efu yu fruteri a heihei man san den fosi Kresten ben du, èn san Yehovah Kotoigi e du na heri grontapu, dan dati kan yepi en frustan a tori moro bun. Noso kande yu kan sori en taki, te sma e lespeki a makti fu Gado, dan dati e pusu den fu gi yesi na den libisma èn fu hori densrefi na den wet dati, srefi te nowan skowtu e luku den (Rom. 13:1-14). Efu yu e sori den nanga yepi fu Bijbel fu san ede yu e du wan tu sani èn fu san ede yu no e du wan tu tra sani, dan moro furu fu den heihei sma disi ben sa kan piki bun tapu san yu e taigi den.

San a sma di e poti na aksi, sabi kaba fu Bijbel

Te yu e prakseri fa fu piki wan sma, dan a kan taki yu sa musu poti prakseri tu na san a sma sabi kaba fu den Santa Buku fu Bijbel. Disi na san Yesus ben du di a ben piki den Saduseisma fu wan aksi di den ben poti gi en fu na opobaka. Fu di Yesus ben sabi taki den ben teki soso den sani di Moses skrifi, dati meki Yesus ben taki nanga den fu wan tori di skrifi na ini den fosi feifi buku fu Moses, èn a fosi sani di Yesus taki na: „Ma srefi Moses ben tyari kon na krin taki den dedewan e kisi wan opobaka” (Luk. 20:37). Na a srefi fasi yu tu sa kan feni taki a bun fu kari pisi fu Bijbel di den arkiman fu yu sabi kaba.

Ma fa a de efu a sma di e arki yu, no e bribi na ini Bijbel? Luku san na apostel Paulus ben du di a ben taki na tapu na Areopagus, soleki fa dati skrifi na Tori fu den Apostel 17:22-31. A ben taki fu Bijbel waarheid nanga den sma, sondro fu taki langalanga fu a Bijbel. Te a de fanowdu, dan yu kan du a srefi sani tu. Na wan tu presi yu musu taki furu leisi nanga wan sma fosi yu kan opo Bijbel gi en fu sori en san skrifi drape. Te yu o bigin sori a sma san skrifi na ini Bijbel, dan yu ben sa du koni fu taki fosi fu san ede a bun fu luku san Bijbel skrifi, na presi fu yu taigi a sma taki na Gado Wortu èn dati meki wi musu fu teki san skrifi drape. Ma yu musu wani fu sori a sma krinkrin san Gado abi na prakseri, èn baka dati yu kan meki a sma di e arki yu, si san Bijbel e taki. A Bijbel abi moro krakti, moro leki iniwan sani di wisrefi ben o man taki.​—Hebr. 4:12.

„Na wan switi fasi ala ten”

A fiti trutru taki neleki fa Yehovah de nanga switi fasi ala ten, na so den futuboi fu en e kisi fu yere dati te den e taki, dan den musu du dati „na wan switi fasi ala ten, èn a fasi fa den e taki musu de nanga sowtu”! (Kol. 4:6; Ex. 34:6) Disi wani taki dati wi musu taki na wan switi fasi, srefi te a gersi leki a sma di wi e taki nanga en, no warti fu wi taki switi nanga en. Wi musu taki switi, wi no musu taki grofu, èn wi no musu taki sani di kan hati sma.

Furu sma abi en kefalek hebi na ini a libi, èn ibri dei trawan e kosi den. Te wi miti nanga den sma disi èn wi wani taki nanga den, dan den kan taki grofu nanga wi. San wi musu du? Bijbel e taki: „Wan safri piki e puru atibron.” Efu wi e piki na so wan fasi, dan furu tron dati kan puru na atibron fu wan sma di e denki tra fasi leki wi (Odo 15:1; 25:15). Te wi e taki switi nanga den sma di e kisi fu du nanga takru situwâsi ibri dei èn te wi de switi nanga den, dan dati kan hari den so taki den wani arki a bun nyunsu di wi e tyari gi den.

Wi no wani haritaki nanga den sma di no e lespeki a waarheid. Na presi fu dati, wi wani taki-go-taki-kon fu Bijbel nanga den sma di e gi wi na okasi fu du so. Sobun, awinsi sortu fasi wan sma e taki nanga wi, wi wani memre taki wi musu piki na wan switi fasi èn na wan fasi di e sori taki wi de seiker taki den moi pramisi fu Gado de tru.​—1 Tes. 1:5.

Bosroiti di wan sma srefi musu teki èn sani di abi fu du nanga a konsensi fu en

Te wan bijbelstudenti noso wan tra bribiman e aksi yu san ensrefi musu du na ini wan spesrutu situwâsi, dan fa yu musu piki en dan? Kande yu sabi san yusrefi ben o du. Ma ibri sma sa musu teki a frantwortu fu den bosroiti di ensrefi e teki na ini en libi (Gal. 6:5). Na apostel Paulus ben preiki gi sma, èn a ben tyari kon na krin taki a ben gi den deki-ati fu meki ’a bribi fu den, yepi den fu gi yesi’ (Rom. 16:26). Dati na wan moi eksempre di wisrefi kan teki abra. Wan sma di e teki bosroiti nomo fu plisi a sma di e leri en a Bijbel noso fu plisi wan tra libisma, na wan sma di e dini libisma, èn so wan sma no e meki a bribi yepi en na ini en libi (Gal. 1:10). Sobun, a no ben sa bun efu yu e piki a studenti wantewante te a e aksi yu wan sani di a wani sabi.

Ma fa yu kan piki en so taki yu e hori yusrefi na a Bijbel? Yu kan sori en tapu Bijbel gronprakseri di fiti, èn sosrefi tapu eksempre di skrifi na ini Bijbel. Na wan tu tra okasi, yu kan sori en fa ensrefi musu ondrosuku a tori so taki ensrefi kan feni den gronprakseri nanga den eksempre dati. Kande yu kan taki srefi fu den gronprakseri èn sori en o warti den eksempre dati de, ma yu no musu sori en san a musu du. Baka dati yu kan aksi a sma efu a e si wan sani di kan yepi en fu teki wan koni bosroiti. Dan gi en deki-ati fu go prakseri fu den gronprakseri nanga den eksempre disi, so taki a kan si san na a moro bun sani di ensrefi kan du fu plisi Yehovah. Na so yu e yepi en fu ’gebroiki a koni fu en fu si sani krin, so taki a e leri fu man si krin san bun èn san ogri’.​—Hebr. 5:14.

Gi piki tapu den Gemeente Konmakandra

Furu tron wi abi na okasi fu taki fu wi bribi tapu den konmakandra fu a Kresten gemeente. Wan fasi fa wi e du dati, na te wi e gi piki tapu aksi di poti. Fa wi musu gi piki? Wi musu wani blesi Yehovah, noso taki bun fu en. Dati na soifri san a psalm skrifiman David du di a ben de „na mindri den ipi sma di kon makandra” (Ps. 26:12). Wi musu gi piki na so wan fasi tu taki wi e gi den tra bribiman deki-ati, so taki wi e tranga den „fu sori lobi èn fu du bun wroko”, soleki fa na apostel Paulus wani wi fu du (Hebr. 10:23-25). Te wi e studeri den les fosi wi kon na den konmakandra, dan dati sa yepi wi fu gi makandra deki-ati na a fasi dati.

Te a brada e gi yu na okasi fu gi piki, dan yu musu piki syatu, yu musu piki krin, èn ala sma musu man frustan san yu e taki. No taki fu a heri paragraaf, ma taki fu wán sani nomo. Efu yu e gi piki tapu soso wán pisi fu na aksi, dan trawan e kisi na okasi tu fu taki moro sani tapu na aksi. A ben sa bun tu, efu yu e poti krakti tapu den bijbeltekst di kari drape. Te yu e du disi, dan pruberi fu poti prakseri na den wortu fu a tekst di e horibaka gi a sani di unu e taki tapu a momenti dati. No leisi langalanga komoto fu a paragraaf, ma na presi fu dati, leri fu gi piki nanga yu eigi wortu. No bruya efu a piki di yu gi no de soleki fa a musu de. A sani dati e pasa nanga ibriwan fu wi wanwan leisi te wi e gi piki.

Wi kan frustan now taki, fu sabi fa fu piki wan sma, na moro leki fu sabi wawan san na a piki tapu na aksi. Efu wi wani sabi fa fu piki wan sma, dan wi musu abi a koni fu si sani krin. Ma fu tru, a e meki yu firi bun fu gi wan piki di komoto fu yu ati èn di e naki na ati fu wan tra sma, a no so?​—Odo 15:23.