Sreka yusrefi fu hori lezing gi a gemeente
A PROGRAMA fu a Theokrasia Diniwroko-skoro meki na so wan fasi taki ala sma na ini a gemeente kan nyan bun fu dati. Sosrefi tapu tra gemeente konmakandra èn na tapu den bigi konmakandra, wi e kisi kefalek bun sani fu yere. Efu yu musu teki prati na wan fu den konmakandra disi, dan yu kisi wan bigi frantwortu. Na apostel Paulus ben gi a Kresten opziener Timoteyus tranga fu poti prakseri dorodoro na a fasi fa en ben e gi leri (1 Tim. 4:16). Den sma di e kon na den Kresten konmakandra, teki den ten fu kon drape, èn wan tu fu den musu meki bun furu muiti srefi fu doro drape. Disi den e du fu di den wani kon sabi fa den kan tron mati fu Gado. Fu tru, a de wan kefalek bigi grani fu de wan fu den sma di e gi a sortu leri disi. Fa yu kan du a grani disi soifri leki fa a musu du?
Edepenti fu a leisipisi fu Bijbel
A pisi disi fu a skoro komoto fu a Bijbel leisipisi di musu leisi a wiki dati. Yu musu sori fa a Bijbel leisipisi gi a wiki dati, abi krakti tapu wi na ini a ten disi. Soleki fa a skrifi na Nehemia 8:8, dan Esra nanga den mati fu en ben leisi Gado Wortu na fesi ala sma, èn den ben tyari kon na krin san den ben leisi. Na so ’den ben sori sma san a Wortu wani taki’, èn den ben meki den arkiman frustan Gado Wortu. Te yu musu du den edepenti fu Bijbel, dan dati e gi yu na okasi fu du a srefi sani tu.
Fa yu musu sreka yusrefi gi so wan lezing? Efu a kan, dan leisi a pisi fu Bijbel di yu kisi, wán wiki noso wan moro langa pisi ten bifo yu musu hori en tapu a skoro. Baka dati, go sidon prakseri fu yu gemeente, èn san a abi fanowdu. Begi fu a sani dati. Baka di yu si san yu gemeente abi fanowdu, dan luku efu yu kan feni den sani disi ini a Bijbel leisipisi: Sortu rai yu kan gi? Sortu eksempre yu kan fruteri? Sortu gronprakseri yu kan kari?
A de prenspari fu ondrosuku sani. Yu abi a Watchtower Library tapu CD-ROM, na Index van Wachttoren-publikaties, noso na index di de na ini A Waktitoren na a kaba fu a yari? Yu abi den na ini wan tongo di yu kan frustan? Efu dati de so, dan gebroiki den bun. Te yu e ondrosuku den sani di tyari kon na doro fu luku san den e taki fu den vers di yu wani gebroiki, dan yu kan feni kefalek bun sani. Na ondrosuku di yu e du, kan meki taki yu kon sabi fa a situwâsi ben de na a ten dati, fa profeititori kon tru, san wan tu spesrutu tekst e taki fu Yehovah, noso yu kan si fa den e fruteri san wan tu gronprakseri wani taki. No taki tumusi furu sani. Poti prakseri na wan tu tekst nomo. A moro bun fu taki fu wan tu tekst nomo èn fu du dati bun.
A kan taki yu sa abi fu aksi den arkiman fu fruteri sortu winimarki den kisi fu a Bijbel leisipisi fu a wiki dati. Sortu sani den ben feni, di sa meki taki densrefi kan studeri moro bun, noso di sa yepi den fu studeri moro bun leki osofamiri? Noso san den ben feni di sa meki den du den diniwroko moro bun, noso di sa meki den libi moro bun? Sortu sani fu Yehovah den si krin, di den leisi fa a ben du nanga libisma èn fa a ben handri nanga tra kondre? San den arkiman leri fu meki den bribi kon moro tranga èn fu meki den kisi moro warderi gi Yehovah? No go taki fu sani di sma no e frustan. Teki wan tu vers, èn poti krakti na tapu san den vers wani taki èn sori fa wi kan gebroiki den.
Na instruktielezing
A lezing disi komoto fu wan artikel fu A Waktitoren, noso kande srefi fu wan pisi fu wan buku. Furu tron a pisi disi langa nofo fu hori a lezing na ini a ten di yu kisi fu du dati. Fa yu musu hori so wan lezing? Yu musu de leki wan leriman, yu no musu de leki wan sma di e taki nomo san a ben leisi. Wan owruman musu „abi a koni fu man gi leri”.—1 Tim. 3:2.
Te yu bigin sreka yusrefi, dan bigin fu studeri a sani di yu kisi. Luku den bijbeltekst di kari drape. Prakseri dipi. Meki muiti fu du ala den sani disi langa na fesi, fosi a dei di yu musu hori a lezing. Memre taki den brada nanga sisa e kisi a deki-ati fu leisi a tori di yu kisi fu meki yu lezing, èn disi den musu leisi fosi den o arki yu lezing. A lezing fu yu a no soso fu luku baka san den brada nanga sisa ben leisi, noso fu fruteri a tori moro syatu leki fa a skrifi, ma yu musu sori den arkiman fa den kan gebroiki den sani di den leisi. Gebroiki wan tu fu den sani di yu kisi fu meki yu lezing, èn gebroiki den bun so taki a gemeente kan nyan bun fu dati.
Leki fa ibri pikin abi en eigi fasi fa a de, na so ibri gemeente abi en eigi fasi fa a de. Wan papa noso wan mama di wani gi en pikin bun leri, no e kari wan tu bun gwenti nomo gi a pikin. Na presi fu dati, a papa noso a mama e taki-go-taki-kon nanga a pikin. A papa noso a mama e hori na prakseri fa en pikin de, èn den problema di a pikin abi. Na a srefi fasi den brada di e gi leri na ini a gemeente, e meki muiti fu frustan san a gemeente abi fanowdu èn den e pruberi fu yepi a gemeente tu nanga san den e taki. Toku, wan bun leriman no sa gebroiki eksempre di kan hati wan fu den arkiman. Na presi fu dati, a sa sori go na den winimarki di wan sma e kisi nownow kaba fu di a sma dati e waka den pasi fu Yehovah. Wan bun leriman sa poti krakti tu tapu rai di komoto fu Bijbel di sa yepi den sma na ini a gemeente fu lusu den problema di den abi.
Te wan sma e gi bun leri, dan a e doro na ati fu den arkiman. Fu man du disi, dan a leriman no musu fruteri tru tori nomo, ma a musu meki taki trawan kon warderi den tru tori disi tu. Disi wani taki dati a leriman musu broko en ede trutru nanga den sma di a e gi leri. Skapuman na yeye fasi musu sabi den skapu fu den. Efu na wan lobi-ati fasi den e hori na prakseri sortu problema den difrenti sma abi, dan den sa man gi den sma disi deki-ati. Den sa man sori tu taki den e frustan den wan disi, taki den abi sari-ati gi den, èn taki den e firi san den wan disi e firi.
Bun leriman sabi taki wan lezing di den e hori musu sori krin san den wani doro. A lezing musu hori na so wan fasi taki a de krin san na den moro prenspari penti èn trawan musu man memre den tu. Den arkiman sa musu man memre sani di den kan gebroiki bun na ini den libi.
A Diniwroko Konmakandra
Te yu e hori wan lezing di komoto fu wan fu den artikel na ini Wi Kownukondre diniwroko, dan dati kan de pikinso tra fasi leki san wi taki teleki now. Yu sa si taki dyaso furu tron yu sa abi fu du soifri san skrifi na ini Wi Kownukondre diniwroko te yu sa gi den arkiman leri, èn yu no sa man teki san yusrefi feni taki dati e fiti. Yepi den arkiman fu prakseri bun fu den tekst di kari drape fu gi rai (Tit. 1:9). Yu no abi furu ten, èn furu tron yu no e kisi na okasi fu taki fu tra sani tu.
Na a tra sei, a kan pasa tu taki yu sa musu taki fu wan tori di no de fu feni na ini Wi Kownukondre diniwroko. Kande yu musu gebroiki wan Waktitoren artikel, noso a kan taki a pisi ini Wi Kownukondre diniwroko e fruteri yu syatu san yu musu du. A de na yu leki leriman fu luku san a gemeente abi fanowdu èn san yu kan du fu yepi den nanga a lezing di yu o hori. Kande yu kan fruteri wan syatu agersitori di e sori soifri san na a tori di yu wani meki den arkiman kon sabi, noso kande yu kan fruteri wan ondrofenitori di fiti. Memre taki yu no musu taki wawan fu a tori, ma yu musu taki na so wan fasi dati yu e yepi a gemeente du a wroko di skrifi na ini a Wortu fu Gado. Taki na so wan fasi tu fu yepi den feni prisiri na ini a wroko dati.—Tori. 20:20, 21.
Te yu e sreka yusrefi gi a lezing fu yu, dan prakseri fa a situwâsi de fu den sma na ini a gemeente. Prèise den gi san den e du kaba. Fa a gebroiki di den e gebroiki a rai di yu e gi den na ini a lezing fu yu, kan yepi den fu du den diniwroko moro bun èn fu kisi moro prisiri na ini a preikiwroko?
Den brada aksi yu fu hori wan interview noso wan demonstrâsi? Efu dati de so, dan yu musu sreka dati moi na fesi kaba. A kan luku moro makriki fu aksi wan tra sma fu seti den sani disi gi yu, ma a no ala tron dati na a moro bun sani fu du. Efu a kan, dan luku a demonstrâsi noso na interview bifo a dei di a musu hori tapu a konmakandra. De seiker taki a demonstrâsi noso na interview hori na so wan fasi, taki a e yepi den arkiman frustan krin san yu musu fruteri den.
Spesrutu Dei Konmakandra, Kring Konmakandra nanga Kongres
Te brada e kweki moi Kresten maniri èn den e tron bun takiman nanga leriman, dan den kan aksi den brada disi fu hori wan lezing tapu wan Spesrutu Dei Konmakandra, wan Kring Konmakandra noso wan Kongres. Disi na trutru bun okasi pe den kan gi leri na a fasi fa Gado wani. Te den e aksi wan brada fu hori so wan lezing, dan dati kan de wan manuscriptlezing, wan schema lezing, noso a pisi di a musu leisi, fosi a Bijbel drama e bigin. Noso a kan de a pikin pisi papira pe den e taigi en fa a musu hori wan lezing na tapu wan Spesrutu Dei Konmakandra. Efu yu abi a grani fu teki prati na so wan programa, dan sreka yusrefi bun. Du disi teleki yu feni taki a sani di yu musu sreka, bun nofo fu hori.
Den wan di musu hori wan manuscriptlezing, musu leisi ala den wortu fu a lezing èn den musu leisi ibri wortu tu. Den no e poti tra wortu, noso taki sani tra fasi leki fa a skrifi drape. Den e studeri a lezing dati so taki den man si krin san na den moro prenspari penti èn fa den penti disi e tyari kon na krin. Den e leisi nanga wan tranga sten èn den e go doro nanga dati teleki den kan hori a lezing disi na so wan fasi taki den kan poti krakti tapu den yoisti wortu, den kan hori en nanga faya, èn den kan hori en na wan switi fasi. Den wani hori a lezing sosrefi nanga firi, na wan seryusu fasi, nanga overtoigi, èn sosrefi nanga wan krakti sten so taki furu arkiman kan yere den.
Den brada di musu hori wan schema lezing, musu sorgu taki den e hori a lezing fu den na so wan fasi taki den e hori densrefi soifri na san skrifi tapu a schema. Te a takiman e hori a lezing, dan a no musu leisi fu a schema noso sreka ensrefi fu hori a lezing leki wan manuscriptlezing. Na presi fu dati a takiman musu man taki fri sondro fu luku tapu papira doronomo, èn a musu taki komoto fu en ati. A de prenspari fu hori yusrefi na a ten di gi tapu a schema, so taki yu sa man tyari ibriwan fu den moro prenspari penti kon krin na fesi. A takiman musu meki bun gebroiki fu den sani di skrifi na ondro den moro prenspari penti, èn a musu meki bun gebroiki fu den bijbeltekst drape. A no musu tyari sani kon na fesi di no skrifi na ini a schema ma di ensrefi lobi. Bika efu a ben o du dati, èn efu a no ben o man taki fu ala sani di skrifi na ini a schema, dan na fu espresi a no ben o taki san a musu taki soleki fa a skrifi na ini a schema. A no de fu taki dati a fondamenti fu a leri di a brada e gi, e komoto fu Gado Wortu. A sani di den Kresten owruman musu du, na fu „preiki a wortu” (2 Tim. 4:1, 2). Sobun, wan takiman sa musu poti spesrutu prakseri na den bijbeltekst di skrifi tapu a schema, a sa musu taki-go-taki-kon fu den èn sori fa fu gebroiki den tekst disi.
No wakti, no draidrai
Yu e dini na ini wan gemeente pe yu abi furu okasi fu hori wan lezing? Fa yu kan poti nofo prakseri na ala den lezing disi? No sreka yusrefi na a lasti momenti.
Efu yu wani hori lezing di e gi a gemeente winimarki, dan yu musu prakseri bun na fesi san yu o taki. Fu dati ede, teki a gwenti fu leisi a tori di yu musu taki fu en, wantewante baka te yu kisi en. Disi sa gi yu na okasi fu prakseri fu en te yu e du tra sani. Dan na ini den dei noso den wiki bifo yu hori yu lezing, yu kan yere sani di kan yepi yu si fa fu gebroiki den sani di yu kisi fu meki yu lezing, moro bun. Sani kan pasa di e sori yu taki a tori trutru e kon na a yoisti ten. A sa teki ten fu yu fu leisi èn fu denki fu a lezing wantewante baka te yu kisi en. Ma a ten di yu e gebroiki fu du dati, a no lasi ten. Te fu kaba, te yu e sidon fu meki yu lezing, dan yu sa si taki a ben de kefalek bun taki yu denki fu en bun langa na fesi kaba. Efu yu e meki den lezing fu yu na so wan fasi, dan yu no sa firi moro taki na wan hebi gi yu. A sa yepi yu tu fu hori yu lezing na so wan fasi, taki yu sa fruteri sani di a gemeente kan gebroiki, èn yu sa doro na ati fu den sma ini a gemeente.
Efu yu e warderi a presenti di yu kisi fu Yehovah, di abi fu du nanga a programa di A seti fu gi en pipel leri, dan dati sa meki taki yu sa gi grani na en èn yu sa de wan blesi gi den wan di lobi en.—Yes. 54:13; Rom. 12:6-8.