Fa fu gebroiki wan schema

FURU sma e senwe pikinso te den e denki taki den musu gebroiki wan schema fu hori wan lezing. Den e firi moro bun te ala sani di den wani taki, skrifi na tapu papira, noso te den man hori ala sani na ede.

Ma toku, te yu luku en bun, dan ibri dei wi alamala e taki sondro fu skrifi ala sani na tapu papira. Na so wi e taki te wi e taki nanga wi famiri èn nanga wi mati. Wi e taki so tu te wi abi wan prati na ini a preikiwroko. Èn sosrefi wi e taki so te wi e begi nanga wi heri ati, awansi wi e begi wi wawan, noso gi wan grupu fu sma.

Te yu e hori wan lezing, dan yu denki taki a de prenspari fu leisi ala sani soleki fa yu skrifi dati, noso a de moro prenspari fu gebroiki wan schema? Te yu e leisi ala sani fu wan papira pe a lezing skrifi, dan dati kan yepi yu fu taki sani soifri èn fu gebroiki den yoisti wortu. Toku efu yu e du dati, dan yu no sa man doro na ati fu trawan so bun. Te yu musu leisi furu sani, dan furu tron yu sa taki tra fasi leki fa yu gwenti taki. Yu kan poti moro prakseri na san yu skrifi èn no na yu arkiman. Ma efu na dati yu ben o du, dan furu fu yu arkiman no sa arki yu so bun moro leki fa den ben o arki yu te den e firi taki yu abi den na prakseri, èn yu e gebroiki a tori so taki a fiti gi den. Efu trutru yu wani gi sma deki-ati nanga yu lezing, dan yu no musu leisi en langalanga fu wan papira.

A Theokrasia Diniwroko-skoro seti fu yepi wi na ini na aladei libi. Te wi e miti den mati fu wi, dan wi no e teki wan pisi papira fu leisi den sani di wi wani taigi den, soso fu di wi wani de seiker taki wi e gebroiki den yoisti wortu. Na ini a preikiwroko, wi no e tyari wan papira nanga wi pe ala sani skrifi fu leisi gi den sma, soso fu di wi frede taki wi kan frigiti wan tu sani di wi wani taigi den. Te yu musu hori wan demonstrâsi tapu a skoro pe yu wani sori fa fu gi kotoigi na ini den sortu situwâsi dati, dan pruberi fu taki leki fa yu gwenti taki ala dei. Te yu e sreka yusrefi bun, dan yu sa si taki a nofo fu abi wan schema fu memre yu na den moro prenspari sani di yu wani taki. Yu kan abi a schema disi na prakseri noso a kan de tapu papira tu. Ma fa yu kan de seiker taki yu sa man wroko nanga wan schema trutru?

Sabi soifri san yu wani taki. Efu yu wani gebroiki wan schema te yu e taki, dan yu musu sabi soifri san yu wani taki. Disi no wani taki dati yu musu sabi ala den wortu di yu wani taki. Ma a wani taki nomo taki yu e denki bun bifo yu e taki wan sani.

Na ini na aladei libi, wan sma kan taki sani sondro fu denki fosi, ma bakaten a kan winsi taki a no ben taki den sani dati. Wan tra sma kan taki neleki a no sabi san a e taki, fu di a e dyompo fu a wan tori go na a trawan. Efu wan sma abi iniwan fu den tu problema disi, dan a kan lusu den fu di a e wakti wan momenti bifo a e taki wan sani, so taki a kan prakseri san a wani taki trutru. Na a fosi presi, sabi soifri san yu wani doro, baka dati luku san yu musu taki fu man doro a sani dati, èn dan yu musu bigin taki.

Yu e sreka yusrefi fo go na ini a preikiwroko? Teki yu ten fu sreka yu tas, ma sabi sosrefi san yu wani taki. Efu yu teki a bosroiti fu pristeri wan sani soleki fa a skrifi na ini Wi Kownukondre diniwroko, dan leisi en furu tron so taki yu frustan krinkrin san na den moro prenspari penti. Taki syatu san na den moro prenspari penti sondro fu gebroiki furu wortu. Taki a sani nanga yu eigi wortu èn fiti en na den sma di yu sa miti na ini yu kontren. Yu sa si taki a bun fu prakseri fosi fu den sani di yu wani taki. San yu sa musu du kande? (1) Te yu o bigin taki nanga wan sma, dan yu kan kari wan sani di furu sma e broko den ede nanga dati na a presi pe yu e libi. Gi a tra sma a kari fu ensrefi taki san a e denki. (2) Abi wan spesrutu sani na prakseri di yu kan taki fu a problema dati, èn prakseri sosrefi fu wán noso tu bijbeltekst di e sori san Gado pramisi fu du fu puru ala hebi gi sma. Efu yu e kisi na okasi, dan sori taki Yehovah sa du disi nanga yepi fu en Kownukondre, a hemel tiri fu en. (3) Gi a sma a deki-ati fu du wan sani nanga den sani di yu taigi en. Kande yu kan pristeri en wan tu buku noso wan bijbelstudie, noso du ala tu sani, èn meki mofo nanga a sma fu go doro nanga a takimakandra na wan tra ten.

A wan-enkri schema di kande trutru sa yepi yu fu pristeri a bun nyunsu na so wan fasi, na sani di yu abi na ede fu taki. Efu yu wani luku wan schema bifo yu taki nanga a fosi sma na ini a preikiwroko, dan kande yu kan skrifi wan tu wortu nomo na tapu a schema fu sori yu san yu kan taki na a bigin fu a takimakandra. A schema kan abi sosrefi wán noso tu bijbeltekst, èn sosrefi yu kan skrifi syatu san yu wani taki na a kaba fu a takimakandra. Te wi e sreka wisrefi bun tapu so wan schema èn te wi e gebroiki en tu, dan wi no sa dyompo fu a wan tori go na a tra tori, èn dati sa yepi wi fu libi wan krin boskopu na baka di a sma no sa frigiti so esi.

Efu sma na ini yu kontren e poti a srefi aksi furu tron, noso efu den e taki a srefi sani ibri tron baka bika den no wani arki yu, dan kande a sa bun fu ondrosuku a tori dati moro fara. Furu tron a wan-enkri sani di yu abi fanowdu na tu noso dri bun penti makandra nanga bijbeltekst di sa yepi yu fu piki a sma. Den ondro-edeprakseri di skrifi nanga fatu letter na ini a buku Redeneren aan de hand van de Schrift, kan yepi yu fu meki wan bun schema. Kande yu feni wan tra bun sani di skrifi na ini wan tra buku. Meki wan syatu schema, èn skrifi den sani di yu feni na ini a tra buku. Poti a schema èn den sani di yu skrifi abra fu a tra buku, makandra nanga den sani di yu e gebroiki na ini a preikiwroko. Te wan ososma e poti na aksi noso e kari a sani fu san ede a no wani arki yu, dan taigi en taki yu wani teki na okasi fu sori en san yu e bribi (1 Petr. 3:15). Gebroiki a schema fu yepi yu fu piki a sma.

Te yu sa begi gi yu osofamiri, gi wan bukustudie grupu, noso gi a gemeente, dan a bun fu prakseri fosi, so taki yu sabi san yu o taki. Soleki fa a skrifi na Lukas 11:2-4, dan Yesus sori den disipel fu en san na wan tu sani fu man taki wan bun begi. Na a inwijding fu a tempel na Yerusalem, Salomo ben begi wan langa begi. A de krin taki a ben denki na fesi fu san a ben o begi. A ben poti prakseri fosi na Yehovah èn na a sani di A pramisi David. Baka dati Salomo ben poti prakseri na a tempel; èn dan, wan-fru-wan, a ben poti prakseri na spesrutu sani nanga grupu fu sma (1 Kow. 8:22-53). Wi kan kisi winimarki fu den eksempre disi.

No meki wan muilek schema fu hori yu lezing. Yu musu meki wan schema fu hori wan lezing? Efu dati de so, dan omeni sani yu musu skrifi na ini a schema?

No frigiti taki yu e meki wan schema fu yepi yu memre den sani di yu abi na prakseri fu taki. Kande yu sa feni taki a de wan yepi gi yu fu skrifi wan tu sani di yu sa gebroiki fu bigin nanga yu lezing. Ma baka dati, poti prakseri na den tori di yu wani taki, èn no poti prakseri soso na wortu. Efu yu e skrifi den sani dati na tapu papira, dan skrifi den syatu. Den moro prenspari sani di yu wani tyari kon na krin na ini yu lezing, no musu de furu èn den musu de krin fu si tapu yu schema. Disi yu kan du fu di yu e skrifi den nanga bigi letter, fu di yu e poti wan strepi na ondro den, noso fu di yu e kloru den. Na ondro ibriwan fu den moro prenspari penti disi, dan skrifi den sani di yu wani gebroiki te yu e tyari den prenspari penti kon na krin. Skrifi den bijbeltekst di yu wani gebroiki. Furu tron a moro bun fu leisi den tekst komoto fu a Bijbel te yu e hori a lezing. Skrifi den agersitori di yu wani gebroiki. Kande yu kan skrifi wan sani di wan grontapu sma taki, èn di yu wani gebroiki fu di a fiti gi a tori fu yu. Skrifi nofo sani so taki yu sa abi nofo buweisi fu tyari kon na fesi. A sa moro makriki fu gebroiki a schema te a seti bun.

Wan tu sma e gebroiki schema di abi soso den sani di den abi fanowdu fu a hori a lezing fu den. Wan schema kan abi wan tu prenspari wortu noso wan tu bijbeltekst, so taki a takiman sa memre wantewante san a musu taki. Sosrefi a schema kan abi wan prenki di sa yepi a takiman memre den sani di a wani taki. Nanga den syatu sani disi di a takiman skrifi, a sa man pristeri a boskopu fu en na wan fasi di no bruya, èn a sa man taki nanga den sma leki fa a gwenti taki ibri dei. Disi na a marki di wi wani doro nanga a les disi.

Na tapu bladzijde 39 teleki 42 fu a buku disi, yu sa feni a les „Meki wan schema”. A ben sa bun fu leisi a les dati te yu e wroko na a les disi di abi leki nen „Fa fu gebroiki wan schema”.

Fa fu gebroiki a schema. A sani di yu wani doro now, a no soso fu sreka wan schema gi a lezing fu yu. Ma yu wani gebroiki a schema heri bun.

Yu kan bigin gebroiki yu schema, te yu e sreka yusrefi fu hori yu lezing. Luku a nen fu a lezing, leisi ibriwan fu den moro prenspari penti, èn taki san den prenspari penti disi abi fu du nanga a nen fu yu lezing. Skrifi omeni ten sa de fanowdu fu taki fu ibriwan fu den prenspari penti disi. Now yu kan go baka èn luku a fosi prenspari penti. Luku den buweisi, den bijbeltekst, den agersitori, nanga den eksempre di yu wani gebroiki fu tyari a fosi prenspari penti kon na krin. Luku a pisi dati moro leki wán tron, teleki yu sabi en heri bun. Du a srefi sani disi tu nanga den tra prenspari penti fu yu lezing. Luku sortu sani yu kan libi, efu dati de fanowdu, so taki yu kan kaba na a ten di yu kisi. Baka dati, dan luku a heri lezing baka. Poti prakseri na den tori di yu wani taki, no poti prakseri na den wortu. No leri a lezing fu yu na ede.

Te yu e hori yu lezing, dan yu musu man luku den arkiman fu yu bun tu. Baka te yu leisi wan bijbeltekst, dan yu musu man gebroiki yu Bijbel fu taki-go-taki-kon fu a tekst, sondro fu yu go luku baka san yu ben skrifi tapu papira. Na so a de tu te yu e gebroiki wan agersitori. Fruteri en neleki te yu ben o fruteri den mati fu yu, na presi fu leisi en komoto fu wan pisi papira. Te yu e taki, dan no luku ibri tron baka san yu skrifi fu si fa yu musu go doro. Ma taki komoto fu yu ati, èn yu sa doro na ati fu den wan di e arki yu.

Te yu sabi fa fu gebroiki wan schema bun, dan yu du wan kefalek prenspari sani di sa yepi yu fu tron wan bun takiman.