Fa yu o piki?
1. Fu san ede wi musu teki na eksempre fu Yesus te sma e poti aksi gi wi?
1 Te na a dei fu tide, sma e fruwondru fu a bun fasi fa Yesus ben e piki den aksi di sma ben poti gi en. Te wi de ini a preikiwroko èn sma e poti aksi gi wi, dan a ben o bun fu gi piki neleki fa Yesus ben e du dati.—1 Petr. 2:21.
2. San kan yepi wi fu gi bun piki tapu aksi?
2 Arki fosi: Yesus ben prakseri fosi fu san ede wan sma ben poti wan aksi gi en. Dati wani taki son leisi dati wi musu poti aksi gi a sma fu kon sabi fa a e denki trutru. Wan sma kan aksi: „Yu e bribi na ini Yesus?” So wan sma kande trutru wani sabi fu san ede yu no e hori Kresneti. Efu yu kon sabi fu san ede a sma poti wan aksi, dan yu o man taki-go-taki-kon moro bun nanga en.—Luk. 10:25-37.
3. Sortu sani wi abi di kan yepi wi fu feni bun piki na ini Bijbel?
3 Gi piki nanga yepi fu Gado Wortu: Nofo tron, a moro bun fu gebroiki Bijbel fu gi piki tapu wan aksi (2 Tim. 3:16, 17; Hebr. 4:12). A pikin buku Fa foe bigin èn go doro nanga bijbel takimakandra, e yepi wi fu gi yoisti piki. Wan tra sani di kan yepi wi, na a pisi: „Tori fu Bijbel di bun fu hori takimakandra”, di de na ini a Nyun-Grontapuvertaling fu den Kresten Griki Buku fu Bijbel. Srefi efu a sma di poti na aksi no e bribi na ini Bijbel, toku na wan koni fasi, yu kan fruteri en san Bijbel e leri. Gi a sma deki-ati fu poti seryusu prakseri na den koni rai na ini Bijbel. Te yu e teki na eksempre fu Yesus, dan den piki fu yu o de neleki „gowtu apra di kerfu na ini wan solfru preti”, iya, den o moi èn den o warti srefisrefi.—Odo 25:11.
4. O ten wi no musu pruberi fu gi piki tapu ibri aksi di sma e poti gi wi?
4 Wi musu gi piki tapu ibri aksi? Efu yu no man gi piki tapu wan aksi, dan yu no abi fu syen fu taki: „Mi no sabi, ma mi kan go ondrosuku a tori, èn kon baka na yu fu sori yu sortu piki mi feni.” Te na ososma si taki yu handri na so wan fasi èn taki yu wani yepi en, dan a kan aksi yu fu kon baka wan tra leisi. Ma te yu si taki a sma e poti wan aksi soso fu di a wani haritaki nanga yu, dan yu musu du neleki Yesus èn gi wan syatu piki (Luk. 20:1-8). Na so a de tu, te yu e miti wan sma di no wani sabi moro fu Bijbel, ma di wani haritaki nanga yu. A moro bun fu tapu a takimakandra na wan switi fasi, èn fu gebroiki yu ten fu suku den sma di trutru wani sabi moro.—Mat. 7:6.
5. Sortu eksempre Yesus gi te a abi fu du nanga a fasi fa wi musu gi piki tapu aksi?
5 Yesus ben sabi taki efu a ben wani du a wroko fu en bun, dan a ben de tumusi prenspari fu frutrow tapu Yehovah. Na so a ben o man „gi kotoigi fu a waarheid” èn dati ben wani taki tu dati a ben gi piki tapu aksi fu sma di trutru ben wani sabi moro (Yoh. 18:37). Wi abi a bigi grani fu teki na eksempre fu Yesus te wi e gi piki tapu aksi fu sma di abi a „yoisti denki fu man kisi têgo libi”!—Tori. 13:48.