Programa fu yepi yu tron wan moro bun takiman nanga wan moro bun leriman
AWANSI yu yongu noso yu owru, awansi yu na wan man-nengre noso wan umasma, toku a skoro disi kan yepi yu fu kan taki moro bun èn fu gi moro bun leri komoto fu a Wortu fu Gado.
Den wan di nen skrifi tapu a Theokrasia Diniwroko-skoro, e kisi fu yere fu a skoro-opziener sortu prati den musu hori tapu a skoro. Na tapu den dri bladzijde di e kon baka a wan disi, yu sa feni den penti di yu kan wroko na den. Den disi na fu yusrefi fu gebroiki den. Den nomru di skrifi bifo den difrenti penti, na den nomru fu den les di e kon na tapu den tra bladzijde. Na ini den les dati yu sa leisi fu sani di yu musu du fu tron wan moro bun takiman nanga wan moro bun leriman, èn sosrefi yu sa si fu san ede ibriwan fu den les disi de prenspari. Yu sa feni bun rai tu di sa yepi yu du den sani di skrifi na ini den les.
Den dri difrenti kloru di poti na fesi a penti, e sori nanga sortuwan fu den dri sani a penti abi fu du. A penti kan abi fu du nanga (1) a leisi di yu musu leisi gi den arkiman, (2) wan demonstrâsi di yu musu hori nanga tu noso moro sma, noso (3) wan lezing di yu musu hori gi a gemeente. A skoro-opziener sa taigi yu na sortu penti yu musu wroko. A ben sa bun, efu yu o wroko na wán penti nomo, ibri tron te yu abi wan prati na a skoro. Yu sa kisi winimarki te yu e pruberi fu du den sani di skrifi na a kaba fu a les di yu kisi fu wroko na en. Efu a de krin taki yu wroko bun na a les dati, dan a skoro-opziener sa meki yu wroko na wan tra penti a tra leisi te yu abi wan prati na a skoro.
Efu yu sa musu hori wan demonstrâsi, dan yu musu hori en na wan fasi fa wi e pristeri a bun nyunsu. Wan tu fasi fa wi kan pristeri a bun nyunsu de fu feni na tapu bladzijde 82. Ma boiti den fasi di kari na tapu a bladzijde dati, yu kan teki tra fasi tu fu pristeri a bun nyunsu. A kan taki a skoro-opziener e sori yu sortu fasi yu musu teki fu pristeri a bun nyunsu te yu musu hori yu demonstrâsi. Disi a kan du, fu di kande a wani taki yu kon gwenti nanga a fasi disi. Wan tra sani di a kan du tu, na fu meki yusrefi luku sortu fasi yu o teki fu pristeri a bun nyunsu.
Srefi te yu no abi fu sreka yusrefi fu abi wan prati tapu a skoro, dan toku yu kan go na fesi furu tu. Disi yu kan du, te yu e leisi a buku disi èn tan pruberi den sani di skrifi na ini. Kande yu kan pruberi fu luku wan tra les tu ibri wiki.
Awansi o langa yu de tapu a skoro kaba, noso awansi o langa yu e preiki kaba, toku yu kan go doro fu go na fesi èn kon moro bun. Meki a de so, taki yu e feni ala winimarki fu a leri di yu e kisi tapu a Theokrasia Diniwroko-skoro.