Taki den wortu krin

EFU yu wani taki trawan frustan san yu e taki, dan yu musu taki krin. Kande yu wani fruteri sma wan moi boskopu, noso kande na wan prenspari boskopu srefi, ma efu den no man frustan den wortu di yu e taki, dan furu fu a boskopu dati sa lasi gowe.

Te sma no e frustan san trawan e taki, dan dati no sa gi den deki-ati fu du sani. A kan srefi taki wan sma abi wan krakti sten èn ala sma kan yere en, ma toku efu a no e taki den wortu soifri, dan a no sa man gi sma deki-ati fu du san den e yere. A ben sa de neleki a e taki wan tra tongo, di den arkiman fu en no man frustan (Yer. 5:15). Bijbel e memre wi, taki: „Efu a trompeti no e bari krin, dan suma sa sreka ensrefi gi a feti? Na so a de tu nanga unu: efu unu e taki wan tongo, ma unu no e taki wortu di makriki fu frustan, dan fa sma sa sabi san unu e taki? Fu taki en leti, unu sa taki neleki unu e taki na ini loktu.”​—1 Kor. 14:8, 9.

San e meki taki son sma no e taki krin? A kan taki a sma no e opo en mofo nofo. Tra sani di kan meki taki wan sma no e taki krin èn no e taki tranga nofo, na te den titei fu en kakumbe steifi tumusi, noso kande a no e opo en mofo nofo.

Te wan sma e taki tumusi gaw, dan dati kan meki tu taki trawan no man frustan so bun san a e taki. Dati ben o de neleki te yu e prei wan cassette-lolo moro esi leki fa a musu prei. Yu man yere den wortu, ma yu no man frustan den bun.

Son leisi sma no e taki krin, fu di den abi wan problema na den mofo, den tongo, den sten, noso den gorogoro, èn disi na den sani di den abi fanowdu fu taki. Ma srefi efu wan sma abi so wan problema, dan toku a kan du furu fu lusu a problema disi, te a sa du den sani di sa gi leki rai na ini a les disi.

Furu tron wan sma no e taki krin, fu di a no e taki den wortu soifri, ma a e taki ala den wortu tumusi esi baka makandra so taki a e kon muilek fu frustan san a e taki. A problema kan de taki a no e taki a heri wortu, ma soso pisi fu a wortu, noso a e nyan wortu. Te wan sma e taki ala den wortu tumusi esi baka makandra, dan den sma di e arki en sa frustan wan tu sani nomo di a e taki, ma tra sani baka den no sa frustan. Fu dati ede wi kan frustan taki te wan sma no e taki wortu krin, dan a leri di a e gi sa lasi krakti.

Fa fu taki krin. Wan fu den moro prenspari sani di yu musu du fu taki den wortu krin, na taki yu musu sabi soifri fa fu taki den wortu na ini yu tongo. Na ini furu tongo, yu kan prati wan wortu na ini tu noso moro pisi èn ibriwan fu den pisi abi wán noso moro letter. Na ini den tongo disi a de so taki yu e taki ibri pisi fu den wortu, ma yu no e poti a srefi krakti tapu ala den pisi te yu e taki. Efu yu wani taki wortu moro krin, dan no taki tumusi gaw èn meki muiti fu taki ibri pisi fu den wortu. Na a bigin a kan gersi leki yu e taki tumusi soifri, ma te yu e pruberi en ibri tron baka, dan safrisafri yu sa si taki yu e bigin taki wortu moro krin sondro fu aka-aka. Sontron, soso fu di yu wani taki grati, dan kande yu sa taki wan tu wortu tumusi esi baka makandra. Ma efu sma no o frustan san den wortu fu yu wani taki, dan a moro bun taki yu no e du disi.

Wan wortu fu warskow: Efu yu wani leri fu taki den wortu krin, dan yu kan pruberi fu taki èn fu leisi den wortu so soifri leki yu man. Ma sorgu taki yu no e kisi a gwenti fu taki so nanga sma, bika den o yere taki a no so yu gwenti taki, èn a kan gersi leki yu e meki yu sten.

Efu sma no e yere yu krin te yu e taki, dan leri fu opo yu ede so taki yu kakumbe no e miti nanga yu borsu. Te yu e leisi komoto fu Bijbel, dan hori a Bijbel hei, so taki te yu luku den arkiman èn baka dati yu e luku baka na ini a Bijbel, dan yu sa abi fu saka yu ede pikinso nomo. Disi sa meki taki yu sa man taki den wortu sondro problema.

Wan tra sani di kan yepi yu fu taki moro bun, na te yu e leri fu no span yusrefi. Furu sma sabi taki te den e span den titei fu den fesi tumusi, noso te den no e hari bro na a yoisti fasi, dan dati kan meki taki den no e taki bun. Te yu e span yusrefi na so wan fasi, dan yu frustan, yu mofo, nanga a fasi fa yu e bro, no o wroko bun nanga makandra. Fu taki en leti, den dri sani disi musu wroko bun nanga makandra efu yu wani taki bun.

Den titei fu yu fesi no musu span, so taki den kan du wantewante san na edetonton e taigi den fu du. Sosrefi yu mofobuba no musu span. Yu mofo musu man opo èn a musu man tapu wantewante so taki te yu e taki, dan sma sa man frustan bun san yu e taki. Efu yu e span yu mofobuba nanga yu kakumbe, dan yu mofo no sa man opo nofo, èn sma no sa man frustan bun san yu e taki. Disi sa meki tu taki yu o taki grofu, ala sani no sa de fu yere te yu e taki, èn yu no sa taki den wortu krin. Disi no wani taki dati yu musu go taki kefalek slow. Ma yu musu du den sani disi na a yoisti fasi so taki sma sa man frustan krin san yu e taki.

Kande te yu e ondrosuku yusrefi bun, dan yu o si taki a o bun gi yu fu leisi nanga wan tranga sten. Luku finifini fa yu e gebroiki den kefalek moi sani di e yepi yu fu taki. Yu e opo yu mofo nofo, so taki ala sani de krin fu yere? Yu musu hori na prakseri taki, aladi a tongo e wroko moro tranga leki ala den tra sani di e yepi yu fu taki, toku a no a tongo wawan e meki yu taki. A neki, a kakumbe, den mofobuba, den titei fu a fesi nanga den titei fu a gorogoro, na tra sani di e yepi yu fu taki. Te yu e taki, dan yu e du dati sondro fu buweigi yu fesi? Efu na dati yu e du, dan a kan taki yu no e taki den wortu krin.

Efu yu abi wan tape recorder, dan teki yu eigi sten tapu wan cassette-lolo. Ma yu musu taki leki fa yu gwenti taki, neleki fa yu ben o taki te yu o miti wan sma na ini a preikiwroko. Taki wan tu miniti langa, èn teki en tapu a lolo. Te yu sa arki san yu taki tapu a lolo, dan dati kan yepi yu fu yere ala den wortu di yu no e taki krin. Fu eksempre, arki efu ala den wortu di yu e taki de krin fu yere, èn efu yu no e nyan den wortu. Efu dati de so, dan pruberi fu si fa a du kon taki yu e taki so. Furu tron yu kan wroko na dati fu di yu e du den sani di wi kari kaba na ini a pisi disi.

Wan sani de di e meki taki yu no man taki so bun? Pruberi fu opo yu mofo, moro leki fa yu ben du fosi, èn pruberi fu taki den wortu pikinso moro krin. Hari bro èn furu yu fokofoko nanga a bro dati, èn taki safrisafri. Furu sma di no ben man taki so bun, teki a rai disi èn den man taki moro krin now. Aladi a kan taki a no wantewante yu o lusu a problema fu yu, toku no lasi-ati. Memre taki Moses ben de wan man di kande no ben man taki bun, ma toku Yehovah ben teki en fu tyari prenspari boskopu gi a pipel fu Israel èn gi Farao fu Egepte (Ex. 4:10-12). Efu yu wani, dan Yehovah sa gebroiki yu tu, èn a sa blesi yu diniwroko so taki sani waka bun.