Hori wan lezing sondro fu leisi en langalanga fu wan papira

KANDE yu wroko tranga fu meki yu lezing. Kande yu lezing abi sani di den arkiman kan leri wan sani fu dati. Kande a lezing fu yu seti na wan makriki fasi di ala sma man frustan bun. Kande yu kan hori a lezing fu yu grati sondro fu aka-aka. Ma efu den arkiman no e arki ala sani di yu e taki; efu den e arki wan tu pisi fu yu lezing nomo, èn baka dati, den e denki tra sani, dan o furu krakti yu lezing abi tapu den? Efu den arkiman no man hori den prakseri na den sani di yu e taki, dan yu denki taki yu sa doro den ati?

San kan de a rutu fu so wan problema? Wan tu sani kan meki taki so wan problema e kon. Ma furu tron a problema e kon fu di wan takiman e leisi langalanga fu wan papira. Nanga tra wortu, a takiman e luku tumusi furu san a ben skrifi, noso a fasi fa a e hori en lezing, de tumusi seryusu. Ma den problema disi abi langalanga fu du nanga a fasi fa a takiman sreka a lezing fu en.

Efu yu e skrifi yu heri lezing fosi, èn baka dati yu e pruberi fu meki wan schema fu a lezing dati, dan kande yu sa si taki a muilek fu hori a lezing sondro fu luku tapu a papira. Fu san ede? Fu di yu suku den yoisti wortu di yu wani taki. Srefi efu yu e gebroiki a schema fu hori a lezing, dan yu sa pruberi fu memre den wortu di yu ben gebroiki di yu skrifi a heri lezing. Te wan heri lezing skrifi na tapu papira, dan den wortu skrifi na wan moro seryusufasi èn den de moro muilek leki san wi e taki ibri dei. Dati sa de fu si te yu e hori a lezing fu yu.

Na presi fu yu skrifi ala sani fu yu lezing finifini, dan pruberi a sani disi: (1) Suku wan nen gi a lezing, èn suku den moro prenspari penti di yu o gebroiki fu meki ala sma frustan fu san ede a nen fu a lezing de so. Te yu o hori wan syatu lezing, dan tu prenspari penti kan sari kaba. Efu yu sa hori wan moro langa lezing, dan kande fo noso feifi prenspari penti sa de fanowdu. (2) Na ondro ibriwan fu den moro prenspari penti fu yu lezing, yu musu skrifi den prenspari bijbeltekst di yu wani gebroiki; skrifi sosrefi den agersitori di yu wani gebroiki èn den prenspari buweisi di yu sa tyari kon na fesi. (3) Denki fa yu o bigin nanga yu lezing. Kande yu kan skrifi wan tu sani srefi fa yu o bigin. Sosrefi, yu musu sabi san yu o taki na a kaba fu yu lezing.

A de kefalek prenspari fu sreka yusrefi gi yu lezing. Ma no pruberi fu memre ibri wortu di yu wani taki te yu e sreka yusrefi. Te yu wani hori wan lezing sondro fu luku tapu wan papira, dan te yu e sreka yusrefi yu no musu poti prakseri na wortu, ma na den sani di yu abi na prakseri fu taki. Yu musu luku san na a fosi sani di yu abi na prakseri, èn te yu sabi dati bun kaba, dan yu kan go doro fu luku san na a tra sani di yu abi na prakseri fu taki. Efu yu seti yu lezing na wan makriki fasi èn efu yu sabi heri bun san yu wani taki, dan a sani disi no sa de muilek. A sa de so tu, taki te yu e hori yu lezing, dan yu sa man taki fri sondro fu prakseri tumusi langa san yu wani taki.

Prakseri den winimarki. Wan prenspari winimarki te yu e hori wan lezing sondro fu luku a papira, na taki yu sa man taki na wan fasi di ala sma e frustan wantewante, èn a sa meki taki den arkiman sa de klariklari fu du san yu e taki. Na so wan fasi yu sa hori yu lezing nanga moro faya, èn a lezing sa hari den arkiman moro fu arki yu.

Te yu e taki sondro fu leisi dati fu wan papira, dan yu sa man luku den arkiman fu yu moro bun, èn dati baka sa meki taki yu sa man taki nanga den arkiman moro bun tu. Fu di yu no abi fu luku ala leisi tapu papira fu sabi san yu musu taki, dan den arkiman fu yu sa firi taki yu sabi a tori fu yu heri bun èn taki trutru yu e bribi den sani di yu e taki. Sobun, te yu e hori yu lezing na so wan fasi, dan yu sa man taki moro switi, èn yu sa man taki komoto fu yu ati fu doro na ati fu den arkiman fu yu.

Te yu e hori wan lezing sondro taki yu e luku yu papira ala leisi, dan dati e gi yu na okasi fu taki wan tu tra sani na ini yu lezing, noso fu no taki wan tu sani moro di yu ben sreka. A lezing fu yu no seti na so wan fasi taki yu no sa man kenki a tori pikinso te dati de fanowdu. Kon meki wi taki dati wan kefalek sani de na ini a nyunsu tapu a dei di yu o hori yu lezing, èn a sani disi abi fu du nanga a tori di yu o taki. We, a no ben o fiti dan fu sori go na a nyunsu disi? Noso kande te yu e taki, dan yu e si taki furu fu den arkiman fu yu na pikin di e go na skoro ete. Efu yu ben sa man kenki den agersitori fu yu so taki a kan yepi den skoropikin disi fu si fa a tori abi fu du nanga den libi, dan dati ben o moi srefisrefi!

Wan tra winimarki te yu e hori wan lezing sondro fu luku wan papira ala leisi, na taki dati e yepi yu gebroiki yu frustan moro bun. Te den arkiman fu yu e warderi san yu e taki èn te den e arki yu bun, dan yusrefi sa taki nanga moro faya èn yu sa tyari moro sani kon na fesi, noso yu sa teki yu ten fu taki wan tu sani baka so taki den no frigiti den. Efu yu e si taki den arkiman no e arki yu moro, dan yu kan bigin du sani fu lusu a problema disi, na presi fu yu taki go doro nanga sma di no e poti prakseri na san yu e taki.

Sani nanga san yu musu luku bun. Yu musu sabi taki te yu e hori wan lezing sondro fu luku tapu yu papira, dan wan tu sani de nanga san yu musu luku bun. Wán fu den sani de, taki makriki yu kan pasa a ten di yu kisi fu hori a lezing. Efu yu e taki tumusi furu tra sani te yu e hori yu lezing, dan yu kan kisi problema nanga a ten. Yu kan sorgu taki disi no e pasa nanga yu, fu di yu e skrifi na tapu a schema omeni ten yu sa gebroiki gi ibri pisi fu yu lezing. Baka dati yu musu hori yusrefi soifri na a ten di yu poti gi ibri pisi fu a lezing.

Wan tra sani nanga san wan takiman musu luku bun, spesrutu efu a de wan bun takiman, na taki a no musu de tumusi seiker fu ensrefi. Wan tu takiman di gwenti kaba fu hori lezing, kan feni taki a no muilek fu poti wan tu sani makandra gawgaw fu furu a ten di den abi fu taki. Ma wi musu abi sakafasi èn wi musu frustan taki wi abi wan prati na wan programa fu gi leri, pe Yehovah srefi na a Bigi Leriman. Disi musu gi wi deki-ati fu de seryusu, fu begi, èn fu sreka wisrefi bun bifo wi o hori wi lezing.​—Yes. 30:20; Rom. 12:6-8.

Furu takiman no gwenti fu hori lezing sondro fu luku tapu wan papira. Kande a moro bigi sani nanga san den e broko den ede, na taki den kan frigiti san den musu taki. No meki a sani disi hori yu na baka fu go na fesi fu tron wan moro bun takiman. Sreka yusrefi bun, èn luku go na Yehovah fu yepi yu nanga en yeye.​—Yoh. 14:26.

Tra takiman e broko den ede tumusi furu nanga den yoisti wortu di den musu taki, èn dati meki den e frede fu hori wan lezing sondro fu leisi langalanga fu wan papira. A tru taki te yu e hori wan lezing sondro fu leisi langalanga fu wan papira, dan kande yu no sa gebroiki den soifri wortu soleki fa dati de fu feni na ini wan manuscriptlezing. Kande yu no sa gebroiki wortu soifri leki fa yu musu skrifi dati na ini a tongo fu yu. Ma dati no abi trobi, solanga yu e taki nanga yu arkiman na wan switi fasi. Den arkiman sa wani du san wi e fruteri den te wi e gebroiki wortu di den man frustan wantewante èn te wi no e taki sani na wan tumusi muilek fasi. Efu yu e sreka yusrefi bun, dan yu sa taki sani neleki fa yu gwenti taki ibri dei. Disi yu sa du, no fu di yu leri ala wortu na ede, ma fu di yu ben teki yu ten fu prakseri bun fu den sani di yu wani taki. Efu ibri dei yu e taki bun, dan yu sa taki bun tu te yu de na tapu a podium.

Sortu sani yu musu skrifi. Te yu e tan pruberi, dan baka wan pisi ten yu sa man skrifi soso wan tu wortu nomo gi ibri pisi fu yu lezing. Yu kan skrifi den sani disi, makandra nanga wan tu bijbeltekst di yu wani gebroiki, na tapu wan karta noso wan pisi papira so taki yu kan si den wantewante te yu abi den fanowdu. Gi a preikiwroko, dan furu tron yu sa musu abi na ede san yu wani taki. Efu yu ondrosuku wan tori fu tyari wan gobaka, dan kande yu kan skrifi wan tu sani syatu na tapu wan pisi papira èn poti dati na ini yu Bijbel. Noso kande yu wani gebroiki wan tu sani di skrifi na ini a buku Redeneren aan de hand van de Schrift fu taki nanga wan sma.

Ma toku, efu yu abi prati tapu difrenti konmakandra na ini den wiki di e kon èn efu yu musu hori wan publiki taki tu, dan kande yu sa si taki yu musu skrifi moro sani. Fu san ede? So taki yu kan memre baka san yu wani taki na a prati dati, bifo yu hori a prati dati. Ma awinsi dati de so, toku efu ibri tron baka yu e luku san yu skrifi, dan yu sa lasi den winimarki di e kon te yu e hori wan lezing sondro fu leisi en langalanga fu wan papira. Efu yu skrifi furu sani, dan marki den wortu nanga den bijbeltekst di yu wani poti krakti na tapu, so taki a sa de makriki gi yu fu si den na tapu a schema.

Aladi wan bun takiman furu tron sa hori en lezing sondro fu leisi en langalanga fu wan papira, toku wan tu winimarki kan de te a e hori en lezing tra fasi tu. Na a bigin èn na a kaba fu a lezing, dan a takiman musu luku den arkiman bun èn a musu gebroiki krakti wortu te a e taki. Fu dati ede, kande a sa wani hori wan tu wortu na ede di a kan taki na a bigin èn na a kaba fu a lezing. Te a takiman musu kari tru tori, nomru, sani di trawan taki, noso bijbeltekst, dan a ben sa bun fu leisi dati, ma a musu du dati nanga krakti.

Te trawan wani sabi san wi e bribi. Sontron wi e kisi a kari fu fruteri san wi e bribi, sondro taki wi kisi na okasi fu sreka wisrefi. Disi kan pasa te wi miti wan sma na ini a preikiwroko, di no e agri nanga wan sani. Den srefi sani kan pasa te wi de nanga famiriman, na wi wrokope, noso na skoro. Lanti tiriman kan aksi wi sosrefi fu fruteri san na a bribi fu wi èn fu san ede wi e libi na so wan fasi. Den Buku fu Bijbel e gi wi a deki-ati: „De klariklari ala ten fu opo taki gi unsrefi na fesi ibriwan sma di e aksi unu fu san ede a howpu de na ini unu, ma du dati makandra nanga safrifasi èn nanga bigi lespeki.”​—1 Petr. 3:15.

Luku fa Petrus nanga Yohanes ben piki a Dyu Sanhedrin, soleki fa dati skrifi na Tori fu den Apostel 4:19, 20. Nanga wan tu wortu nomo, den ben taki krin fu san ede den no ben sa man du san a Sanhedrin ben aksi den. Den ben du dati na wan fasi di ben fiti den arkiman fu den, fu di den ben sori taki a tori di ben abi fu du nanga den leki apostel, ben abi fu du tu nanga a Dyu krutu. Bakaten, trawan ben taki falsi sani fu Stefanus, èn fu dati ede a ben musu kon na fesi a srefi krutu. Leisi san Stefanus ben piki den na Tori fu den Apostel 7:2-53, sondro taki a ben sreka ensrefi na fesi gi dati. Fa a ben seti den sani di a ben wani taki? A ben bigin fruteri san ben pasa na ini owruten. Baka dati a fruteri a tori soleki fa den ben pasa a wan baka a trawan. Na wan bun momenti, a bigin poti krakti tapu a fasi fa a pipel fu Israel ben opo densrefi teige Gado. Na a kaba a sori taki a Sanhedrin du a srefi sani dati, di den sorgu taki trawan kiri a Manpikin fu Gado.

Te yu e kisi a kari fu taki fu a bribi fu yu sondro taki yu kisi na okasi fu sreka yusrefi, dan san kan yepi yu fu taki bun? Du san Nehemia du; a ben begi safri bifo a piki wan aksi di Kownu Artakserkses ben poti gi en (Neh. 2:4). Baka dati, dan yu musu denki gawgaw san na den prenspari sani di yu wani taki. Yu kan seti den moro prenspari sani di yu wani taki, na a fasi disi: (1) Teki wán noso tu sani di yu wani taki fu a tori dati (yu kan teki den tori fu a buku Redeneren aan de hand van de Schrift). (2) Luku sortu bijbeltekst yu sa gebroiki fu horibaka gi den sani disi. (3) Prakseri fa yu sa bigin, ma hori na prakseri fa a sma e firi di poti na aksi gi yu, so taki a sa wani arki san yu abi fu taki. Te yu seti ala den sani disi, dan yu kan bigin taki.

Te yu de na ini problema, dan yu sa man sabi ete san yu musu du? Yesus ben taigi den bakaman fu en: „Unu no musu broko un ede nanga fa unu o taki noso san unu o taki, bika na a ten dati unu o sabi san unu musu taki; bika a no unu wawan e taki, ma unu e taki nanga yepi fu a yeye fu un Tata” (Mat. 10:19, 20). Disi no wani taki dati na wan wondru fasi yu sa kisi „wortu fu koni” soleki fa den fosi yarihondro Kresten ben kisi dati (1 Kor. 12:8). Ma efu dorodoro yu e teki a leri di Yehovah e gi den futuboi fu en na den Kresten konmakandra, dan a santa yeye sa yepi yu memre san yu musu taki te dati de fanowdu.​—Yes. 50:4.

Sondro tweifri a sa abi furu bun bakapisi te yu e hori wan lezing sondro fu leisi en langalanga fu wan papira. Pruberi fu du dati ibri tron te yu abi wan prati na ini a gemeente. Te yu e du dati, dan a no sa de muilek gi yu efu yu musu gi trawan wan piki sondro taki yu kisi na okasi fu sreka yusrefi, fu di na den srefi sani yu musu du te yu musu hori wan lezing. No hori yusrefi na baka fu taki sondro fu leisi langalanga fu wan papira. Te yu leri fu taki so, dan dati sa yepi yu fu du yu preikiwroko moro bun. Èn efu yu abi a grani fu hori lezing gi a gemeente, dan yu sa man sorgu taki den arkiman tan arki yu, èn yu sa doro na ati fu den sosrefi.