Taki nanga faya

TE YU e taki nanga faya, dan dati sa meki taki a lezing fu yu no sa soi. Aladi a de prenspari fu leri sma wan sani te yu e taki, toku yu sa man meki den arkiman tan arki yu te yu e taki nanga faya. Awansi fa yu kweki, noso awansi fa yu de, toku yu kan leri fu taki nanga faya.

Taki nanga firi. Di Yesus ben taki nanga wan uma fu Samaria, dan a taigi en taki den wan di e anbegi Yehovah, musu du dati „nanga yeye èn nanga waarheid” (Yoh. 4:24). Den musu anbegi Gado nanga wan ati di furu nanga tangi, èn den musu anbegi Gado tu nanga waarheid soleki fa dati skrifi na ini Gado Wortu. Te wan sma de nanga tangi na ati trutru, dan dati sa de fu si na ini a fasi fa a e taki. A sa de fayafaya fu taki nanga trawan fu den sani di Yehovah gi wi na wan lobi-ati fasi. En fesi sa sori fa a e firi trutru, èn sosrefi san a e meki nanga en anu, èn nanga en sten, sa sori fa e firi trutru.

Ma te wan takiman lobi Yehovah èn a e bribi san a e taki, dan fa a e du kon taki toku a no e taki nanga faya? A no nofo te wan takiman e sreka ensrefi tapu den sani di a sa taki. A musu sabi a tori finifini, èn a musu de nanga ala en firi na ini a tori. Kon meki wi taki dati a musu taki fu a frulusu-ofrandi fu Yesus Krestes. Te a takiman e hori en lezing, dan en ede no musu furu nanga soso finifini tori fu a frulusu-ofrandi, ma a musu abi warderi gi san na ofrandi fu Yesus du gi en leki takiman èn sosrefi gi den arkiman fu en. A no musu frigiti fu de nanga tangi na ati gi a kefalek moi sani disi di komoto na Yehovah Gado nanga Krestes Yesus. A takiman musu prakseri fu a bigi okasi di opo gi libisma fu kisi libi, dati wani taki fu libi koloku fu têgo nanga wan volmaakti gosontu na ini a paradijs dya na grontapu! Sobun, a takiman musu sorgu taki en ati de na ini a tori tu.

Bijbel e taki fu Esra, wan leriman fu Wet na ini Israel, dati a „ben sreka na ati fu en fu go suku rai na a wet fu Yehovah èn fu du en èn leri sma . . . na Israel” (Esra 7:10). Efu wi e du a srefi sani tu, fu sreka wi ati èn fu no sreka soso a tori di wi wani fruteri, dan wi sa taki komoto fu wi ati. Efu wi e taki fu a waarheid komoto fu wi ati, dan dati kan yepi furu fu meki den sma di e arki wi, kisi wan trutru lobi gi a waarheid.

Prakseri den arkiman fu yu. Wan tra prenspari sani di kan meki taki yu e taki nanga faya, na te yu de seiker taki yu arkiman musu yere den sani di yu abi fu taki. Disi wani taki dati te yu e sreka yusrefi, dan yu no musu suku bun sani nomo fu taki, ma yu musu begi Yehovah tu, so taki a yepi yu fu gebroiki den sani disi gi a bun fu den sma di sa arki yu (Ps. 32:8; Mat. 7:7, 8). Ondrosuku fu san ede yu arkiman musu yere san yu abi fu taki, fa den sa man nyan bun fu dati, èn fa yu kan tyari dati na so wan fasi taki den sa si trutru o warti a de.

Wroko na den sani di yu wani taki, teleki yu firi taki a sani di yu wani taki na wan span tori di ala sma musu yere. Kande a no de wan nyun tori, ma a fasi fa yu e tyari a tori, kan de wan fasi di den sma no ben yere so ete. Yu kan sreka wan tori di trutru sa yepi den arkiman fu tranga a matifasi fu den nanga Yehovah, noso fu meki den kisi warderi gi den sani di Yehovah gi wi. Yu kan sreka wan tori tu di e sori den arkiman san den kan du fu kakafutu gi den hebi fu a libi na ini na owru seti disi, noso fa den kan du den diniwroko bun. Efu na wan fu den sani disi yu e du, dan seiker yu sa man taki nanga faya te yu e hori yu lezing.

Ma san yu kan du efu yu musu leisi na fesi sma? Fu man leisi nanga faya, dan yu sa musu du moro leki fu taki den wortu soifri nomo. Studeri a pisi tori bun. Efu yu sa musu leisi wan pisi fu Bijbel, dan go suku moro sani di e taki fu a pisi dati. Sorgu taki yu frustan bun san a tori wani taki trutru. Prakseri fa yu nanga den arkiman kan kisi wini fu a pisi dati, èn leisi en na so wan fasi tu taki den arkiman man frustan bun sortu wini den kan kisi fu a pisi tori.

Yu e sreka yusrefi fu go na ini a preikiwroko? Luku baka sortu tori yu wani taki nanga den sma, èn sortu bijbeltekst yu wani leisi gi den. Prakseri tu san den sma e denki. San ben de a nyunsu di furu sma yere? Nanga sortu problema den e kisi fu du? Te yu de srekasreka fu sori sma fa Gado Wortu e lusu den problema disi, dan yu sa de nanga faya fu sori den dati, èn yu no sa abi fu du neleki yu de nanga faya, ma dati sa kon fu ensrefi.

Sori dati yu e taki nanga faya te yu e hori wan lezing. A fasi fa yu e taki te yu e hori wan lezing, sa sori sma efu yu de nanga faya. A fasi fa yu e poti yu fesi musu sori den krinkrin taki yu de nanga faya. Te yu e taki, dan sma musu yere taki yu de seiker fu den sani di yu e taki. Ma a no musu de so dati yu e taki na wan fasi di e sori taki yu abi bigifasi.

Yu musu du disi na wan yoisti fasi. Wan tu sma abi a gwenti fu fruteri ala sani leki span tori. Kande den sa musu kisi yepi fu frustan taki te wan sma e taki nanga tumusi furu opo-opo, noso te a e sori tumusi furu firi, dan den arkiman sa poti moro prakseri na en, na presi fu poti prakseri na a boskopu. Na a tra sei, den sma di e syensyen, musu kisi deki-ati kande fu sori moro fa den e firi.

Te yu e taki nanga faya, dan dati kan meki den sma di e arki yu, kisi a faya dati tu. Efu yu e luku den arkiman bun èn efu yu e taki nanga faya te yu e hori yu lezing, dan den arkiman fu yu sa firi a srefi sani san yu e firi. Apolos ben taki nanga faya, èn trawan ben kari en wan bun takiman. Efu yu e taki nanga faya, dan yu sa hori yu lezing na so wan fasi taki den sma di e arki yu, sa kisi deki-ati fu du san yu e taki.​—Tori. 18:24, 25; Rom. 12:11.

Taki nanga faya te dati fiti na a tori fu yu. Luku bun taki yu no de nanga faya a heri pisi ten te yu e hori yu lezing, bika dati sa meki taki den arkiman sa kon weri fu arki yu. Dan a sa pasa taki ibri leisi te yu e gi den deki-ati fu du san yu taki, den no sa arki yu moro trutru. Disi e sori o prenspari a de fu sreka den sani di yu sa taki, na so wan fasi dati yu sa man kenki a fasi fa yu e taki te yu e hori yu lezing. No hori yu lezing na wan fasi di kan gersi leki yu no e span nanga den sani di yu e taki. Efu yu luku finifini sortu tori yu wani taki nanga yu arkiman, dan yu o si taki yu o bigin lobi a tori dati trutru. Ma na son penti yu musu taki nanga moro faya te yu e hori yu lezing, èn yu musu pruberi fu du disi nanga koni.

Spesrutu te yu e taki fu den moro prenspari sani fu yu lezing, dan yu musu taki nanga moro faya. A lezing fu yu musu abi heimarki. Fu di den heimarki disi na den moro prenspari pisi fu yu lezing, dati meki furu tron den de fu gi den arkiman deki-ati fu du wan sani. Baka te yu sori yu arkiman fa a tori de trutru, dan yu musu gi den deki-ati, fu di yu sa sori den sortu winimarki den sa kisi te den du den sani di yu taki. Te yu de nanga faya, dan dati sa yepi yu fu doro na ati fu den sma di e arki yu. No taki nanga faya soso fu di yu feni taki yu musu du dati. Te yu e taki nanga faya, dan yu musu sabi fu san ede yu e du dati. A tori di yu o taki nanga den arkiman, sa yepi yu fu kon sabi dati.